ဗိုလ်ချုပ်အောင်ဆန်း၏အားကျဖွယ်၊ထူးခြားချက်များ
7
7/20/2009 | Posted in ဗိုလ်ချုပ်အောင်ဆန်း
ကျနော့်ဆီမှာ ရန်ကုန်အရေးပိုင်ဟောင်း မောရစ်ကောလစ် ရေးသားပြုစုခဲ့တဲ့ last & first in burma ကို ဦးခင်မောင်ကြီးက ဘာသာပြန်ဆိုရေးသားထားတဲ့ အင်္ဂလိပ်၊မြန်မာ နောက်ဆုံး တိုက်ပွဲ ထဲက (ထိုအချိန်က တန်ခိုးအကြီးထွားဆုံး ဖြစ်တဲ့ အင်္ဂလိပ်လူမျိုးတွေကိုယ်တိုင် လေးစားချီးကြူးခဲ့တဲ့) ဗိုလ်ချုပ်အောင်ဆန်း၏ လေးစားဖွယ်ရာ၊ အားကျအတုယူဖွယ်ရာ၊ အံ့သြဖွယ်ရာ အမူအရာ၊ ပြောဆိုဆက်ဆံ ပုံများကို ကောက်နှုတ်ဖော်ပြသွားပါမယ်။ ထိုခေတ် အရေးအသားများနှင့်သာ ရေးသွားပါ့မယ်။ ပြီးတော့ စာတွေကို အရမ်းရှည်နေမှာ စိုးလို့ အနည်းအကျဉ်း ဖြတ်တောက် ထားတဲ့ အတွက် စာတကြောင်းနဲ့ တကြောင်း အဆက်အဆပ် ရှိချင်မှ ရှိပါလိမ့်မယ်။ ဒါကလဲ ဗိုလ်ချုပ် အကြောင်းပဲ အသားပေး ထားတဲ့ အတွက် ဒီလိုဖြစ်နေတာကို နားလည်ကြပါ ခင်ဗျား..........................။

အောင်ဆန်းသည် မိမိ၏တပ်မတော်ကြီးကိုဂျပန်တပ်မတော်နှင့်အတူ စစ်မျက်နှာသို့တက်၍ ဗြိတိသျှတို့အားတိုက်ခိုက်လိုပါသည်ဟု အယုံသွင်းနိုင်ခဲ့လေသည်။

၁၉၄၅၊မတ်လ ၂၇ရက်နေ့တွင်ကား ဗမာတပ်များသည်၊ ဂျပန်တပ်များကို စတင်တိုက်ခိုက်လေတော့သည်။ ပုန်ကန်မှုစလျှင်၊ စခြင်း ဂျပန်တပ်သားနှင့် စစ်ဗိုလ်ပေါင်း ၇၀၀ကျော်ကို သတ်ဖြတ် သုတ်သင်ခဲ့ခါ ထိုစာရင်းတွင် ဗိုလ်ချုပ် ၂ ယောက်ပါ၊ ပါဝင်လေသည်။

မေလ ၂ ရက်နေ့တွင်ဗြိတိသျှများသည် ရန်ကုန်ကို ပြန်လည်သိမ်းပိုက်လိုက်ကြတော့သည်။
ဗိုလ်ချုပ်စလင်း သည် အောင်ဆန်းနှင့် ကိုယ်တိုင်တွေ့ဆုံလျက် နားလည်မှုယူလိုက်ရကား၊ မိမိ၏ဌာနချုပ်သို့လာလည်ပါရန်၊ ဖိတ်ကြားလိုက်လေသည်။ သူတို့နှစ်ယောက်၏ တွေ့ဆုံဆွေးနွေးချက်မှာ တော်တော် ထူးခြားခဲ့ရတော့သည်။ အောင်ဆန်းသည် သူ၏အကျင့်အတိုင်းပင် တုံးတိတိနှင့် မိမိမှာ ဗမာပြည်ယာယီအစိုးရ၏ ကိုယ်စားလှယ်ဖြစ်ပြီး ထိုအစိုးရ အဖွဲ့၏ စစ်ဝန်ကြီးဖြစ်ကြောင်း ပြောလေတော့သည်။ ထိုသတင်းကို ဗိုလ်ချုပ်စလင်းမှာ ဘယ်လိုမှ မကြားထားရာ ဗမာသည် ယာယီအစိုးရ ရှိသည်ဆိုခြင်းကို မယုံကြည်နိုင်ပဲ ဖြစ်နေလေတော့သည်။ အောင်ဆန်းက သူ့အား သက်သက်ဖြန်းခြင်း ဖြစ်သည်ဟု စလင်းက ယူဆလိုက်လေသည်။ အောင်ဆန်းကမူ တ္ကနြေ္ဒမပျက်ဘဲ ခပ်တည်တည်နှင့်ပင် မိမိသည် ဖ-ဆ-ပ-လ အဖွဲ့ကြီး၏ သံတမန် အဖြစ်နှင့် လာခြင်းဖြစ်ကြောင်း ဖ-ဆ-ပ-လ အဖွဲ့ကြီးကပင်လျှင် ဗြိတိသျှတို့နှင့် ဂျပန်များအား မောင်းထုတ်ရေး၌ မာဟာမိတ်ဖွဲ့ရန် ဆုံးဖြတ်ခဲ့ခြင်းဖြစ်ကာ ဗမာပြည်မှ ဂျပန်များကို အောင်မြင်စွာ မောင်းထုတ်ပြီးသည်အထိလည်း ဆက်လက်၍ မဟာမိတ်ဖွဲ့မည် ဖြစ်ကြောင်၊ နောင်တွင်တော့ ဖ-ဆ-ပ-လအဖွဲ့ကြီး၏ ရည်ရွယ်ချက်မှာ လွတ်လပ်သော အမျိုးသား အစိုးရကို တည်ထောင် ဖွဲ့စည်းဖို့ပင် ဖြစ်ကြောင်း စသည်ဖြင့် ဆက်လက်ရှင်းပြလိုက်ပြန်သည်။ အကယ်စင်စစ် အောင်ဆန်းကား သူတို့၏ ရည်ရွယ်ချက်ကို အတိအလင်း ဖွင့်ဟ အသိပေးလိုက်ခြင်းပင် ဖြစ်တော့သည်။ သူသည် ဗြိတိသျှတို့၏ ရည်ရွယ်ချက်ကို တောင်းဆိုနေခြင်းမဟုတ်ပဲ ဖ-ဆ-ပ-လ အဖွဲ့ကြီး၏ ရည်ရွယ်ချက်ကိုသာ ပြောဆိုနေခြင်းဖြစ်လေသည်။

စလင်းသည် အောင်ဆန်း၏ တောင်းဆိုချက်များကို ရှောင်ရှားကာ စစ်ဘက်အုပ်ချုပ်ရေး ရှိနေသမျှ ကာလပတ်လုံး မည်သည့် ပြည်သူ့ အုပ်ချုပ်ရေးမျိုးမှ ရှိနိုင်မည် မဟုတ် ဟုပြန်လည်ဖြေကြားလိုက်သည်။ စစ်ဘက်အုပ်ချုပ်ရေးသည် ဂျပန် လက်နက်ချသည်အထိ ရှိနေမည် ဖြစ်ရာ ထိုအတောအတွင်း အောင်ဆန်းသည် ၄င်း၏တပ်မတော်ကို ဗြိတိသျှ တပ်မတော် အတွင်း သွတ်သွင်း ပူးပေါင်းစေလိုကြောင်း စလင်းကပြောကြားခဲ့လေသည်။ ထိုအခါ အောင်ဆန်းကလည်း မဟာမိတ် အနေဖြင့် မိမိ၏တပ်များကို မဟာမိတ် ဗိုလ်ချုပ် လက်အောက်တွင် ထားရှိမည်ဖြစ်ကြောင်း၊ သို့ရာတွင် ဗမာပြည်ယာယီ အစိုးရ၏ သစ္စာတော်မှ တပါး၊ မိမိသည် အခြားမည်သူ၏ သစ္စာကို ခံယူမည်မဟုတ်ကြောင်း ပြန်လည်ဖြေကြားခဲ့လေသည်။ ထိုအံ့သြဘွယ် သတင်းကို စလင်းသည် မောင့်ဘက်တင် ထံသို့ပို့လိုက်သည်။

ကျွန်ုပ်တို့သည် အောင်ဆန်း၏ ရည်မှန်းချက်များကို ဖေါက်ထွင်း ကြည့်ရူကြပါစို့။ အောင်ဆန်းသည် ဘယ်လိုမှ ပရိယာယ် မာယာမလုပ်ခဲ့ဘဲ၊ မိမိသုံးသပ်နားလည်ထားသော မိမိ၏အခြေအနေကို ပွင့်လင်းစွာ ကျေညာလိုက်ခြင်းဖြစ်လေသည်။
၁၉၄၅၊မေလ ၁၇ရက်နေ့တွင်ကား စက္ကူဖြူစာတမ်း ကိုထုတ်ပြန်ကျေညာလိုက်လေသည်။ ထို စက္ကဖြူ ပေါ်လစီနှင့် ဖ-ဆ-ပ-လ တောင်းဆိုချက်များ၏ ကွာခြားမှုမှာ အင်မတန်မှ ကြီးမားနေလေတော့သည်။ ဖ-ဆ-ပ-လ တောင်းဆိုချက်ဆိုလျှင် တိုက်ရိုက်အုပ်ချုပ်ခြင်း အလျှင်းအလိုမရှိဘဲ ဗမာအား သမတနိုင်ငံတော် အဖြစ်နှင့်မထူထောင်မီအတွင်း မိမိတို့အား အချုပ်အခြာ အာဏာပိုင်သော ယာယီ အစိုးရ အဖြစ်နှင့် အသိအမှတ်ပြုရမည်၊ နိုင်ငံတော်တွင်လည်း တိုင်းရင်းသား အားလုံးပါဝင်ရမည်၊ စက္ကူဖြူထည်းမှ လက်မခံနိုင်ဆုံး အချက်မှာ ဗမာပြည်၏ထက်ဝက်နီးပါးရှိသော တောင်တန်းဒေသများကို ဗမာပြည်မကြီးနှင့် ခွဲထားခြင်းပေတည်း။

ထိုအတောအတွင်းဝယ် အောင်ဆန်းနှင့် ဖ-ဆ-ပ-လ မှာပို၍သာ ထင်ပေါ်လာလေသည်။ ၁၅ရက်နေ့တွင် ရန်ကုန်၌ အောင်ပွဲခံ ဗိုလ်ရှူသဘင် ကျင်းပခဲ့ကြသည်။ (မောင့်ဘက်တင်၏ ပြန်တမ်းတွင် ယခုလို ဖော်ပြထားသည်) အလေးပြုခံ စင်မြင့် ဗမာအလံ(တော်လှန်ရေး အလံ) ကိုလည်း အခြားအလံများနှင့်အတူ လွှင့်တင်ကာ အလေးပြုချီတက်ကြသည့် ဗြိတ်သျှနှင့် မဟာမိတ်တပ်များ အထည်းတွင် ဗမာအမျိုးသားတပ်မတော်မှ တပ်များလည်း ပါဝင်ခဲ့သည်။ သို့အားဖြင့် ဗမာအမျိုးသားတပ်မတော်သည် မဟာမိတ် အဆင့် အတန်းဖြင့် သတ်မှတ်ခြင်း ခံရပါသည်ဟု ပြောဆိုနိုင်ခွင့် ရခဲ့သည်။

ထိုအချိန်မှာပင် အောင်ဆန်းသည် ဗိုလ်ချုပ်ဟူသော ဘွဲ့ကို စတင်သုံးခဲ့ခြင်းဖြစ်လေသည်။ ၄င်း၏၃၀နှစ်မျှသာ ရှိသေးသော အသက်ကို ကြည့်လိုက်တော့လည်း ၄င်းမှာ အင်မတန် ထူးခြားနေတော့သည်။ တပြည်လုံးကပင် မိမိတို့ စောင့်မျှော်နေသည့် ကယ်တင်ရှင်မှာ ၄င်းပင် ဖြစ်ရမည်ဟု ယုံကြည်ကိုးစား လာခဲ့ကြလေသည်။

ဇွန်လ ၂၀ရက်နေ့တွင် ဗမာပြည်ဘုရင်ခံဟောင်း ဒေါ်မန်စမစ်သည် လေယာဉ်ဖြင့် ရန်ကုန်သို့ဆိုက်ရောက်လာကာ မြစ်ထဲတွင် ဆိုက်ကပ်ထားသော ဗြိတ်သျှစစ်သင်္ဘော ကမ်းဘားလင်း ပေါ်သို့တက်ရောက်၍ ဖ-ဆ-ပ-လ- ကိုယ်စားလှယ်များနှင့် ထူထောင်ပြီးသား နိုင်ငံရေး ပါတီခေါင်းဆောင်ဟောင်း များကိုပါ သီခြား ခေါ်ယူတွေ့ဆုံဆွေးနွေးခဲ့လေသည်။ ဘုရင်ခံဟောင်း ဒေါ်မန်စမစ်သည် အင်မရီထံသို့ စာရေးပြောပြရာတွင် ကျွန်ုပ် အဓိက စိတ်ဝင်းစားသူများမှာ အောင်ဆန်းနှင့် သန်းထွန်းတို့သာ ဖြစ်သည်။ ၄င်းတို့ ၂ ယောက်သည် ကျွန်ုပ်နှင့် တနာရီကြာမျှ စကားပြောသွားကြသည်။ ၄င်းတို့သည် ပွင့်ပွင့်လင်းလင်းပင် ဖ-ဆ-ပ-လ၏ တောင်းဆိုချက်များကိုသာ ပြောကြားသွားခဲ့လေသည်။

သြဂုတ်လ၈ရက်နေ့တွင် ပထမ အနုမြူဗုံးကို ကြဲချလိုက်ကြသည်၊ သြဂုတ်လ၁၂ရက်နေ့တွင်ကား ဂျပန်သည် လက်နက်ချ အညံ့ခံခဲ့လေသည်။ ထိုအခါ ဗမာပြည်၏ စစ်ဘက်အုပ်ချုပ်ရေးသည် ပြီးဆုံးခါနီးသို့ ရောက်ရှိလာပါတော့သည်။

ထိုအတောအတွင်း မောင့်ဘက်တင်သည် အောင်ဆန်းအား အပိုင်သိမ်းသွင်းနိုင်ဘို့ လိုလားခဲ့လေသည်။ ထို့ကြောင့်လဲ သူသည် အောင်ဆန်းအား ဘရိဂိတ်ဒီယာ ဗိုလ်မှူချုပ်ခန့်အပ်ကာ အမြဲတမ်း ဗမာ့တပ်မတော်၌ လက်ထောက် အင်စပတ်တာဂျင်နရယ် ရာထူးပေးပါ ဒေါ်မန်စမ်အား အကြံပေးခဲ့လေသည်။ သို့အားဖြင့် အောင်ဆန်း၏ နောက်လိုက်တပ်သားများလည်း အမြဲတမ်း ဗမာ့တပ်မတော်ထည်းသို့ ဝင်လိုက်လာကြမည်ဟု မောင်ဘက်တင် တွက်ဆခဲ့လေသည်။ သို့ရာတွင် ထိုရာထူးကို အောင်ဆန်းကမိမိ စစ်သားများ အနက် ဝင်ချင်သူများအား အမြဲတမ်း ဗမာ့တပ်မတော်တွင် ပါဝင် အမှုထမ်းစေမည်ဟု ဂတိပြုခဲ့သည်။သူကိုယ်တိုင်ကမူ မောင့်ဘက်တင်ထံသို့ စာတစောင်ဖြစ် ရေးသားပေးပို့၍ ဒေါ်မန်စမစ်ထံသို့ မိတ္တူ တခုကိုလည်း ပေးပို့ခဲ့လေသည်။ ထိုစာမှာ ပွင့်လင်းခြင်း၊ ဖုံးကွယ်ခြင်း၊ ခင်မင်ခြင်း၊ ခြိမ်းခြောက်ခြင်း ရောထွေးနေသည့် ထူးခြားသော စာတစောင် ဖြစ်လေသည်။
ကျွန်ုပ်၏ ချစ်လှစွာသော လော့်ဒ်လူးဝစ် ဟုအစချီထားကာ မိမိအား လက်ထောက် အင်စပက်တာဂျင်နရယ် ရာထူးပေးအပ်ခြင်းနှင့် ပတ်သက်၍ ထိုရာထူးကို မိမိသည် စစ်ဘက်မှ နှုတ်ထွက်ပြီး နိုင်ငံရေးထည်း ဝင်တော့မည်ဖြစ်ရာ လက်မခံနိုင်ပါကြောင်း ဖော်ပြထားသည်။ (ဗြိတိသျှတို့၏ တပ်မတော်တွင် သူက အမြဲတမ်း အရာရှိဝင်လုပ်ဖို့ ဆိုသည်မှာ သူ့အမြင်တွင် မဖြစ်နိုင်သော ကိစ္စဖြစ်နေသည်။ သူ၏တကယ့် တပ်မတော်သည် တခြားနေရာတွင် ရှိနေသည် မဟုတ်ပါလား) သူ၏ငြင်းဆိုချက်ကို ယုတ္တိရှိစေရန်လည်း၊ အောင်ဆန်းက ထိုသို့ အကြောင်း ပြပြန်သည်၊ တပ်မတော်တွင် ကျွန်ုပ် ဆက်လက် အမှုမထမ်းနိုင်တော့ခြင်းကိုလည်း အထူးဝမ်းနည်းမိပါသည်၊ ကျွန်ုပ်အတွက် စစ်ဘက်တွင် အမှုထမ်းရခြင်းကို အခြားအလုပ်များထက် ပိုမိုနှစ်ချိုက်ပါ၏။ ကျွန်ုပ်တို့အား အမျိုးမျိုး ကျေးဇူးပြခဲ့ပြီး အနာဂတ်နိုင်ငံရေး နယ်ပယ်၌ ဗမာပြည်နှင့် ဗြိတိသျှပြည် အကြား ဖြစ်ပေါ်ခြင်ဖြစ်ပေါ်လာမည့် ပြဿနာများ အကြားကပင် ကျွန်ုပ်၏ အသဲနှလုံးတွင် အမြဲတမ်း ခင်မင်မှု ရှိနေမည့်သူတယောက်ကို တုံ့ပြန် ကျေးဇူးဆပ်သော အားဖြင့် ကျွန်ုပ်သည် မိတ်ဆွေကြီး ပြောသည့်အတိုင်း တပ်မတော်ထည်းသို့ ဝင်လာချင်လှပါသည်။
သို့ရာတွင် ဖ-ဆ-ပ-လ မှသူ၏ရဲဘော်များက ကန့်ကွက်လျက်ရှိရာ ၄င်းတို့၏ ဆုံးဖြတ်ချက်ကို မိမိ နာခံရမည်သာဖြစ်ပါသည်ဟု အောင်ဆန်းက ဆက်လက်ရေးခဲ့သည်။ ကျွန်ုပ်သည် အင်မတန်မှ ကြီးလေးလှမည်ဟုထင်သော်လည်း၊ တကယ်တမ်း၌ ထိုမျှလောက်ဖြစ်လိမ့်မည် မဟုတ်ဟု မျှော်လင့်သော နိုင်ငံရေး တာဝန်များကို ထမ်းဆောင်ရန်အတွက် စစ်တပ်ထဲမှ မထွက်မီ မိတ်ဆွေကြီးကို နှုတ်ဆက်ခဲ့ပါသည်။ ကျွန်ုပ်တို့ ကြားဝယ် အနာဂတ်၌ ဘယ်လိုအကြောင်းအရာပဲ ပေါ်ပေါက်လာသည်ဖြစ်စေ၊ ယခု ကျွန်ုပ်နှင့် မိတ်ဆွေကြီးအား ချည်နှောင်ထားသော ခင်မင်မှု နှောင်ကြိုးကို ဆက်လက် ထားရှိနိုင်မည်ဟုလည်း ကျွန်ုပ်မျှော်လင့်ပါသည်။ မိတ်ဆွေကြီးအား ကျွန်ုပ် လက်ဆောင်ပေးခဲ့သည့် ဂျပန်ဆာမူရိုင်းဓားကိုလည်း ယခုပြီးဆုံးခဲ့ပြီးဖြစ်သော အရှေ့တောင် အာရှ စစ်ပွဲကြီးအတွင်း မိတ်ဆွေကြီးက ကျွန်ုပ်တို့ အတွက်ပြုလုပ် ဆောင်ရွက်ချက်များအား လှိုက်လှဲစွာ ကျေးဇူးတင်ခြင်း အထိမ်းအမှတ်နှင့် ထာဝစဉ် ထားရှိပါမည့် အကြောင်း မေတ္တာ ရပ်ခံပါသည်။
သို့အားဖြင့် အသက် ၃၀ပင်မပြည့်သေးဘဲ ထိုအချိန်တိုင် မထင်ရှားသေးသည့် လူငယ်ကလေးသည် ထိုစဉ်က အာရှတွင် တန်းခိုးအကြီးထွားဆုံး ဖြစ်နေသည့် သူအား တန်းတူအနေဖြင့် ဆက်ဆံနှုတ်ဆက်ခဲ့လေသည်။ ထိုစာမှာ ဗမာရာဇဝင်နှင့် အတ္ထုပတ္တိတွင် အဓိကစာတမ်း တစောင်ဖြစ်ပေသည်။ ထိုစာတွင် ထုတ်ဖော်ပြထားချက်များနှင့် အတူ ကွယ်ဝှက်ထားခြင်းများမလည်းပါရှိခဲ့သည်။ အရိပ်အမြွက်နှင့် နမိတ် လက္ခဏာများကိုလည်း ညွှန်ပြခဲ့ပေသည် တကား။ အောင်ဆန်း၏ စိတ်ဓာတ်နှင့် ဂုဏ်ရည် ကိုလည်း ထိုစာသည် တော်တော်ဖော်ပြခဲ့ပေသည်။ ကြီးမားသော ကွတ်အင်္ကျီကြီးကို ဝတ်ထားသော လူညုက်ကလေး အဖြစ်နှင့် ကန်ဒီတွင် သူ့အား တွေ့ခဲ့ရသော သူများ အဖို့ သူသည် ဘယ်လိုမှ အရာ မရောက်သည့် အသွင်ပေါ်ခဲ့ပေသည်။ သူ့ထံတွင် မောက်မာဝင့်ကြွား ဟန်ပြမှု မရှိသည်မှာ အမှန်ပင်ဖြစ်တော့သည်။ ဥရောပမှ နိုင်ငံရေး ဆရာကြီးများနှင့် တူညီမှုသည့် သူ့ထံတွင် ဘယ်လိုမှ မရှိခဲ့၊ သူ့အား ဗိုလ်ချုပ်ဟု ခေါ်ကြသူများက ချမှတ်ပေးသော တာဝန် လုပ်ငန်းကြီးကို အောင်ဆန်းသည် တည်တည်ငြိမ်ငြိမ်နှင့်ပင် ဆောင်ရွက်ခဲ့ပေသတည်း။

သူသည် လော့မောင့်ဘက်တင်ကို ညို့ယူဖမ်းနိုင်ခဲ့သည့်နည်းတူ၊ ဘုရင်ခံ ဒေါ်မန်စမစ်မှာလည်း သူ့ညှို့ဓာတ်ကို ခံစားခဲ့ရလေသည်။ ထိုအချိန်ဆီက ဒေါ်မန်စမစ်သည် ပက်သစ်လောရင့်စ် ထံသို့ ထိုသို့ စာရေးခဲ့သည်။ အောင်ဆန်းမှာ ယနေ့ဗမာပြည်တွင် အရေးပါ အရာရောက်ဆုံး သူတဦးဖြစ်နေသည်ကို ကျွန်ုပ်တို့ အနေဖြင့် လက်ခံရမည်သာဟု ထင်ပါသည်။ လူတိုင်းက သူ့အားယုံကြည်လေးစားကြပုံရသည်။သူ၏စစ်တပ်များကလည်း၊ သူ့အား ချစ်ခင်ကြည်ညိုကြကာ သူခိုင်းသမျှ လုပ်ကြမည် ဖြစ်သည်။ သူသည် ဗမာပြည်တွင်းသို့ ကျွန်ုပ်တို့ မြန်မြန် ပြန်မဝင်လာသည့်တိုင် ဂျပန်များအား ထကြွပုန်ကန်ရန် အစီအစဉ်များ လုပ်ထားခဲ့သည်။ သူသည် ကိုယ်ကျိုးအတွက် ရည်မှန်းချက်ကြီး ထားသူလည်းမဟုတ်ချေ။ ဘမော်(ဒေါက်တာဘာမော်)၏ ဗြောင်ကျလွန်းသော မရိုးသား၊ မဖြောင့်မတ်မှုကို သူ၏ရိုးသား ဖြောင့်မတ်မှုက နှိုင်းယှဉ်မှု သာဓက ကြီးပြနေတော့သည်။

စက္ကူဖြူ ပေါ်လစီနှင့် ပတ်သက်၍ စီမံကိန်းများ ချမှတ် လုပ်ဆောင်ရာတွင် ပါဝင်ကူညီဆောင်ရွက်နိုင်ရန် အတိုင်ပင်ခံကောင်စီအဖွဲ့ကို ဒေါ်မန်စမစ်မှ ဖွဲ့စည်းခဲ့သည်။ ထိုအဖွဲ့တွင် ၁၅ယောက်ထားရန် ဖြစ်သော်လည်း နောက်တွင် ၁၁ယောက် အထိလျော့ချလိုက်လေသည်။ဖ-ဆ-ပ-လ မှ ကိုယ်စားလှယ်များကို နေရာ အများဆုံး ပေး၍ ကျန် ၄ နေရာကို ဒေါ်မန်စမစ်မှ ရွေးချယ်ခဲ့လေသည်။ ဒေါ်မန်စမစ်ရွေးချယ်ခဲ့သူများမှာ ပေါ်ထွန်းမှာ ပြည်ထဲရေးဌာန၊ ဘဏ္ဏာရေးကို ထွန်းအောင်ကျော်ကိုင်ကာ၊ ကာကွယ်ရေးနှင့်နယ်ခြားဌာနများကိုတော့ ဗြိတ်ိသျှ အရာရှိများအား ပေးမည်ဖြစ်လေသည်။ ထိုအခါအောင်ဆန်းမှ ပေါ်ထွန်းမှာ ဗမာပြည် ကိစ္စများနှင့် အဆက်ပြတ်နေသည်မှာ နှစ်ပေါင်းများစွာ ကြာမြင့်ခဲ့ရပြီ ဖြစ်ရကား ပြည်ထဲရေးနှင့် မသင့်တော်ကြောင်း အောင်ဆန်းက တုံးတိတိကြီးပင်ပြောခဲ့သည်။ ဥပမာဆိုယင် ပေါ်ထွန်းဟာ လက်နက်တွေ ဘယ်မှာဝှက်ထားတယ်ဆိုတာ သိမလားဟု အောင်ဆန်းသည် ခပ်ပြုံးပြုံးပင် အေးအေးဆေးဆေးမေးခဲ့လေသည်။ သူ၏အမူအရာသည်၎င်း၊ အသံသည်၎င်း၊ စကားများနောက်ကွယ်တွင် ခြိမ်းခြောက်မှုကို ဘယ်လိုမှ အရိပ်အယောင်မှ မဖော်ထုတ်ခဲ့ပြန်ချေ။
ထို့ပြင် စက္ကူဖြူပေါ်လစီအား ဗမာပြည်မှမယုံကြည့်ပုံနှင့် ကျွန်ုပ်တို့၏ ရည်ရွယ်ချက်များကို အောင်ဆန်းတို့မှ ပွင့်ပွင့်လင်းလင်းပင် ဝေဖန်ခဲ့ကြပေသည်။

ဒီဗိုလ်ချုပ်ဆိုသူသည် ဘယ်လိုလူစားမျိုးဖြစ်သနည်း။ ဒေါ်မန်စမစ်အနေဖြင့်တော့ ထိုဗိုလ်ချုပ်ကို ခင်မင်နိုင်ပေသည်၊ ၄င်းထံမှခင်မင်မှုကို တုံ့ပြန်ရရှိပါက အကျိုးရှိပေမည်၊ ၄င်းအား မိမိတို့ အမြင်ဘက်သို့ပါအောင် မဆွဲဆောင်နိုင်စေကာမူ ၄င်း၏ယုံကြည်မှုကို မိမိတို့ ရရှိပါက အဘိုးတန်ပေမည်။ သို့ရာတွင် စိတ်ဓာတ်ပြင်းထန်လှပြီး ရိုးရိုးကုပ်ကုပ် ကလေးနေတတ်သည့် ထိုစစ်သားကလေးသည် ဗမာပြည်အတွက် ဘယ်လို လွတ်လပ်ရေးမျိုးကို ရည်မှန်းထားနေလေသတည်း။ ဖ-ဆ-ပ-လ အဖွဲ့အနေဖြင့် ဥပဒေကို ဆိုရှယ်လစ်ဆန်ဆန်၊ ဒီမိုကရေစီ အခြေခံ စည်းမျဉ်း ဥပဒေကို ရေးသားထုတ်ပြန်ခဲ့ပေသည်။
ထို့ပြင် အောင်ဆန်း၏တောင်းဆိုချက်များကို တက်စ်(test) လုပ်ရန်လူမှာ ဦးစောပင်လျှင် ဖြစ်လိမ့်မည်။
ဒေါ်မန်စမစ်အနေဖြင့် ဦးစောကို ပြန်ခေါ်ရပေမည်။ ဦးစောသည်ဂျပန်နှင့် စစ်မဖြစ်မီတွင် ချာချီနှင့် တွေ့ဆုံဆွေးနွေးရန် အင်္ဂလန်ပြည်သို့ သွားရောက်ပြီး အမေရိကန်သို့လဲ သွားရောက်ခဲ့ပေသည်။ (ထိုသို့ မသွားခင် ဦးစောသည် ရွှေတိဂုံ ဘုရားအား သွားရောက်ဖူးမျှော်ခဲ့လေသည်။ သို့ရာတွင် သူသည် သာမန်ဘုရားဖူးများကဲ့သို့ ဘိနပ်ချွတ်လျှက် ကုန်းတော်ပေါ်သို့ မတက်ဘဲ အင်္ဂလိုအင်ဒီယန်း ကပြားတယောက် မောင်းနှင်သော သူ၏ ကိုယ်ပိုင်လေယာဉ်ဖြင့် ရွှေတိဂုံစေတီထက်တွင် ပျံဝဲပြီး ဖူးမျှော်ခဲ့လေသည်။ ထိုသို့ အဆန်းထွင် ဘုရားဖူးခြင်းသည် ဗမာ့အမြင်တွင် မနှစ်မြို့ဘွယ်ရာ ဖြစ်ခဲ့ပေသည်။ ဗုဒ္ဓရုပ်ပွားတော် အများအပြားနှင့် ဓာတ်တော်မွေတော်များ ဠာပနာထားသည့် မြတ်လှသည့် ရွှေတိဂုံစေတီတော်ထက်တွင် လေယာဉ်နှင့် ပျံခြင်းသည် အထူးပင် ဘုရားကို မရိုသေရာ ရောက်နေပေတော့သည်။) အမေရိကန်မှတဆင့် ဗမာပြည်သို့ အပြန်တွင် ဂျပန်နှင့် စစ်ဖြစ်ခဲ့ပြီ ဖြစ်သော အရှေ့ပိုင်းသို့ ခရီးသည်များ ပို့ဆောင်ပေးမည့် လေယာဉ်များ မရှိတော့သဖြင့် ဦးစောသည်အမေရိကန်သို့ ပြန်လာပြီး ထိုကမှတဆင့် ပေါ်တူဂီသို့ဖြတ်၍ ဗမာပြည်သို့ ပြန်ရန် စီစဉ်ခဲ့သည်။ လစ္စဘုန်းမြို့သို့ရောက်သည့်အခါတွင် ဦးစောသည် ရှေ့ဆက်သွားမည့် လေယာဉ်စောင့်စားရင်ဂျပန် သံအမတ်နှင့် တွေ့ဆုံသည်ကို ဗြိတိသျှထောက်လှမ်းရေးမှ သိရှိသွားသောကြောင့် ဦးစောအား ဗမာပြည်သို့ ပြန်ခွင့် မပေးတော့ပဲ အဖမ်းခံခဲ့ရလေသည်။

စက္ကူဖြူပေါ်လစီအရ အတိုင်ပင်ခံ ကောင်စီကို ဖွဲ့ပြီးနောက် ဥပဒေပြု လွှတ်တော်ကို ထပ်မံရွေးချယ်ခန့်အပ်ရပေမည်ဖြစ်လေသည်။ နိုဝင်ဘာလတွင် ယင်းဥပဒေပြု လွှတ်တော် အတွက် လူရွေးစဉ် ဒေါ်မန်စမစ်သည် အောင်ဆန်းနှင့် သန်းထွန်းတို့ အားခေါ်၍ နေရာပေးခဲ့လေသည်။ ထိုအခါအောင်ဆန်းမှာ မိမိသည် ကောင်စီထဲဝင်၍ မရှိသော အရာကို အတိုက်အခံပြုဘို့မှာ မဖြစ်နိုင်ကြောင်းဟု ပြန်ဖြေခဲ့လေသည်။
ထိုနေ့မှာပင် ဖ-ဆ-ပ-လ သည် ရွှေတိဂုံဘုရား၌ လူထုစည်းဝေးပွဲကြီး ကျင်းပခဲ့လေသည်။ အမြဲတမ်း ပွင့်ပွင့် လင်းလင်း ရှိသော အောင်ဆန်းသည် ဒေါ်မန်စမစ် အား အစည်းအဝေး အာဂျင်ဒါ အစီအစဉ်ကို ထုတ်ပြပြီး ပထမ အာဂျင်တာမှာ ဘုရင်ခံ ဒေါ်မန်စမစ်သည် ဗြိတိန်ပြည်ကဲ့သို့ ဒီမိုကရေစီနိုင်ငံတခု၏ ကိုယ်စားလှယ် အဖြစ်နှင့် မထိုက်တန်ကြောင်း အဆိုဖြစ်လေသည်။ ထိုစာကိုလူထုရှေ့ အဆိုတင်သွင်းလိုက်ပါက လူထုက တညီတညွှတ်ထဲ တခဲနက် ထောက်ခံအတည်ပြုကြလိမ့်မည်ဟု အောင်ဆန်းက ရှင်းပြသည်။ ထိုသို့ဗြောင်ကျလွန်း အားကြီးလည်း ဒေါ်မန်မစ်မှာ စိတ်မဆိုးနိုင်၊ ငြိမ်ဝပ်ပ်ိပြားမှု ပျက်ပြားမှာ စိုးရိမ်ပြီး လူထုကြီးအား လှုံ့ဆော်ခြင်းမပြုရန်သာ တိုက်တွန်းပြောကြားလိုက်ရပေသည်။ ထိုအခါ အောင်ဆန်းမှ မစိုးရိမ်ပါနဲ့ လူထုကြီးကို ထိန်းတဲ့နည်း ကျုပ်မှာ ရှိပါတယ်ဟု ပြန်လည်ပြောကြားခဲ့ပေသည်။ အကယ်စင်စစ်လဲ ထုလူထုစည်းဝေးပွဲကြီးမှ လူထုကြီးသည် တည်တည်ငြိမ်ငြိမ် လေးလေးနက်နက်ပင် ရှိခဲ့ကြပေသည်။

အောင်ဆန်းသည် တန်ခိုးအာဏာ ကြီးမားလာသည်နှင့်အမျှ သူသည် ပိုမို၍သာ တွန့်ဆုတ်မှု ရှိလာခဲ့သည်ကား ထူးခြားချက် တရပ်ပင်ဖြစ်လေသည်။ တခါတခါတွင် သူသည် အင်မတန်မှ စိတ်အားညိုးငယ်နေတတ်လေသည်။ မိမိသည် နောက်ထပ် ယခုထက်မြင့်မား လာရပါက အကျနာလိမ့်မည်လော။ လူငယ်တယောက်သာ ရှိသေးသည်။ မိမိသည် တိုင်းပြည်အား လွတ်လပ်ရေးပန်းတိုင်ဆီသို့ အောင်မြင်စွာ လမ်းညွှန် ခေါ်ဆောင်သွားနိုင်ပါမည်လော။ မောင့်ဘက်တင်ထံ ရေးခဲ့ သည့်အတိုင်းပင် သူလုပ်ဆောင်နေသည်မှာ အင်မတန်မှ ကြီးလေးခက်ခဲလှပေတော့သည်။ သူ့တွင် ပြည်သူလူထု၏ ချစ်ခင် ကြည်ညိုမှုကိုခံယူရရှိသည့်တိုင်အောင် ရန်သူတွေကလဲ ပတ်လည်ဝိုင်းနေပေသည်။ တိုင်းပြည်ခေါင်းဆောင် နေရာကို ရအောင် ကြိုးစားပြီး မအောင်မြင်ခဲ့ကြဘဲ သူ့အား မနာလိုဝန်တို ဖြစ်နေကြသည့် နိုင်ငံရေး သမားဟောင်းကြီးတွေက ရှိနေကြသေးသည် မဟုတ်ပါလား။ ထိုသို့ စိတ်အား ညိုးငယ်နေသော အချိန်ကာလ တလညခင်းတွင် အောင်ဆန်းသည် ဒေါ်မန်စမစ်အား လာတွေ့လေသည်။ ထိုနေ့က အဖြစ်အပြက်သည် တော်တော်ပင် ဆန်းခဲ့ပေသည်။
အောင်ဆန်းသည် သူစိတ်အားညိုးငယ်နေသည့်အခါ သူ၏စိုးရိမ်ချက်များကို ဒေါ်မန်စမစ်အား ဖွင့်ဟတိုင်ပင်ရာတွင် သူ့တွင် တိုင်ပင်ဖော်၊ တိုင်ပင်ဘက် မရှိကြောင်း ထုတ်ဖော်ပြောဆိုခဲ့လေသည် သူသည် မိတ်ဆွေများ လိုချင်ခဲ့သော်လည်း ရှာရနိုင်ဖို့မှာ အင်မတန်မှ ခဲယဉ်းသည်ဟု ဆိုခဲ့သည်။ ထိုအခါဒေါ်မန်စမစ်မှ ဟာ... ခင်ဗျားဟာ ပြည်သူ လူထုကြီးရဲ့ အချစ်တော်ဖြစ်နေတာ မိတ်ဆွေ မရှိဘူးလို့ ဘယ်နှယ့် ပြောလိုက်တာလဲဟု ပြန်ပြောခဲ့ပေသည်။ အောင်ဆန်းမှ ကျုပ်တိုင်းပြည်ကို လွတ်လပ်စေဘို့သာ ရည်ရွယ်တာပါ။ ဒီတာဝန်ကြီးဟာ ဘယ်လောက်ကြီးလေးပြီး ကျုပ်ကို အဖော်မဲ့စေမယ်ဆိုတာ ကျုပ်မသိခဲ့ပါဘူးဟု ပြန်လည်ဖြေကြားခဲ့ပေသည်။ အမျိုးသား အာဇာနည် ခေါင်းဆောင်တွေဟာ ဘယ်လောက် ကြာကြာခံသလဲ ဒီတိုင်းပြည်မှာတော့ သိပ်မခံပါဘူး၊ သူတို့မှာ ရန်သူတွေသိပ်များလှတာကလား အလွန်ဆုံးခံ ၃နှစ်ပါဘဲ၊ ကျုပ်အတွက်ဆိုယင် နောက်ဆက် အသက်ရှင်လှ တနှစ်ခွဲပေါ့ဟု စိတ်ပျက်နားကျည်းစွာ ဒေါ်မန်စမစ်အား ပြောခဲ့လေသည်။
သို့အားဖြင့် အောင်ဆန်းသည် သူ၏နီးကပ်လာနေပြီဖြစ်သော သေဘေးကို ကြိုတင်ဖွင့်ပြောခဲ့လေသည်။ ထိုအကြောင်းကို သူ့စိတ်ထည်းက အလိုလို ရိပ်မိနေသည့်အပြင် နက္ခတ်ဗေဒင် ဆရာများကလဲ သတိပေးထားကြလေသည်။ ထိုသို့ ဝမ်းနည်း၊ ပမ်းနည်း၊ ညည်းတွားခဲ့သည်မှာ ကြောက်ရွံ့၍ မဟုတ်၊ သူ့ကံကြမာကို မခံယူနိုင်၍လည်းမဟုတ်၊ သူယုံကြည်စွာ ထိုအကြောင်းကို ဖွင့်ဟတိုင်ပင် နိုင်သည့် လူကိုရှာတွေ့ရပြီး၊ စိတ်ထိခိုက်လှခြင်းကြောင့်သာ ဖြစ်လေသည်။

၁၉၄၇၊ဇူလိုင်လ၊ ၁၉ နံနက်တွင်ကား အောင်ဆန်း သဘာပတိ အဖြစ်ဆောင်ရွက်နေသော ကောင်စီ အစည်းအဝေးတခုကို ကျင်းပနေခဲ့သည်။ ၁၀နာရီခွဲပြီး၍ မိနစ်အနည်းငယ် အကြာတွင် မောင်းပြန် သေနတ်များ ကိုင်ဆောင်လာသည့် ဗမာသေနတ်ကိုင် တစုသည်၊ ထိုကောင်စီအဖွဲ့ အစည်းအဝေးကျင်းနေရာ အခန်းသို့ ရုတ်တရက် ဝင်ရောက် လာကြပြီး ကောင်စီဝင် လူကြီးများအား အနီးကပ်၍သေနတ်များနှင့် ပစ်ခတ်ကြရာ စက္ကန့်အနည်းငယ်အတွင်းမှာပင် အောင်ဆန်းနှင့် အခြား ၄ယောက်မှာ ကျဆုံး သွားရလေသည်။ ကျန် ၂ ယောက်မှာ ဒဏ်ရာ အကြီးအကျယ်ရသွားကြပြီး ဆေးရုံရောက်သော် သေဆုံး သွားကြလေသည်။ လုပ်ကြံသူများသည် သေနတ်ဖြင့်ပစ်ခတ်ရင်း ပြန်ထွက်သွားကြရာ ဝန်ကြီးတဦး၏ သက်တော်စောင့်မှာ ကျဆုံးသွားရလေသည်။
၎င်းအမှု ဖြစ်ပွားပြီးပြီးခြင်း ဗမာလက်နက် ကိုင်များနောက် ပုလိပ်များ လိုက်သွားကြကာ ဦးစောအိမ်တွင် ဖမ်းဆီးရမိလိုက်လေသည်။ ဦးစောအား ဗမာတရားသူကြီးများဦးစီးသည့် ခုံရုံးတွင် စစ်ဆေးရာ ၃၇ရက် တိတိကြာမြင့်ခဲ့လေသည်။ အစိုးရပြ သက်သေ ၇၈ ယောက် နှင့် တရားခံပြ သက်သေ ၃၁ ယောက်ကို စစိဆေးခဲ့ရလေသည်။ ဦးစောအား အပြစ်ရှိကြောင်း ဆုံးဖြတ်ကာ ကြိုးပေးလိုက်လေသည်။

ဗြိတိသျှ အစိုးရသည် သမတပြည်ထောင်စုဗမာနိုင်ငံတော်အား အချုပ်အခြာအာဏာပိုင် လွတ်လပ်သော နိုင်ငံအဖြစ် အသိအမှတ်ပြုပါသည် ဟူ၍ အာဏာလွှဲပြောင်းရေး အခမ်းအနားကို ရန်ကုန်မြို့တွင် ၁၉၄၈၊ဇန်နဝါရီလ၊ ၄ရက် နံနက် ၄ နာရီ၊မိနစ် ၂၀တွင် ကျင်းပခဲ့လေသည်။