အန်အယ်လ်ဒီပါတီ မှတ်ပုံမတင်သည့်အပေါ်
ပြည်တွင်းပြည်ပမှ အတိုက်အခံအဖွဲ့အစည်းများ၏ သဘောထားများ

NEJ / ၃၀ မတ် ၂၀၁၀
http://www.khitpyaing.org/interviews/2010/March/30310.php
၂၀၁၀ ခုနှစ် နအဖကောင်စီက ထုတ်ပြန်ထားသည့် ရွေးကောက်ပွဲဆိုင်ရာ ဥပဒေများသည် တရားမျှတမှု လုံးဝမရှိသဖြင့် အမျိုးသားဒီမိုကရေစီအဖွဲ့ချုပ် (အန်အယ်လ်ဒီ) သည် ပါတီအဖြစ် ထပ်မံ မှတ်ပုံတင်တော့မည်မဟုတ်ကြောင်း မတ် (၂၉) ရက်၊ အန်အယ်လ်ဒီရုံးချုပ်တွင် ပြုလုပ်သည့် ဗဟိုဦးစီးအဖွဲ့ဝင်များ၏အစည်းအဝေးမှ ကန့်ကွက်သူမရှိ အများသဘောတူ ဆုံးဖြတ်ခဲ့သည်။
ထိုသို့ စစ်အစိုးရ ပြုလုပ်မည့် ၂၀၁၀ ရွေးကောက်ပွဲတွင် အန်အယ်လ်ဒီသည် ပါတီအဖြစ် မှတ်ပုံတင်ခြင်းမရှိသည့်အပေါ် ပြင်တွင်းပြည်ပမှ အတိုက်အခံအဖွဲ့အစည်းများ၏ သဘောထားအမြင်များကို ခေတ်ပြိုင်က ဆက်သွယ်မေးမြန်း တင်ပြလိုက်ပါသည်။

ဦးစိန်ဝင်း (၀န်ကြီးချုပ်)
ပြည်ထောင်စုမြန်မာနိုင်ငံ အမျိုးသားညွန့်ပေါင်းအစိုးရ (အန်စီဂျီယူဘီ)


အန်အယ်လ်ဒီရဲ့ ဆုံးဖြတ်ချက်ကို ကျနော်တို့အပြည့်အ၀ ထောက်ခံတယ်။ ဒါဟာ လုပ်သင့်လုပ်ထိုက်တာကို လုပ်တာပဲလို့ ကျနော်တို့မြင်ပါတယ်။ တရားဝင်မှုထက်စာရင် ပြည်သူလူထုရဲ့ ထောက်ခံမှုက ပိုအရေးကြီးတယ်လို့ မြင်ပါတယ်။ အန်အယ်လ်ဒီရဲ့အသံဆိုတာ မတိတ်ပါဘူး။ ဖိနှိပ်မှုတွေ အများကြီးရှိတာ၊ မတရားဥပဒေတွေ အများကြီးရှိတာ၊ မတရားလုပ်ငန်းစဉ်တွေ လုပ်နေတာ၊ ပြည်သူလူထုကို လုံးဝအရေးမထားဘဲနဲ့ အမျိုးမျိုး ဒုက္ခဝေအောင် လုပ်နေတာတွေ ရှိနေသမျှ တော်လှန်တဲ့အသံတွေကလည်း ထွက်နေမှာပါပဲ။ ရှေ့ဆက်ပြီး နိုင်ငံရေးလှုပ်ရှားဖို့ဆိုတာ ပြည်သူလူထုက လက်ခံရင် လုပ်လို့ရပါတယ်။

ဦးမောင်မောင် (အထွေထွေအတွင်းရေးမှူး)
ပြည်ထောင်စုမြန်မာနိုင်ငံအမျိုးသားကောင်စီ (အန်စီယူဘီ)


ကျနော်တို့အနေနဲ့ အန်အယ်လ်ဒီရဲ့ ဆုံးဖြတ်ချက်ကို အများကြီး ကြိုဆိုထောက်ခံတယ်။ ဆက်လက်ထောက်ခံသွားဖို့လည်း နည်းမျိုးစုံနဲ့ ကြိုးစားသွားမယ်။ ဒီဆုံးဖြတ်ချက်ရဖို့ တက်ညီလက်ညီလှုပ်ရှားခဲ့တဲ့ မြို့နယ်အဆင့် တိုင်းအဆင့်အဖွဲ့ဝင်တွေ အမှုဆောင်တွေ၊ လွှတ်တော်ကိုယ်စားလှယ်တွေရဲ့သတ္တိဆုံးဖြတ်ချက် ပြတ်ပြတ်သားသားကို မြင်ရတဲ့အတွက် တော်တော်ကြီးကို ၀မ်းသာပါတယ်။ မြန်မာပြည်ရဲ့ သမိုင်းမှာ အများပြောသလို အန်အယ်လ်ဒီဟာ သူ့ကိုပေးထားတဲ့တာဝန်ကို သူထမ်းဆောင်ဖို့ အဆင်သင့် ရှိတယ်ဆိုတာကို ပြလိုက်တာဖြစ်တယ်။ ၉၀ ပြည့်နှစ် ရွေးကောက်ပွဲတုန်းက ပြည်သူက ရွေးချယ်ခဲ့တာ ဖြစ်တယ်။ ပြည်သူရွေးချယ်ခဲ့တဲ့ ရွေးကောက်ပွဲကို ပုံမဖော်ဘဲနဲ့ နောက်ထပ်ရွေးကောက်ပွဲတခုကို လုပ်လို့မရဘူးဆိုတာကို အန်အယ်လ်ဒီက တိတိလင်းလင်း ပြလိုက်တာဖြစ်တယ်။
ကျနော်တို့အနေနဲ့ နိုင်ငံတကာမှာရှိတဲ့ အစိုးရနဲ့ အပြည်ပြည်ဆိုင်ရာ အသိုင်းအ၀ိုင်းအားလုံးကိုရော အန်အယ်လ်ဒီနဲ့ ရွေးကောက်ပွဲအနိုင်ရ ပုဂ္ဂိုလ်တွေရဲ့ လှုပ်ရှားမှုကိုရော ၀ိုင်းဝန်းပြီးတော့ နည်းမျိုးစုံနဲ့ ထောက်ခံအားပေးသွားဖို့ ကြိုးစားနေပါတယ်။

ဦးဘိုလှတင့် (နိုင်ငံခြားရေးနှင့် ဘဏ္ဍာရေးဝန်ကြီး)
ပြည်ထောင်စုမြန်မာနိုင်ငံ အမျိုးသားညွန့်ပေါင်းအစိုးရ (အန်စီဂျီယူဘီ)

ဒီကိစ္စနဲ့ပတ်သက်ပြီး အန်အယ်လ်ဒီဟာ အင်မတန်မှ ရဲရင့်ပြတ်သားပြီး မှန်ကန်တဲ့ဆုံးဖြတ်ချက်ကို ချတယ်၊ အင်မတန်မှ သိက္ခာရှိတဲ့ ဆုံးဖြတ်ချက်ကို ချလိုက်တဲ့အတွက် ကျနော်တို့က လှိုက်လှိုက်လှဲလှဲ ကြိုဆိုပါတယ်။
အန်အယ်လ်ဒီဟာ မြန်မာနိုင်ငံမှာ ဒိထက်ပိုပြီးတော့ ဖိနှိပ်ခံရဖို့ အကြောင်းရှိတယ်၊ ချုပ်ချယ်ခံရဖို့အကြောင်းရှိတယ်၊ ခေါင်းဆောင်တွေလည်း ဖမ်းဆီးထိန်းသိမ်းတာ ပိုပြီးခံရဖို့ အကြောင်းရှိတာကို သိလျက်နဲ့ တကယ်ကို မှန်ကန်တဲ့ဆုံးဖြတ်ချက် ချခဲ့တဲ့အတွက် သူတို့ဟာ ဘယ်လိုအခြေအနေမျိုးကိုမဆို ရင်ဆိုင်ဖို့ အသင့်ဖြစ်တယ်လို့ ကျနော်တို့က မြင်ပါတယ်။ ဒါပေမယ့် နိုင်ငံတကာမိသားစုကဖြစ်စေ၊ ပြည်တွင်းက တိုင်းရင်းသားလူမျိုးပေါင်းစုံ ပြည်သူလူထုကဖြစ်စေ၊ တကယ်တမ်း အန်အယ်လ်ဒီနဲ့ ဒေါ်အောင်ဆန်းစုကြည်ကို ၀န်းရံထောက်ခံအားပေးကြမယ်ဆိုရင်တော့ နအဖ လုပ်ချင်တိုင်း လုပ်လို့မရဘူးလို့ မြင်ပါတယ်။တကယ်တမ်းပြောရမယ်ဆိုရင် နိုင်ငံရေးပါတီ ပေါ်ပေါက်လာတာဟာ လှုပ်ရှားမှုကြောင့် ပေါ်ပေါက်လာတာ ဖြစ်ပါတယ်။ နိုင်ငံရေးပါတီ ရှိနေလို့ လှုပ်ရှားမှုကြီး ပေါ်ပေါက်တာမဟုတ်ပါဘူး။ အားလုံးသိတဲ့အတိုင်း ကျောင်းသားလူငယ်တွေက စပြီးတော့ ၈၈ ခုနှစ် လူထုလှုပ်ရှားမှုရဲ့ အကျိုးဆက်အဖြစ် ၁၉၉၀ ရွေးကောက်ပွဲဆိုတာ ပေါ်လာတာဖြစ်ပါတယ်။ လူထုလှုပ်ရှားမှုနဲ့ တကယ့်ဒီမိုကရေစီလှုပ်ရှားမှု ရှိတဲ့အတွက်ကြောင့်မို့သာလျှင် နိုင်ငံရေးပါတီဆိုတာ ပေါ်ပေါက်လာတာဖြစ်ပါတယ်။ နိုင်ငံရေးပါတီ ထောင်ပြီးတော့မှ နိုင်ငံရေးတို့၊ ဒီမိုကရေစီရေးတို့ လှုပ်ရှားနိုင်တာမဟုတ်ပါဘူးလို့ ကျနော်တို့မြင်ပါတယ်။

ဦအောင်မိုးဇော် (ဥက္ကဋ္ဌ)
လူ့ဘောင်သစ်ဒီမိုကရက်တစ်ပါတီ (ဒီပီအန်အက်စ်)

မနေ့က အမျိုးသားဒီမိုကရေစီအဖွဲ့ချုပ် (အန်အယ်လ်ဒီ) ဆုံးဖြတ်ချက်ကို ကြိုဆိုပါတယ်။ ပြည်သူလူထုတရပ်လုံးရဲ့ သဘောထားကို ထင်ဟပ်စေတယ်။ ဒီနေ့လို အခြေအနေကာလမျိုးမှာ တိုင်းသူပြည်သားအားလုံး၊ ဒီမိုကရေစီအင်အားစုတွေ၊ နိုင်ငံရေးအင်အားစုတွေ အားလုံး အန်အယ်လ်ဒီနဲ့ တစိတ်တ၀မ်းတည်းရှိဖို့လိုပြီး ၀ိုင်းရံပံ့ပိုးကြဖို့ အထူးလိုအပ်တဲ့အချိန် ဖြစ်တယ်။ အဖွဲ့ချုပ်ကို နအဖက ဖျက်သည်ဖြစ်စေ၊ မဖျက်သည်ဖြစ်စေ အမျိုးသားဒီမိုကရေဒီအဖွဲ့ မပျက်ဘူးဆိုတာ ယုံကြည်တယ်။ အကယ်၍ နအဖက ဖျက်လိုက်ခြင်းအားဖြင့် တတိုင်းပြည်လုံး အမျိုးသားဒီမိုကရေစီအဖွဲ့ချုပ် အဖွဲ့ဝင်တွေ ဖြစ်သွားဖို့လိုတယ်။ ဖြစ်သွားလိမ့်မယ်လို့လည်း ယုံကြည်တယ်။ စစ်အုပ်စုနဲ့ ၂၀၀၈ ဖွဲ့စည်းပုံကို ပြည်သူလူထုအားနဲ့ တိုက်မှ ရမယ်ဆိုတာ အားလုံးလက်ခံပြီးသားဖြစ်တယ်။ ပြည်သူတွေ ရဲဘော်ရဲဘက်တွေအနေနဲ့ အဖွဲ့ချုပ်နဲ့ တစိတ်တ၀မ်းတည်း ရှိပြီးတော့ ကျားကုတ်ကျားခဲ ဆက်လက်ဆောင်ရွက်သွားဖို့ တိုက်တွန်းလိုတယ်။

မိုင်းဘုန်းကျော် (အထွေထွေအတွင်းရေးမှူး)
အမျိုးသားဒီမိုကရေစီတပ်ပေါင်းစု (အန်ဒီအက်ဖ်)

အမျိုးသားဒီမိုကရေစီအဖွဲ့ချုပ်က ပါတီမှတ်ပုံတင်မယ့်ကိစ္စကို ကန့်ကွက်သူမရှိ ဆုံးဖြတ်တာ မြန်မာပြည်သူတွေဘက်ကို ပြတ်ပြတ်သားသား ရပ်တည်တဲ့ သမိုင်းဝင် ဆုံးဖြတ်ချက်ဖြစ်တယ်။ ဒီဆုံးဖြတ်ချက်ကို လှိုက်လှိုက်လှဲလှဲကြိုဆိုတယ်။ အဖွဲ့ချုပ်က ဆက်လက်လှုပ်ရှားမယ့် လှုပ်ရှားမှုတွေအကုန်လုံးကို ၀ိုင်းရံပံ့ပိုးသွားမယ်။ တိုင်းရင်းသား ပြည်သူလူထု တရပ်လုံးကလည်း ၀ိုင်းရံပံ့ပိုးပေးဖို့ ကျနော်တို့ တိုက်တွန်းချင်ပါတယ်။ နအဖဟာ အဖွဲ့ချုပ်စတင်ဖွဲ့စည်းတဲ့ ၁၉၉၀ ကတည်းက တောက်လျှောက် ပြဿနာရှာနေတာပါ။ ဘယ်လိုပဲ ပြဿနာရှာရှာ အဖွဲ့ချုပ်ဟာ ပြည်သူထောက်ခံမှုနဲ့အတူ ကနေ့အထိ ရပ်တည်နေတာ ဖြစ်တယ်။ နအဖက ပြင်းထန်တဲ့ဖိနှိပ်မှုတွေ ဘယ်လိုပဲလုပ်လုပ် လူထုဝန်းရံမှုနဲ့အတူ အဖွဲ့ချုပ်ဟာ ဆက်လက်ရှင်သန်နေမယ်။ ကျနော်တို့လည်း အဖွဲ့ချုပ်နဲ့အတူ လှုပ်ရှားမှုတွေကို ဟန်ချက်ညီ ဆက်လက် ဆောင်ရွက်သွားမယ်လို့ ပြောချင်ပါတယ်။

သခင်ချန်ထွန်း (၀ါရင့်နိုင်ငံရေးသမားကြီး)

ဒါက ရွေးကောက်ပွဲဥပဒေမှာ လက်မခံနိုင်တဲ့ အချက်တွေပါနေတော့ ဒီဟာတွေကို တောင်းဆိုပြီးတော့ အန်အယ်လ်ဒီက ရွေးကောက်ပွဲမ၀င်ဘူးလို့ ဒီလိုပဲမြင်ပါတယ်။ သူတို့က သေသေချာချာလေ့လာပြီးတော့မှ အဲဒီအခြေအနေပေါ်မှီပြီး ဆုံးဖြတ်တာဆိုတော့ သူတို့အယူအဆ သူတို့အတွေးအခေါ်နဲ့ ဆုံးဖြတ်တာဖြစ်တော့ ဒီရွေးကောက်ပွဲဝင်တဲ့အတွက် ပြဿနာတွေကို ကမ္ဘာက အသိအမှတ်ပြုမလား၊ မပြုဘူးလား ဆိုတဲ့ကိစ္စတွေ ပေါ်လာမှာပါ။ ဘာလို့လဲဆိုတော့ ကမ္ဘာကအသိအမှတ်ပြုထားတဲ့ မြန်မာ့ခေါင်းဆောင် ဒေါ်အောင်ဆန်းစုကြည်နဲ့တကွ ထောင်ကျနေတဲ့ နိုင်ငံရေးအကျဉ်းသားတွေ ရွေးကောက်ပွဲမ၀င်ရဘူးဆိုတာတွေကို တချို့က ထင်ထင်မြင်မြင် ကန့်ကွက်နေကြတာတွေလည်း ကြားနေရတယ်။ အမှန်ကတော့ ဒီရွေးကောက်ပွဲကြီးဟာ အောင်မြင်မယ်လို့ လုပ်တဲ့သူတွေက ထင်မြင်ကြပေမယ့် ကမ္ဘာ့နိုင်ငံတွေ အထူးသဖြင့် ဥရောပ၊ အမေရိကန် အစရှိတဲ့နိုင်ငံတွေက ဒီရွေးကောက်ပွဲကို အသိအမှတ်ပြုကြလိမ့်မယ် မထင်ဘူး။

ဦးဝင်းတင် (ဗဟိုအလုပ်အမှုဆောင်အဖွဲ့ဝင်)
အမျိုးသားဒီမိုကရေစီအဖွဲ့ချုပ် (အန်အယ်လ်ဒီ)


ဒေါ်အောင်ဆန်းစုကြည်ရဲ့ အညွှန်းအရဆို ဘယ်လိုပဲဖျက်ဖျက် ပါတီမပျက်ဘူး။ ကျနော်တို့နိုင်ငံရေးမပျက်ပါဘူး။ နိုင်ငံရေးဆိုတာ ဒီမိုကရေစီနိုင်ငံရေးပဲ။ မြန်မာနိုင်ငံမှာ စစ်မှန်တဲ့ ဒီမိုကရေစီတည်ထောင်ဖို့၊ လူ့အခွင့်အရေးတွေ ပြည့်ဝဖို့၊ စစ်မှန်တဲ့ ပြည်ထောင်စုစနစ် ထွန်းကားဖို့ အာဏာရှင်စနစ်မှန်သမျှ ဖယ်ရှားဖို့ဆိုတဲ့ ကျနော်တို့ရဲ့ မူလနိုင်ငံရေးတွေက မပျက်ပါဘူး။ ကျနော်တို့ရဲ့ အသည်းနှလုံးထဲ၊ ခေါင်းထဲမှာ ဒီနိုင်ငံရေးတွေရှိနေရင် အဲဒီနိုင်ငံရေးတွေကို ကျနော်တို့က ဒီမိုကရေစီအဖွဲ့အစည်းတခုအဖြစ် ရပ်တည်ချိန်တုန်းက ရှိခဲ့တဲ့အတိုင်းပဲ ဒါတွေကို ဆက်လက် ထိန်းသိမ်းသွားရပါမယ်။ ပါတီတို့ဘာတို့ဆိုတာ ပုံသဏ္ဌာန်ပဲဗျာ။

ဦးအေးသာအောင် (အတွင်းရေးမှူး)
ရခိုင်အမျိုးသားဒီမိုကရေစီအဖွဲ့ချုပ် (အေအယ်လ်ဒီ)

အန်အယ်လ်ဒီဟာ စီအာပီပီအဖွဲ့ဝင်ပါတီတခုဖြစ်ပါတယ်။ အထူးသဖြင့် ဒီလို ပါတီမှတ်ပုံမတင်ဘူး၊ ရွေးကောက်ပွဲကို မ၀င်ဘူးဆိုတာဟာ တိုင်းရင်းသားအဖွဲ့တွေရဲ့ ဆုံးဖြတ်ထားတဲ့ ဆုံးဖြတ်ချက်နဲ့လည်းကိုက်ညီတယ်၊ စီအာပီပီရဲ့မူနဲ့လည်း ကိုက်ညီတဲ့အတွက်ကြောင့် ကျနော်တို့အနေနဲ့ ဒါကို ကြိုဆိုပါတယ်။ အခုလို ဆုံးဖြတ်လိုက်တာဟာလည်း ၂၀၀၈ ဖွဲ့စည်းပုံ အခြေခံဥပဒေကို အန်အယ်လ်ဒီက လက်မခံဘူးလို့ ထုတ်ပြန်ပြီးဖြစ်သလို အခု ရွေးကောက်ပွဲဆိုင်ရာ ဥပဒေတွေ၊ နည်းဥပဒေတွေဟာ တနည်းအားဖြင့် မမျှော်လင့်တဲ့ မထင်မှတ်တဲ့ နိုင်ငံရေးပါတီတွေကို ကန့်သတ်တားဆီး ချုပ်ချယ်မယ့် ဥပဒေတွေ ဖြစ်နေတော့ ရွေးကောက်ပွဲကော်မရှင်ရဲ့ ဥပဒေအောက်မှာ လှုပ်ရှားရမယ့် နိုင်ငံရေးပါတီတရပ်အနေနဲ့ မှတ်ပုံမတင်တာဘဲ ကောင်းတယ်လို့ မြင်ပါတယ်။
အန်အယ်လ်ဒီဟာ မှတ်ပုံတင်ပြီးသားဖြစ်တယ်။ နောက်ထပ်မှတ်ပုံတင်စရာမလိုဘူး၊ ဆက်လက်ပြီးတော့ တိုင်းပြည်အတွက် နိုင်ငံရေးအရ လှုပ်ရှားသွားမယ်ဆိုတာ ပေါ်လွင်ပါတယ်။ ကျနော်တို့ တိုင်းရင်းသားပါတီများနဲ့လည်း လက်တွဲဆောင်ရွက်သွားမှာ ဖြစ်ပါတယ်။

ဦးဉာဏ်ဝင်း (ဗဟိုအလုပ်အမှုဆောင် အဖွဲ့ဝင်)
အမျိုးသားဒီမိုကရေစီအဖွဲ့ချုပ် (အန်အယ်လ်ဒီ)

အန်အယ်လ်ဒီ မှတ်ပုံတင်လိုက်ရင် နိုင်ငံရေးအပြောင်းအလဲက ပိုပြီးတော့ ဆိုးသွားမယ်။ မှတ်ပုံမတင်တာကမှ တော်တယ်ဆိုပြီး ဒီလိုယူဆတာပါ။ တလုံးတစည်းတည်း စစ်အာဏာရှင် ကျွန်ခံရမယ့်အလုပ်ကို ကျနော်တို့မလုပ်ဘူး။ နိုင်ငံရေးက ပါတီဆိုင်းဘုတ်ရှိမှ မဟုတ်ပါဘူး။ ကျနော်တို့ နိုင်ငံရေး ဆက်လုပ်သွားကြမယ်။

NLD ရွေးကောက်ပွဲ မ၀င်

ကိုထွေး Monday, March 29, 2010
E-mail Print
နိုင်ငံ တ၀န်းလုံးရှိ အမျိုးသား ဒီမိုကရေစီ အဖွဲ့ချုပ် (NLD) ကိုယ်စားလှယ် များသည် လာမည့် ရွေးကောက်ပွဲတွင် ပါတီမှတ်ပုံ မတင်ရန် ဆုံးဖြတ်ချက်ကို ယနေ့ ချမှတ် လိုက်သည်။

ရန်ကုန်မြို့ ရွှေဂုံတိုင်ရှိ NLD ရုံးချုပ်၌ ကျင်းပသော မှတ်ပုံတင်ရေး မတင်ရေး ဆွေးနွေးပွဲတွင် နိုင်ငံတ၀န်းရှိ NLD ကိုယ်စားလှယ် ၁၁၃ ဦးတို့က ကန့်ကွက်သူမရှိ မှတ်ပုံမတင်ရန် ဆုံးဖြတ်လိုက်ခြင်းဖြစ်သည်။

[ပါတီ မှတ်ပုံတင်ရေး မတင်ရေး ယနေ့ အစည်းအဝေးမကျင်းပမီ NLD ရုံးချုပ်ရှေ့၌ တွေ့ရသော အဖွဲ့ဝင်လူငယ် တချို့ (ဓာတ်ပုံ - AP)]

ပါတီ မှတ်ပုံတင်ရေး မတင်ရေး ယနေ့ အစည်းအဝေးမကျင်းပမီ NLD ရုံးချုပ်ရှေ့၌ တွေ့ရသော အဖွဲ့ဝင်လူငယ် တချို့ (ဓာတ်ပုံ - AP)
NLD ပြန်ကြားရေး အဖွဲ့ဝင် ဦးအုန်းကြိုင်က “ဗဟို ဦးစီး အဖွဲ့ဝင်များရဲ့ ဆွေးနွေး ချက်များအရ နအဖက ထုတ်ပြန် ထားသော ၂၀၁၀ ခုနှစ် ရွေးကောက်ပွဲ ဆိုင်ရာ ဥပဒေ များသည် လုံးဝ မျှတမှု မရှိတော့ပါသဖြင့် NLD ကို ထပ်မံ မှတ်ပုံတင် တော့မည် မဟုတ်ကြောင်း အများ သဘောတူ ကန့်ကွက်သူ မရှိ ဆုံးဖြတ်သည်” ဟု ပြောသည်။

ဒေါ်အောင်ဆန်း စုကြည် အပါအ၀င် ဖမ်းဆီး ထားသော အကျဉ်းသား အားလုံး လွှတ်ပေးရန် တောင်းဆိုသည့် ဆုံးဖြတ်ချက် ကိုလည်း ချမှတ် လိုက်ကြောင်း ၎င်းက ဆက်ပြောသည်။

ဥက္ကဋ္ဌ ဦးအောင်ရွှေကကျန်းမာရေး အရ အစည်းအဝေးသို့ တက်ရောက်ခြင်း မရှိသော်လည်း ပါတီခေါင်းဆောင် ဒေါ်အောင်ဆန်း စုကြည် ဆုံးဖြတ်ချက် အတိုင်း လိုက်နာမည်ဖြစ်ကြောင်း စာတစောင် ပေးပို့ခဲ့ကြောင်း သိရသည်။

ဆွေးနွေးပွဲ မစတင်မီ ဦးအောင်ရွှေ၏စာနှင့် ဒေါ်အောင်ဆန်းစုကြည်က ပေးပို့ခဲ့သော ၎င်း၏ သဘောထား ရေးသားထားသည့် စာကို ဦးဉာဏ်ဝင်းက ဖတ်ပြခဲ့ပြီး မဲခွဲ ဆုံးဖြတ်မှုများ စတင် ကြောင်းသိရသည်။

ဒေါ်အောင်ဆန်းစုကြည်၏ စာတွင် ဖွဲ့စည်းပုံအခြေခံဥပဒေကို လက်မခံနိုင်သည့်အတွက် ရွှေဂုံတိုင် စာတမ်းကို ဆက်လက် ကိုင်ဆွဲထားဆဲ ဖြစ်ကြောင်း၊ မတရားသည့် ရွေးကောက်ပွဲ ဥပဒေဖြစ်သောကြောင့် NLD အနေဖြင့် မှတ်ပုံတင်ရန် လက်မခံ နိုင်ကြောင်း၊ NLDသည် ၎င်း၏ ကိုယ်ပိုင်မဟုတ်သကဲ့သို့ မည်သူ တဦး တယောက် ပိုင်မျှ မဟုတ်ကြာင်း ပါရှိသည်။

ယင်းအပြင် ပါတီအတွင်း အုပ်စုဖွဲ့သည့် လုပ်ရပ်ကို လုံးဝမကြိုက်သကဲ့သို့ လက်မခံနိုင်ကြောင်း၊ ပြည်သူလူထုကိုလည်း ဒီမိုကရေစီ ရရှိရန် ဆက်လက်ကြိုးပမ်းမည်ဖြစ်ကြောင်း၊ ပါတီဖျက်သိမ်းခံရရုံနှင့် ပါတီပျက်စီးသွားခြင်း မဟုတ်ကြောင်း ထည့်သွင်းရေးသား ထားသည်။

ဒေါ်အောင်ဆန်းစုကြည်က တရားမျှတမှုမရှိသည့် ရွေးကောက်ပွဲ ဥပဒေအောက်တွင် ပါတီ မှတ်ပုံတင်ရေး အတွက် စဉ်းစားခဲ့ခြင်း လုံးဝမရှိကြောင်း ပြောကြားခဲ့ပြီး ၆ ရက်အကြာ ယခု ဆွေးနွေးပွဲကို ကျင်းပခြင်း ဖြစ်သည်။

အကျဉ်းကျခံနေသော NLD ခေါင်းဆောင်များ ရွေးကောက်ပွဲတွင် ပါဝင်ယှဉ်ပြိုင်ခွင့် မရှိစေရန် ပါတီများမှတ်ပုံတင်ခြင်း ဥပဒေက တားမြစ် ထားသည့် အပြင် NLD အနေဖြင့် မေလ ၇ ရက်နေ့တွင် ရွေးကောက်ပွဲ ကော်မတီထံသို့ မှတ်ပုံတင်ခြင်း မပြုပါက တရားဝင် ပါတီ အဖြစ်မှ ဖျက်သိမ်းခံရမည်ဖြစ်သည်။

ပြီးခဲ့သည့် ရက်ပိုင်းအတွင်း NLD အဖွဲ့ဝင်များအကြား ပါတီမှတ်ပုံတင်ရေး မတင်ရေးနှင့် ပတ်သက်၍ အငြင်းပွားခဲ့ကြသည်။ NLD လူငယ် ခေါင်းဆောင်များက ပါတီမှတ်ပုံမတင်ရန် ဆုံးဖြတ်ချက်ချမှတ်ခဲ့သည်။

အဖွဲ့ချုပ်ဝင်လူငယ် ၅၀ ကျော်ခန့်ကNLDအဖွဲ့ချုပ်ရုံးရှေ့တွင် နိုးအမှတ်တံဆိပ်ပါ တီရှပ်အဖြူရောင် ဆင်တူဝတ်ဆင်ထားကြပြီး
ပြည်နယ်နှင့်တိုင်းအသီးသီးမှ တက်ရောက်လာကြသော ကိုယ်စားလှယ်များကို စံပယ် ပန်းကုံးများနှင့် အောင်သပြေပန်းများ ကမ်း၍ ကြိုဆိုခဲ့ကြသည်။

“အခြေခံဥပဒေဟာ လုံးဝ လက်ခံနိုင်စရာမရှိတဲ့အတွက် မှတ်ပုံမတင်ပါဘူး” ဟု တနင်္သာရီတိုင်း ရေဖြူ မြို့နယ် ကိုယ်စားလှယ် ဦးတိုးပိုး က ဆိုသည်။

ဦးတိုးပိုးကဲ့သို့ပင် ကချင်ပြည်နယ်မှ ဦးမြသိန်း၊ ကရင်ပြည်နယ်မှ ဒေါ်နန်းခင်ထွေးမြင့်၊ ချင်းပြည်နယ်မှ ဦးအောင်သာ၊ ပဲခူးတိုင်း မှ ဦးအောင်စိုးမြင့်၊ ရှမ်းပြည်နယ်မှ ဒေါ်ခင်မိုးမိုးတို့က ဖွဲ့စည်းပုံအခြေခံ ဥပဒေကို လက်သင့်မခံကြောင်း၊ ရွှေဂုံတိုင် ကြေညာစာတမ်း ကိုသာ ကိုင်ဆွဲထား၍ မှတ်ပုံမတင်ကြောင်း ပြောဆိုသည်။ သို့သော်လည်း ကချင်ပြည်နယ်မှ ဦးတင်ဝယ်က မှတ်ပုံတင်သင့်ကြောင်း ပြောဆိုသည်။

NLDရုံး အနီးရှိ လက်ဖက်ရည်ဆိုင်တွင် အရပ်ဝတ်ရဲများနှင့် ထောက်လှမ်းရေး ၅၀ ကျော်ခန့်က ဗီဒီယိုကင်မရာများဖြင့် မှတ်တမ်း တင်လျက်ရှိသကဲသို့ စွမ်းအားရှင် (၂၀၀) ကျော်ခန့် ပါဝင်သော ဒိုင်နာကား ၆ စီး ကလည်း နံနက် ၈ နာရီ မထိုးမီကတည်းက ရောက်ရှိနေကြောင်း သိရှိရသည်။

NLD ပါတီသည် ၁၉၈၈ ခုနှစ်တွင် စတင် တည်ထောင်ခဲ့ပြီး ၁၉၉၀ ပြည့်နှစ် ရွေးကောက်ပွဲတွင် လူထုထောက်ခံမဲ အများဆုံးဖြင့် အနိုင် ရရှိခဲ့သည်။

ဤသတင်းကို ရန်ကုန် အခြေစိုက် ဧရာဝတီ သတင်းထောက် ခိုင်သွယ်က ပူးပေါင်းရေးသားသည်။

ရွေးကောက်ပွဲ မဝင်ရန် NLD ဆုံးဖြတ်

ဆလိုင်းဟံသာစန်း | တနင်္လာနေ့၊ မတ်လ ၂၉ ရက် ၂၀၁၀ ခုနှစ် ၁၇ နာရီ ၃၃ မိနစ်
အီးမေးလ်ပို့ရန် ပရင့်ထုတ်ရန် PDF ဖိုင်ရယူရန်

နယူးဒေလီ (မဇ္ဈိမ) ။ ။ အကြိတ်အနယ်ဆွေးနွေးပြီးနောက် ၂ဝ၁ဝ ရွေးကောက်ပွဲနှင့် ပတ်သက်၍ အမျိုးသားဒီမိုကရေစီအဖွဲ့ချုပ်အနေဖြင့် မှတ်ပုံမတင်ဟု ဆုံးဖြတ်လိုက်ကြသည်။

မှတ်ပုံတင်ရေး မတင်ရေးနှင့်ပတ်သက်၍ NLD ရုံးချုပ်၌ ယနေ့ပြုလုပ်သော ဗဟိုအလုပ်အမှုဆောင် ကော်မတီနှင့် ပြည်နယ်/တိုင်း ဗဟိုဦးစီးအဖွဲ့ဝင်များ၏ တွေ့ဆုံဆွေးနွေးအပြီး ပါတီခေါင်းဆောင်များက ရွေးကောက်ပွဲဝင်မည် မဟုတ်ကြောင်း ကန့်ကွက်သူမရှိ အတည်ပြု ဆုံးဖြတ်ခြင်း ဖြစ်သည်။
Copy_of_NLD-Offices
“ဒုဥက္ကဋ္ဌ ဦးတင်ဦး ကြေညာတာက ပါတီ ဗဟိုအလုပ်အမှုဆောင် ကော်မတီက ဆုံးဖြတ်ချက် ၂ ခု ချလိုက်တယ်။ ၂ဝ၁ဝ ရွေးကောက်ပွဲအတွက် NLD ပါတီ ဗဟိုဦးစီးအစည်းအဝေးရဲ့ ဆုံးဖြတ်ချက်အရ ကန့်ကွက်သူမရှိ ရွေးကောက်ပွဲ မှတ်ပုံမတင်ဘူး။ နောက်တချက်က မှတ်ပုံမတင်သော်လည်း ပါတီကို မဖျက်သိမ်းဘူး” ဟု ရုံးချုပ်ရှေ့တွင် ပါတီခေါင်းဆောင်များ၏ ဆုံးဖြတ်ချက်ကို စောင့်ဆိုင်းနေသည့် ပါတီလူငယ်အဖွဲ့ ခေါင်းဆောင်တဦးက ပြောသည်။

ထို့အပြင် ယနေ့ ဗဟိုအလုပ်အမှုဆောင် CEC နှင့် ဗဟိုဦးစီးအဖွဲ့ CC အစည်းအဝေးသို့ ပါတီ ဥက္ကဋ္ဌ ဦးအောင်ရွှေက တက်ရောက်လာခြင်း မရှိသော်လည်း ဒေါ်အောင်ဆန်းစုကြည်၏ အဆုံးအဖြတ်ကို လိုက်နာရန် အမှာစကားပါးလိုက်ကြောင်း သိရသည်။ ဒေါ်အောင်ဆန်းစုကြည်က ပါတီမှတ်ပုံမတင်ရန် ယခုလ ၂၃ ရက်နေ့တွင် သူမ၏ ရှေ့နေများမှတဆင့် သဘောထားပေးခဲ့ခြင်း ဖြစ်သည်။

CEC အဖွဲ့ဝင်ပေါင်း ၂ဝ ဦးနှင့် CC အဖွဲ့ဝင်ပေါင်း ဦးရေ ၁ဝဝ ရှိသည့်အနက် ယနေ့အစည်းအဝေးသို့ CEC ထဲမှ ဥက္ကဋ္ဌ ဦးအောင်ရွှေ၊ အတွင်းရေးမှူး ဦးလွင်၊ အဖွဲ့ဝင် ဦးလွန်းတင်တို့မှလွဲ၍ ကျန်အဖွဲ့ဝင်များ တက်ရောက်ကြပြီး၊ CEC ၊ CC အဖွဲ့ဝင်များနှင့် လူငယ်ခေါင်းဆောင် ၅ ဦး စုစုပေါင်း ၁၁၃ ဦး တက်ရောက်ခဲ့ကြသည်ဟု နောက်ဆုံးသိရှိရသည်။

ရန်ကုန်တိုင်း ဗဟန်းမြို့နယ်ရှိ ရုံးချုပ်၌ ပြုလုပ်သော အစည်းအဝေးတွင် ပါတီ၏ ရပ်တည်ချက်နှင့် ပတ်သက်သော အရေးပါသော ဆွေးနွေးပွဲကို နေ့လည် ၁၂ နာရီမှ စတင်၍ တင်ပြရာ ၁ နာရီ ၄၅ မိနစ်တွင် ပထမပိုင်း အစည်းအဝေး ရပ်နားခဲ့သည်။

ဒုတိယပိုင်းကို နေ့လည် ၂ နာရီတွင် ပြန်လည်စတင်ရာ CC က ဆက်လက်တင်ပြမှုများ ပြုလုပ်ခဲ့သည်။ ညနေ ၄ နာရီတွင် အဆိုပါ တင်ပြမှုများ ပြီးဆုံးသည့်အခါ CEC အစည်းအဝေး ဆက်လက်ပြုလုပ်ကာ ညနေ ၅ နာရီခန့်တွင် ယခုဆုံးဖြတ်ချက် ပေါ်ထွက်လာခြင်း ဖြစ်သည်။

ယခုလ ၈ ရက်နေ့တွင် စတင်ထုတ်ပြန်ခဲ့သည့် စစ်အစိုးရ၏ ရွေးကောက်ပွဲ ဥပဒေများအရ ပါတီအား ပြန်လည်မှတ်ပုံတင်မည်ဆိုလျှင် နေအိမ်တွင် ပြစ်ဒဏ် ၁၈ လ ကျခံနေရသည့် ပါတီအထွေထွေ အတွင်းရေးမှူး ဒေါ်အောင်ဆန်းစုကြည်၊ အကျဉ်းကျခံနေရသည့် ဗဟိုဦးစီးအဖွဲ့ဝင် ၁ဝ ဦးနှင့် ပါတီဝင်များအား ပါတီမှ ထုတ်ပယ်ပစ်ရမှာဖြစ်သည်။

အကယ်၍ ထုတ်ပယ်ခြင်း မရှိလျှင်၊ ရက် ၆ဝ အတွင်း မှတ်ပုံတင်ခြင်း မရှိလျှင် ပါတီသည် အလိုလျောက် ဖျက်သိမ်းရမည့် အခြေအနေတွင် ရောက်ရှိနေသဖြင့် NLD ပါတီ ခေါင်းဆောင်ပိုင်းအတွင်း ရွေးကောက်ပွဲ ကော်မရှင်ထံ ပြန်လည်၍ မှတ်ပုံတင်ရေး၊ မတင်ရေးဟူသည့် အငြင်းပွားမှုများ ဖြစ်ခဲ့ရသည်။

ယခုလ ၂၆ ရက်နေ့တွင် ပြည်နယ်/တိုင်း အဆင့် လူငယ်လုပ်ငန်း ဖော်ဆောင်ရေးနှင့် အကူအညီပေးရေး အဖွဲ့ဝင် ၆ဝ ဦးခန့် တက်ရောက်သော အစည်းအဝေးက ရွေးကောက်ပွဲ ဥပဒေကို လက်သင့်မခံနိုင်ဘဲ ပါတီကို မှတ်ပုံတင်ခြင်း မပြုရန် ဆုံးဖြတ်ခဲ့ကြသည်။

ပါတီ ဥက္ကဋ္ဌ ဦးအောင်ရွှေက ယခုလ ၁၅ ရက်နေ့တွင် ပါတီဌာနချုပ်တွင် ပါတီ ဆက်လက် ရှင်သန်နိုင်ရေးအတွက် ရွေးကောက်ပွဲကော်မရှင်တွင် မှတ်ပုံတင်ဖို့ စဉ်းစားရန် အဆိုပြုခဲ့ပြီးနောက် လူငယ်များ၏ သဘောထား ထိုသို့ ပေါ်ထွက်ခဲ့ခြင်း ဖြစ်သည်။

မြန်မာနိုင်ငံ အကျဉ်းထောင်များတွင် CC အဖွဲ့ဝင် ၁ဝ ဦး အပါအဝင် ပါတီဝင် ၄၃ဝ ကျော်မှာ အကျဉ်းကျနေဆဲဖြစ်ပြီး စုစုပေါင်း နိုင်ငံရေးအကျဉ်းသားပေါင်း ၂၁ဝဝ ကျော်ရှိနေသည်။

၁၉၉ဝ ခုနှစ် ရွေးကောက်ပွဲတွင် NLD သည် နိုင်ငံတဝှန်းတွင် အမတ်နေရာ ၈၂ ရာခိုင်နှုန်းကျော်ဖြင့် အနိုင်ရရှိခဲ့သော်လည်း စစ်အစိုးရက အာဏာလွှဲပြောင်းပေးခြင်း မရှိခဲ့ဘဲ နောက်တကြိမ်ရွေးကောက်ပွဲသာ ကျင်းပရန် ပြင်ဆင်နေသည်။

ဖက်ဆစ်တော်လှန်ရေး၊ Force - ၁၃၆ … ဗိုလ်ချုပ်အောင်ဆန်းနှင့် ကြေးနန်းနှစ်စောင်
http://www.mizzimaburmese.com/edop/songpa/5102--force----.html

မင်းဟန် | ဗုဒ္ဓဟူးနေ့၊ မတ်လ ၂၄ ရက် ၂၀၁၀ ခုနှစ် ၁၂ နာရီ ၅၁ မိနစ်
အီးမေးလ်ပို့ရန် ပရင့်ထုတ်ရန် PDF ဖိုင်ရယူရန်

(၂ဝ၁ဝ ခုနှစ် မတ်လ ၂၇ ရက်နေ့တွင် ကျရောက်သည့် ၆၅ နှစ်မြောက် ဖက်ဆစ်တော်လှန်ရေးနေ့သို့…..)

(က)
ပထမတွင် ….ဖက်ဆစ်တော်လှန်ရေးကြီးအား မတ်လ ၂၅ ရက်နေ့တွင် စတင်ရန် ဗိုလ်ချုပ်အောင်ဆန်းက သတ်မှတ်ထား၏။

သို့သော်…. အင်္ဂလိပ်စစ်တပ်များအား ခုခံတိုက်ခိုက်ရန်၊ ဂျပန်စစ်ဌာနချုပ်က ဗမာ့တပ်မတော်ကို၊ ‘စစ်အမိန့်’ ထုတ်ပြန်ပေးခဲ့သည့်အတွက် …ပထမ သတ်မှတ်ထားခဲ့သောရက်အား ပြင်ဆင်ခဲ့ကြရသည်။ မတ်လ ၂၅ ရက်မှ…. ဧပြီလ ၂ ရက်နေ့သို့ ပြောင်းလဲလိုက်၏။

တော်လှန်မည့်နေ့ ‘ဒီ ဒေး’ အပြောင်းအလဲရှိသကဲ့သို့ …စစ်တိုင်း ၁ ၏ စစ်ရေးခေါင်းဆောင်နှင့် နိုင်ငံရေးခေါင်းဆောင် အပြောင်းအလဲများလည်း ရှိ၏။

မတ်လ ၂၅ ရက်နေ့တွင်မူ ….. တပ်မတော်နှင့် တော်လှန်ရေးအား ဆန့်ကျင်ပြီး ဂျပန်တို့နှင့် ပူးပေါင်းလိုသည့် ဗိုလ်မှူးရန်နိုင် (ရဲဘော်သုံးကျိပ်ဝင်၊ ဒေါက်တာ ဘမော်၏ သားမက်) ၏ သတင်းပေးမှုကြောင့် ဂျပန်စစ်ဘက်ဌာနက သိရှိသွားပြီး တပ်မတော်၏ လှုပ်ရှားမှုများအား အရေးယူစုံစမ်းလာ၏။ ပဲခူးရှိ တိုင်း ၄ တွင် လက်နက်များသိမ်းယူမည်အထိ အခြေစိုက်လာ၏။ ဤတွင် ….. တပ်မတော်အနေနှင့် ဖက်ဆစ်တော်လှန်ရေးအား လက်ဦးမှုရယူနိုင်ရန်အတွက် …. တော်လှန်ရေးစတင်မည့် ရက်နှင့် အချိန်အား အရေးပေါ်ပြောင်းလဲသတ်မှတ်လိုက်ရ၏။ ဖက်ဆစ်တော်လှန်ရေးကြီး စတင်မည့် နေ့ရက်…

‘ဒီ-ဒေး’ ကား …၁၉၄၅ ခုနှစ် မတ်လ ၂၇ ရက်….။ စတင်မည့်အချိန် ‘န-နာရီ’ က … ၁၉းဝဝ နာရီ…။

(ခ)
၁၉၄၅ ခုနှစ် ၊ မတ်လ ၃၁ ရက်…။
မင်းတုန်းမြို့နယ်၊ ကစွန်းမြောင်ရွာ…လယ်တဲ…။

ဗိုလ်ချုပ်အောင်ဆန်း၏ ဗဟိုစစ်ဦးစီးဌာနချုပ်အား ကံမမြို့နယ် ပုဏ္ဍားရွာတွင် အခြေစိုက်ထားပြီး၊ ဗိုလ်မှူးအောင်၏ တိုင်း ၇ တိုင်းစစ်ဌာနချုပ်က …. မင်းတုန်းမြို့နယ် ကစွန်းမြောင်ရွာအနီးရှိ လယ်တဲငယ်တခုတွင် ယာယီအခြေပြုထားသည်။ ပုဏ္ဍားရွာနှင့် ကစွန်းမြောင်ရွာများက ခြေလျင်ခရီးနှင့် ၄ မိုင် ခရီးမျှသာဝေး၏။

ဖက်ဆစ်တော်လှန်ရေး မစတင်မီကတည်းမှပင် ဆင်းမလားရောက် ဗြိတိသျှများနှင့် ဖဆပလ သည် အဆက်အသွယ် ရရှိထားခဲ့၏။ ဖက်ဆစ်တော်လှန်ရေးအတွက် အိန္ဒိယရှိ သခင်သိန်းဖေ (စာရေးဆရာ သိန်းဖေမြင့်) ၏ အဆက်အသွယ်ဖြင့် ဖဆပလ နှင့် Force - ၁၃၆ အကြား စစ်ရေးအရ အပြန်အလှန် ဆက်သွယ်မှု ရှိနေ၏။ ကြိုးမဲ့ကြေးနန်းဆက်သွယ်ရေး တပ်သားများအား Force - ၁၃၆ မှ လေထီးနှင့် ဖက်ဆက်တော်လှန်ရေး စစ်တိုင်းကြီးများတွင် ချပေး၏။ စစ်တိုင်းများအားလုံးတွင်မူ မဟုတ်…။ ဗိုလ်မှူးအောင်၏ တိုင်း ၇ တွင် ရှိ၏။ သခင်သန်းထွန်း၊ ကိုဗဟိန်းတို့ အခြေပြုထားသည့် ပဲခူးရိုးမအရှေ့ခြမ်းတွင် ရှိ၏။ မြစ်ဝကျွန်းပေါ်ရှိ တိုင်း ၂ တွင် ရှိ၏။ တိုင်း ၂ တွင်က …. သခင်စိုးနှင့် ဗိုလ်မှူးကြီးနေဝင်းတို့ တာဝန်ယူကြ၏။ ဗိုလ်ချုပ်အောင်ဆန်း ဦးစီးသည့် ဗဟိုစစ်ဦးစီးဌာနချုပ်တွင်က မရှိ….။ တိုင်း ၇ နှင့်တွဲ၍ သုံးရသည်။

မတ်လ ၃၁ ရက်နေ့၊ နံနက်မှာပင် ဗိုလ်ချုပ်တို့ တိုင်း ၇ စစ်ဌာနချုပ်ရှိရာ မင်းတုန်းမြို့နယ်၊ ကစွန်းမြောင်ရွာအနီးရှိ လယ်တဲတခုသို့ ရောက်ရှိလာကြ၏။ ဗိုလ်ချုပ်နှင့်အတူ…. ဗိုလ်မှူးမင်းခေါင် (ရဲဘော်သုံးကျိပ်ဝင်) ဗိုလ်မှူးထွန်းအုံ (မြူနီစပယ်မင်းကြီး၊ အငြိမ်းစား)၊ ဗိုလ်မှူးစမိုက် (ဗိုလ်မှူးကြီး လှအောင်) ၊ ဗိုလ်မှူးဖိုးကွန်း (ပြည်သူ့ရဲဘော်၊ အငြိမ်းစား၊ ဆိုဗီယက်သံအမတ်ကြီး) တို့လည်း လိုက်ပါလာကြသည်။

တပေါင်းနွေ၏ မွန်းတည့်နေက ပူပြင်းလွန်းလှ၏။ အပူရှိန်ကြောင့် သက်ကယ်မိုးသည် တဖျစ်ဖျစ်နှင့် မြည်နေ၏။ ညိုခြောက်နေသည့် ရိုးပြတ်တောအား ဖြတ်၍တိုက်ခတ်လာည့်လေကား…. လေပူ….။ တဲအရှေ့ရှိ လက်ပံပင်အိုညီနောင်က တပင်လုံး အပွင့်နီနီရဲရဲများနှင့် အနီရောင် ချယ်ထား၏။ လေပူအဝှေ့ကြောင့် လက်ပံပွင့်တို့က လေဟုန်စီး၍ မြေသို့ ဝဲ၍ …ဝိုက်၍ သက်ဆင်းနေကြ၏။ မြေပြင်ပင်ရင်းတွင်လည်း ရဲရဲ…။

တဲအတွင်း၌က …. ဗိုလ်ချုပ်၊ ဗိုလ်မှူးအောင်၊ ဗိုလ်မှူးစိန်မှန်၊ ဗိုလ်မှူးထွန်းအုံ၊ ဗိုလ်မှူးမင်းခေါင်နှင့် သခင်တင်မြတို့ ထိုင်နေကြ၏။ ဗိုလ်ချုပ်သည် Force - ၁၃၆ ၏ တပ်ဖွဲ့မှူးမှ သူ့ထံသို့ ပေးပို့လိုက်သည့် ကြေးနန်စာအား ဖတ်နေသည်။ ကြေးနန်စာအား ဖတ်ရင်း ဗိုလ်ချုပ်သည် ‘ဟန်းကော’ အတွင်းမှ ရေနွေးကြမ်းပူပူအား တခွက်ပြီး တခွက် သောက်၍နေ၏။ ကြေးနန်စာအား ဖတ်နေသည့် ဗိုလ်ချုပ်၏ မျက်နှာသည် …. တင်းမာမှုများနှင့် …။ တင်းမာနေသော ဗိုလ်ချုပ်၏မျက်နှာက …. တည်တည်ငြိမ်ငြိမ်ပင် …ဒေါသမထွက်…။

(ဂ)
Force - ၁၃၆ က (ဖဆပလ) အား ဖက်ဆစ်တော်လှန်ရေးတွင် သူတို့၏ ပြောက်ကျားတပ်၊ သတင်းပေးအဆင့်နှင့်သာ ဆက်ဆံချင်၏။ ဖက်ဆစ်ဝင်ရိုးတန်း အင်အားစုအား စစ်ရေးအရ မဟာမိတ်ပြု၍၊ တော်လှန်တိုက်ပွဲဝင်နေသည့် ဖက်ဆစ်တော်လှန်ရေး ပြည်သူ့တပ်မတော်အဖြစ် (ဖဆပလ) အပေါ် သဘောမထားလို..။ ပြီးလျှင် … လေထီးနှင့် ချပေးထားသည့်၊ ကြိုးမဲ့ကြေးနန်းဆက်သွယ်ရေး စက်များကိုလည်း Force - ၁၃၆ နှင့်သာ ဆက်သွယ်ရမည်။ အခြားစစ်တိုင်းများနှင့် အချင်းချင်း မဆက်သွယ်ရဟူ၍ ကန့်သတ်ထား၏။ လက်နက်နှင့် ခဲယမ်းမီးကျောက်များအား ဖက်ဆစ်တော်လှန်ရေးအတွက် လေထီးနှင့် ချပေးမည့် အစီအစဉ်ကိုလည်း ဖက်ဆစ်တော်လှန်ရေးကြီး စတင်သည့် အချိန်အထိ မချသေး…။ ဤတွင် … တိုင်း ၇ ၏ ဒုတိယစစ်ရေးခေါင်းဆောင် ဗိုလ်မှူးစိန်မှန် ပေါက်ကွဲလေ၏။ မဟာမိတ်တပ်မျာအား ‘ငါ ’ နှင့် ကိုင်တုတ်ဖူး၏။

“ဒီမအေပေးတွေဆီက လက်နက်မရရော ဂျပန်ကို မတိုက်နိုင်တော့ဘူးလား။ ရှိတဲ့လက်နက်နဲ့ ဂျပန်တွေ ဖင်သနီလန်ကုန်အောင် တိုက်ပြမယ်။ ဂျပန်တင်မကဘူး ဒင်းတို့ကိုပါ တိုက်ပြမယ်။ … နယ်ချဲ့သမားတွေ”

ဗိုလ်ချုပ်သည် ကြေးနန်းစာအား အပြန်ပြန်အလှန်လှန် ဖတ်၏။ ပြီးလျှင် …. အနီးတွင် ထိုင်နေသည့် ဗိုလ်မှူးစိန်မှန်အား…။
“ကဲ… အားလုံးကြားရအောင် ဒီကြေးနန်းကို ဗိုလ်စိန်မှန်က ဖတ်ပြလိုက်စမ်းပါ”…ဟု ဗိုလ်ချုပ်က လက်အတွင်းမှ ကြေးနန်းစာအား ဗိုလ်မှူးစိန်မှန်သို့ လှမ်း၍ပေး၏။

ကြေးနန်စာက ….မတ်လ ၃၁ ရက်နေ့တွင် တိုင်း ၇ စစ်ဒေသသို့ ဗိုလ်ချုပ်တို့ ရောက်ရှိနေသည့် အကြောင်းအား Force - ၁၃၆ သို့ ဗိုလ်ချုပ်ကိုယ်တိုင် အကြောင်းကြားခဲ့သည့် ကြေးနန်းစာအပေါ် Force - ၁၃၆တပ်ဖွဲ့မှူးမှ ဗိုလ်ချုပ်ထံသို့ အကြောင်းပြန်လာသည့် ကြေးနန်းစာ ဖြစ်သည်။ ဗိုလ်မှူးစိန်မှန်က ….ဗိုလ်ချုပ်လှမ်းပေးသည့် ကြေးနန်အား အသံမြှင့်၍ ဖတ်ပြ၏။

“Major General Aung San (Self Styled)”…
“မေဂျာဂျင်နရယ်ဟု မိမိကိုယ်မိမိ ဘွဲ့ပေးထားသူ အောင်ဆန်း…”

ဗိုလ်မှူးစိန်မှန်သည် ကြေးနန်းစာ၏ ပထမတကြောင်းအား ဖတ်ပြီး… ဆက်၍ မဖတ်။ ရပ်လိုက်၏။ ပြီးလျှင် …. ဒေါသနှင့် …။

“ဒါဟာ ကျနော်တို့ကို စော်ကားတာပဲ ဗိုလ်ချုပ်။ ဒီကောင်တွေ လူပါးကို ဝတယ်။ ကျနော်တို့ကို သူတို့ရဲ့ ကျွန်တွေပဲလို့ ထင်နေတုန်းပဲနဲ့ တူတယ်”

အားလုံးက … Force - ၁၃၆ ၏ ကြေးနန်းတွင် ရေးထားသည့် ပထမဆုံးစာကြောင်းကြောင့်၊ မခံမရပ်နိုင်ဖြစ်၍ နေကြ၏။ မကျေနပ်ကြ…။

“ဗိုလ်ချုပ်ကို ဒီလို အမည်တပ်ရေးတာဟာ ဗိုလ်ချုပ်ကို ပုဂ္ဂိုလ်ရေးအရ စော်ကားကာတာတင် မဟုတ်ဘူး။ ကျနော်တို့ရဲ့ တော်လှန်ရေးကိုရော…။ တမျိုးသားလုံးကိုပါ စော်ကားရာကြတာပဲ”။ သခင်တင်မြက ဝင်ပြော၏။

“ ကဲပါလေ ဆုံးအောင်ဖတ်ပြီးမှ ထင်မြင်ချက် ပြောကြတာပေါ့။ ဆက်ဖတ်စမ်းပါ”

ဗိုလ်ချုပ်က …စကားစအား ဖြတ်၍ ဆက်ဖတ်ရန် အမိန့်ပေး၏။ ဗိုလ်မှူးစိန်မှန်သည် အံတတြိတ်ကြိတ်နှင့် ကြေးနန်းအား ဆက်၍ဖတ်၏။

“သင့်ထံမှ ကြေးနန်းကို လက်ခံရရှိသည်။ လက်ဖတင်နယ်ကာနယ် ကရူးအား ဖြူးအနောက်တွင် လေထီးနှင့် ချပေးပြီး ယခု သခင်သန်းထွန်းနှင့် အတူရှိနေသည်။ A.F.O နှင့် ပူးတွဲဆောင်ရွက်မည့် တပ်ဖွဲ့ Force - ၁၃၆ မှ အရာရှိအားလုံးကို ကာနယ်ကရူးက အုပ်ချုပ်လိမ့်မည်။ ဂျပန်အား ထိရောက်စွာ တိုက်ခိုက်ရေးအတွက် A.F.O လက်အောက်ရှိ သင်အုပ်ချုပ်နေသော လက်နက်ကိုင်တပ် အားလုံးသည် မဟာမိတ်စစ်ဌာနချုပ်၏ စစ်အမိန့် ညွှန်ကြးချက်များကို လိုက်နာဆောင်ရွက်သင့်သည်။ သင်၏ အုပ်ချုပ်မှုအောက်တွင် ရှိနေသော မင်းဘူး၊ မကွေး၊ သရက်ဒေသများရှိ သင်တို့၏ လက်နက်ကိုင်တပ်များသည် ဂျပန်များကို ထိရောက်စွာ တိုက်နိုင်မည်မဟုတ်။ သို့ကြောင့် ဤဒေသရှိ သင်၏ တပ်များကို ပြည်၊ သာယာဝတီ၊ အင်းစိန် မီးရထားလမ်းတလျှောက်သို့ အမြန်ဆုံး ပြောင်းရွှေ့၍ မဟာမိတ်စစ်ဌာနချုပ်၏ ညွှန်ကြားမှုအောက်တွင် ဂျပန်ကို စစ်ဆင်ရန် ဖြစ်သည်။ သင်၏ တပ်များအားလုံး ထိုဒေသသို့ ရောက်ပါက ကျွန်ုပ်တို့ထံမှ ဆက်သွယ်ရေးအရာရှိများနှင့် လိုအပ်သော ဆက်သွယ်ရေး ကိရိယာများကို လေထီးဖြင့် ချပေးမည်။ သင်တို့ လိုအပ်သော လက်နက်ခဲယမ်း၊ ဆေးဝါးနှင့် စစ်ပစ္စည်းများ ထောက်ပံ့ရေးကို ဆက်သွယ်ရေးအရာရှိများက ဆောင်ရွက်ပေးလိမ့်မည်။ သင်၏ သဘောထား အကြောင်းပြန်ပါ”

ကြေးနန်းက ဤတွင် ဆုံးပြီ….၊ အားလုံး၏ ရင်အတွင်းမှ ဒေါသမီးအပူက … တပေါင်းနွေနှင့် အပြိုင်…။ ဗိုလ်ချုပ်သည် သူ၏ တပ်မှူးများအား ဝေ့၍ကြည့်ပြီး…. တည်တည်ငြိမ်ငြိမ်နှင့်ပင် စကားအား ဆို၏။

“ဒီမှာ ကိုယ်တို့ ဂျပန်ကို ထချတာဟာ သူတို့အလိုကို လိုက်လျောဖို့၊ သူတို့က အသိအမှတ်ပြုတာကို ရချင်လို့ မဟုတ်ဘူး။ တိုင်းပြည်လွတ်လပ်ရေးအတွက် လုပ်သင့်လုပ်ထိုက်တဲ့ အလုပ်အဖြစ် ကိုယ်တို့ ဆန္ဒအလျောက် ဂျပန်ကို ထတော်လှန်ကြတာပဲ။ အဲဒီတော့ သူတို့က ကိုယ်တို့ကို အသိအမှတ်မပြုချင်၊ လေးလေးစားစား မဆက်ဆံချင်လည်း ပြဿနာမဟုတ်ပါဘူး။ ကိုယ်တို့အဖို့ ပြည်သူလူထုကို စည်းရုံးနိုင်သလောက် ပြည်သူလူထုနဲ့အတူ ဂျပန်ကို ချနိုင်သလောက် ကမ္ဘာက ကိုယ်တို့ရဲ့ ကြိုးပမ်းမှုကို အသိအမှတ် ပြုလာမှာပဲ။ ဒီအင်္ဂလိပ်တွေကိုလည်း သိပ်မမျှော်လင့်နဲ့။ သူတို့ဟာ နယ်ချဲ့သမားတွေဆိုတာလည်း မမေ့နဲ့။ ကဲ .. သူတို့ဆီကို ကိုယ်တို့ရဲ့ သဘောထား အမြန်ဆုံး ပြန်ပို့ရမယ်။ အဲဒီကြေးနန်း အခုပဲ ရေးလိုက်မယ်”

ဗိုလ်ချုပ်၏ စကားဆုံးသည်နှင့် တဲအတွင်း၌ ခဏငယ်မျှ တိတ်ဆိတ်၍သွား၏။ ဗိုလ်ချုပ်သည် ‘ဟန်းကော’ အတွင်းမှ ရေနွေးကြမ်းပူပူအား ငှဲ့၍ သောက်၏။ ပြီးလျှင် …. စာရွက်လွတ်တရွက်ပေါ်၌ ကြေးနန်းစာအား ချ၍ရေး၏။

“မှ
မေဂျာဂျင်နရယ်အောင်ဆန်း
စစ်ခေါင်းဆောင်
ဖ တ ပ လ အဖွဲ့ချုပ်
မြန်မာနိုင်ငံ။

သို့
စစ်သေနာပတိ
မဟာမိတ် စစ်ဌာနချုပ်
အရှေ့အာရှတောင်ပိုင်း

သင်တို့ထံမှ ပေးပို့သော…. နေ့စွဲပါ ကြေးနန်းကို ရရှိပါသည်။ ဂျပန်အား ထိရောက်စွာ တိုက်ခိုက်ရေးအတွက် မင်းဘူး၊ မကွေး၊ သရက် ဒေသများရှိ ကျွန်ုပ်တို့ တပ်များအားလုံး ပြည်၊ သာယာဝတီ၊ အင်းစိန် ဒေသများသို့ ပြောင်းရွှေ့၍ စစ်ဆင်တိုက်ခိုက်ပါ ဟူသော သင်တို့၏ အကြံပေးချက်ကို လက်မခံနိုင်ပါ။ ပြည်၊ သာယာဝတီ၊ အင်းစိန် ဒေသများတွင် ကျွန်ုပ်တို့ အုပ်ချုပ်မှုအောက်ရှိ ဗမာ့အမျိုးသားတပ်မတော်မှ တပ်ရင်းအချို့နှင့် ပြောက်ကျားတပ်အချို့ တပ်ဖြန့်စစ်ဆင်လျက်ရှိပါသည်။ ဖ တ ပ လ အဖွဲ့ချုပ်မှ ချမှတ်ထားသော စစ်ဆင်ရေး အစီအစဉ်အတိုင်း ဂျပန်ဖက်ဆစ်များကို ကျွန်ုပ်တို့ တပ်များက တိုက်ခိုက်ရင်း သင်တို့၏ မဟာမိတ်တပ်များနှင့် စစ်မျက်နှာများတွင် ပူးတွဲတိုက်ခိုက်သွားလိုသည်။

သို့ကြောင့် မြန်မာနိုင်ငံပေါ်မှာ ဖက်ဆစ်ဂျပန်များကို ထိရောက်စွာ စစ်ဆင်တိုက်ခိုက်ရေးအတွက် လိုအပ်သော စစ်ရေးအစီအစဉ်များကို သင်တို့နှင့် ညှိနှိုင်းရေးဆွဲရန် သင်တို့ထံမှ ဆက်သွယ်ရေးအရှာရှိ တယောက် ကျွန်ုပ်ထံ အမြန်ပို့ပေးစေလိုသည်။ လောလောဆယ်အားဖြင့် သင်တို့ ပေးမည်ဟု ကတိပြုထားသော လက်နင်ခဲယမ်းနှင့် ဆေးဝါးစစ်ပစ္စည်းများကို ကျွန်ုပ်တို့ ညွှန်ပြသည့် နေရာများသို့ အမြန်ဆုံး ချပေးစေလိုသည်။

လက်နက်ခဲယမ်းကို အမြန်ဆုံး လေထီးနှင့်ချပေးရမည့်တပ်များနှင့်ဒေသမှာ
(၁) ဗိုလ်ကြီးစိန်ဝင်း ခေါင်းဆောင်သော တပ်ရင်း ၆ ၊ မင်းတုန်းအရှေ့ဒေသ။
(၂) ဗိုလ်ကြီးစန်းယု ခေါင်းဆောင်သော တပ်ရင်း ၂ ၊ မင်းတုန်း ပတ်ဝန်းကျင်ဒေသ။
(၃) ဗိုလ်ကြီးမိုးညို ခေါင်းဆောင်သော စက်မှုလက်မှု တပ်ရင်း၊ မင်းဘူးဒေသ။
(၄) ဗိုလ်မင်းလွင် အုပ်ချုပ်သော တိုင်း ၇ ဌာနချုပ်၊ ကင်းတပ်ခွဲ
အမြန်အကြောင်းပြန်ပါ။ ဗိုလ်ချုပ်သည် သူ၏ကြေးနန်းအား အဆုံးသတ်လိုက်၏။
လေအသွေ့ကြောင့်….တဲအရှေ့ရှိ လက်ပံပင်ညီနောင်မှ လက်ပံပွင့်တို့က …. လေဟုန်စီး၏။ ဝေလည်း ရဲရဲ….။ ကြွေလည်း ရဲရဲ…..။

“… ရင့်ကြွေ ညောင်းသည်
ရွက်ဟောင်း စွန့်ပစ်၊ ဘဝသစ်သို့
သနစ်ပြောင်းမည်၊ ဖူးသစ်မိသည်
အနီထဲမှ ကြယ်ဖြူပွင့် … ”

(ဒဂုန်တာရာ၏… မတ်လတော်လှန်ရေးကဗျာမှ)

အညွှန်း။ ။ သခင်တင်မြ၏ ဘုံဘဝမှာဖြင့် (ဆဋ္ဌမတွဲ)

“NLD နဲ့ ဒေါ်အောင်ဆန်းစုကြည်တို့က ခွဲလို့မရပါဘူး” ဆိုတဲ့
ဆရာလူထုစိန်ဝင်းနဲ့ အင်တာဗျူး

(ဗွီအိုအေ အင်တာနက်စာမျက်နှာမှ ကူးယူဖော်ပြသည်)

ဒီတပတ် မြန်မာ့မျက်မှောက်ရေးရာ ဆွေးနွေးခန်းမှာ ၀ါရင့်သတင်းစာဆရာကြီး လူထုဦးစိန်ဝင်းကို ဦးကျော်ဇံ သာဆက်သွယ်ပြီး အမျိုးသားဒီမိုကရေစီအဖွဲ့ချုပ်အနေနဲ့ ဒီလိုအခြေအနေမှာ ဘာတွေလုပ်သင့်၊ သူ့ရဲ့  NLD နဲ့ ရွေးကောက်ပွဲအပေါ်ထားရှိတဲ့ အမြင်တွေကို ဆွေးနွေးသုံးသပ် တင်ပြထားပါတယ်။

ဦးကျော်ဇံသာ ။ ။ မြန်မာနိုင်ငံ စစ်အစိုးရရဲ့  ရွေးကောက်ပွဲဥပဒေကို လူတော်တော်များများ လက်မခံကြပါဘူး။ ဒီတကြိမ်မှာ ၉၀ ပြည့်နှစ် ရွေးကောက်ပွဲမှာ လူထုထောက်ခံမှု တခဲနက်ရခဲ့တဲ့ အမျိုးသားဒီမိုကရေစီအဖွဲ့ချုပ် အ နေနဲ့ ဘယ်လို ဆုံးဖြတ်သင့်တယ်လို့ ဆရာထင်ပါသလဲ။

ဦးစိန်ဝင်း ။ ။ ဘယ်လိုဆုံးဖြတ်သင့်တယ်ဆိုတာကိုတော့ ကျနော့်အလုပ်မဟုတ်တဲ့အတွက် ကျနော် မပြောနိုင် ပါဘူး။ ကျနော်က ဘယ်လို ဆုံးဖြတ်သင့်တယ် ထင်သလဲဆိုတဲ့ အမေးကိုတော့ ဖြေလို့ရတယ်။ အနှစ် (၂၀) လုံးလုံး အမျိုးသားဒီမိုကရေစီအဖွဲ့ချုပ်ရဲ့ လုပ်ရပ်တွေကို စောင့်ကြည့်လာတဲ့ လူတယောက်အနေနဲ့ အနှစ် (၂၀) လုံး NLD လုပ်ခဲ့တာက အစိုးရ စိတ်ဆိုးမယ့်ကိစ္စ၊ အစိုးရမကြိုက်တဲ့ ကိစ္စတွေ သူဘာမှ မလုပ်ဘူး။ အစိုးရ လုပ် စေချင်တာဘဲ လုပ်မယ်ဆိုပြီး သူကရပ်တည်ခဲ့တာ။ အဲဒါကြောင့် အခုလည်း အစိုးရ လုပ်စေချင်တဲ့အတိုင်း သူ့ ပါတီကို မှတ်ပုံတင်မယ်၊ ရွေးကောက်ပွဲဝင်မယ်လို့ ယူဆပါတယ်။

“ဟုတ်ပါတယ်။ ကျနော် ကြိုက်သည်ဖြစ်စေ မကြိုက်သည်ဖြစ်စေ၊ သဘောတူသည်ဖြစ်စေ မတူသည်ဖြစ်စေ ဒေါ်အောင်ဆန်းစုကြည်မှတပါး ဒီနေ့ ဗမာပြည်သူလူထုကို ဦးဆောင်နိုင်တဲ့လူ၊ ဒေါ်အောင်ဆန်းစုကြည်မှတပါး တပ်မတော်နဲ့ ပြည်သူလူထုကို ရင်ကြားစေ့အောင် ဆောင်ရွက်နိုင်တဲ့လူ ဗမာပြည်မှာ ဘယ်သူမှမရှိပါဘူး”

ဦးကျော်ဇံသာ ။ ။ ဆရာရဲ့  ယူဆချက်က ရွေးကောက်ပွဲ မ၀င်ချင်ဘူးလို့ ထင်ပါသလား။

ဦးစိန်ဝင်း ။ ။ ၀င်သင့်မ၀င်သင့်လို့ ကျနော်က မပြောချင်ဘူး။ ကျနော်မှာ သူကိုပြောပိုင်ခွင့် မရှိဘူး။ သတင်းသ မားတယောက်အနေနဲ့က ဖြစ်ပျက်နေတဲ့ သတင်းတွေပေါ်မှာ ကျနော်က ဝေဖန်သုံးသပ်တာပဲ လုပ်နိုင်တယ်။ သူ့အနေနဲ့ ၀င်လိမ့်မယ်လို့ပဲ ကျနော်က ပြောတယ်။ ရွေးကောက်ပွဲဝင်တဲ့ လူတွေကိုလည်း ကျနော်က မှား တယ်၊ မှန်တယ်လို့ ကျနော်မှာ ပြောပိုင်ခွင့် မရှိဘူး။ ဒါ လူတဦးချင်းဆီရဲ့  ကိုယ်ပိုင်လွတ်လပ်စွာ ဆုံးဖြတ်ခွင့်ဖြစ် တယ်။ အဲဒါကြောင့် ကျနော်က ဘယ်ပါတီကိုမှ ရွေးကောက်ပွဲဝင်လို့ အပြစ်မတင်ပါဘူး။

ဦးကျော်ဇံသာ ။ ။ ဒါပေမယ့် ဆရာက NLD ကို စစ်အစိုးရအကြိုက် လိုက်လုပ်တယ်ဆိုတဲ့ အချက်ကိုတော့ ထောက်ပြဝေဖန်တယ်။

ဦးစိန်ဝင်း ။ ။ ဟုတ်ပါတယ်။ ဒါက ကျနော်တို့ သတင်းသမားရဲ့  အလုပ်။

ဦးကျော်ဇံသာ ။ ။ စစ်အစိုးရက NLD ကို ရွေးကောက်ပွဲ ၀င်စေချင်တယ်လို့ ထင်ပါသလား။ တကယ်တော့ NLD မ၀င်လေ ကောင်းလေ။ စစ်အစိုးရက သူတို့ လိုချင်တဲ့လူတွေက NLD မပါရင် နိုင်မယ်လို့ တမင် ဒီလိုအ ကွက်ဆင်တယ်လို့ မဖြစ်နိုင်ဘူးလား။

ဦးစိန်ဝင်း ။ ။ ကျနော်ကတော့ အဲဒီလို မယူဆဘူး။ NLD ကို အစိုးရကိုယ်တိုင်ကလည်း ၀င်စေချင်တယ်လို့ ကျ နော် ယူဆတယ်။ ဘာဖြစ်လို့လဲဆိုတော့ အစိုးရက ဒီနေ့အစိုးရက ပိုက်ဆံလည်း မလိုဘူး၊ ရာထူးအာဏာ လည်း လက်ရှိဖြစ်တယ်။ သူမှာ upper hand စင်ပေါ်ကလူပဲ။ သူလိုချင်တာ တခုပဲရှိတယ်။ Legitimacy ပဲ သူ လိုချင်တယ်။ အဲဒီ တရားဝင် ဖြစ်တည်မှု legitimacy ရဖို့အတွက်ဆိုရင် NLD ရွေးကောက်ပွဲဝင်ဖို့ လိုပါတယ်။ NLD ရွေးကောက်ပွဲ မ၀င်ဘူးဆိုရင် ကမ္ဘာတခုလုံးလည်း အသိအမှတ်ပြုကြမှာ မဟုတ်ဘူး။ သူလိုချင်တဲ့ legitimacy ကို ရမှာ မဟုတ်ဘူး။ ဒါကြောင့် အစိုးရကတော့ ရွေးကောက်ပွဲ ၀င်စေချင်တယ်လို့ ကျနော် ယူဆ ပါတယ်။

ဦးကျော်ဇံသာ ။ ။ NLD ရွေးကောက်ပွဲဝင်လို့ ၁၉၉၀ ရွေးကောက်ပွဲလို ပြန်လည်းအနိုင်ရခဲ့ရင် ဒီ ဖွဲ့စည်းပုံကို သူတို့ပြုပြင်နိုင်စရာ အကြောင်းမရှိဘူးလား။

ဦးစိန်ဝင်း ။ ။ မရှိဘူးခင်များ။ ဘာကြောင့်လဲဆိုတော့ ဖွဲ့စည်းအုပ်ချုပ်ပုံအခြေခံဥပဒေကို ရေးဆွဲထားတာကိုက ဒီဖွဲ့စည်းအုပ်ချုပ်ပုံကို ပြင်ချင်လို့ရှိရင် ၇၅% အထက် ထောက်ခံမှရမယ်။ စစ်တပ်က ၂၅% အမာခံ ရှိနေပြီဖြစ် တယ်။ တခြား သူကိုထောက်ခံမယ့် ကြံ့ဖွံ့တို့လို၊ သူရဲ့  cronies စီးပွားရေးသမားတွေကလည်း ၀င်အရွေးခံကြ အုံးမှာဆိုတော့ ဘယ်လိုမှ ပြင်ဆင်လို့ ရနိုင်စရာအကြောင်းမရှိပါဘူး။ နောက်တချက်က NLD ရွေးကောက်ပွဲ ၀င်ရင်လည်း ကျနော်က နိုင်မယ်လို့ မထင်ဘူး။

ဦးကျော်ဇံသာ ။ ။ ဒီနေရာမှာ အမျိုးသားဒီမိုကရေစီအဖွဲ့ချုပ်ရဲ့  ခေါင်းဆောင် တကယ်တော့ အမျိုးသားဒီမိုက ရေစီအဖွဲ့ချုပ်ဟာ ဒေါ်အောင်ဆန်းစုကြည်ရဲ့  အရှိန်အ၀ါနဲ့ အဓိကရပ်တည်နေတယ်ဆိုရင် မှားမယ်မဟုတ်ဘူး လို့ ထင်ပါတယ်။ အဲဒီတော့ ခေါင်းဆောင်ဖြစ်တဲ့ ဒေါ်အောင်ဆန်းစုကြည်က ၀င်မယ်မ၀င်ဘူး ပြတ်ပြတ်သား သား ပြောကြားသင့်တယ်လို့ ဆရာ မထင်ဘူးလား။ အခု ဒေါ်အောင်ဆန်းစုကြည်က ပါတီရဲ့  ဆုံးဖြတ်ချက်ကို လိုက်နာမယ်ဆိုတာကို ဆရာ ဘယ်လိုပြောလိုပါသလဲ။

ဦးစိန်ဝင်း ။ ။ ကျနော်ကတော့ ဒီကိစ္စဟာ အင်မတန် သေရေးရှင်ရေး အရေးကြီးတဲ့ကိစ္စ ဖြစ်တယ်။ ပါတီရဲ့  ရပ် တည်ရေးအတွက် နောက်ဆုံးအဆင့်ဖြစ်တယ်။ အဲဒီတော့ ပါတီခေါင်းဆောင် ဒေါ်အောင်ဆန်းစုကြည်မှာ အ ပြည့်အ၀ တာဝန်ရှိတယ်လို့ ကျနော်ကတော့ ယူဆတယ်။ ဒီကိစ္စမှာ သူဆုံးဖြတ်မှဖြစ်မှာပါ။ သူ့ဆုံးဖြတ်ချက် မ ဟုတ်ဘဲနဲ့ ပါတီက ခေါင်းဆောင်တွေက ဆုံးဖြတ်လိုက်မယ်ဆိုရင် NLD အောက်ခြေထုလူထုက လက်ခံမှာ မ ဟုတ်ပါဘူး။ ဘာဖြစ်လို့လဲဆိုတော့ လက်ရှိ NLD ခေါင်းဆောင်မှုတွေကို ပြည်သူလူထုက လုံးဝအယုံအကြည် မရှိတော့ပါဘူး။ တော်တော်လေး စိတ်ကုန်နေကြပါပြီ။

ဦးကျော်ဇံသာ ။ ။ ဆိုတော့ ဒေါ်အောင်ဆန်းစုကြည်က ဦးဆောင်ပြီး ဆုံးဖြတ်သင့်တယ်ပေါ့။

ဦးစိန်ဝင်း ။ ။ ဟုတ်ပါတယ် ဒေါ်အောင်ဆန်းစုကြည် ကိုယ်တိုင် ဆုံးဖြတ်ရပါမယ်။ သူ ဆုံးဖြတ်မှ ပြည်သူလူထု က လက်ခံမှာ။ NLD အောက်ခြေတွေကလည်း ဒေါ်အောင်ဆန်းစုကြည် ဆုံးဖြတ်ချက်ဆိုရင်တော့ ဘာမဆို လက်ခံမှာပဲ။ အခုရှိနေတဲ့ CEC (Central Executive Committee) တွေ၊ CC (Central Committee) တွေကို ပြည်သူလူထုက အယုံအကြည်မရှိပါဘူး။ NLD အောက်ခြေတွေကလည်း အယုံအကြည် မရှိပါဘူး။ ဒါကြောင့် မို့ သူတို့ဆုံးဖြတ်ချက်နဲ့လည်း မပြီးပါဘူး။

ဦးကျော်ဇံသာ ။ ။ ဒီတခါ ဒေါ်အောင်ဆန်းစုကြည် ကိုယ်တိုင် ဆုံးဖြတ်ချက်ချဖို့ သူမှာ ဘာအခက်အခဲတွေရှိနေ လို့ သူကိုယ်တိုင် မဆုံးဖြတ်ဘဲ ပါတီက ဆုံးဖြတ်ပါလို့ ပြောသလဲ။ ဆရာ ဘယ်လိုတွက်ပါသလဲ။

ဦးစိန်ဝင်း ။ ။ သူကတော့ ပါတီဝင်ကောင်းတယောက်အနေနဲ့ ပါတီအများစု ဆုံးဖြတ်တာကို နားခံမယ်ဆိုတဲ့ ပါ တီဝင်ကောင်း တယောက်ရဲ့  ကျင့်ဝတ်ကို ပြချင်တာလို့ ကျနော်ယူဆပါတယ်။ ဒါပေမယ့် ဒီကိစ္စမှာတော့ ဒီလို လုပ်လို့မရတော့ဘူး။ သူကိုယ်တိုင် အတိအကျဝင်ပြီး ဆုံးဖြတ်မှ ဖြစ်မှာပါ။

ဦးကျော်ဇံသာ ။ ။ ဟုတ်ကဲ့ ကျနော်တို့ အရှေ့ ကို နည်းနည်းမျှော်ကြည့်ရင် အမျိုးသားဒီမိုကရေစီအဖွဲ့ချုပ်က ရွေးကောက်ပွဲ မ၀င်ဘူးဆိုရင် ပါတီက ဖျက်သိမ်းခံရမယ့် အခြေအနေရှိပါတယ်။ အဲဒီတော့ အမျိုးသားဒီမိုက ရေစီအဖွဲ့ချုပ်က ပြည်သူကို ဘယ်လို ဦးဆောင်ပြီးတော့ နိုင်ငံရေး ရှေ့ တိုးအောင်လုပ်နိုင်မယ့် အလားအလာရှိ ပါသလဲ။

ဦးစိန်ဝင်း ။ ။ ဗမာနိုင်ငံရေး လှုပ်ရှားမှုမှာ အနှစ် (၂၀) ကာလမှာ NLD က မရှိသလိုပါဘဲ။ NLD ရှိနေတယ်လို့ ကို ပြည်သူလူထုက မသိဘူး။ ပြည်တွင်းမှာ တိုင်းရင်းသားတွေနဲ့ ကျနော်တို့ တိုက်ပွဲတွေဖြစ်နေတယ်၊ ကိုးကန့် တွေ အတိုက်ခံရတယ်။ ဒါလည်း NLD က သူနဲ့မဆိုင်သလို နေတာဘဲ။ ခလေးစစ်သားတွေ မိဘရင်ခွင်ကခေါ် ပြီး စစ်သားတွေလုပ်ခိုင်းတယ်။ ဒါကိုလည်း NLD က မသိသလို နေတာပဲ။ လယ်သမားတွေရဲ့  လယ်တွေကို အသိမ်းခံရပြီးတော့ လယ်သမားတွေ ထောင်ကျတယ်။ ဒါကိုလည်း NLD က မသိသလိုနေတာပဲ။ အခုလည်း အလုပ်သမားဆန္ဒပြပွဲတွေကိစ္စတွေလည်း NLD က သူနဲ့မဆိုင်သလို နေတာဘဲ။ အဲဒီတော့ NLD ရှိခြင်း မရှိ ခြင်းက ဗမာနိုင်ငံရေး ဖြစ်စဉ်မှာ အခုအချိန်မှာ ဘာမှအရေးမပါတော့ပါဘူး။

ဦးကျော်ဇံသာ ။ ။ ဟုတ်ကဲ့ ကျနော်တို့ သတင်းသမားတွေ၊ မီဒီယာသမားတွေက NLD ရဲ့ လုပ်ရပ်နဲ့ ပတ်သက် ပြီးတော့ လူတချို့ ရဲ့  ပြောကြားဝေဖန်မှုကို ထင်ဟပ်ပြီးတော့ အဲဒီလိုဖော်ပြတဲ့အခါတိုင်း ကျနော်တို့ကို တချို့  က ပြန်ပြောကြပါတယ်။ NLD ရပ်တည်ရေး သိပ်အရေးကြီးတာကို ခင်များတို့ နားမလည်းဘူးလား၊ ဒီအချိန်မှာ ခင်များတို့ ဒီစကားပြောရကောင်းမလားဆိုပြီး အမြဲတမ်း ဝေဖန်တာခံရပါတယ်။ ဒီလိုလူတွေကို ဘယ်လိုတုံ့ပြန် ရှင်းပြသင့်ပါသလဲ။

ဦးစိန်ဝင်း ။ ။ ကျနော် အခုနပြောသလိုပါပဲ။ နိုင်ငံရေးမပါဘဲနဲ့ ရပ်တည်နေတယ်ဆိုတာ အသက်မရှိတဲ့ လူသေ ကောင်ကြီးပါဘဲ။ ဘာမှ မထူးပါဘူး။ အရေးကြီးတာက ရပ်တည်ဖို့ မဟုတ်ဘူး။ နိုင်ငံရေးကဲ။ အခု အနှစ် (၂၀) အတွင်း NLD က ဘာမှမလုပ်ပါဘူး။ ကျနော် တလောကပြောခဲ့သလို ပဲခူးက ဦးအေးမြင့်လို လူပုဂ္ဂိုလ်တဦးတ ယောက်လောက်တောင် NLD က တိုင်းပြည်အကျိုးကို မသယ်ပိုးခဲ့ပါဘူး။ နောက်တခါ မဖြူဖြူသင်းလို အမျိုး သမီးတယောက်လို လူတွေရဲ့  ဒုက္ခတွေကို ကယ်တင်ပေးခဲ့တာမျိုး မလုပ်ခဲ့ပါဘူး။ ဒါကြောင့် NLD က တည်ရှိ နေတာကို ပြည်သူလူထုက သိကိုမသိတော့ပါဘူး။

ဦးကျော်ဇံသာ ။ ။ NLD ကို တကယ်လို့ ရွေးကောက်ပွဲ မ၀င်လို့ ဖျက်သိမ်းခံရရင် NLD ရဲ့  အခန်းကဏ္ဍ လုံးဝ ချုပ်ငြိမ်းသွားပြီးလို့ ဆိုရမှာပေါ့။

ဦးစိန်ဝင်း ။ ။ NLD ကတော့ ချုပ်ငြိမ်းသွားတယ်လို့ ပြောလို့မရဘူး။ အခုလက်ရှိ ရှိနေတဲ့ CEC ဒီပုဂ္ဂိုလ်တွေက တော့ ချုပ်ငြိမ်းသွားမှာပဲ။ သူတို့ရဲ့  နိဂုံးပဲ ဖြစ်သွားမယ်။ နိုင်ငံရေးရှိနေသရွေ့  ဒေါ်အောင်ဆန်းစုကြည် ရှိနေသ ရွေ့ကာလပတ်လုံး NLD ကတော့ ရှိနေမှာပဲ။ ဘာဖြစ်လို့လဲဆိုတော့ NLD နဲ့ ဒေါ်အောင်ဆန်းစုကြည်တို့က ခွဲ လို့မရပါဘူး။

ဦးကျော်ဇံသာ ။ ။ ဒေါ်အောင်ဆန်းစုကြည်က ဆက်လျက်ရှိနေမယ့် သဘောပေါ့။

ဦးစိန်ဝင်း ။ ။ ဟုတ်ပါတယ်။ ကျနော် ကြိုက်သည်ဖြစ်စေ မကြိုက်သည်ဖြစ်စေ၊ သဘောတူသည်ဖြစ်စေ မတူ သည်ဖြစ်စေ ဒေါ်အောင်ဆန်းစုကြည်မှတပါး ဒီနေ့ ဗမာပြည်သူလူထုကို ဦးဆောင်နိုင်တဲ့လူ၊ ဒေါ်အောင်ဆန်းစု ကြည်မှတပါး တပ်မတော်နဲ့ ပြည်သူလူထုကို ရင်ကြားစေ့အောင် ဆောင်ရွက်နိုင်တဲ့လူ ဗမာပြည်မှာ ဘယ်သူမှ မရှိပါဘူး။

ဦးကျော်ဇံသာ ။ ။ တချို့ က NLD သာ အဲဒီလိုတရားဝင်ရပ်တည်ခွင့်မရတော့ရင် NLD အနေနဲ့ underground သွားရလိမ့်မယ်။ တနည်းအားဖြင့် လျှို့ ဝှက်လုပ်ငန်းတွေ၊ မြေအောက်လုပ်ငန်းတွေနဲ့ လှုပ်ရှားရမယ်လို့ ဆိုကြပါ တယ်။ အဲဒီကိစ္စမှာ အကြမ်းဖက်တဲ့ကိစ္စတွေများပါလာခဲ့ရင် ဒေါ်အောင်ဆန်းစုကြည်ရဲ့  အကြမ်းမဖက် မူဝါဒနဲ့ လုံးဝဆန့်ကျင်နေတာပေါ့။

ဦးစိန်ဝင်း ။ ။ NLD ကို အဲဒီလို ဇွတ်အတင်းမြေအောက် တွန်းပို့တဲ့ အပြောအဆိုမျိုးတွေကိုတော့ ကျနော်က ရှောင်ကြဉ်စေချင်တယ်။ ပါတီမှတ်ပုံတင် မရှိတာနဲ့ မြေအောက်ကိုရောက်သွားတာမျိုးက မဖြစ်နိုင်ပါဘူး။ ၈၈ မျိုးဆက်သစ်ကျောင်းသားများ သူတို့မှာ ပါတီလည်းမရှိပါဘူး။ မရှိပေမယ့် သူတို့ဟာ တရားဝင် ရပ်တည်ပြီး တော့ နိုင်ငံရေးလှုပ်ရှားမှုတွေ လုပ်သွားကြတာပါပဲ။ အဲဒီတော့ ပါတီမှတ်ပုံမတင်တာနဲ့ မြေအောက်ရောက် သွား၊ လက်နက်ကိုင် တိုက်ပွဲတွေဆင်နွှဲလိမ့်မယ်ဆိုတာမျိုး မျှော်မှန်းတာမျိုးတွေ မပြောစေချင်ဘူး။ အဲဒါဆိုရင် ၁၉၄၇ ခုနှစ်က ကွန်မြူနစ်တွေကို ဖဆပလ ဆိုရှယ်လစ်တွေက တောထဲကို မောင်းထုတ်လိုက်သလိုမျိုး NLD ကို မောင်းထုတ်သလို ဖြစ်သွားပါလိမ့်မယ်။

အချက်အလက် ဆင်းရဲခေါင်းပါးရှာသော ငါးမင်းဆွေသို့
Thursday, 18 March 2010 12:46 တူမောင်ညို

E-mail Print
http://www.yoma3.org/index.php?option=com_content&view=article&id=520:2010-03-18-05-49-43&catid=43:2008-09-21-07-46-00&Itemid=126
ရင်းနှီးတဲ့ လုပ်ဖေါ်ကိုင်ဖက်တစ်ယောက်က လှမ်းပြောတာပါ။

မတ်လ ၁၆ ရက်နေ့ မြန်မာ့အလင်းသတင်းစာထဲက “ငါးမင်းဆွေ” ဆောင်းပါးမှာ ခင်ဗျားကို “ထိကပါးရိကပါး” လုပ်ထားတယ်လို့ ပြောလာပါတယ်။

ဒါနဲ့ သူပြောတဲ့ဆောင်းပါး ဖတ်ကြည့်ဖြစ်တယ်ဆိုပါတော့။

ခေါင်းစဉ် ကြည့်လိုက်ကတည်းက“မျက်ခမ်းမြင်ရုံနဲ့ ငတာကြီးသားမှန်း သိတယ်” ဆိုသလိုပဲ၊ ဘယ်အချိုး ချိုးတော့မယ်ဆိုတာ သိပြီးသားပါလို့ ပြောရင် အပြောလွန်ရာကျမလား မသိပါဘူးဗျာ။

သတင်းစာဆောင်းပါး ဆိုတာ သတင်းဆောင်းပါးပဲမဟုတ်လား။ “အားလုံးကောင်းပါသည်ခင်ဗျား” ပဲပေါ့။ ဒီထက် ဘာရေးနိုင်မှာလဲ။

Tu Maung Nyo
ငါးမင်းဆွေက စကတည်းက ယဉ်သကိုလို့ ဆိုရမှာပဲဗျ။

ကျနော့်ဆောင်းပါးက ငါးမင်းဆွေပြောသလို “မဇ္ဈိမဂျာနယ်” မှာ ဖေါ်ပြခဲ့တာ လုံးဝမဟုတ်ပါဘူး။ မှားပါတယ်။

“ရိုးမ ၃ ဝဘ်ဆိုက်” မှာ ဖေါ်ပြခဲ့တာဖြစ်ပါတယ်။

“လယ်သမားတွေ ဆင်းရဲနေတယ်”လို့ ရေးလိုက်တာလည်း မဟုတ်ပါဘူး။

လယ်သမားတွေ လက်ရှိကြုံတွေ့နေရတဲ့ ဘဝကို နေ့စဉ်ထုတ် ဂျာနယ်မဂ္ဂဇင်းတွေထဲမှာ ဖေါ်ပြထားတဲ့ အချက်အလက်တွေကို ကိုးကားပြီး ရေးလိုက်တာပါ။(ဂျာနယ်မဂ္ဂဇင်းတွေကလည်း အကုန်လုံး ဖေါ်ပြနိုင်တာမဟုတ်ပါဘူး။ စိစစ်ရေးက ခွင့်ပြုသလောက်ပေါ့)

ငါးမင်းဆွေပြောချင်တဲ့ ချမ်းသာတာ ဘယ်လိုလယ်သမားမျိုးတွေလဲ။

မြန်မာပြည်လူဦးရေရဲ့ ၇၀ ရာခိုင်နှုန်းရှိတဲ့ လယ်သမားတွေထဲမှာ ဘယ်နှရာခိုင်နှုန်းက ငါးမင်းဆွေပြောသလို ထော်လာဂျီ၊ တီဗွီ၊ ဆိုင်ကယ်၊ ပျဉ်ထောင်ကာသွပ်မိုးနဲ့ နေထိုင်နိုင်ပါသလဲ။ တမြို့နယ်မှာ အဲဒီလို နေထိုင်နိုင်တဲ့ လယ်သမားဦးရေ ဘယ်နှယောက်များ ရှိပါသလဲ။ ခင်ဗျားရေတွက်ပြစမ်းပါဗျာ။

လယ်ကွင်းကို ဆိုင်ကယ်စီးရင်းကြည့်ပြီး ထင်ရာမြင်ရာ ပြောသလို ဖြစ်နေတယ်။

ဒါမှမဟုတ် ငါးမင်းဆွေ အိပ်မက်မက်နေတာလား။ စိတ်ကူးယဉ်တာလား။ လယ်သမားတွေ ချမ်းသာစေချင်တယ်ဆိုတာ ကောင်းပါတယ်။ ကျနော်လည်း လယ်သမားတွေ ချမ်းသာစေချင်တာ ခင်ဗျားထက် မလျော့ပါဘူး။

ရန်ကုန်က စက်မှုဇုံတွေမှာ အလုပ်သမားတွေ ဆန္ဒပြနေတာကို ငါးမင်းဆွေ ကြားမှာပါ။

အဲဒါလည်း အလုပ်သမားတွေ စားဝတ်နေရေး၊ ကုန်ဈေးနှုန်းတွေက အလုပ်သမားတွေရတဲ့ လစာလုပ်ခစရိတ်တွေနဲ့ အလှမ်းကွာလို့ ဆိုတာ ခင်ဗျားသဘောပေါက်မှာပါ။

သူတို့တောင်းဆိုချက်မှ ဘယ်လိုနိုင်ငံရေးတောင်းဆိုချက်မှမပါတာ ခင်ဗျားတွေ့မှာပါ။ သူတို့တောင်းဆိုနေတာ လစာလုပ်ခတိုးပေးရေးနဲ့ အလုပ်ခွင်သာယာရေး၊ အားလပ်ရက်သတ်မှတ်ပေးရေး၊ အိုတီကြေး တိတိကျကျ သတ်မှတ်ပေးရေး ဆိုတဲ့ သူတို့ဘဝ လက်တွေ့လိုအပ်ချက်တွေပဲ မဟုတ်လား။

အလုပ်သမားများဟာ အလုပ်သမားများအတွက် တောင်းဆိုနေတာပါ။

ဒါကြောင့် အချက်အလက်တွေ ပိုစုံလင်အောင် လယ်ကွင်းတွေဘက်ချည်းပဲ သမံကာရှံကာ မသွားပါနဲ့၊ စက်မှုဇုံတွေဘက်လည်း တစ်ခေါက်တစ်ကျင်းလောက် ခြေဦးလှည့်စမ်းပါဦး ငါးမင်းဆွေရ။

ခက်တော့တာပဲ။

အစိုးရထုတ်သတင်းစာချည်း လှိမ့်မဖတ်နဲ့။ နေ့စဉ်ထုတ် ဂျာနယ်တွေ ဖတ်ကြည့်ပါဦး။ သူတို့ခမျာလည်း ရတဲ့ “စပေ့” ကလေးကနေ စာပေကင်ပေတိုင်လက်က လွတ်လောက်မယ့် အသုံးအနှုန်းလေးတွေနဲ့ ဖေါ်ပြထားကြတယ်။

ဒီရေးသားဖေါ်ပြချက်ကို အရင်ဖတ်ကြည့်ပါ။

"လယ်သမားအကြွေးက ဒီလောက်ရောက်နေတော့ ဘာမှမဝယ်နိုင်ဘူး" ဟု လည်ပင်းရှေ့ကို ညာဘက်လက်ဇောင်းဖြင့် ထောက်၍ (လယ်သမား) ဦးသိန်းက ပြောသည်။(ကြော်ငြာနှင့် ဈေးဝယ်လမ်းညွှန်မဂ္ဂဇင်း အမှတ် ၁၇၅၊ ဖေဖေါ်ဝါရီ၊၂၀၁၀ စာမျက်နှာ ၄၀-၄၅)

လယ်သမားတွေ ဘယ်လောက် ဆင်းရဲနေသလဲဆိုတာကို ထင်ဟပ်နေတဲ့ အင်တာဗျူးတစ်ခုရှိတယ်။ “မြန်မာနိုင်ငံ ဆန်စပါးလုပ်ငန်းအသင်း ဥက္ကဌ ဦးချစ်ခိုင်နှင့် တွေ့ဆုံခြင်း” Weekly Eleven ဂျာနယ် [No.17, Vol.5, February 3, Wednesday] ရှာဖတ်ကြည့်ပါ။

အဲဒီထဲက အချက်အလက်တွေကို မမှန်ကန်ဘူးဆိုပြီး ငြင်းခုန်ချင်သပဆိုရင် ငါးမင်းဆွေအနေနဲ့ ဦးချစ်ခိုင်နဲ့သာ သွားတွေ့ပြီး ဆွေးနွေးလိုက်ပါ။ အဖြစ်မှန် သိလာပါလိမ့်မယ်။

ဦးချစ်ခိုင်က အဲဒီအင်တာဗျူးထဲမှာ သူ့ပိုင်းဖြတ်ချက်ကို အခုလို ပြောထားတယ်။ “ကျွန်တော့် အသက် (၆၂) နှစ် ရှိလာပြီ။ ဒီအသက်အရွယ်က ကိုယ်ပိုင်စီးပွားရေးထက် အများပြည်သူ အကျိုးစီးပွားအတွက် လုပ်ဖို့ အရွယ်ကို ရောက်နေပြီ” တဲ့။ ဒီတော့ သူက ခင်ဗျားကို လူကြီးလူကောင်းဆန်ဆန် ဆွေးနွေးမှာ သေချာပါတယ်။

သူ့ဆီကပြန်လာတဲ့ ခင်ဗျားသိမြင်လာမှုတွေကို ဆောင်းပါးရေးစမ်းပါဦးဗျာ။

အဲဒီအင်တာဗျူးထဲမှာ ဦးချစ်ခိုင်က လယ်သမားတွေ ဘာတွေလိုအပ်နေသလဲ ဆိုတဲ့ မေးခွန်းကို “တောင်သူတွေမှာ အဓိက လိုအပ်နေတာကတော့ သွင်းအားစုနဲ့ ငွေကြေးအရင်းအနှီးပါပဲ။ နောက် စိုက်ပျိုးမှုနည်းပညာ မြင့်မားဖို့လည်း လိုနေပါတယ်” လို့ ဖြေသွားတယ်။

သူပြောသွားတဲ့ အဓိကလိုအပ်ချက် (၃) မျိုးဆိုတာ ဘယ်လောက်အရေးကြီးတယ်ဆိုတာ ခင်ဗျားသဘောပေါက်မှာပါ။

ခင်ဗျားတို့ ဖားနေတဲ့ “နိုင်ငံတော်” က လယ်သမားတွေကို ထုတ်ချေးရမယ့် စိုက်ပျိုးစရိတ်ချေးငွေ (အမတော်ကြေး) ထုတ်မချေးနိုင် လို့ ပုဂ္ဂလိက ဆန်စပါးနဲ့ပဲ အထူးပြုကုမ္မဏီ (၂၉) ခုက (၂) ရာခိုင်နှုန်းတိုးနဲ့ ချေးနေရသတဲ့။ ဒါတောင် တစ်နိုင်ငံလုံးမှာရှိတဲ့ တောင်သူတွေအားလုံး ကို မပံ့ပိုးနိုင်သေးပါဘူးတဲ့။

သဘာဝဓါတ်ငွေ့တွေ၊ သယံဇာတတွေ တရုတ်နဲ့ထိုင်းကိုထုတ်ရောင်းလို့ရတယ်ငွေတွေဘယ်ရောက်သွားသလဲ။

ခင်ဗျားရဲ့ နိုင်ငံတော်အကြီးအကဲဆိုသူတွေထံ မေးမြန်းပြီး ပြည်သူတွေ သိအောင် သတင်းစာကနေ ရေးပါဦးဗျာ။ နိုင်ငံတော်ကရတဲ့ ငွေကို တိုင်းသူပြည်သားတွေအကျိုး သုံးရမှာပေါ့ဗျာ။ ဘယ်သူ့အကျိုးအတွက် သုံးနေသလဲ။ ဒါတွေကို ငါးမင်းဆွေ “တွေ့/မေးသည်” ဆိုပြီး ဖော်ထုတ်ရေးသားသင့်တယ်။

မြန်မာ့လယ်ယာစိုက်ပျိုးရေးဘဏ်က လယ်တစ်ဧက ၈,၀၀၀ ကျပ်နှုန်းဖြင့် ချေးပေးသော ငွေမှအပ မည်သည့်ချေးငွေမျှ မရရှိပါဘူး။

မိုးစပါးတစ်ဧက ၁၃၀,၀၀၀ ကျပ်ခန့်၊ နွေစပါးတစ်ဧက ၁၈၀,၀၀၀ ကျပ် စိုက်ထုတ်ရင်းနှီးရပါတယ်။ တောင်သူလယ်သမားတွေဟာ ပြီးခဲ့တဲ့ နှစ်တွေက ၁၀ ကျပ်တိုး၊ ၁၅ ကျပ်တိုးနဲ့ ချေးရပြီး ရွှေအပေါင်ရှိသူများပင်လျှင် ၅ ကျပ်တိုးဖြင့် ချေးယူရပါတယ်။ ငွေချေးယူရာမှာလည်း အဆက်အသွယ်ကောင်းပြီး ကျောထောက်နောက်ခံရှိမှသာ ချေးငွေရနိုင်ပါတယ်။

ချေးငွေမရတဲ့အတွက် ရိတ်သိမ်းချိန်ဈေးကွက်အတွင်း စပါးအလျှံအပယ် ရောက်ချိန်မှာ တောင်သူလယ်သမားတွေ အကြွေးဆပ်ဖို့ အပြေးအလွှား စပါးရောင်းချရတဲ့အတွက် အကျိုးဆက်အနေနဲ့ တလင်း ဈေးနိမ့်သွားရတဲ့ အဖြစ်တွေ ကြုံရတယ်လို့ ဆိုကြပါတယ်။

သုတေသနပြုချက်တစ်ခုလည်း အခုလို အကြံပြုထားတယ်။

“ကျေးရွာများတွင် အသေးစား အခြေခံ စီးပွားရေးအဆောက်အဦး စီမံကိန်းများ တည်ဆောက်ရန် ငွေထုတ်ပေးခြင်းဖြင့် ကျေးလက်နေ ဝင်ငွေနည်းသူများကို နေ့စားအလုပ်အကိုင် အခွင့်အလမ်းများ ဖန်တီးပေးရန် လိုအပ်ကြောင်း၊ (လမ်း၊ တံတား၊ ဆည်မြောင်းငယ်များ) စသည့် ရည်ရွယ်ချက်မှာ လယ်ယာမဲ့နှင့် ကြွေးမြီတင် လယ်သမားများ အလုပ်မရှိသည့်ကာလတွင် ဝင်ငွေရရှိပြီး လိုအပ်သည့် ကျေးလက်အဆောက်အအုံများလည်း ပေါ်ပေါက်စေနိုင်ကြောင်း၊ လယ်သမားအများစုသည် တစ်နေ့လျှင် ၂,၀၀၀ ကျပ်ခန့် ရနိုင်မည့် အလုပ်မျိုးကို စိတ်ဝင်စားကြကြောင်း” ဖော်ပြထားသည်။

ကိုင်း … ဘယ့်နှယ်လုပ်မလဲ၊ ငါးမင်းဆွေ။

ထုတ်လုပ်ရေးနဲ့ ရောင်းချရေးပိုင်းနဲ့ ပတ်သက်ပြီး ပြောထားတာကို ဖတ်ကြည့်လိုက်ပါဦး။ ငါးမင်းဆွေ ဖျားသွားမယ်။ မူရင်းအတိုင်း ဖော်ပြပေးလိုက်ပါတယ်။

“ကျွန်တော်တို့ရဲ့ အိမ်နီးချင်းနိုင်ငံဖြစ်တဲ့ ထိုင်းနိုင်ငံနဲ့ ဗီယက်နမ်နိုင်ငံဟာ တစ်ဧကကို တင်း ၂၀၀ လောက် ထွက်တယ်။ ထိုင်းက တစ်နှစ်ကို တန်ချိန် ၁၀ သန်း ပို့နိုင်တယ်။ ဗီယက်နမ်က တစ်နှစ်ကို တန်ချိန်ခြောက်သန်း ပြည်ပပို့နိုင်တယ်။ ကျွန်တော်တို့ဆီမှာတော့ တစ်ဧက တင်း ၆၀ တောင် အနိုင်နိုင်ပဲ။ အခု ပြည်ပကို တန်ချိန် တစ်သန်းကျော်လေးပဲ ပို့တာတောင် ဈေးကွက်မှာ လှုပ်ခတ်မှု ရှိချင်နေသေးတယ်။ အဓိကသွင်းအားစုနဲ့ ငွေကြေး၊ နည်းပညာ ကွာနေတာ” တဲ့။ ဒီလောက်ဆိုရင် သဘောပေါက်မှာပါ။

ဒီဆောင်းပါးနိဂုံးကိုကလည်း ငါးမင်းဆွေလို လူတွေအတွက် ရည်ညွှန်းလိုက်သလား မဆိုနိုင်ဘူးပေါ့ဗျာ။

“မြန်မာနိုင်ငံ ဆန်စပါးလုပ်ငန်းအသင်း ဥက္ကဌ ဦးချစ်ခိုင်” စကားနဲ့ပဲ အနားသတ်လိုက်ပါရစေ။ “မီဒီယာပဲဖြစ်ဖြစ်၊ ဘယ်သူပဲဖြစ်ဖြစ် တောင်သူတွေရဲ့ လက်ရှိဘဝနဲ့လိုအပ်ချက်ကို တကယ်သိချင်ရင် လယ်ကွင်းထဲက တောင်သူတွေအထိ ဆင်းကြည့်ကြပါလို့ အကြံပြုချင်ပါတယ်”

ပြောလက်စနဲ့ နောက်ဆုံးတစ်ခု ပြောလိုက်ဦးမယ်။

တောင်သူလယ်သမားတွေ အကျိုးစီးပွား၊ အလုပ်သမားတွေ အကျိုးစီးပွားအတွက် တစ်စုတစ်စည်းထဲ ခုခံကာကွယ် တိုက်ပွဲဝင်နိုင်ဖို့ လယ်သမားတွေ၊ အလုပ်သမားတွေရဲ့ စစ်မှန်တဲ့ ကိုယ်စားလှယ်တွေ ပါဝင်တဲ့ လယ်သမားသမဂ္ဂ၊ အလုပ်သမားသမဂ္ဂတွေ ဖွဲ့စည်းတည်ရှိခွင့် မရှိသေးတဲ့ အချက်ကလည်း ရှက်စရာကောင်းတဲ့ ကွက်လပ်မည်းကြီးတစ်ခု ဖြစ်တယ်ဆိုတာကို ငါးမင်းဆွေ သဘောပေါက်ပါ။
တူမောင်ညို
(၂၀၁၀ ပြည့် မတ်လ ၁၇)

ကိုးကား
၁။ Weekly Eleven ဂျာနယ် [No.17, Vol.5, February 3, Wednesday]
၂။ ကြော်ငြာနှင့် ဈေးဝယ်လမ်းညွှန်မဂ္ဂဇင်း (အမှတ် ၁၇၅/ ဖေဖေါ်ဝါရီ/၂၀၁၀ စာမျက်နှာ ၄၀-၄၅ )

လွတ်လပ်ပြီး တရားမျှတတဲ့ ရွေးကောက်ပွဲ ဖြစ်လာရေး UNA ကုလကို တိုက်တွန်း

17 March 2010http://www.voanews.com/burmese/2010-03-17-voa4.cfm့်



မြန်မာစစ်အစိုးရက ဒီနှစ်ထဲ ကျင်းပပေးမယ့် ရွေးကောက်ပွဲအတွက် ဥပဒေတွေ ထုတ်ပြန်ခဲ့ပေမဲ့ ဒါတွေဟာ တရားမျှတမှု မရှိသလို အားလုံး ပါဝင်နိုင်ခွင့် မရှိတာမို့ ပြည်တွင်းပြည်ပက ဝေဖန်မှုတွေ ရှိနေချိန်မှာ ၁၉၉၀ ပြည့်နှစ် ရွေးကောက်ပွဲ အနိုင်ရ တိုင်းရင်းသား တပ်ပေါင်းစု အဖွဲ့တခုကလည်း ဒီဥပဒေ ပြင်ဆင်နိုင်ရေးအတွက် ကုလသမဂ္ဂ အထွေထွေ အတွင်းရေးမှူးချုပ် ဘန်ကီမွန်း (Ban Ki-moon) ထံကို အိတ်ဖွင့်ပေးစာတစောင် ပေးပို့ခဲ့ပါတယ်။ ညီညွတ်သော တိုင်းရင်းသား လူမျိုးများ မဟာမိတ်အဖွဲ့ (UNA) က ပေးပို့လိုက်တဲ့စာက တိုက်တွန်းထားတဲ့ အကြောင်းတွေကိုတော့ ဗွီအိုအေ ထိုင်းအခြေစိုက် သတင်းထောက် ကိုကျော်ထင်က တင်ပြပေးထားပါတယ်။

လွတ်လပ်ပြီး တရားမျှတတဲ့ ရွေးကောက်ပွဲ ဖြစ်လာဖို့ မြန်မာစစ်အစိုးရကို ဖိအားပေးဖို့ လိုအပ်ကြောင်း ညီညွတ်သော တိုင်းရင်းသားလူမျိုးများ မဟာမိတ်အဖွဲ့ (UNA) က မစ္စတာ ဘန်ကီမွန်းထံ အိတ်ဖွင့်ပေးစာ ပေးခဲ့တာ ဖြစ်ပါတယ်။

ရွေးကောက်ပွဲ ဥပဒေဟာ အတင်းအဓမ္မ အတည်ပြုခဲ့တဲ့ ၂၀၀၈ အခြေခံဥပဒေကို အခြေပြု ရေးထားတာဖြစ်လို့ တရားဝင် အတည်မဖြစ်ဘူးလို့ ပေးစာမှာ ပါရှိပါတယ်။ တရားမျှတတဲ့ ရွေးကောက်ပွဲဖြစ်ဖို့ အားလုံးပါဝင်နိုင်တဲ့ အခင်းအကျင်းဖြစ်ဖို့ လိုတယ်လို့ UNA ပြောခွင့်ရပုဂ္ဂိုလ် ဦးကျင့်ရှင်းထန်က ပြောပါတယ်။

“ဒီလိုဖြစ်နေတဲ့ အတွက်ကြောင့် တကယ်လို့များ ရွေးကောက်ပွဲ ပုံမှန်ဖြစ်ဖို့၊ တရားမျှတစွာ ဖြစ်နိုင်ဖို့ဟာမှာ အခု ထောင်ကျ နေတဲ့ သူတွေကို အရင်လွှတ်ပါဆိုတာ ကျနော်တို့ ပြောနေကျပါ။ အဲဒါတွေကို လွှတ်ပြီး ဒေါ်အောင်ဆန်းစုကြည် တို့ အပါအ၀င် ဒိုင်ယာလော့ဂ် (Dialogue) ကို လုပ်ပေးပါ။ အဲဒါတွေကိုရအောင် ဒီအစိုးရကို ဖိအားပေးပေးပါ။ ပြီးတော့ လူနည်းစုဒေသတွေမှာ လုပ်နေတဲ့ စစ်ဆင်ရေးတွေလည်း ရပ်တန့်ပေးဖို့၊ ရွေးကောက်ပွဲ ဆိုတာလည်းပဲ UN ကပြောတာ All inclusive လို့ ပြောထားတာကို All inclusive မဖြစ်နိုင်ဘူးဆိုတာ လုံးလုံးကြီး ပေါ်နေတော့ အဲဒါတွေကို ပြုပြင်ပေးဖို့ UN အနေနဲ့ အစိုးရကို ဖိအားပေးပေးရန် ဆိုတဲ့ အနေမျိုးနဲ့ ဒါကို တင်ပြတာပါ။”

မစ္စတာ ဘန်ကီမွန်းကလည်း ဒေါ်အောင်ဆန်းစုကြည် အပါအ၀င် နိုင်ငံရေး အကျဉ်းသားတွေကို အမြန်ဆုံး လွှတ်ပေးပြီး အားလုံးပါဝင်နိုင်တဲ့ အခင်းအကျင်းတခု ဖြစ်မှသာ အများက ယုံကြည်လက်ခံတဲ့ ရွေးကောက်ပွဲ ဖြစ်မယ်လို့ ပြောဆိုလိုက်ပြီး ရွေးကောက်ပွဲနဲ့ ပတ်သက်လို့ ဗိုလ်ချုပ်မှူးကြီးသန်းရွှေဆီကို စာရေးသား ပေးပို့ခဲ့တယ်လို့ သိရပါတယ်။ မြန်မာနိုင်ငံဆိုင်ရာ လူ့အခွင့်အရေး အထူးကိုယ်စားလှယ် မစ္စတာ ကင်တားနား (Mr. Quintana) ကလည်း နိုင်ငံရေး အကျဉ်းသားတွေ ပြန် မလွှတ်ပေးသရွေ့ စစ်အစိုးရ ကျင်းပမယ့် ရွေးကောက်ပွဲကို နိုင်ငံတကာက အယုံအကြည်ရှိနိုင်မှာ မဟုတ်ဘူးလို့ ဆိုပါတယ်။

စစ်အစိုးရရဲ့ ရွေးကောက်ပွဲ ဥပဒေ တရားမျှတမှု မရှိတာကို အမေရိကန်၊ EU အပါအ၀င် အာဆီယံ နိုင်ငံတွေကလည်း ဝေဖန်မှုတွေ ရှိလာပါတယ်။ ထောင်ကျနေသူတွေ ပါဝင်ခွင့် မရသ၍ လွတ်လပ်ပြီး တရားမျှတတဲ့ ရွေးကောက်ပွဲ ဖြစ်လာမှာ မဟုတ်ဘူးလို့ ဦးကျင့်ရှင်းထန်က ဆက်ပြောပါတယ်။

“အခုထောင်ကျနေတဲ့လူတွေကို၊ အဲဒီထဲမှာ တကယ်လို့များ ပါတီမှတ်ပုံတင်မယ့် အခါမှာ ဒီလူတွေ ပါလို့ရှိရင် ပါတီ မှတ်ပုံတင်တဲ့အခါ လက်ခံလို့မရဘူး ဆိုပြီးတော့ ပါတာတွေ၊ ဒါ ကျနော်တို့ လူ့အခွင့်အရေးနဲ့ ပတ်သက်လို့ ဒီလူတွေကို အတင်းထောင်ချပစ်တာ။ နောက်တခါ ထောင်ကျပြီးတဲ့အခါ ပါတီမှာ ဒီလိုဖြစ်နေပြန်တယ်ဆိုတော့ ဒီလူတွေက လူ့အခွင့်အရေးကို အဖြစ်အပျက် တခုတည်းမှာ နှစ်ခါတောင်မှ ပြစ်ဒဏ်ပေးတဲ့ပုံမျိုး ဖြစ်နေတော့ လူ့အခွင့်အရေး တော်တော်လေး ဆုံးရှုံးသွားတယ် ဆိုတာကို ကြည့်လုပ်ပါဦး။ ဒီလိုဖြစ်မယ်ဆိုရင် ဘယ်တော့မှ တရားမျှတတဲ့ ရွေးကောက်ပွဲလည်း ဖြစ်နိုင်မှာ မဟုတ်ဘူး ဆိုတဲ့ဟာကို ကျနော်တို့ တင်ပြတာပါ။”

UNA ဟာ အရင်ကလည်း မစ္စတာ ဘန်ကီမွန်းဆီကို စာရေးသား တင်ပြမှုတွေ လုပ်ခဲ့ပါတယ်။ ဒီအဖွဲ့ကို ၉၀ ခု ရွေးကောက်ပွဲ အနိုင်ရ ပါတီတွေနဲ့ စုစည်းထားတာဖြစ်ပြီး ၉၀ ခု ရွေးကောက်ပွဲမှာ အမတ် ၆၇ နေရာ အနိုင်ရခဲ့ပါတယ်။

မြန်မာ့ရွေးကောက်ပွဲ ဥပဒေ ဖိလစ်ပိုင် ဘ၀င်မကျ

18 March 2010
http://www.voanews.com/burmese/2010-03-18-voa2.cfm


မြန်မာပြည်မှာ ကျင်းပမယ့် ရွေးကောက်ပွဲတွေမှာ အဖမ်းအဆီး ခံနေရတဲ့ မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည် မပါဝင်နိုင်အောင် ရေးဆွဲထားတဲ့ ရွေးကောက်ပွဲဆိုင်ရာ ဥပဒေသစ်တွေနဲ့ ပတ်သက်ပြီး ဖိလစ်ပိုင်နိုင်ငံက စိုးရိမ်မကင်း ဖြစ်နေတဲ့အကြောင်း ထုတ်ဖော် ပြောဆိုလိုက်ပါတယ်။

ဖိလစ်ပိုင်နိုင်ငံမှာ ရောက်နေတဲ့ မြန်မာ နိုင်ငံခြားရေးဝန်ကြီး ဦးဉာဏ်ဝင်းကို ဖိလစ်ပိုင် နိုင်ငံခြားရေးဝန်ကြီး အယ်လ်ဘာတို ရိုမြူလို (Alberto Romulo) က မနေ့တုန်းကပဲ မြို့တော် မနီလာမှာ ပြောခဲ့တာပါ။

ဖိလစ်ပိုင်နိုင်ငံမှာ အခု ကျင်းပနေတဲ့ ဘက်မလိုက်နိုင်ငံများ ညီလာခံမှာ ဦးဉာဏ်ဝင်းကို သီးသန့် ပြောဆိုခဲ့တာပါ။ သူတို့နှစ်ဦးရဲ့ ပြောဆိုမှုကို ကျေနပ်မှု မရှိဘူး၊ ဦးဉာဏ်ဝင်းဘက်က ရွေးကောက်ပွဲဆိုင်ရာ ဥပဒေတွေနဲ့ ပတ်သက်ပြီး သိပ်လည်း မပြောခဲ့ဘူးလို့ ဆိုပါတယ်။

မကြာခင်က ထုတ်ပြန်ခဲ့တဲ့ မြန်မာပြည်က ရွေးကောက်ပွဲ ဥပဒေသစ်တွေထဲမှာ အကျဉ်းကျနေတဲ့ နိုင်ငံရေး ပါတီဝင်တွေဟာ ရွေးကောက်ပွဲမှာ ၀င်ရောက်ယှဉ်ပြိုင်ခွင့် မရှိသလို နိုင်ငံရေး ပါတီထဲမှာ အကျဉ်းချခံထားရသူ ရှိနေရင်လည်း ပါတီမှာ ပါဝင်ခွင့် မရှိလို့ ဆိုထားပါတယ်။ အခုချိန်ထိ ဘယ်နေ့ ရွေးကောက်ပွဲ ကျင်းပမယ် ဆိုတာကိုလည်း မြန်မာစစ်အစိုးရက မကြေညာသေးပါဘူး။

မြန်မာစစ်အစိုးရ လူ့အခွင့်အရေး ချိုးဖောက်မှု ခုံရုံးဖွဲ့စစ်ဆေးရေး လက်တွေ့ဖော်ဆောင်ဖို့ HRW တိုက်တွန်း

17 March 2010http://www.voanews.com/burmese/2010-03-17-voa3.cfm


မြန်မာစစ်အစိုးရက ကျူးလွန်ခဲ့တဲ့ စစ်ရာဇ၀တ်မှုတွေကို စုံစမ်း ဖော်ထုတ်ပေးဖို့ မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေး အထူးကိုယ်စားလှယ်ရဲ့ အဆိုပြုချက် မလွဲမသွေ အကောင်အထည် ဖော်နိုင်လိမ့်မယ်လို့ မျှော်လင့်ကြောင်း လူ့အခွင့်အရေး စောင့်ကြည့် လေ့လာနေတဲ့ Human Rights Watch အဖွဲ့က ပြောကြားလိုက်ပါတယ်။ တချိန်တည်းမှာပဲ ဒီကော်မရှင်ကို အချိန်ဆွဲမနေဘဲ အမြန်ဆုံး အကောင်အထည် ဖော်ပေးဖို့လည်း တောင်းဆိုလိုက်ပါတယ်။ အပြည့်အစုံကို ဆက်သွယ် စုံစမ်းထားတဲ့ ကိုဇော်ဝင်းလှိုင်က တင်ပြပေးထားပါတယ်။

မြန်မာစစ်အစိုးရ အာဏာပိုင်တွေ ချမှတ်လုပ်ဆောင်နေတဲ့ မူတွေက လူ့အခွင့်အရေး ချိုးဖောက်မှုတွေ၊ စစ်ရာဇ၀တ်မှုတွေ ဖြစ်စေတာကြောင့် နိုင်ငံတကာ စုံစမ်းစစ်ဆေးရေး ကော်မရှင်တရပ် ဖွဲ့စည်း စုံစမ်းစစ်ဆေးပေးဖို့ မတ်လ ၁၅ ရက်နေ့က ကုလသမဂ္ဂ လူ့အခွင့်အရေး ကောင်စီကို တင်သွင်းတဲ့ အစီရင်ခံစာထဲမှာ လူ့အခွင့်အရေး အထူးကိုယ်စားလှယ် တိုးမာ့စ် အိုဟေး ကင်တားနား (Tomas Ojea Quintana) က ထည့်သွင်း အဆိုပြုခဲ့တာပါ။
မစ္စတာ ဘရက်ဒ် အဒမ်စ် (Brad Adams) ဟာ HRW လူ့အခွင့်အရေး လေ့လာစောင့်ကြည့်ရေး အဖွဲ့ရဲ့ အာရှဒေသရေးရာ အမှုဆောင် ညွှန်ကြားရေးမှူး ဖြစ်ပါတယ်။ သူက မစ္စတာ ကင်တားနားရဲ့ အဆိုပြုခဲ့တဲ့ အဲဒီ စုံစမ်းစစ်ဆေးရေး ကော်မရှင် သေချာပေါက် ဖွဲ့စည်းနိုင်လိမ့်မယ်လို့ သူ့အနေနဲ့ မျှော်လင့်တယ်လို့ ပြောပါတယ်။

“ကျနော့်အနေနဲ့ မျှော်လင့်ပါတယ်။ မြန်မာပြည်သူတွေအတွက် ကျနော် မျှော်လင့်ပါတယ်။ ကော်မရှင် ဖွဲ့ဖြစ်ရင် သူတို့ပဲ အကျိုးအမြတ် ရရှိမှာ ဖြစ်ပါတယ်။ ဒီကော်မရှင် အမြန်ဖွဲ့ဖြစ်မလား ဆိုရင်တော့ မဖွဲ့ဖြစ်ဘူးလို့ပဲ ကျနော် ဖြေရမှာပဲ။ ဒါဟာ နိုင်ငံတကာမှာ နိုင်ငံရေးအရ တူညီတဲ့ သဘောတူညီမှု ရရှိရေးအတွက် ကြီးမားတဲ့ ခြေလှမ်းတခု ဖြစ်ပါတယ်။ ဒီကော်မရှင် ခပ်မြန်မြန် ဖွဲ့ဖြစ်ရင်တော့ ကျနော့်အနေနဲ့ အံ့အားသင့်မိမှာပဲ။

“ဘာဖြစ်လို့လဲဆိုတော့ အစိုးရ တော်တော်များများက ရွေးကောက်ပွဲမှာ မြန်မာစစ်အစိုးရ ဘာလုပ်မလဲ ဆိုတာကို စောင့်ကြည့်ကြလိမ့်ဦးမယ်လို့ ကျနော်ထင်တယ်။ ဒါပေမဲ့ ရွေးကောက်ပွဲ ရလဒ်အပေါ် စိတ်ပျက်မှုတွေ ရှိခဲ့ရင်တော့ ဒီကော်မရှင် ဖွဲ့စည်းရေးကို တိုင်းပြည်အများစုက ထောက်ခံကြလိမ့်မယ်လို့ ကျနော်ထင်ပါတယ်။”
နယ်စပ် တိုင်းရင်းသား ဒေသတွေ အပါအ၀င် မြန်မာနိုင်ငံအတွင်းမှာ လူ့အခွင့်အရေး ချိုးဖောက်မှုတွေ တရားလက်လွန် ဖြစ်ပေါ်နေတာကြောင့် စုံစမ်းစစ်ဆေးရေး ကော်မရှင် ဖွဲ့စည်း စုံစမ်းပေးဖို့ လူ့အခွင့်အရေး လေ့လာစောင့်ကြည့်ရေး အဖွဲ့အနေနဲ့ တောင်းဆိုလာခဲ့တာ ကြာပေမဲ့ ကြေညာချက်တွေ ထုတ်ပြန်၊ အပြန်အလှန် ပြောဆို ဆွေးနွေးနေကြရုံထက် ပိုမလာခဲ့တဲ့အတွက် လက်တွေ့ လုပ်ဆောင်ဖို့ အချိန်တန်ပြီလို့ မစ္စတာ ဘရက်ဒ် အဒမ်စ်က ပြောပါတယ်။

“ဘာမှ ထူးခြားပြောင်းလဲမှု မရှိတဲ့ အစီရင်ခံစာတွေ ရေးနေကြမယ့်အစား နိုင်ငံတကာ အသိုင်းအ၀ိုင်း အနေနဲ့ လက်တွေ့လုပ်ဆောင်ဖို့ လိုအပ်ပြီလို့ ကျနော်တို့ ထင်တယ်လေ။ ကုလသမဂ္ဂက ဦးဆောင်ပြီး စုံစမ်းစစ်ဆေးရေး ကော်မရှင် ဖွဲ့စည်းပြီး စုံစမ်းစစ်ဆေးလို့ ရလာတဲ့ အချက်အလက်တွေကတဆင့် သက်ဆိုင်သူတွေကို အရေးယူ အပြစ်ပေးတာ အပါအ၀င် ဘာလုပ်သင့်တယ် ဆိုတာကို တင်ပြသင့်တယ်လို့ ကျနော်တို့ ထင်ပါတယ်။”
လူ့အခွင့်အရေး အထူးစုံစမ်း စစ်ဆေးရေးမှူးတဦး အနေနဲ့ မြန်မာနိုင်ငံ အတွင်းက လူ့အခွင့်အရေး ချိုးဖောက်မှုတွေကို စုံစမ်းစစ်ဆေးရေး ကော်မရှင် ဖွဲ့စည်းဖို့ တရားဝင် အဆိုပြုတာ ဒါ ပထမဆုံးအကြိမ် ဖြစ်ပါတယ်။

စုံစမ်းစစ်ဆေးရေး ကော်မရှင် ဖွဲ့စည်းတဲ့ နေရာမှာလည်း နိုင်ငံရေးအရ လုပ်ဆောင်လိုတဲ့ ဆန္ဒရှိရင် ကော်မရှင်ဖွဲ့နိုင်တဲ့ နည်းလမ်းတွေ အများကြီး ရှိပါတယ်လို့ မစ္စတာ ဘရက်ဒ် အဒမ်စ်က ထောက်ပြပါတယ်။
“ဒီကော်မရှင်ဖွဲ့ဖို့က နိုင်ငံရေးအရ လုပ်ဆောင်လိုစိတ် ရှိဖို့ပဲ လိုပါတယ်။ မစ္စတာ ဘန်ကီမွန်း တဦးတည်းလည်း ဆုံးဖြတ်ချက် ချလိုက်လို့ ရပါတယ်။ ကုလသမဂ္ဂ အတွင်းရေးမှူးချုပ် အနေနဲ့ အရင် အဲဒီလို လုပ်ခဲ့တဲ့ သာဓကတွေ ရှိခဲ့ဖူးပါတယ်။ လူ့အခွင့်အရေးနဲ့ ဒီမိုကရေစီ အရေးတွေကို ထောက်ခံ အားပေးကြတဲ့ အရေးပါတဲ့ အဖွဲ့ဝင်နိုင်ငံတွေ ဖြစ်ကြတဲ့ အမေရိကန် ပြည်ထောင်စု၊ ဥရောပသမဂ္ဂ အဖွဲ့ဝင် နိုင်ငံတွေ၊ ဂျပန်၊ အိန္ဒိယ စတဲ့ နိုင်ငံတွေ အနေနဲ့လည်း လူ့အခွင့်အရေး ကောင်စီ၊ ဒါမှမဟုတ် အထွေထွေ ညီလာခံက တဆင့် ဒီကော်မရှင် ဖွဲ့စည်းရေးကို တောင်းဆိုနိုင်ပါတယ်။”

ဒါမှမဟုတ်လည်း အတွင်းရေးမှူးချုပ် အနေနဲ့ ဖွဲ့စည်းပေးဖို့ ဖိအားပေးလို့ ရနိုင်သလို ဂျနီဗာမြို့မှာ ရုံးထိုင်တဲ့ လူ့အခွင့်အရေး မဟာမင်းကြီး နာဗီ ပီလေး (Navi Pillay) တဦးတည်းကလည်း ဆုံးဖြတ်ပြီး ဖွဲ့စည်းလို့ ရနိုင်ပါတယ်လို့ သူက ဆက်ပြောသွားပါတယ်။ ဒါကြောင့် ဒီကော်မရှင် ဖွဲ့ရေး၊ မဖွဲ့ရေး ဆိုတာထက် ဘယ်တော့ဖွဲ့မလဲဆိုတဲ့ မေးခွန်းက အဓိက ကျပါတယ်လို့ ဆိုပါတယ်။
တကယ်လို့ အတွင်းရေးမှူးချုပ် ကိုယ်တိုင်၊ ဒါမှမဟုတ် လူ့အခွင့်အရေး မဟာမင်းကြီးက စုံစမ်းစစ်ဆေးရေး ကော်မရှင် ဖွဲ့စည်းဖို့ ဆုံးဖြတ်ချက်ချ လုပ်ဆောင်ခဲ့ရင် လုံခြုံရေးကောင်စီ အမြဲတမ်းအဖွဲ့ဝင် နိုင်ငံတွေလည်းဖြစ်၊ စစ်အစိုးရနဲ့ ရင်းနှီးတဲ့ မဟာမိတ် နိုင်ငံတွေလည်းဖြစ်တဲ့ တရုတ်နဲ့ ရုရှားနိုင်ငံတို့ အနေနဲ့လည်း ကန့်ကွက်ပိုင်ခွင့် မရှိဘူးလို့ မစ္စတာ ဘရက်ဒ် အဒမ်စ်က ပြောပါတယ်။

မြန်မာနိုင်ငံဆိုင်ရာ လူ့အခွင့်အရေး အထူးကိုယ်စားလှယ် မစ္စတာ တိုးမာ့စ် အိုဟေး ကင်တားနားဟာ မြန်မာနိုင်ငံကို ပြီးခဲ့တဲ့ ဖေဖော်ဝါရီ လလယ်ပိုင်းတုန်းက တရားဝင် သွားရောက်လည်ပတ်ပြီး ပြီးခဲ့တဲ့ မတ်လ ၁၅ ရက်နေ့က ဂျနီဗာမြို့မှာရှိတဲ့ လူ့အခွင့်အရေး ကောင်စီကို သူတွေ့ရှိခဲ့တဲ့ မြန်မာနိုင်ငံဆိုင်ရာ လူ့အခွင့်အရေး အခြေအနေတွေကို အစီရင်ခံစာ တင်သွင်းခဲ့တာ ဖြစ်ပါတယ်။
မစ္စတာ ကင်တားနား တင်သွင်းခဲ့တဲ့ နိုင်ငံတကာ စုံစမ်းစစ်ဆေးရေး ကော်မရှင် ဖွဲ့စည်းရေး အဆိုပြုချက်ကို ထောက်ခံကြောင်း သြစတြေးလျနိုင်ငံကတော့ တရားဝင် ထုတ်ဖော်ပြောဆိုပြီး ဖြစ်ပါတယ်။

ရွှေဂုံတိုင် ကြေညာချက် ပြန်သုံးသပ်မည်

18 March 2010 http://www.voanews.com/burmese/2010-03-18-voa1.cfm



စစ်အစိုးရက ရွေးကောက်ပွဲ ဥပဒေတွေ ထုတ်ပြန်လိုက်ပြီးနောက် NLD အမျိုးသား ဒီမိုကရေစီ အဖွဲ့ချုပ်က ရွှေဂုံတိုင် ကြေညာစာတမ်းကို မြို့နယ်အလိုက် ဝေဖန်သုံးသပ်မှုတွေ ရှိနေတယ်လို့ NLD ခေါင်းဆောင်တွေက ပြောလိုက်ပါတယ်။ ပါတီ ရှေ့ဆက် ရပ်တည်ရေးနဲ့ ရွေးကောက်ပွဲ ၀င်မ၀င်ကို မတ်လ ၂၉ ရက်နေ့မှာ ဆုံးဖြတ်မယ်လို့ NLD က ကြေညာထားချိန်မှာ အခုလို သုံးသပ်မှုတွေကို လုပ်နေတာ ဖြစ်ပါတယ်။ အပြည့်အစုံကို ကိုသိန်းထိုက်ဦးက တင်ပြပေးထားပါတယ်။

မြန်မာစစ်အစိုးရရဲ့ ရွေးကောက်ပွဲ ဥပဒေတွေဟာ ဒီမိုကရေစီ ကျင့်စဉ်နဲ့အတူ အားလုံးပါဝင်နိုင်တဲ့ အနေအထားမှာ မရှိတဲ့အတွက် ဒီဥပဒေတွေကို ရင်ဆိုင်သွားမယ်ဆိုတဲ့ သဘောထားတရပ် NLD အတွင်းမှာ ရှိနေပြီး ဒီကိစ္စကို ဆက်လက် ညှိနှိုင်းနေတယ်လို့ NLD ဗဟိုအလုပ်အမှုဆောင် အဖွဲ့ဝင် ဦးခင်မောင်ဆွေက ပြောပါတယ်။ NLD အနေနဲ့ ၂၀၀၈ ခုနှစ် ဖွဲ့စည်းပုံပါ ဒီမိုကရေစီ နည်းလမ်းမကျတဲ့ အချက်တွေ ပြန်ပြင်ပေးရေး တောင်းဆိုထားတဲ့ ရွှေဂုံတိုင် ကြေညာစာတမ်းကို ဆက်လက် ကိုင်စွဲထားဆဲပဲလို့ ပြောဆိုတဲ့ တချိန်တည်းမှာပဲ မြို့နယ်အလိုက် ပြန်လည် ဝေဖန် သုံးသပ်တာမျိုးတွေလည်း ရှိနေတယ်လို့ ပြောပါတယ်။

“ရွှေဂုံတိုင် ကြေညာစာတမ်းကို မြို့နယ်တွေအလိုက် ပြန်လည်ဝေဖန်ဖို့ သဘောထားတွေ ရှိလာပါတယ်။ အဲဒီဟာကတော့ ရွှေဂုံတိုင် ကြေညာစာတမ်းကို ဆက်လက်ပြီးတော့ ကိုင်စွဲထားပြီး တွေ့ဆုံဆွေးနွေးရေးဆိုတဲ့ အနေအထား တရပ်ကိုလည်း ဆက်ပြီးတော့ ရှိနေမှာကို အန်ကယ်တို့က အတိအလင်းပဲ ရပ်တည်ချက်အဖြစ် လက်ကိုင်ထားဆဲပဲ ရှိပါတယ်။ ရွှေဂုံတိုင် ကြေညာချက် သဘောထားပေါ့လေ။

“အခုလောလောဆယ် ထွက်လာတဲ့ ပါတီဥပဒေ၊ ရွေးကောက်ပွဲ ဥပဒေတွေ အပေါ်မှာ မကျေလည်တဲ့ဟာတွေကို ပြန်လည် ပြင်ဆင်နိုင်အောင် ရင်ဆိုင်သွားမယ်ဆိုတဲ့ သဘောထားတွေကိုလည်း အန်ကယ်တို့ အပြီးအပြတ် ညှိနှိုင်းလို့တော့ ပြီးသွားပါပြီ။ ဆုံးဖြတ်ဖို့ကတော့ ၂၉ ရက်နေ့ကျမှပဲ ဆုံးဖြတ်သွားမှာပါ။”

NLD ပါတီ ရပ်တည်ရေးနဲ့ ခေါင်းဆောင်မှုကို ရွေးချယ်ရာမှာ ပါတီ ပျက်ပြယ်သွားမှာ စိုးရိမ်သူတချို့ ရှိနေတယ်ဆိုတဲ့ သတင်းတွေ ထွက်နေတဲ့ တချိန်တည်းမှာပဲ တကယ်လို့ NLD က ရွေးကောက်ပွဲမှာ ပါဝင်ယှဉ်ပြိုင်မယ်လို့ ဆုံးဖြတ်လိုက်တာနဲ့ ပါတီအနေနဲ့ ဆက်လက် ရပ်တည်နိုင်တယ်ထား၊ ၁၉၉၀ ခုနှစ် ရွေးကောက်ပွဲ ရလဒ်ကို NLD ကိုယ်တိုင် ချေဖျက်ပြီးသား ဖြစ်သွားနိုင်တယ်ဆိုတဲ့ သတိပေးချက်မျိုးတွေလည်း ထွက်ပေါ်နေပါတယ်။

NLD ဗဟိုအလုပ်အမှုဆောင် အဖွဲ့ဝင် သတင်းစာဆရာကြီး ဦးဝင်းတင်ကတော့ မြန်မာစစ်အစိုးရရဲ့ ရွေးကောက်ပွဲ ဥပဒေက နိုင်ငံရေး အကျဉ်းသားတွေနဲ့ ပတ်သက်တဲ့ NLD ရဲ့ သဘောထား၊ နိုင်ငံရေးပါတီတွေရဲ့ လုပ်ပိုင်ခွင့် ဆီးကို ကျော်လာတဲ့ ကန့်သတ်ချက်တွေ ဖြစ်နေတယ်လို့ ဝေဖန်ပါတယ်။

“ဘာဖြစ်လို့လဲဆိုတော့ တစ်၊ ကျနော်ပြောချင်တာက ဒါ သူတို့နဲ့ မဆိုင်ဘူး၊ အစိုးရနဲ့ မဆိုင်ဘူး။ ပါတီဝင် တယောက်ကို ပါတီထဲမှာ လက်ခံထားခြင်း၊ မခံထားခြင်းဟာ သူတို့အလုပ် မဟုတ်ဘူး၊ ကျနော်တို့အလုပ်။ ကျနော်တို့ဘာသာ ကျနော်တို့ ပါတီရဲဘော် တယောက် လက်ခံထားမယ်၊ ဒေါ်အောင်ဆန်းစုကြည်ကို ကျနော်တို့က ခေါင်းဆောင် တင်ထားတယ်၊ အဲဒါ သူတို့ခေါင်းဆောင် မဟုတ်ဘူးလို့ ပြောခွင့်မရှိဘူး။

“ဒါ့ထက်ပိုဆိုးတာက ကျနော်တို့က အဲဒီလို ဥပဒေမျိုး ထုတ်ပြန်ထားတဲ့ အခါကျတော့ ပါတီထဲမှာ ဘယ်လိုမှ ထောင်ကျမယ့်အလုပ်ကို မလုပ်ဝံ့တော့ဘူး။ နိုင်ငံရေးသမားပဲ ထောင်ကျသင့် ကျမှာပဲ၊ မှန်ရာပြော ထောင်ကျမှာပဲ။ နောက်တခုက ပါတီထဲမှာ လှုပ်လှုပ်ရှားရှား၊ တက်တက်ကြွကြွ၊ ထက်ထက်သန်သန် လုပ်တဲ့သူတွေဆိုရင် မင်း ထောင်ကျလိမ့်မယ်၊ မင်း ဒါတွေရပ်ဆိုတဲ့ ပါတီကနေ ၀င်ပြီးတော့ စာပေစိစစ်ရေး လုပ်သလို သူတို့ကို စိစစ်ရေး လုပ်ရမယ်၊ တားမြစ်ရမယ် ဆိုရင်ဖြင့်၊ အဲတော့ ပါတီတွင်း ကိစ္စတွေလည်း ၀င်ရှုပ်တယ်၊ ကျနော်တို့ရဲ့ စိတ်ဓာတ်ကိုလည်း ချိုးနှိမ်၊ ချိုးဖျက်ရာ ရောက်တယ်လို့ မြင်ပါတယ်။ ဒါနှစ်ချက်ပေါ့။”

ဒေါ်အောင်ဆန်းစုကြည် အပါအ၀င် နိုင်ငံရေး အကျဉ်းသားတွေဟာ နိုင်ငံရေးတာဝန် လက်ရှိ ထမ်းဆောင်နေသူတွေ ဖြစ်တယ်လို့ NLD အနေနဲ့ ခံယူတဲ့အတွက် သူတို့ကို မကြာခင်တုန်းက ပြင်ဆင် ဖွဲ့စည်းလိုက်တဲ့ NLD ဗဟိုကော်မတီစာရင်းမှာ ထည့်သွင်းခဲ့တဲ့အကြောင်း ဦးဝင်းတင်က ပြောပါတယ်။ ဒီနိုင်ငံရေး အကျဉ်းသားတွေကို ပါတီက ထုတ်ပယ်ပစ်ဖို့ ကန့်သတ်တာက ပါတီကိုလည်း ခြေချုပ် လက်ချုပ် ချုပ်နှောင်တာ ဖြစ်တယ်လို့ ဦးဝင်းတင်က ပြောပါတယ်။

ဘာပဲဖြစ်ဖြစ် လာမယ့် မတ်လ ၂၉ ရက်နေ့ဆိုရင် စစ်အစိုးရ စီစဉ်တဲ့ နိုင်ငံရေး ဇာတ်ခုံပေါ်မှာ NLD အမျိုးသား ဒီမိုကရေစီ အဖွဲ့ချုပ် အနေနဲ့ နိုင်ငံရေးပါတီ တခုအဖြစ် ဆက်ရှိ မရှိ ဆုံးဖြတ်ချက် ချမယ်လို့ ကြေညာထားတဲ့အတွက် ဒီအဖြေကို စိတ်ဝင်စားမှုတွေနဲ့အတူ ဒီအချိန်ဟာ NLD အတွက် အရေးကြီးတဲ့ အချိုးအကွေ့ဆိုပြီး နိုင်ငံရေး လေ့လာသူတွေက သတ်မှတ်ထားကြပါတယ်။

နိုင်ငံတကာကာ မြန်မာ မြန်မာအပေါ်လှုပ်ရှားများ
29 January 2010
ဥရောပသမဂ္ဂရဲ့ မြန်မာနိုင်ငံဆိုင်ရာ အထူးသံတမန် ပီယဲရို ဖက်ဆီနို (Piero Fassino) ဟာ ဇန်န၀ါရီလ ၂၈ ရက်နဲ့ ၂၉ ရက်နေ့တွေမှာ အမေရိကန် ပြည်ထောင်စု ၀ါရှင်တန်မြို့တော်ကို လာရောက်ပြီး အမေရိကန် လက်ထောက် နိုင်ငံခြားရေးဝန်ကြီး ကာ့တ် ကမ်းဘဲလ် (Kurt Campbell) နဲ့ မြန်မာနိုင်ငံဆိုင်ရာ အရေးကိစ္စတွေကို ဆွေးနွေးမယ်လို့ ကြေညာချက်တရပ် ဇန်န၀ါရီလ ၂၈ ရက်နေ့ ရက်စွဲနဲ့ ထုတ်ပြန်ထားပါတယ်။
မစ္စတာဖက်ဆီနိုဟာ အမေရိကန် အမျိုးသား လုံခြုံရေးကောင်စီ၊ အောက်လွှတ်တော်၊ အထက်လွှတ်တော်တို့အပြင် မြန်မာနဲ့ အရှေ့တောင်အာရှရေးရာ အကြံပေး ပညာရှင် အဖွဲ့တွေနဲ့လည်း တွေ့ဆုံမယ်လို့ သိရပါတယ်။
ဝါရှင်တန်မြို့တော်ကို မရောက်ခင် နယူးယောက်ခ်မြို့ကို ၀င်ရောက်ပြီး ကုလသမဂ္ဂ တာဝန်ရှိသူတွေနဲ့လည်း ဆွေးနွေးမှာ ဖြစ်ပါတယ်။
၂၀၁၀ ပြည့်နှစ်ဟာ မြန်မာနိုင်ငံ အနာဂတ်အတွက် အရေးပါတဲ့ နှစ်တနှစ်ဖြစ်ပြီး စစ်အစိုးရက ရွေးကောက်ပွဲလုပ်ဖို့ ဆုံးဖြတ်ထားခြင်းဟာ အစိုးရနဲ့ အတိုက်အခံတွေ၊ တိုင်းရင်းသား လူမျိုးစုတွေကြား စစ်မှန်တဲ့ ဆွေးနွေးပွဲ စတင်ဖို့၊ သိက္ခာရှိပြီး ပွင့်လင်းတဲ့ ရွေးကောက်ပွဲ ဖြစ်အောင်လို့ နိုင်ငံတကာက လုပ်ဆောင်ဖို့ တိုက်တွန်းလိုက်တာပဲ ဖြစ်တယ်လို့ ဒီခရီး မစခင်မှာပဲ မစ္စတာဖက်ဆီနိုက ပြောကြားသွားခဲ့ပါတယ်။
မြန်မာ နျူကလီးယားကိစ္စ ပြည်တွင်းအထောက်အထား မခိုင်လုံသေး

29 January 2010
မြန်မာနိုင်ငံဟာ မြောက်ကိုရီးယားနဲ့ ပူးပေါင်းပြီး နျူကလီးယား လက်နက်တွေ ထုတ်လုပ်ဖို့ စီစဉ်နေတယ်ဆိုတာ နိုင်ငံတကာက သံသယရှိနေဆဲ ဖြစ်ပေမဲ့ လောလောဆယ် အထောက်အထားတွေအရ အခိုင်အမာ မပြောနိုင်သေးဘူးလို့ နိုင်ငံတကာ သုတေသန အဖွဲ့တခုက ပြောကြားလိုက်ပါတယ်။ ISIS ခေါ် သိပ္ပံနဲ့ နိုင်ငံတကာ လုံခြုံရေး အဖွဲ့ရဲ့ အစီရင်ခံစာပါ ရေးသားချက်တွေကို အမေရိကန် အစိုးရက မလေ့လာရသေးပေမဲ့ နျူကလီးယား လက်နက် ပျံ့နှံ့မယ့် အရေးကိုတော့ စိုးရိမ်ကြောင်း မြန်မာစစ်အစိုးရကို ပြောကြားခဲ့တယ်လို့ ဆိုပါတယ်။ အကြောင်းစုံကို ကိုသားညွန့်ဦးက တင်ပြပေးထားပါတယ်။
ISIS ခေါ် သိပ္ပံနဲ့ နိုင်ငံတကာ လုံခြုံရေးအဖွဲ့က မြန်မာနိုင်ငံရဲ့ နျူကလီးယား ရည်မှန်းချက် ဆိုတဲ့ အစီရင်ခံစာ တစောင်ကို ဒီနေ့ ထုတ်ပြန်လိုက်တာ ဖြစ်ပါတယ်။ နျူကလီးယားစက်ရုံ တည်ဆောက်ရေး ဖြစ်တယ်ဆိုတဲ့ မန္တလေးမြို့နားက မြင်ကွင်းတွေကို ညွှန်းဆိုထားပါတယ်။
ဒီအကြောင်းနဲ့ ပတ်သက်ပြီး အမေရိကန် အစိုးရအနေနဲ့ ဘာများပြောစရာရှိလဲလို့ မနေ့က ပြုလုပ်တဲ့ အမေရိကန် နိုင်ငံခြားရေးဌာန သတင်းစာရှင်းလင်းပွဲမှာ သတင်းထောက် တယောက်က မေးမြန်းခဲ့ပါတယ်။ နိုင်ငံခြားရေးဌာန ပြောခွင့်ရပုဂ္ဂိုလ် ဖိလစ် ခရော်လီ (Philip Crowley) ကတော့ မြန်မာအစိုးရနဲ့ ဆွေးနွေးမှုတွေမှာ နျူကလီးယား ပျံ့နှံ့တဲ့ကိစ္စအပေါ် စိုးရိမ်မကင်းကြောင်း ထည့်သွင်း ပြောခဲ့တယ်လို့ ဆိုပါတယ်။ ဒါပေမဲ့လည်း ဒီအစီရင်ခံစာကို သူတို့ မလေ့လာရသေးဘူးလို့ ဖြေသွားပါတယ်။
ISIS ရဲ့ Burma Nuclear Ambition ဆိုတဲ့ အစီရင်ခံစာမှာ အဓိက ဖော်ပြထားချက်ကတော့ မြန်မာအစိုးရက မြောက်ကိုရီးယားနိုင်ငံနဲ့ ဆက်ဆံမှုတွေအရ ဒါဟာ နျူကလီးယားကိစ္စ ဒါမှမဟုတ် ဒုံးနဲ့ပတ်သက်ပြီး အဆင့်မြင့် နည်းပညာပိုင်းအရ ပတ်သက်မှုတွေ ရှိနိုင်တယ်လို့ နိုင်ငံတကာက သံသယရှိနေတဲ့ ကိစ္စကို သေချာ ပြန်လည်စိစစ် သုံးသပ်ထားတာ ဖြစ်ပါတယ်။ ဒီသတင်းတွေနဲ့ ရထားတဲ့ အချက်အလက်တွေကို ဆန်းစစ်ကြည့်တော့ မြန်မာနိုင်ငံမှာ နျူကလီးယား ဓာတ်ပေါင်းဖို လျှုို့ဝှက် တည်ဆောက်နေတယ်ဆိုတာ၊ နျူကလီးယားနဲ့ ပတ်သက်တယ်ဆိုတဲ့ ခိုင်မာတဲ့ အထောက်အထား မပြနိုင်ဘူးလို့ ဆိုပါတယ်။
တလောက သတင်းတွေမှာ ပေါ်ထွက်ခဲ့တဲ့ မြောက်ကိုရီးယားနိုင်ငံနဲ့ ပေါင်းပြီး မြန်မာနိုင်ငံမှာ လိုဏ်ခေါင်း တူးဖော်တဲ့ ဓာတ်ပုံတွေ၊ နျူကလီးယား ဓာတ်ပေါင်းဖို ဖြစ်တယ်လို့ ယူဆရတဲ့ ကောင်းကင်ဂြိုဟ်တုက ရိုက်ယူထားတဲ့ အဆောက်အဦးပုံတွေကို သေချာ စိစစ်ကြည့်တဲ့ အခါမှာတော့ ဒါဟာ နျူကလီးယားစက်ရုံနဲ့ မပတ်သက်ဘဲ ရေလှောင်တမံလုပ်ငန်းနဲ့ ဆိုင်တဲ့ ပုံတွေပဲ ဖြစ်တယ်လို့ ဆိုပါတယ်။
ဒါပေမဲ့လည်း ရှိနေတဲ့ နောက်အမြင်တခုကတော့ မြောက်ကိုရီးယား နျူကလီးယား လက်နက် အစီအစဉ်အတွက် လိုအပ်နေတဲ့ ပစ္စည်းတချို့ကို မြန်မာနိုင်ငံကတဆင့် ၀ယ်ယူပေးတာမျိုးလည်း ဖြစ်နိုင်တယ်လို့ ရေးထားပါတယ်။ မြောက်ကိုရီးယား ယူရေနီယံ သန့်စင်ရေး လုပ်ငန်းအတွက် တဆီးအချို့ကို မြန်မာနိုင်ငံကတဆင့် မြောက်ကိုရီးယားကို ရောက်ရှိနေတယ်လို့ ယူဆစရာရှိတယ်လို့ ဖော်ပြပါတယ်။
ဒါပေမဲ့လည်း မြန်မာစစ်အစိုးရဟာ ပွင့်လင်းမှုမရှိတဲ့ အစိုးရ ဖြစ်တာမို့ ဒီအချက်အလက်တွေကို ခိုင်လုံအောင် စုံစမ်းစစ်ဆေးဖို့တော့ ခက်ခဲတယ်လို့ အစီရင်ခံစာမှာ ဖော်ပြပါတယ်။ မြောက်ကိုရီးယားနိုင်ငံနဲ့ ဆက်နွယ်တယ်ဆိုတဲ့ လိုဏ်ခေါင်းတွေကို သတင်းဌာနတွေကို ပေါက်ကြားစေခဲ့တယ်ဆိုတဲ့ စစ်အရာရှိဟောင်း တဦးနဲ့ နိုင်ငံခြားရေး ၀န်ကြီးဌာန ၀န်ထမ်းတဦးကိုတော့ မကြာခင်ကဘဲ မြန်မာစစ်အစိုးရက သေဒဏ် အပြစ်ပေးခဲ့ပါတယ်။
၂၀၁၀ ရွေးကောက်ပွဲကိစ္စ နိုင်ငံတကာ သံတမန်တွေ စိုးရိမ်

03 February 2010
မြန်မာစစ်အစိုးရက ၂၀၁၀ ရွေးကောက်ပွဲကို ကျင်းပမယ်လို့ ပြောဆိုနေပေမဲ့လည်း ရွေးကောက်ပွဲနဲ့ ပတ်သက်တဲ့ သတင်းအချက်အလက်တွေကို အခုချိန်ထိ မထုတ်ပြန်သေးတဲ့အတွက် နိုင်ငံတကာ အသိုင်းအ၀ိုင်းက စိုးရိမ်နေကြပါတယ်။ မြန်မာနိုင်ငံအတွင်း လူ့အခွင့်အရေး အခြေအနေတွေ အပါအ၀င် ရွေးကောက်ပွဲနဲ့ဆိုင်တဲ့ မြန်မာ့အရေး ဆွေးနွေးပွဲတရပ်ကို နယူးယောက်မြို့က ကုလသမဂ္ဂ ရုံးချုပ်မှာ ကျင်းပခဲ့ပါတယ်။ ဒီအကြောင်းနဲ့ ပတ်သက်ပြီး စုံစမ်းမေးမြန်းထားတဲ့ ကိုရန်နိုင်က တင်ပြပေးထားပါတယ်။
မြန်မာနိုင်ငံမှာ စစ်အစိုးရက ၂၀၁၀ ရွေးကောက်ပွဲ ကျင်းပမယ့်ရက် မကြေညာသေးသလို ရွေးကောက်ပွဲနဲ့ ဆိုင်တဲ့ ဥပဒေတွေကို မထုတ်ပြန်သေးတဲ့အပြင် နိုင်ငံရေးနဲ့ဆိုင်တဲ့ အကျဉ်းသားတွေကို လွှတ်မပေးသေးတဲ့အတွက် ဒီရွေးကောက်ပွဲဟာ ဂုဏ်သိက္ခာရှိပြီး တရားမျှတတဲ့ ရွေးကောက်ပွဲ ဖြစ်လာနိုင်ပါ့မလားလို့ နိုင်ငံတကာ အသိုင်းအ၀ိုင်းက စိုးရိမ်နေကြပါတယ်။ အဲဒါကြောင့် မြန်မာ့အရေးကို စိတ်ဝင်စားကြတဲ့ နိုင်ငံတွေက ၂၀၁၀ ရွေးကောက်ပွဲ အခြေအနေတွေနဲ့ ဆိုင်တဲ့ ဆွေးနွေးပွဲတခုကို နယူးယောက်မြို့ ကုလသမဂ္ဂဆိုင်ရာ အိုင်ယာလန်နိုင်ငံရဲ့ မစ်ရှင်မှာ ပြုလုပ်ခဲ့ပြီး အိုင်ယာလန်နိုင်ငံနဲ့ ချက်သမ္မတနိုင်ငံတို့က ကမကထလုပ် စီစဉ်ခဲ့တာ ဖြစ်ပါတယ်။
ဒီဆွေးနွေးပွဲမှာ အဓိက ပြောဆိုဆွေးနွေးခဲ့တာတွေနဲ့ ပတ်သက်ပြီး NCGUB အဝေးရောက် မြန်မာနိုင်ငံ အမျိုးသား ညွန့်ပေါင်းအစိုးရရဲ့ ကုလသမဂ္ဂဆိုင်ရာ ကိုယ်စားလှယ် ဒေါက်တာသောင်းထွန်းက အခုလို ပြောပါတယ်။
“အဓိက သိချင်တာကတော့ ပထမဦးဆုံးအချက် အနေနဲ့ ၂၀၁၀ ရွေးကောက်ပွဲရဲ့ အချိန်ဇယားပေါ့၊ ဒုတိယကတော့ ရွေးကောက်ပွဲ ကျင်းပမယ်လို့ နအဖဘက်က ကြေညာထားတယ်။ ဒါပေမဲ့ ယနေ့အထိ ရွေးကောက်ပွဲဆိုင်ရာ ဥပဒေနဲ့ နိုင်ငံရေးပါတီများ မှတ်ပုံတင်ခြင်း ဆိုင်ရာ ဥပဒေတွေ ထွက်မလာတဲ့ အပေါ်မှာ ဒီဥပဒေက ဘယ်တော့ ထွက်ဖို့ရှိလဲ၊ နအဖဘက်က ဘယ်လိုမျိုး ပြင်ဆင်မှုတွေ လုပ်သလဲဆိုတဲ့ အပိုင်းပေါ့။
“နောက်တခုကတော့ ဒေါ်အောင်ဆန်းစုကြည် ဦးဆောင်တဲ့ အမျိုးသားဒီမိုကရေစီ အဖွဲ့ချုပ် အပါအ၀င် တခြား နိုင်ငံရေး ပါတီတွေ၊ တိုင်းရင်းသား အင်အားစုတွေနဲ့ တွေ့ဆုံ ဆွေးနွေး ညှိနှိုင်းမှုတွေ လုပ်ရမယ်။ ဒေါ်အောင်ဆန်းစုကြည်၊ ခွန်ထွန်းဦး အပါအ၀င် ဖမ်းဆီး ထိန်းသိမ်းခံထားရတဲ့ နိုင်ငံရေး အကျဉ်းသားတွေ၊ နိုင်ငံရေး ခေါင်းဆောင်တွေ၊ ရှစ်လေးလုံးက ကိုမင်းကိုနိုင်တို့ အပါအ၀င် နိုင်ငံရေး အကျဉ်းသားတွေ လွှတ်ရမယ်။ ဆိုတော့ အဲဒီအပိုင်းတွေ အပေါ်မှာ ဘယ်လောက် အတိုင်းအတာထိ တိုးတက်မှုရှိသလဲ၊ ဘယ်လို အခြေအနေတွေ ရှိသလဲ။
“အမျိုးသားဒီမိုကရေစီ အဖွဲ့ချုပ် အပါအ၀င် တခြား တိုင်းရင်းသား နိုင်ငံရေး ပါတီတွေ၊ အင်အားစုတွေရဲ့ ၂၀၁၀ အပေါ် သဘောထား အမြင်တွေကိုလည်း အဓိကထားပြီး မေးမြန်း ဆွေးနွေးကြတာ ဖြစ်ပါတယ်။”
ဒီဆွေးနွေးပွဲကို ဥရောပသမဂ္ဂ အဖွဲ့ဝင် နိုင်ငံတွေ အပါအ၀င် အမေရိကန် ပြည်ထောင်စု၊ ကနေဒါ၊ နော်ဝေး၊ ဆွီဒင်၊ ဒိန်းမတ်လို မြန်မာ့မိတ်ဆွေ နိုင်ငံတွေနဲ့ အရှေ့တောင်အာရှ နိုင်ငံက သံတမန်တချို့လည်း တက်ရောက် ဆွေးနွေးခဲ့ပါတယ်။ ရွေးကောက်ပွဲနဲ့ဆိုင်တဲ့ အခြေအနေတွေကို ဆွေးနွေးခဲ့သလို မြန်မာနိုင်ငံတွင်းက နိုင်ငံရေးနဲ့ လူ့အခွင့်အရေး အခြေအနေတွေအပေါ် ဆွေးနွေးခဲ့တာနဲ့ ပတ်သက်ပြီး ဒေါက်တာသောင်းထွန်းက အခုလို ဆက်ပြောပါတယ်။
“ဥရောပသမဂ္ဂ အပါအ၀င် နိုင်ငံတော်တော်များများက မြန်မာနိုင်ငံမှာ ငြိမ်းချမ်းချောမွေ့တဲ့ ဒီမိုကရေစီရေး အသွင်ကူးပြောင်းမှု ဖြစ်စေချင်တယ်။ လူ့အခွင့်အရေး အခြေအနေတွေ တိုးတက်တာ မြင်စေချင်တယ်။ ဒါနဲ့ပတ်သက်လို့လည်း အထွေထွေညီလာခံ ဆုံးဖြတ်ချက်တွေထဲမှာ ဖော်ပြထားပြီး ဖြစ်သလို အထွေထွေ အတွင်းရေးမှူးချုပ်ကိုလည်း အဲလိုမျိုး မြန်မာနိုင်ငံမှာ အမျိုးသား ပြန်လည်သင့်မြတ်ရေးနဲ့ ဒီမိုကရေစီရေး အတွက် ကြားဝင် ဆောင်ရွက်ပေးဖို့ဆိုပြီး တိုက်တွန်း ဆုံးဖြတ်ချက် ချထားတာတွေ ရှိပါတယ်။
“အဲဒီအခြေအနေနဲ့ ပတ်သက်လို့ သူတို့အနေနဲ့က စိုးရိမ်ပူပန်မှုတွေ ရှိနေပါတယ်။ ဘာကြောင့်လဲဆိုတော့ ဒီဆုံးဖြတ်ချက်တွေ၊ အကြံပြုချက်တွေ အထွေထွေ အတွင်းရေးမှူးချုပ်ရဲ့ အကြံပြုချက်တွေ ရှိပေမဲ့ တကယ်တမ်း ပြည်တွင်းမှာရှိတဲ့ နိုင်ငံရေး အခြေအနေဟာ တိုးတက်လာမှု၊ လူ့အခွင့်အရေး အခြေအနေ တိုးတက်လာမှု တစုံတရာ မတွေ့ရဘူး။ ဒါ အထွေထွေ ညီလာခံ ဆုံးဖြတ်ချက် ချထားပြီးတဲ့ နောက်ပိုင်းမှာပေါ့။
“အဲဒါတွေနဲ့ ပတ်သက်လို့ သူတို့က စိုးရိမ်မှု ရှိသလို ဂုဏ်သိက္ခာရှိတဲ့ ရွေးကောက်ပွဲတခု၊ အင်အားစုအားလုံး ပါဝင်တဲ့ဟာ ဖြစ်ပ့ါမလား၊ ဒါတွေနဲ့ ပတ်သက်လို့လည်း သူတို့မှာ စိုးရိမ်မှုတွေ ရှိပါတယ်။ ဒါကြောင့် ဒီမေးခွန်းတွေ ထွက်လာတာ ဖြစ်ပါတယ်။”
မြန်မာနိုင်ငံမှာ နိုင်ငံရေးအရ တိုးတက်ပြောင်းလဲမှုတွေ ဖြစ်ပေါ်လာဖို့အတွက် အမျိုးသားဒီမိုကရေစီ အဖွဲ့ချုပ် အပါအ၀င် အတိုက်အခံ နိုင်ငံရေး အင်အားစုတွေ အားလုံးနဲ့ စေ့စပ်ဆွေးနွေးမှုတွေ လုပ်ဖို့၊ ဒေါ်အောင်ဆန်းစုကြည် အပါအ၀င် နိုင်ငံရေး အကျဉ်းသားတွေ အားလုံးကို လွှတ်ပေးဖို့၊ ရွေးကောက်ပွဲကို လွတ်လပ် တရားမျှတပြီး အားလုံးပါဝင်နိုင်တဲ့ ရွေးကောက်ပွဲဖြစ်ဖို့ အမေရိကန် အပါအ၀င် နိုင်ငံတကာက တောင်းဆိုနေတာကို မြန်မာစစ်အစိုးရက အခုချိန်ထိ အပြုသဘောဆောင် တုံ့ပြန်ခြင်း မရှိသေးတဲ့ အပေါ်မှာလည်း နိုင်ငံတကာ အသိုင်းအ၀န်းက စိုးရိမ်မှုတွေ ဖြစ်နေတယ်လို့ ဒေါက်တာသောင်းထွန်းက ပြောကြားခဲ့ပါတယ်။
မြန်မာ့ရွေးကောက်ပွဲ စစ်မှန်မှု ဖိလစ်ပိုင် မေးခွန်းထုတ်

06 February 2010
မြန်မာနိုင်ငံမှာ ဒီနှစ်အတွင်းကျင်းပမယ်ဆိုတဲ့ ရွေးကောက်ပွဲတွေကို စက်တင်ဘာလလောက်မှာ ကျင်းပဖွယ်ရှိပေမဲ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည် ၀င်ရောက် ရွေးကောက်ခံခွင့်ရမှာ မဟုတ်ဘူးဆိုရင်တော့ လုပ်ဇာတ်ကြီး ပဲ ဖြစ်လိမ့်မယ်လို့ ဖိလစ်ပိုင်နိုင်ငံခြားရေးဝန်ကြီး Alberto Romulo က ပြောလိုက်ပါတယ်။
အမေရိကန်ပြည်ထောင်စုကို ရောက်နေတဲ့ မစ္စတာရိုမူလိုက သောကြာနေ့မှာ အခုလို ပြောလိုက်တာဖြစ်ပါတယ်။ ရွေးကောက်ပွဲကို စက်တင်ဘာလ ပတ်ဝန်းကျင်လောက်မှာ ကျင်းပမယ်လို့ မိမိယုံကြည်ကြောင်း၊ မိမိတို့ ကြားထားတာတွေ အရ ရွေးကောက်ပွဲ မတိုင်ခင် ဒေါ်အောင်ဆန်းစုကြည်ကို လွှတ်ပေးဖွယ်ရှိတယ်လို့ ယုံကြည်ကြောင်း မစ္စတာရိုမူလိုက ပြောပါတယ်။
ယုံကြည်လောက်တဲ့ ရွေးကောက်ပွဲမျိုးကျင်းပဖို့ တကယ်တမ်း အလေးအနက်ရှိတယ်ဆိုတာကို ပြချင်ရင် မြန်မာ စစ်အစိုးရ ဟာ ဒေါ်အောင်ဆန်းစုကြည်ကို လွှတ်ပေးသင့်တယ်လို့လည်း ဖိလစ်ပိုင်နိုင်ငံခြားရေးဝန်ကြီးက ပြောပါတယ်။
ဒါပေမဲ့လည်း မြန်မာစစ်အစိုးရဟာ ဒေါ်အောင်ဆန်းစုကြည်ကို ရွေးကောက်ပွဲမ၀င်နိုင်အောင် ပိတ်ပင် တားမြစ်နိုင်ခြေ ရှိသလို အမျိုးသားဒီမိုကရေစီအဖွဲ့ချုပ် အဖွဲ့ဝင်တချို့ကိုလည်း ပိတ်ပင်နိုင်ခြေရှိတယ်လို့ ဆိုပါသေးတယ်။ အဲဒီလိုသာ ဆိုရင်တော့ မြန်မာနိုင်ငံရဲ့ ဒီမိုကရေစီရေး ကိုယ်ပိုင်လမ်းပြမြေပုံဟာ အတုအယောင်ဖြစ်ပြီး ရွေးကောက်ပွဲဟာလည်း လုပ်ပွဲကြီးပဲဖြစ်ပါလိမ့်မယ်လို့ ဖိလစ်ပိုင်နိုင်ငံခြားရေးဝန်ကြီး Alberto Romulo က အမေရိကန်ပြည်ထောင်စု၊ ၀ါရှင်တန် ဒီစီမြို့တော်၊ မဟာဗျူဟာနဲ့ နိုင်ငံတကာ လေ့လာရေးဌာနမှာ ပြောသွားပါတယ်။
ရွေးကောက်ပွဲ မတိုင်ခင် လူ့အခွင့်အရေး ဥရောပ သံတမန်တွေ စိတ်ဝင်စား

16 February 2010
လာမယ့် မတ်လမှာ ကျင်းပမယ့် ကုလသမဂ္ဂ လူ့အခွင့်အရေး ကောင်စီရဲ့ ညီလာခံ မတိုင်ခင် မြန်မာနိုင်ငံရဲ့ နိုင်ငံရေး ပြဿနာတွေနဲ့ လူ့အခွင့်အရေး အခြေအနေတွေကို ကြိုတင်လေ့လာ ဆန်းစစ်တဲ့ မြန်မာ့အရေး ဆွေးနွေးပွဲတခုကို မနေ့က ဆွစ်ဇာလန်နိုင်ငံ ဂျနီဗာမြို့မှာရှိတဲ့ ကုလသမဂ္ဂဆိုင်ရာ ကနေဒါသံရုံးက ကမကထပြုလုပ် ကျင်းပပေးခဲ့ပါတယ်။ ဒီဆွေးနွေးပွဲအတွင်း ဘယ်လိုအကြောင်းအရာတွေကို ဆွေးနွေးခဲ့ကြသလဲ ဆိုတာကို ဆက်သွယ်မေးမြန်းထားတဲ့ မသင်းသီရိက တင်ပြပေးထားပါတယ်။
မနေ့က ကျင်းပခဲ့တဲ့ မြန်မာ့အရေး ဆွေးနွေးပွဲမှာတော့ မြန်မာစစ်အစိုးရက ဦးဆောင်ကျင်းပပေးမယ်ဆိုတဲ့ ၂၀၁၀ ရွေးကောက်ပွဲဆိုင်ရာ နိုင်ငံရေး အင်အားစုတွေရဲ့ သဘောထားတွေ၊ လူ့အခွင့်အရေး ချိုးဖောက်ခံနေရမှု အခြေအနေတွေကို ဆွေးနွေးခဲ့ကြတာပါ။ ဒါကလည်း မတ်လမှာ ကျင်းပမယ့် လူ့အခွင့်အရေး ကောင်စီရဲ့ ညီလာခံမှာ ကမ္ဘာ့နိုင်ငံတွေ အနေနဲ့ မြန်မာနိုင်ငံနဲ့ ပတ်သက်တဲ့ အချက်အလက်တွေကို ပိုပြီးရနေအောင် ဖြစ်တယ်လို့လည်း စီစဉ်သူတွေက ဆိုပါတယ်။
တခါ ကုလသမဂ္ဂရဲ့ မြန်မာနိုင်ငံဆိုင်ရာ လူ့အခွင့်အရေး အထူးကိုယ်စားလှယ် မစ္စတာ တောမတ်စ် အိုဟေး ကင်တားနား (Tomas Ojea Quintana) မြန်မာနိုင်ငံကို အခုရောက်နေပြီး သူစုံစမ်းလာမယ့် လက်ရှိ မြန်မာနိုင်ငံရဲ့ လူ့အခွင့်အရေး အခြေအနေကို ဒီ လူ့အခွင့်အရေး ကောင်စီရဲ့ ညီလာခံအတွင်း တင်ပြပါလိမ့်မယ်။
မနေ့က ပြုလုပ်ခဲ့တဲ့ ဆွေးနွေးပွဲအတွင်းမှာ ပါဝင်ဆွေးနွေးခဲ့သူ NCGUB အဝေးရောက် ညွန့်ပေါင်းအစိုးရအဖွဲ့ ကုလသမဂ္ဂရေးရာ တာဝန်ခံ ဒေါက်တာသောင်းထွန်းကတော့ နိုင်ငံရေး အကျဉ်းသားတွေရဲ့ အခြေအနေတွေနဲ့ သူတို့ရင်ဆိုင်နေရတဲ့ အခက်အခဲတွေကို အဓိက တင်ပြဖြစ်ခဲ့တယ်လို့ ပြောပါတယ်။
“ပြီးခဲ့တဲ့ ၆ လလောက် အတွင်းမှာ ရပ်ဝေးထောင်တွေကို ပြောင်းရွှေ့မှုတွေ ဖြစ်တာနဲ့ ပတ်သက်လို့ ကျနော်တို့ တင်ပြပါတယ်။ နိုင်ငံရေး အကျဉ်းသား ၂၆၀ လောက်က ရပ်ဝေးထောင်တွေကို အပို့ခံရတယ်။ တချို့ဆိုရင် တရုတ်၊ မြန်မာ နယ်စပ်မှာရှိတဲ့ အဲဒီလောက်အထိ ဝေးတဲ့ ထောင်တွေကို ပို့ခံရတဲ့အခါ မိသားစုအနေနဲ့ ထောင်ဝင်စာတွေ့ဖို့ အခက်အခဲတွေ ရှိတယ်၊ အထူးသဖြင့် ICRC နိုင်ငံတကာ ကြက်ခြေနီအဖွဲ့ရဲ့ သွားရောက်မှုတွေကို ၂၀၀၆ ကတည်းက ပိတ်ပင်ထားပြီး နောက်ပိုင်းမှာ နိုင်ငံရေး အကျဉ်းသား အများစုဟာ မိသားစုက ထောက်ပံ့တဲ့ ဆေးဝါးနဲ့ အစားအသောက် အကူအညီအပေါ်မှာ အခြေခံ အသက်ရှင် ရပ်တည်ရတာပေါ့။ ဒါကြောင့် ဒီလိုမျိုး ရပ်ဝေးထောင်တွေ ပြောင်းရွှေ့မှုနဲ့ ပတ်သက်လို့ နိုင်ငံတကာက ဒီကိစ္စတွေကို ဖိအားပေးဖို့ လိုတယ်ဆိုတဲ့ သတင်းပေါ့နော်။”
နောက်တခါ မြန်မာနိုင်ငံအတွင်းမှာ ILO နဲ့ ပူးပေါင်းဆောင်ရွက်မှု အပိုင်းတွေ၊ ၂၀၀၇ ရွှေဝါရောင် သံဃာ့လှုပ်ရှားမှုအပြီး ဖမ်းဆီးခံထားရတဲ့ မြန်မာရဟန်းတော်တွေရဲ့ အခြေအနေတွေအပြင် တိုင်းရင်းသား အရေးတွေကိုပါ ဆွေးနွေးဖြစ်ခဲ့တယ်လုိ့လည်း ဆက်ပြောပြပါတယ်။
“ILO နဲ့ ပူးပေါင်းဆောင်ရွက်တဲ့ လူတွေကို၊ ဥပမာ ရှေ့နေ ဦးဖိုးဖြူတို့ကအစ ကိုဇော်ဌေးတို့၊ နောက် ရခိုင်ဘက်က ပုဂ္ဂိုလ်တွေရော ဖမ်းဆီးထားတာ ရှိတယ်။ အဲဒီကိစ္စတွေနဲ့ ပတ်သက်လို့ ဖိအားပေးဖို့ လိုတယ်။ ILO က မစ္စတာ တာပီယိုလာတို့ သွားရောက်ခဲ့ပေမဲ့ သိပ်ပြီး ထူးထူးခြားခြား ဖြစ်မလာဘူးဆိုတော့ အဲဒီ ILO နဲ့ ပူးပေါင်းဆောင်ရွက်တဲ့ လူတွေ ပြန်လည်လွတ်မြောက်ရေးကိုလည်း ဖိအားပေးဖို့ပေါ့။
“နောက်တခုက ကလေးစစ်သားတွေ၊ စစ်သားစုဆောင်းရေး တပ်တွေ၊ လေ့ကျင့်ရေး သင်တန်းကျောင်းတွေ၊ ဒါတွေကို လွတ်လွတ်လပ်လပ် သွားလာခွင့်တွေမှာ အကန့်အသတ် ဖြစ်နေသေးတယ်ဆိုတဲ့ အပိုင်းပေါ့။ တိုင်းရင်းသား ဒေသတွေမှာ အဓမ္မ ရွှေ့ပြောင်းခံရတဲ့ ဒုက္ခသည်တွေဟာ သိန်းနဲ့ချီပြီး ဖြစ်လာနေတဲ့ အနေအထားတွေ၊ နောက်တခုက ထိုင်းနိုင်ငံက ဒုက္ခသည်တွေ နေရပ်ပြန်မပို့ဖို့ ကိစ္စ၊ အဲဒီကိစ္စတွေကို ကျနော်တို့ အများစု တင်ပြပါတယ်။”
တနင်္လာနေ့ကစလို့ မြန်မာနိုင်ငံကို ရောက်နေတဲ့ ကုလသမဂ္ဂရဲ့ မြန်မာနိုင်ငံဆိုင်ရာ လူ့အခွင့်အရေး ကိုယ်စားလှယ် မစ္စတာ ကင်တားနားရဲ့ ခရီးစဉ်နဲ့ ပတ်သက်လို့လည်း ပြောဆိုဖြစ်ခဲ့တယ်လို့ ဒေါက်တာသောင်းထွန်းက ပြောပါတယ်။
“ကင်တားနား ခရီးစဉ် မစခင်မှာ ဦးတင်ဦး လွတ်လာတာတော့ ဘာပဲပြောပြော တိုးတက်မှုတခုလို့ ပြောလို့ရတာပေါ့။ ဒါပေမဲ့ အဲဒီအခြေခံပေါ်မှာ အမျိုးသားဒီမိုကရေစီ အဖွဲ့ချုပ်ရဲ့ နိုင်ငံရေး လွတ်လပ်ခွင့်တွေ ဘယ်လိုတွေ ရှိမလဲဆိုတဲ့ အပိုင်းတွေပေါ့။ ဒါတွေကတော့ ကျနော်တို့ စောင့်ကြည့်ရဦးမယ်။ နိုင်ငံရေး အကျဉ်းသားတွေ လွတ်မြောက်ရေး Issu က ကင်တားနားရဲ့ ဦးစားပေး အစီအစဉ် ဖြစ်မယ်လို့ ကျနော်တို့ ယူဆတယ်။
“နောက်တခုက ရခိုင်ကိုသွားတာ အနှစ် ၂၀ အတွင်း လူ့အခွင့်အရေးနဲ့ ပတ်သက်တဲ့ ကျွမ်းကျင်သူတွေထဲမှာ မစ္စတာ ကင်တားနားက ပထမဦးဆုံးဖြစ်တာ တွေ့ရပါတယ်။ အဲဒီလို သွားခွင့်ရတဲ့အခါ အထူးသဖြင့် ရခိုင်ပြည်နယ်မှာရှိတဲ့ လူ့အခွင့်အရေး ချိုးဖောက်မှုတွေ၊ ရိုဟင်ဂျာတွေနဲ့ ပတ်သက်တဲ့ အနေအထားတွေကို သူ့အနေနဲ့ ပိုပြီး ပြည့်ပြည့်စုံစုံ စူးစမ်းလေ့လာခွင့် ရလိမ့်မယ်ဆိုတဲ့ အနေအထားရှိတာကို ကျနော်တို့ တင်ပြထားပါတယ်။”
မနေ့က ဆွစ်ဇာလန်မှာရှိတဲ့ ကနေဒါသံရုံးမှာ ပြုလုပ်ခဲ့တဲ့ မြန်မာ့အရေး ဆွေးနွေးပွဲကို လက်ရှိ လူ့အခွင့်အရေး ကောင်စီရဲ့ အလှည့်ကျဥက္ကဋ္ဌဖြစ်တဲ့ စပိန်နိုင်ငံက သံတမန်တချို့၊ ဥရောပသမဂ္ဂ အဖွဲ့ဝင် နိုင်ငံတချို့က သံတမန်တွေအပြင် အရှေ့အာရှ နိုင်ငံတွေက သံတမန်တချို့လည်း တက်ရောက်ခဲ့တာပါ။
“သူတို့အနေနဲ့လည်း ၂၀၁၀ နဲ့ ပတ်သက်လို့ သူတို့ အနီးကပ် စောင့်ကြည့်နေတယ်။ သူတို့အနေနဲ့ ဆက်တိုက်လည်း သိသွားချင်တယ်ဆိုတဲ့ သဘောပေါ့။ အခု ကင်တားနားရဲ့ ခရီးစဉ်ဟာ ဘာပဲပြောပြော နောက်ကျတယ်။ ဘာဖြစ်လို့လဲဆိုတော့ ရှေ့လ မတ်လဆန်းတယ်ဆိုရင် လူ့အခွင့်အရေးကောင်စီ အစည်းအဝေးက စတော့မှာပါ။ ဆိုတော့ အဲဒီအနေအထားမှာတောင် သူတို့အနေနဲ့ ဘယ်လိုပဲ အချိန်တိုတောင်းပေမဲ့ ကင်တားနားဆီက နောက်ဆုံး အခြေအနေနဲ့ ပတ်သက်လို့ တင်ပြတဲ့ အစီရင်ခံစာမျိုးကို သူတို့ တောင်းမယ်ပေါ့။
“ဘာဖြစ်လို့လဲဆိုတော့ လတ်တလော အခြေအနေတွေကို သူတို့ သိချင်တယ်။ ကင်တားနားက လူ့အခွင့်အရေး အခြေအနေတွေ တိုးတက်မှု ရှိမရှိဆိုတဲ့ သုံးသပ်ချက်တွေကိုလည်း သူတို့ ကြားချင်တယ်။ ဒါတွေကို သူတို့ အများကြီး မျှော်လင့်နေတယ်ဆိုတာ ကျနော်တို့ တွေ့ရပါတယ်။”
မနေ့က ဆွစ်ဇာလန်မှာရှိတဲ့ ကနေဒါသံရုံးမှာ ကျင်းပခဲ့တဲ့ မြန်မာ့အရေး ဆွေးနွေးပွဲအကြောင်းကို NCGUB အဝေးရောက် ညွန့်ပေါင်းအစိုးရ အဖွဲ့က ကုလသမဂ္ဂရေးရာ တာဝန်ခံ ဒေါက်တာသောင်းထွန်း ပြောပြခဲ့တာ ဖြစ်ပါတယ်။
တိုင်းရင်းသား လူနည်းစုတွေအပေါ် ဖိနှိပ်မှု ရပ်တန့်ဖို့ မြန်မာစစ်အစိုးရကို လူ့အခွင့်အရေးအဖွဲ့ တိုက်တွန်း

16 February 2010
လာမယ့် ရွေးကောက်ပွဲ မတိုင်မီ ကာလမှာ မြန်မာစစ်အစိုးရ အနေနဲ့ တိုင်းရင်းသား နိုင်ငံရေး လှုပ်ရှားသူတွေအပေါ် ဖိနှိပ် တာတွေ ရပ်တန့်ဖို့အတွက် နိုင်ငံတကာ လွတ်ငြိမ်းချမ်းသာခွင့်အဖွဲ့က အစီရင်ခံစာတစောင် ထုတ်ပြန်ပြီး ဒီကနေ့ တောင်းဆိုလိုက်ပါတယ်။ ဒီတောင်းဆိုမှုကို မြန်မာ့နိုင်ငံရေး အင်အားစုတွေက ကြိုဆိုလိုက်ပြီး အမျိုးသား ပြန်လည် သင့်မြတ်ရေးအတွက် တိုင်းရင်းသား နိုင်ငံရေး အကျဉ်းသားတွေ လွှတ်ပြီး တွေ့ဆုံဆွေးနွေးဖို့ တိုက်တွန်းပါတယ်။ အပြည့်အစုံကို ထိုင်းအခြေစိုက် သတင်းထောက် ကိုမိုးဇော်က တင်ပြပေးထားပါတယ်။
အမေရိကန် အခြေစိုက် နိုင်ငံတကာ လွတ်ငြိမ်းချမ်းသာခွင့်အဖွဲ့ (AI) က ဒီလို အစီရင်ခံစာ ထုတ်ပြန်ချိန်ဟာ ကုလသမဂ္ဂ လူ့အခွင့်အရေး ကိုယ်စားလှယ် တောမတ်စ် အိုဟေး ကင်တာနား (Tomas Ojea Quintana) ရခိုင်ပြည်နယ်ဘက်ကို သွားရောက်ချိန်နဲ့လည်း တိုက်ဆိုင်နေပါတယ်။
AI အဖွဲ့ရဲ့ တောင်းဆိုချက်ကိုတော့ သူတို့ရဲ့ အင်တာနက် စာမျက်နှာမှာ အသံနဲ့ ဖတ်ကြားထားပါတယ်။
သူတို့ရဲ့ ကြေညာချက်ကတော့ လာမယ့် ရွေးကောက်ပွဲမတိုင်မီ ကာလမှာ မြန်မာစစ်အစိုးရ အနေနဲ့ တိုင်းရင်းသား နိုင်ငံရေး လှုပ်ရှားသူတွေအပေါ် ဖိနှိပ်တာတွေ ရပ်တန့်ရမယ်လို့ ဒီကနေ့ အစီရင်ခံစာ ထုတ်ပြန်ပြီး တောင်းဆိုကြောင်း ဖတ်ကြားထား တာ ဖြစ်ပါတယ်။
AI အဖွဲ့က ထုတ်ပြန်တဲ့ စာမျက်နှာ ၅၈ မျက်နှာရှိတဲ့ အစီရင်ခံစာကို ရခိုင်၊ ရှမ်း၊ ကချင်၊ ချင်း စတဲ့ တိုင်းရင်းသား လူမျိုးစု ၇ စုက နိုင်ငံရေး လှုပ်ရှားသူ ၇၀၀ ကို အခြေပြုပြီး ထုတ်ပြန်ထားတာ ဖြစ်ကြောင်းနဲ့ ဒီအစီရင်ခံစာကို ၂၀၀၇ ခုနှစ် သြဂုတ်လ ကနေ ၂ နှစ်ကြာ ကာလအတွင်း ဖြစ်ပျက်ခဲ့တဲ့ အခြေအနေတွေကို ဖော်ပြထားကြောင်း ကြေညာချက်မှာ ပါရှိပါတယ်။
ရခိုင်ဒီမိုကရေစီ အဖွဲ့ချုပ်ရဲ့ ပြောရေးဆိုခွင့်ရှိသူ ဦးအေးသာအောင်က AI အဖွဲ့ရဲ့ ကြေညာချက်ဟာ မြန်မာပြည်မှာ လက်တွေ့ဖော်ဆောင်ရမယ့် အရာတွေကို ထုတ်ပြန်လိုက်တာ ဖြစ်တယ်လို့ ပြောပါတယ်။
“အခုကြေညာတဲ့ ကြေညာချက်ဟာ တကယ်တော့ မြန်မာနိုင်ငံမှာ လက်တွေ့အားဖြင့် ဖော်ဆောင်ပေးရမယ့် ဖော်ဆောင်ချက်တွေကို တနည်းတလမ်းနဲ့ ဖော်ပြတယ်လို့ ကျနော့်အနေနဲ့ မြင်ပါတယ်။ မြန်မာနိုင်ငံမှာ တိုင်းရင်းသား စည်းလုံးညီညွတ်ရေးကို မတည်ဆောက်ဘဲနဲ့ ပြီးပြည့်စုံတဲ့ အမျိုးသား သွေးစည်း ညီညွတ်ရေးကို တည်ဆောက်လို့ မရပါဘူး။ အဲတော့ တိုင်းရင်းသား စည်းလုံးညီညွတ်ရေးကို တည်ဆောက်တဲ့ နေရာမှာလည်း အပြောသက်သက်နဲ့ မဟုတ်ဘဲ လက်တွေ့အကောင်အထည်ဖော်ဖို့ လိုပါတယ်။”
ဒီလို အကောင်အထည် ဖော်ရာမှာ လိုအပ်မယ့် အချက်တွေကို ဦးအေးသာအောင်က အခုလို ဆက်ပြောပါတယ်။
“အဲဒီလို အကောင်အထည်ဖော်တဲ့ နေရာမှာ အဓိကကတော့ ပင်လုံ သဘောတူညီချက်တွေကို အကောင်အထည်ဖော်ဖို့ လိုသလို အခုအခါမှာ တိုင်းရင်းသား ခေါင်းဆောင်များဖြစ်တဲ့ ဦးခွန်ထွန်းဦး၊ စိုင်းညွန့်လွင်၊ ဗိုလ်ချုပ်ဆေထင်တို့ အပါအ၀င် တိုင်းရင်းသား ရာပေါင်းများစွာတွေကို ဖမ်းဆီး ထောင်ချထားတဲ့ ဟာတွေကို လွှတ်ပေးဖို့ လိုပါတယ်။ နောက်တခုက တိုင်းရင်းသား နယ်မြေတွေမှာ ဖြစ်ပေါ်နေတဲ့ လက်နက်ကိုင် ပဋိပက္ခတွေကို ရပ်စဲပြီးတော့ ပြည်တွင်းစစ်ကိုလည်းပဲ ပြီးပြည့်စုံတဲ့ ငြိမ်းချမ်းရေးရအောင် တည်ဆောက်ဖို့ လိုပါတယ်။”
AI အဖွဲ့ရဲ့ ထုတ်ပြန်ချက်မှာ အာဏာပိုင်တွေက တိုင်းရင်းသား နိုင်ငံရေး လှုပ်ရှားသူတွေကို ဖမ်းဆီးတာ၊ ထောင်ချတာ၊ ညှဉ်းပန်းနှိပ်စက်တာ၊ သတ်ဖြတ်တာတွေ လုပ်နေကြောင်းနဲ့ သူတို့ရဲ့ တရားဝင် လှုပ်ရှားမှုတွေကို လုပ်ဆောင်ဖို့ ကြိုးစားရာမှာ မျက်ခြည်မပြတ် စောင့်ကြည့်ခံရတာ၊ နှောင့်ယှက် ဟန့်တားတာနဲ့ ခွဲခြားဆက်ဆံ ခံရတာတွေ ရှိနေတယ်လို့ ဖော်ပြပါတယ်။
နိုင်ငံရေး အကျဉ်းသားများ ကူညီစောင့်ရှောက်ရေးအဖွဲ့-မြန်မာနိုင်ငံက ကိုဘိုကြည်က ဖမ်းဆီးခံထားရတဲ့ တိုင်းရင်းသား နိုင်ငံရေး အကျဉ်းသား ၂၀၀ ကျော်လောက် ရှိတယ်လို့ ပြောပါတယ်။
“၂၀၀ ကျော် ရှိပါတယ်၊ ကျနော်တို့ စာရင်းတွေ အရတော့။ ရှမ်းရှိတယ်၊ မွန်ရှိတယ်၊ ကရင်ရှိတယ်၊ ရခိုင်ရှိတယ်။ ဥပမာ ဦးကျော်မင်းဆိုတာ မြင်းခြံထောင်မှာရှိတယ်၊ သူက ရခိုင်ကပဲ။ သူလည်း MP ပဲ။ သူတို့ တမိသားစုလုံး အဖမ်းခံရတာ။ နောက် ဦးညီပု ရှိမယ်၊ ဦးခွန်ထွန်းဦး ရှိမယ်၊ စိုင်းထွန်းညိုတို့ရှိမယ်။ နောက် ရခိုင်ဘက်မှာ အဖမ်းခံရတဲ့ ဘုန်းကြီးတွေတော့ ရှိတယ်။
“တိုင်းရင်းသားတွေ တော်တော်များများ ဖြစ်တယ်ဆိုတာ တချို့တွေက ထောင်ဝင်စာတောင် မလာနိုင်တဲ့ အနေအထားမျိုး တွေ ရှိတယ်။ စောစောပိုင်းကဆိုရင် အထူးသဖြင့် ကရင်တွေဆိုရင် ထောင်ပြောင်းလာပြီးတဲ့ အချိန်မှာ တော်တော်လေး ညှဉ်းပန်းနှိပ်စက်၊ အရိုက်ခံရတာမျိုးတွေ ရှိပါတယ်။
“အခု ထင်ရှားတဲ့ တိုင်းရင်းသား ခေါင်းဆောင်တွေထဲမှာ ဆိုရင်လည်း ရှမ်းက ဦးခွန်ထွန်းဦးတို့ ဆိုရင်လည်း နယ်ဝေး ထောင်တွေ အပို့ခံရတယ်။ ပြီးတော့ ကျန်းမာရေး အခြေအနေတွေ မကောင်းဘူး။ မကောင်းတဲ့ကြားထဲ ဆေးဝါးကုသခွင့် လုံလုံလောက်လောက် မပေးတာတွေကလည်း နိုင်ငံရေး အကျဉ်းသားတွေရော၊ တိုင်းရင်းသား နိုင်ငံရေး အကျဉ်းသားတွေ ရော ခံစားနေရတဲ့ ကိစ္စတွေပါ။”
အမျိုးသား ပြန်လည်သွေးစည်းရေးအတွက် ဆိုရင် ထောင်ကျခံနေရတဲ့ တိုင်းရင်းသား နိုင်ငံရေး ခေါင်းဆောင်တွေနဲ့ လက်တွဲလုပ်ဖို့ လိုအပ်တယ်လို့ ကိုဘိုကြည်က ဆက်ပြောပါတယ်။
“တိုင်းရင်းသား နိုင်ငံရေး အကျဉ်းသားတွေထဲမှာ တချို့ အရေးကြီးတဲ့ တိုင်းရင်းသား ခေါင်းဆောင်တွေလည်း ပါဝင်နေတာ တွေ့ရတယ်။ ဒီတိုင်းရင်းသား ခေါင်းဆောင်တွေက အမျိုးသား ပြန်လည်သင့်မြတ်ရေးအတွက် အင်မတန် အရေးကြီးတဲ့ သူတွေ ဖြစ်တယ်။ ဒီလူတွေကို အကျဉ်းထောင်ထဲမှာ အသက်ဆုံးရှုံးသွားတဲ့ အဖြစ်မျိုးတော့ မဖြစ်သင့်ဘူး။ ဒီလူတွေနဲ့ အတူတွဲပြီး တိုင်းပြည်အတွက် လက်တွဲလုပ်ရမှာ ဖြစ်တယ်။ အဲဒီအတွက် ဒီလူတွေကို ခြွင်းချက်မရှိ ချက်ချင်း လွှတ်ပေးသင့် တယ်လို့ ကျနော်တို့ ပြောချင်ပါတယ်။”
နိုင်ငံတကာ လွတ်ငြိမ်းချမ်းသာခွင့်အဖွဲ့က ရွေးကောက်ပွဲ မတိုင်မီမှာ တိုင်းရင်းသား လူမျိုးစုတွေကို ဖိနှိပ်တာတွေ ရပ်တန့်ဖို့ တောင်းဆိုနေတဲ့ တပြိုင်တည်းမှာတော့ မြန်မာ့နိုင်ငံရေး အင်အားစုတွေက ရွေးကောက်ပွဲထက် အမျိုးသား ပြန်လည်သွေးစည်း ညီညွတ်ရေးအတွက် တွေ့ဆုံဆွေးနွေးဖို့ကို အလေးထား တင်ပြနေကြပါတယ်။
မြန်မာစစ်အစိုးရကတော့ ရွေးကောက်ပွဲကို ဒီနှစ်အတွင်း ကျင်းပမယ်လို့ ကတိပေးထားပေမဲ့ ဘယ်နေ့ ဘယ်လမှာ ကျင်းပ မယ် ဆိုတာတော့ အခုချိန်ထိ မကြေညာသေးပါဘူး။
နိုင်ငံတကာ လွတ်ငြိမ်းချမ်းသာခွင့် အဖွဲ့က ရွေးကောက်ပွဲကို ဦးတည်နေတဲ့ အခုလိုကာလမှာ လွတ်လပ်စွာ အသင်းအပင်း ဖွဲ့စည်းခွင့်၊ စုဝေးခွင့်နဲ့ ကိုးကွယ်ခွင့်တွေအပေါ် ကန့်သတ်ချုပ်ချယ် မထားဖို့ မြန်မာစစ်အစိုးရကို တိုက်တွန်းထားသလို နိုင်ငံရေး အကျဉ်းသားတွေ အားလုံးကိုလည်း ခြွင်းချက်မရှိ အမြန်ဆုံး လွှတ်ပေးဖို့နဲ့ ရွေးကောက်ပွဲမှာ သတင်းမီဒီယာတွေကို လွတ်လပ်စွာ ရေးသားဖော်ပြခွင့် ပြုဖို့ကိုလည်း တိုက်တွန်းထားပါတယ်။
လူ့အခွင့်အရေး ကိုယ်စားလှယ် စစ်တွေအကျဉ်းထောင် သွားရောက်ကြည့်ရှု

16 February 2010
မြန်မာနိုင်ငံကို ၅ ရက်ကြာခရီး လာရောက်နေတဲ့ ကုလသမဂ္ဂရဲ့ မြန်မာနိုင်ငံဆိုင်ရာ လူ့အခွင့်အရေး စုံစမ်းစစ်ဆေးရေးမှူး မစ္စတာ တောမတ်စ် အိုဟေး ကင်တားနား (Tomas Ojea Quintana) ဟာ ဒီနေ့ သူ့ရဲ့ ဒုတိယမြောက်နေ့မှာ စစ်တွေထောင် ကို သွားရောက်ခဲ့ပြီး ရခိုင်ပြည်နယ်ထဲမှာ လှုပ်ရှားနေတဲ့ ပြည်တွင်းပြည်ပက အစိုးရမဟုတ်တဲ့ NGO အဖွဲ့အစည်း တွေနဲ့ သွားရောက်တွေ့ဆုံခဲ့ပါတယ်။ အပြည့်အစုံကို ဒေါ်ခင်မျိုးသက်က တင်ပြပေးထားပါတယ်။
ရခိုင်ပြည်နယ်ထဲမှာ လူ့အခွင့်အရေး ချိုးဖောက်မှုတွေကို လေ့လာ စုံစမ်းဖို့အတွက် ကုလသမဂ္ဂရဲ့ မြန်မာနိုင်ငံဆိုင်ရာ လူ့အခွင့်အရေး စုံစမ်းစစ်ဆေးရေးမှူး မစ္စတာ ကင်တားနားဟာ ဒီနေ့ စစ်တွေမြို့ကို ရောက်ရှိနေပါတယ်။ မစ္စတာ ကင်တားနားရဲ့ ခရီးစဉ်မှာ လိုက်ပါဆောင်ရွက်ပေးနေတဲ့ ရန်ကုန် ကုလသမဂ္ဂ သတင်းနဲ့ ပြန်ကြားရေး တာဝန်ခံ ဦးအေးဝင်းကို ဆက်သွယ်မေးမြန်းကြည့်တဲ့အခါ မစ္စတာ ကင်တားနား ဒီနေ့ စစ်တွေအကျဉ်းထောင်ကို သွားရောက် လေ့လာခဲ့တယ်လို့ ပြောပါတယ်။
“ကျနော်တို့ အခု စစ်တွေမှာ ရှိပါတယ်။ အခုပဲ စစ်တွေထောင်က အကျဉ်းသားအချို့ တွေ့ခဲ့ပါတယ်။ စစ်တွေထောင်ထဲ ၀င်ပြီး လေ့လာခဲ့ပါတယ်။ မနက်က စစ်တွေရောက်ရောက်ချင်းမှာပဲ အထွေထွေ အုပ်ချုပ်ရေးက ဒေသအာဏာပိုင်တွေနဲ့ တွေ့ခဲ့တယ်။ ပြီးတော့ စစ်တွေထောင်ကို လေ့လာတယ်။ အခု အစည်းအဝေးကတော့ ရခိုင်မှာရှိတဲ့ NGO တွေနဲ့ အစည်းအဝေး လုပ်နေပါတယ်။
“NGO ၂၁ ခုလောက်နဲ့ တွေ့နေပါတယ်။ ရခိုင်မှာ အခြေစိုက်တဲ့၊ ရုံးခွဲဖွင့်ထားတဲ့ သူတွေပေါ့။ ပြီးတော့ ရခိုင်မှာ အခြေစိုက်တဲ့ ပြည်တွင်းက NGO တွေနဲ့ တွေ့ဖို့ ရှိပါသေးတယ်။ မနက်ဖြန်ကတော့ ဘူးသီးတောင်၊ မောင်တောဘက်ကို သွားဖို့ ရှိပါတယ်။ ဒီအစီအစဉ်ကိုတော့ ကျနော် အတိအကျ မသိသေးပါဘူး။”
မစ္စတာ ကင်တားနားရဲ့ ရခိုင်ပြည်နယ် ခရီးစဉ်မှာ ILO ကမ္ဘာ့အလုပ်သမား အဖွဲ့ကြီးရဲ့ မြန်မာနိုင်ငံဆိုင်ရာ ဌာနေကိုယ်စားလှယ် မစ္စတာ စတိဗ် မာရှဲလ် (Mr. Steve Marshall) လည်း လိုက်ပါသွားပါတယ်။ မစ္စတာမာရှဲလ်က …
“မစ္စတာ ကင်တားနား အနေနဲ့ ဒေသခံ ကိုယ်စားလှယ်တယောက် ပါနေတာဟာ အဆင်ပြေ အသုံးဝင်မယ်လို့ ယုံကြည်တာမို့ ကျနော်ပါ လိုက်လာခဲ့တာပါ။ မြန်မာအစိုးရဘက်ကလည်း ဒါဟာ အပြုသဘော ဆောင်မယ်လို့ မြင်ပြီးတော့ ကျနော်ပါလိုက်ဖို့ သဘောတူပါတယ်။ ILO ဟာ လူ့အခွင့်အရေးဆိုင်ရာ အဖွဲ့အစည်းတခု ဖြစ်တာမို့ ဒီလို လူ့အခွင့်အရေးနဲ့ဆိုင်တဲ့ အကြံဉာဏ် ပေးနိုင်သူတွေ များများ ပါလေလေ၊ သူ့ရဲ့ ခရီးစဉ်ဟာ ပိုပြီး အဆင်ပြေလေလေ ဖြစ်မှာပါ။
“ကျနော်တို့ဟာ အဓမ္မလုပ်အားပေး ခိုင်းစေမှု ပပျောက်အောင် မြန်မာအာဏာပိုင်တွေနဲ့ လက်တွဲ ဆောင်ရွက်နေသလို ဒီကိစ္စဟာလည်း လူ့အခွင့်အရေး ကိုယ်စားလှယ် လုပ်ဆောင်ဖို့ သတ်မှတ်ထားတဲ့ အလုပ်တွေထဲက တခု ဖြစ်နေတာပါ။”
အခုလို ရခိုင်ပြည်နယ်ထဲက လူ့အခွင့်အရေး ချိုးဖောက်မှုတွေကို စုံစမ်းဖို့အတွက် လာရောက်တာနဲ့ ပတ်သက်ပြီး လူ့အခွင့်အရေး လှုပ်ရှားသူတွေက ကြိုဆိုလိုက်ကြပါတယ်။ ဒါပေမဲ့ သူ့ရဲ့ ရခိုင်ပြည်နယ် ၂ ရက် ခရီးစဉ်ကနေ ရခိုင်ပြည်နယ် တ၀န်းက လူ့အခွင့်အရေး ချိုးဖောက်မှု အားလုံးကို ပြည့်ပြည့်စုံစုံ မသိနိုင်တဲ့အတွက် ကုလသမဂ္ဂ လူ့အခွင့်အရေး ကောင်စီရဲ့ မတ်လထဲမှာ ကျင်းပမယ့် အစည်းအဝေးမှာ မစ္စတာ ကင်တားနား အစီရင်ခံစာ တင်သွင်းတဲ့အခါ ပြည့်စုံမှု မရှိမှာကို ပူပန်နေကြပါတယ်။
မစ္စတာ ကင်တားနား မြန်မာနိုင်ငံကို မလာရောက်ခင် ရခိုင်ပြည်နယ်တွင်းက လူ့အခွင့်အရေး ချိုးဖောက်မှုတွေနဲ့ ပတ်သက်ပြီး အိတ်ဖွင့်ပေးစာ ရေးသား တင်သွင်းခဲ့တဲ့ ရခိုင်အမျိုးသမီး အစည်းအရုံးက တာဝန်ခံ ဒေါ်မြရာဇာလင်းက အခုလိုပြောပါတယ်။
“ရခိုင်ပြည်နယ်အတွင်းမှာ လူ့အခွင့်အရေး ချိုးဖောက်မှုတွေက နေရာတကာ ဖြစ်နေပါတယ်။ အဲဒီအတွက်လည်း ဒီလ ဖေဖော်ဝါရီလ ၂ ရက်နေ့မှာ မစ္စတာ ကင်တားနားထံကို စာရေးပြီး ကျမ ပေးထားတာ ရှိပါတယ်။ အဲဒါတွေကို မစ္စတာ ကင်တားနား အနေနဲ့ သေချာလေ့လာပြီး လူ့အခွင့်အရေး ကောင်စီမှာ တင်ပြပေးစေချင်ပါတယ်။
“ဘူးသီးတောင်၊ မောင်တောတွေမှာလည်း ဖြစ်တာ သေချာပါတယ်။ ကျောက်ဖြူ၊ ရမ်းဗြဲ၊ အမ်း စတဲ့ ဒေသတွေမှာဆိုရင် ရေနံတူးဖော်မှုတွေ ရှိတယ်၊ ဂက်စ် တူးဖော်မှုတွေ ရှိတယ်။ အဲဒီလို တူးဖော်တဲ့နေရာမှာ ဆိုရင် အဓမ္မ နယ်မြေ အသိမ်းခံထားရတာတွေ ရှိပါတယ်။ ကျမတို့ ရသေ့တောင်မြို့နယ်မှာ ဆိုရင်လည်း တပ်ပိုင်မြေတွေအတွက် လယ်မြေဧရိယာ အများကြီးကို သိမ်းထားတာတွေ ရှိတယ်။ ပြီးတော့ ကလေးစစ်သား စုဆောင်းမှုတွေကလည်း ရှိနေတယ်။ အမျိုးသမီးတွေ အပေါ်မှာ အဓမ္မ လက်ထပ်မှုတို့ နေရာတကာမှာ ဖြစ်ပေါ်နေပါတယ်။
“အဲဒီလို အမှုတွေအပြင် ရခိုင်ပြည်နယ် တ၀န်းမှာဆိုရင် ရှေးဟောင်း အမွေအနှစ်တွေကို ဖျက်ဆီးနေတာတွေ အများကြီး ရှိပါတယ်။ ရခိုင်ပြည်သူလူထုတွေ အနေနဲ့က လူ့အခွင့်အရေး ကိုယ်စားလှယ်တွေ လာရင်လည်း သူတို့ဆီကို မရောက်ဘူး။ နေရာတ၀ိုက်တည်းမှာ ဖြစ်နေတာမျိုး မဟုတ်ဘဲ ခမီ၊ မြို၊ သက်၊ ဒိုင်းနက် စသည်အားဖြင့် ရခိုင် အပါအ၀င် အဲလို နယ်မြေခံ လူသားတွေ အားလုံးဟာ လူ့အခွင့်အရေး ချိုးဖောက်ခံနေရတာ အများကြီး ရှိပါတယ်။ အဲဒါတွေကို စုံစုံလင်လင် လေ့လာပြီးတော့မှ လူ့အခွင့်အရေး ကောင်စီမှာ တင်ပြတာမျိုး ဖြစ်စေချင်ပါတယ်။”
ဒေါ်မြရာဇာလင်း ပြောပြသွားတာ ဖြစ်ပါတယ်။
မစ္စတာ ကင်တားနားဟာ မနက်ဖြန်မှာ ဘူးသီးတောင်ကို သွားရောက်မှာ ဖြစ်ပြီး ကြာသပတေးနေ့မှာ ရန်ကုန်ကိုပြန်ဖို့ ရှိပါတယ်။ သူ့ရဲ့ ခရီးစဉ်အတွင်း မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည်နဲ့ တွေ့ဆုံဖို့ စစ်အစိုးရကို မေတ္တာရပ်ခံထားတဲ့ အပြင် မြန်မာစစ်အစိုးရ ခေါင်းဆောင်ပိုင်းတွေနဲ့ တွေ့ဆုံနိုင်ဖို့အတွက် နေပြည်တော်ကို သွားရောက်ဖို့ စီစဉ်ထားပြီး မပြန်ခင်မှာ သတင်းစာရှင်းလင်းပွဲ ကျင်းပဖို့ ရှိတယ်လို့ ကုလသမဂ္ဂ ပြန်ကြားရေး တာဝန်ခံ ဦးအေးဝင်းက ပြောပါတယ်။
လူ့အခွင့်အရေး ကိုယ်စားလှယ် ဘူးသီးတောင်မှာ နိုင်ငံရေး အကျဉ်းသား ၅ ဦးနဲ့ တွေ့ဆုံ

17 February 2010
မြန်မာနိုင်ငံကို ၅ ရက်ကြာ ခရီးစဉ်အဖြစ် ရောက်နေတဲ့ ကုလသမဂ္ဂရဲ့ မြန်မာနိုင်ငံဆိုင်ရာ လူ့အခွင့်အရေး စုံစမ်းစစ်ဆေးသူ တောမတ်စ် အိုဟေး ကင်တားနား (Tomas Ojea Quintana) ဟာ ဒီနေ့မှာတော့ ရခိုင်ပြည်နယ် ဘူးသီးတောင် အကျဉ်းထောင်ကို သွားရောက်ခဲ့ပါတယ်။ ဒါ့အပြင် အဲဒီမှာ မွတ်ဆလင် ဘာသာရေး ခေါင်းဆောင်တွေနဲ့လည်း တွေ့ဆုံခဲ့တယ်လို့ ဆိုပါတယ်။ ဒါနဲ့ပတ်သက်လို့ ကုလသမဂ္ဂရုံးက တာဝန်ရှိသူတွေနဲ့ ဆက်သွယ်မေးမြန်းထားတဲ့ ဒေါ်ခင်မျိုးသက်က တင်ပြပေးထားပါတယ်။
မြန်မာနိုင်ငံက လူ့အခွင့်အရေး အခြေအနေတွေကို လာမယ့် မတ်လထဲမှာ ကုလသမဂ္ဂရဲ့ လူ့အခွင့်အရေး ကောင်စီမှာ တင်သွင်းဖို့အတွက် မြန်မာနိုင်ငံကို လာရောက်နေတဲ့ ကုလသမဂ္ဂ လူ့အခွင့်အရေး ကိုယ်စားလှယ် မစ္စတာ ကင်တားနားဟာ သူ့ရဲ့ တတိယမြောက်နေ့ ခရီးစဉ်အဖြစ် ရခိုင်ပြည်နယ်က ဘူးသီးတောင်ကို သွားရောက်ခဲ့ပါတယ်။
ဘူးသီးတောင် အကျဉ်းထောင်မှာ ၈၈ မျိုးဆက် ကျောင်းသားခေါင်းဆောင် ကိုဌေးကြွယ် အပါအ၀င် နိုင်ငံရေး အကျဉ်းသားတွေနဲ့ တွေ့ဆုံခဲ့တယ်လို့ မစ္စတာ ကင်တားနားနဲ့အတူ လိုက်ပါသွားတဲ့ ရန်ကုန် ကုလသမဂ္ဂ သတင်းနဲ့ ပြန်ကြားရေးဌာနက ပြန်ကြားရေး တာဝန်ခံ ဦးအေးဝင်းက အခုလိုပြောပါတယ်။
“ကျနော်တို့ အခုပဲ ဘူးသီးတောင်က ပြန်လာပါပြီ။ စစ်တွေကို ပြန်ရောက်နေပါပြီ။”
ဘူးသီးတောင်မှာ ဒီနေ့ ဘယ်သူတွေနဲ့ တွေ့ခဲ့တယ်၊ ဘာတွေလုပ်ခဲ့တယ်၊ နည်းနည်းပြောပြပေးပါလား။
“ဘူးသီးတောင် ရောက်ရောက်ချင်းမှာတော့ အဲဒီဒေသမှာရှိတဲ့ နစက အဖွဲ့နဲ့ တွေ့ပါတယ်။ တွေ့ပြီးတော့ ဒေသအခြေအနေ ရှင်းပြတယ်။ ပြီးတော့ ကျနော်တို့ ဘူးသီးတောင် အကျဉ်းထောင်ကို သွားပါတယ်။ ဘူးသီးတောင် အကျဉ်းထောင်ကို လေ့လာပြီးတော့ အဲဒီမှာ ဌေးကြွယ်ရယ်၊ ထွန်းညိုရယ်၊ မြတ်ထွန်းရယ်၊ အာမက်ရယ်၊ ကျော်မင်း ဆိုတာရယ် ၅ ဦး တွေ့ခဲ့ပါတယ်။ ပြီးတော့ ဒေသမှာရှိတဲ့ မွတ်ဆလင် ဘာသာရေး ခေါင်းဆောင် တချို့နဲ့ တွေ့ခဲ့ပါတယ်။ အဲဒါပြီးတော့ ကျနော်တို့ စစ်တွေကို ပြန်ထွက်လာပါတယ်။”
အကျဉ်းထောင်တွေထဲကို သွားတဲ့အခါမှာ ILO အဖွဲ့က ဌာနေကိုယ်စားလှယ်ပါ လိုက်ပါသလားရှင့်။
“လိုက်ပါလာပါတယ်။ ဒါပေမဲ့ ကျနော်တို့ အကျဉ်းသားတွေ တွေ့တဲ့အချိန်မှာတော့ လူ့အခွင့်အရေး အဖွဲ့နဲ့ပဲ အကျဉ်းသားတွေ တွေ့ပါတယ်။ ထောင်ထဲကို လိုက်ကြည့်တဲ့ အချိန်မှာတော့ ILO အဖွဲ့ ပါပါတယ်။”
အခု စစ်တွေကနေပြီးတော့ မနက်ဖြန် အစီအစဉ်ရော ဘာတွေ ရှိပါသေးလဲ။
“မနက်ဖြန် အစီအစဉ် ကျနော် အခု ပြောလို့မရသေးပါဘူး။ အစီအစဉ်က တော်ကြာမှ သိရမှာပါ။ မနက်ဖြန် အစီအစဉ်ကတော့ မပြောနိုင်သေးပါဘူး။”
ဒေါ်အောင်ဆန်းစုကြည်နဲ့ တွေ့ဆုံဖို့ စီစဉ်ထားတာမျိုး ရှိပါသေးလား။
“မစ္စတာ ကင်တားနားကတော့ တွေ့ဆုံဖို့ မျှော်လင့်နေပါတယ်။”
ဦးတင်ဦး အပါအ၀င် NLD CEC အဖွဲ့တွေနဲ့လည်း တွေ့ဆုံမယ်လို့ NLD ရုံးက ပြောပါတယ်။ အဲဒါရော ဟုတ်ပါသလား။
“ကျနော်တော့ အဲဒါ ဘာမှမသိပါဘူး။ မနက်ဖြန် အစီအစဉ်ကို ဘာမှမသိသေးပါဘူး။”
နေပြည်တော်ကို သွားဖို့တော့ အစီအစဉ် ရှိပါတယ်နော်။
“ဟုတ်ပါတယ်။”
သောကြာနေ့နော်။
“ဟုတ်ကဲ့ခင်ဗျ။”
ဒီကနေ့ မစ္စတာ ကင်တားနား သွားရောက်ခဲ့တဲ့ ဘူးသီးတောင် အကျဉ်းထောင်မှာ နိုင်ငံရေး အကျဉ်းသား ၁၈ ဦး ရှိပြီး ဒီအကျဉ်းကျနေသူတွေအတွက် ကျန်းမာရေး စောင့်ရှောက်မှု ရဖို့တွေအပြင် မိသားစုနဲ့ ဝေးလံတဲ့ ထောင်တွေကို ပို့နေတဲ့ကိစ္စတွေကို အဓိကထားပြီး မစ္စတာ ကင်တားနားဘက်က တင်ပြသင့်တယ်လို့ နိုင်ငံရေး အကျဉ်းသားများ ကူညီစောင့်ရှောက်ရေးအဖွဲ့ အတွင်းရေးမှူး ဦးတိတ်နိုင်က ပြောပါတယ်။
“ဘူးသီးတောင် ထောင်မှာကတော့ နိုင်ငံရေး အကျဉ်းသား ၁၈ ဦး ရှိပါတယ်။ အဲဒီထဲကမှ သူတို့ကလည်း ပွင့်ပွင့်လင်းလင်း ပြန်ဆွေးနွေးနိုင်မယ့် လူတွေကတော့ ကိုဌေးကြွယ် ရှိပါတယ်၊ ၈၈ မျိုးဆက် ကျောင်းသားကပါ။ ကိုအောင်ဇော်ဦး ရှိပါတယ်၊ သူက လူ့အခွင့်အရေး ကာကွယ်မြှင့်တင်သူများ အဖွဲ့ကပါ။ ဦးကျော်မင်း ရှိပါတယ်၊ ပြည်သူ့လွှတ်တော် ကိုယ်စားလှယ်ပါ။ စည်သူမောင် ရှိပါတယ်၊ သူကတော့ ၂၀၀၇ ဗကသက ကျောင်းသားခေါင်းဆောင်ပါ။ ရှမ်းတိုင်းရင်းသားခေါင်းဆောင် ဦးထွန်းညိုခေါ် အန်ညိုဆိုတာ ရှိပါတယ်၊ ၇၉ နှစ် ကျထားပါတယ်။ သံဃာတော် အနေနဲ့ဆိုရင် ဦးပြည်ကျော်ခေါ် ဦးကန္တ၀ံသ ဆိုတာ ရှိပါတယ်၊ ၁၀ နှစ် ကျထားပါတယ်။ သူတို့နဲ့ တွေ့နိုင်မယ်ဆိုရင်တော့ မစ္စတာ ကင်တားနား လိုချင်တဲ့ အချက်အလက်တွေကို သူတို့ ပေးနိုင်လိမ့်မယ်လို့ ထင်ပါတယ်။
“ကျန်းမာရေး မကောင်းတဲ့လူတွေ ရှိတယ်။ မိသားစုတွေနဲ့ အရမ်းကို အလှမ်းကွာဝေးတဲ့ နေရာတွေကို ပို့ထားတဲ့ ကိစ္စမျိုးတွေရှိတယ်။ အဲလိုမဖြစ်အောင်လို့ တောင်းဆိုသင့်တယ်လို့ မြင်ပါတယ်။”
ဘူးသီးတောင် အကျဉ်းထောင်မှာ အကျဉ်းကျခံနေရတဲ့ လူတွေရဲ့ မိသားစုတွေဟာ ကိုယ်တိုင် သွားရောက် တွေ့ဆုံဖို့ ခက်ခဲတယ်လို့ HRDP လူ့အခွင့်အရေး အဖွဲ့က အကျဉ်းကျနေတဲ့ ကိုအောင်ဇော်ဦးရဲ့ မိသားစုဝင်တဦးက ပြောပါတယ်။
“လတ်တလော ဘာမှ အကြောင်းမကြားဘူး။ လွန်ခဲ့တဲ့ အရက် ၂၀ လောက်က သူ့ဆီက စာလာတယ်။ သူကတော့ မိသားစု စိတ်ဆင်းရဲမှာ စိုးလို့ပေါ့။ သူ့အဖေရှိတော့ သူ့အဖေဆီ တိုက်ရိုက်လာတာ၊ စာက။ အဖေက သမီးတို့နဲ့နေတာ။ အသက် ၇၀ ကျော်ပြီလေ။ ကျန်းမာရေးက သိပ်မကောင်းတော့ သူ့အဖေကိုပဲ သူ့ကိုမပူနဲ့၊ ဘာညာပါပဲ အမရယ်။ ဖအေ စိတ်ဆင်းရဲမှာစိုးလို့၊ ဒါပါပဲ။ သူကတော့ အဆင်ပြေတယ် ပြောတာပဲ။ ထောင်ဝင်စာတွေ့လို့ မရပါဘူး အမရယ်၊ လူကြုံနဲ့ပဲ ပေးရတယ်။ သမီးတို့က ဘာသာကွာခြားတော့ အဲဒီကို သွားခွင့်မပေးဘူး။ တလတခါ လူကြုံနဲ့ ပို့ပေးရတယ်။”
ဘူးသီးတောင် အကျဉ်းထောင်မှာ အကျဉ်းကျခံနေရတဲ့ လူ့အခွင့်အရေး အဖွဲ့က ကိုအောင်ဇော်ဦးရဲ့ မိသားစုဝင်တဦး ပြောပြသွားတာ ဖြစ်ပါတယ်။
KNU နဲ့ အစိုးရ တိုက်ပွဲတွေ ရပ်ဆိုင်းဖို့ ဘန်ကီမွန်း တောင်းဆို

18 February 2010
မကြာခင်က ကရင်အရပ်သားတွေ နေထိုင်တဲ့ ရွာတွေကို မြန်မာစစ်အစိုးရ တပ်တွေက စစ်အင်အားသုံး တိုက်ခိုက်ဖျက်ဆီးခဲ့တာတွေနဲ့ ပတ်သက်ပြီး ကုလသမဂ္ဂ အတွင်းရေးမှူးချုပ် မစ္စတာ ဘန်ကီမွန်း (Mr. Ban Ki-moon) က စိုးရိမ်မကင်း ဖြစ်ကြောင်း၊ အခုလို ထိုးနှက်မှုတွေကို ရပ်တန်းက ရပ်ဖို့ကိုလည်း တိုက်တွန်းလိုက်တဲ့ အကြောင်းနဲ့ အဲဒီ့အပေါ် ဘယ်လိုတုံ့ပြန်မှုတွေ ရှိသလဲဆိုတာကို နော်ရှိုးက တင်ပြပေးထားပါတယ်။
၂၀၁၀ နှစ်သစ်အ၀င်ကစလို့ ကရင်ပြည်နယ်နဲ့ ပဲခူးတိုင်းတို့မှာရှိတဲ့ ကရင်ရွာတွေကို မြန်မာစစ်အစိုးရ တပ်တွေက တိုးမြှင့်တိုက်ခိုက် နှိမ်နင်းမှုတွေ ရှိနေတဲ့ အပေါ်မှာ စိုးရိမ်မကင်း ဖြစ်ကြောင်းနဲ့ အဲဒီလို တိုက်ခိုက်မှုတွေကို ရပ်တန်းက ရပ်ဖို့ ကုလသမဂ္ဂ အတွင်းရေးမှူးချုပ် မစ္စတာ ဘန်ကီမွန်းက မြန်မာစစ်အစိုးရကို တိုက်တွန်းခဲ့တယ်လို့ အတွင်းရေးမှူးချုပ်ရဲ့ ပြောခွင့်ရသူ မစ်စ် မာရီး အိုကာဘဲ (Ms. Marie Okabe) ကလည်း မနေ့က ကုလသမဂ္ဂ သတင်းစာရှင်းလင်းပွဲ တခုမှာ ပြောခဲ့ပါတယ်။
“မကြာခင်က ကရင်တိုင်းရင်းသားတွေ တိုက်ခိုက်ခံခဲ့ရတဲ့ အကြောင်းကို ကုလသမဂ္ဂ အတွင်းရေးမှူးချုပ် သိရှိပြီး ဖြစ်ပါတယ်။ ဆက်ပြီး တိုက်ခိုက်ခံနေရတဲ့ အပြစ်မဲ့တဲ့ ကရင်အရပ်သားတွေရဲ့ အနာဂတ်အတွက် အတွင်းရေးမှူးချုပ်က စိုးရိမ်မကင်း ဖြစ်နေပါတယ်။ သက်ဆိုင်တဲ့သူတွေ တာဝန်ရှိရှိ လုပ်ဆောင်ဖို့ အရေးကြီးတယ်လို့လည်း ပြောခဲ့ပါတယ်။ သူအကြိမ်ကြိမ် ပြောခဲ့သလိုပဲ အဲဒီလို ထိုးနှက်မှုတွေကို ချက်ချင်း ရပ်တန်းက ရပ်ဖို့နဲ့ ငြိမ်းချမ်းတဲ့နည်းနဲ့ ဖြေရှင်းဖို့ အတွင်းရေးမှူးချုပ်က တိုက်တွန်းလိုက်ပါတယ်။ မြန်မာနိုင်ငံကို သူသွားခဲ့တုန်းကလည်း အဲဒီလို ပြောခဲ့ပါသေးတယ်။”
အခုလို ကရင်တိုင်းရင်းသား ရွာတွေအပေါ် စစ်အစိုးရဘက်က တိုးမြှင့်တိုက်ခိုက်လာတဲ့ အကြောင်းကို စစ်အစိုးရနဲ့ အပစ်အခတ် မယူသေးတဲ့ အကြီးဆုံး လက်နက်ကိုင်အဖွဲ့ဖြစ်တဲ့ ကရင်အမျိုးသား အစည်းအရုံး (KNU) ရဲ့ ဂျာမဏီနိုင်ငံ အခြေစိုက် ကိုယ်စားလှယ် မန်းအောင်လွင်က ဗွီအိုအေကို အခုလို ပြောပါတယ်။
“လောလောဆယ် နအဖကနေပြီး ၂၀၁၀ ရွေးကောက်ပွဲ နီးတဲ့အခါမှာ အတိုက်အခံ ခေါင်းဆောင်တွေကို နည်းမျိုးစုံနဲ့ အကြောင်းရှာပြီး ဖမ်းဆီး ထောင်ချနေတယ်။ ပြီးတော့ နယ်စပ်ဒေသတွေမှာ၊ ဥပမာ KNU လိုမျိုးပေါ့ စစ်မှန်တဲ့ ဖက်ဒရယ်စနစ်အတွက် မားမားမတ်မတ် ရပ်တည်တဲ့ အဖွဲ့အစည်းတွေကို ပြင်းထန်စွာ ထိုးစစ်ဆင် တိုက်ခိုက်နေတာ တွေ့ရတယ်။ ဒါပေမဲ့ ထူးဆန်းတာက ဒီတခေါက်က တကယ်ပဲ အပြစ်မဲ့တဲ့ ကရင်ရွာသူ ရွာသားများကို တိုက်ခိုက်တာ တွေ့ရပါတယ်။
“ဥပမာ တွယ်လွယ်ထူး၊ ညောင်လေးပင်၊ မူထရော၊ ဖာပွန်၊ ကျောက်ကြီး အစရှိတဲ့ ဒေသမှာရှိတဲ့ ကရင်ရွာတွေကို နအဖက တိုက်ခိုက်တဲ့နေရာမှာ အဲဒီမှာ လက်နက်ကိုင် ကရင်အဖွဲ့အစည်းတွေ မရှိပါဘူး။ တကယ်ပဲ ရိုးသားဖြူစင်ပြီး အေးအေးဆေးဆေး ငြိမ်းချမ်းစွာ နေထိုင်တဲ့ ကရင် ရွာသူရွာသားတွေ ဖြစ်ပါတယ်။ အဲဒီမှာ ရွာတွေကို မီးရှို့တယ်၊ အမျိုးသမီးတွေကို မုဒိမ်းကျင့်တယ်၊ ပစ္စည်းတွေကို လုယက်တာ တွေ့ရပါတယ်။
“အဲဒါ ဘာကိုတွေ့ရလဲဆိုတော့ နအဖက လာမယ့်ရွေးကောက်ပွဲမှာ ဒီနယ် ဒီဒေသတွေက တချိန်တခါက NLD အတိုက်အခံကို မဲထည့်တဲ့ နေရာတွေ ဖြစ်တယ်။ ဒါကြောင့် မဲမပေးနိုင်အောင် တနည်းအားဖြင့် ရွေးကောက်ပွဲမတိုင်မီ သူတို့ကို မောင်းထုတ်တဲ့ သဘောမျိုးလည်း ဖြစ်ပါတယ်။ နောက်တချက်က တနင်္သာရီဘက်မှာလည်း ဒီအတိုင်းပါပဲ။”
ဆက်လက်ပြီး မန်းအောင်လွင်က မြန်မာပြည်တွင်း ငြိမ်းချမ်းရေးအတွက် နိုင်ငံတကာရဲ့ ဖိအားပေးမှုဟာ အရေးကြီးသလို တချိန်တည်းမှာပဲ ပြည်တွင်းက တိုင်းရင်းသား အားလုံးကလည်း တာဝန်သိသိ လက်တွဲပြီး ပူးပေါင်းလုပ်ဆောင်ဖို့ အရေးကြီးတယ်လို့ ပြောခဲ့ပါတယ်။
“တကယ်တော့ နိုင်ငံတကာ ဖိအားပေးမှုဟာ အလွန်ပဲ အရေးကြီးပါတယ်။ ဒါပေမဲ့ လောလောဆယ် ကရင်ပြည်နယ်မှာ ဖြစ်နေတဲ့ ကရင်ရွာသူ ရွာသားတွေကို နအဖက အခုလို ရက်စက်ယုတ်မာစွာ သတ်ဖြတ်နေတာကို ရပ်တန်းကရပ်အောင် လုပ်ဖို့ကတော့ ပြည်တွင်းမှာရှိသော ကရင်တမျိုးသားလုံးနဲ့ တခြား တိုင်းရင်းသား အားလုံးတို့ရဲ့ သမိုင်းပေးတာဝန်တခု ဖြစ်ပါတယ်။ နအဖက ကရင်လူမျိုးတွေကို ငွေအားဖြင့် လည်းကောင်း၊ ရာထူးအားဖြင့် လည်းကောင်း၊ ဘာသာရေးအားဖြင့် လည်းကောင်း သွေးခွဲပြီး အိုးမည်းသုတ် အချင်းချင်း တိုက်ခိုက်ခိုင်းနေတာကို ၀မ်းနည်းဖွယ်ရာ တွေ့ရှိရပါတယ်။
“ဒီတော့ ဒီအချိန်မှာ ကရင်လူမျိုး အားလုံးဟာ သွေးစည်းညီညွတ်ရမယ့်အချိန် ဖြစ်ပါတယ်။ လောလောဆယ် ဗမာပြည်မှာ ဖြစ်နေတဲ့ ပြဿနာက ၆၂ ခုနှစ်ကစပြီး ဗိုလ်ချုပ်ကြီးနေ၀င်းက တိုင်းပြည်ရဲ့ အာဏာကို မတရားသိမ်းယူပြီး စစ်တပ်က စစ်သားအလုပ် မဟုတ်တဲ့ နိုင်ငံအုပ်ချုပ်ရေးနဲ့ အခြားသော နိုင်ငံရေးရာ ကိစ္စတွေမှာ ၀င်ရောက်ချယ်လှယ်တဲ့ အတွက် ဗမာပြည်ကြီးဟာ သယံဇာတပစ္စည်း ပေါကြွယ်ဝရဲ့သားနဲ့ အခုဆိုရင် ကမ္ဘာမှာ အဆင်းရဲဆုံးစာရင်း ၀င်ခဲ့ရခြင်း ဖြစ်ပါတယ်။
“ဒီတော့ ကျနော်တို့အနေနဲ့ ဗိုလ်ချုပ်မှူးကြီးသန်းရွှေနဲ့ အပေါင်းအပါ တစုကို လူထုဟာ ငြိမ်းချမ်းသောနည်းနဲ့ အနာဂတ်မှာ တိုက်ပွဲဝင် ဆန္ဒပြတဲ့အခါ ပြည်သူကို ချစ်မြတ်နိုးသော စစ်တပ်မှ အရာရှိ ခေါင်းဆောင်များနဲ့ ရဲဘော်များဟာ ပြည်သူနဲ့အတူ လက်တွဲပြီး ပြည်သူချစ်တဲ့ တပ်မတော်တခု ပေါ်ပေါက်ဖို့နဲ့ ပြည်သူနဲ့အတူ၊ တိုင်းရင်းသား အားလုံးတို့နဲ့အတူ ဗမာပြည် ငြိမ်းချမ်းရေးနဲ့ ဖွံ့ဖြိုးရေးကို လက်တွေ့ လုပ်ဆောင်ရမယ့်အချိန် ဖြစ်ပါတယ်။”
မြန်မာစစ်အစိုးရက အခုနှစ်အတွင်း ကျင်းပမယ့် ရွေးကောက်ပွဲကို လွတ်လပ်ပြီး တရားမျှတစေရမယ်လို့ ပြောနေပေမဲ့ နိုင်ငံရေး တက်ကြွလှုပ်ရှားသူတွေ၊ သတင်းသမားတွေကို ဆက်လက်ဖမ်းဆီး အကျဉ်းချမှုတွေ ရှိနေသလို အရပ်သားတွေ နေထိုင်ရာ ဒေသတွေမှာလည်း စစ်အင်အားသုံးပြီး ထိုးနှက်မှုတွေ ရှိနေတာပါ။ အဲဒါကြောင့်လည်း တနေ့က Amnesty International နိုင်ငံတကာ လွတ်ငြိမ်းချမ်းသာခွင့် အဖွဲ့ကြီးက ရွေးကောက်ပွဲ မတိုင်မီ တိုင်းရင်းသား ကျေးရွာတွေအပေါ် အင်အားသုံး နှိမ်နင်းမှုတွေကို ရပ်တန်းကရပ်ဖို့ အစီရင်ခံစာတရပ် ထုတ်ပြန်ပြီး တိုက်တွန်းခဲ့တာလည်း ဖြစ်ပါတယ်။
ရွေးကောက်ပွဲကို လက်ခံနိုင်ဖွယ်အခြေအနေမရှိကြောင်း ကင်တားနားဝေဖန်

19 February 2010
မြန်မာနိုင်ငံမှာ စစ်အစိုးရက ဒီနှစ်အတွင်းကျင်းပမယ်ဆိုတဲ့ ရွေးကောက်ပွဲတွေဟာ
လက်ခံနိုင်စရာအခြေအနေမှာ မရှိတဲ့အကြောင်း ကုလသမဂ္ဂရဲ့ မြန်မာနိုင်ငံ လူ့အခွင့်
အရေးအခြေအနေဆိုင်ရာ အထူးစုံစမ်းစစ်ဆေးရေးမှူး မစ္စတာ Tomas Ojea
Qunitana က ပြောဆိုလိုက်ပါတယ်။ မြန်မာစစ်အစိုးရဟာ လူ့အခွင့်အရေးကို လေးစား
လိုက်နာခြင်းမရှိတဲ့အတွက် စစ်အစိုးရကျင်းပမယ့် ရွေးကောက်ပွဲဟာလည်း အများ
လက်ခံယုံကြည်နိုင်စရာ မရှိတဲ့အကြောင်း မစ္စတာကင်တားနားက ပြောလိုက်တာပါ။
မြန်မာနိုင်ငံခရီးစဉ်အတွင်း နေအိမ်အကျယ်ချုပ်ကျနေတဲ့ မြန်မာ့ဒီမိုကရေစီ
ခေါင်းဆောင် ဒေါ်အောင်ဆန်းစုကြည်နဲ့ တွေ့ဆုံခွင့် မရခဲ့သလို မြန်မာစစ်ကောင်စီ
ခေါင်းဆောင် ဗိုလ်ချုပ်မှူးကြီးသန်းရွှေနဲ့လည်း တွေ့ဆုံခွင့်မရခဲ့ဘဲ မစ္စတာကင်တားနား
ပြန်ထွက်လာရပြီးတဲ့နောက် အဲဒီလိုပြောလိုက်တာဖြစ်ပါတယ်။ အပြည့်အစုံကို
ကိုသိန်းထိုက်ဦးက တင်ပြထားပါတယ်။
ငါးရက်ကြာ မြန်မာနိုင်ငံခရီးစဉ်ကနေ ပြန်အလာ ထိုင်းနိုင်ငံ၊ ဘန်ကောက်မြို့လေဆိပ်
မှာ မစ္စတာကင်တားနားက မြန်မာစစ်အစိုးရကျင်းပမယ့် ရွေးကောက်ပွဲနဲ့ပတ်သက်ပြီး
သူ့ရဲ့သဘောထားအမြင်ကို ပြောဆိုခဲ့တာပါ။
“မြန်မာစစ်အစိုးရအနေနဲ့ လူ့အခွင့်အရေးကို လေးစားလိုက်နာမယ့် အရိပ်အယောင်မျိုး
မတွေ့ရဘူးဆိုတာပါ။ ဒီတော့ သူတို့ကျင်းပမယ့်ရွေးကောက်ပွဲဟာ လက်ခံနိုင်စရာမရှိ
ဘူးလို့ ပြောရပါလိမ့်မယ်။”
မစ္စတာကင်တားနားဟာ ငါးရက်ကြာခရီးစဉ်အတွင်း အင်းစိန်အကျဉ်းထောင်နဲ့ ရခိုင်
ပြည်နယ်၊ ဘူးသီးတောင် အကျဉ်းထောင်တွေကို သွားရောက်ပြီး နှစ်ရှည်ထောင်ဒဏ်
ချမှတ်ခံထားရတဲ့ ၈၈ မျိုးဆက်ကျောင်းသားခေါင်းဆောင် ကိုဌေးကြွယ်အပါအ၀င်
နိုင်ငံရေးအကျဉ်းသားတချို့ကို တွေ့ဆုံခဲ့ပါတယ်။ ဒီအကျဉ်းသားတွေကို မြန်မာစစ်
အစိုးရက လွှတ်ပေးမယ့်အရိပ်အယောင် မတွေ့ရဘူးလို့ သူကပြောပါတယ်။
ဒီလိုနိုင်ငံရေးအကျဉ်းသားတွေကို ဆက်ပြီးဖမ်းဆီးထားမယ့်အတွက် စစ်အစိုးရကျင်းပ
မယ့် ရွေးကောက်ပွဲဟာ လွတ်လပ်ပြီး တရားမျှတတဲ့ရွေးကောက်ပွဲတခု ဖြစ်နိုင်ခြေ
အပေါ် သူ့အနေနဲ့ သံသယရှိတယ်ဆိုပြီး မစ္စတာကင်တားနားက ပြောခဲ့တာပါ။
“ယုံကြည်ချက်ကြောင့် အဖမ်းအဆီးခံနေရတဲ့သူတွေ အားလုံးကို စစ်အစိုးရက လွှတ်
ပေးမယ့်အရိပ်အယောင် မတွေ့ရပါဘူး။ ဒါက ကျနော့်ရဲ့ခရီးစဉ်အတွင်းမှာ တွေ့ရှိချက်
ပါ။ ဒီလို လွှတ်ပေးမယ့်အရိပ်အယောင် မတွေ့ရတဲ့အတွက် နိုင်ငံရေးအကျဉ်းသားတွေ
ကို ဆက်ပြီး ဖမ်းဆီးထားမယ်ဆိုရင် ကျင်းပမယ်ဆိုတဲ့ ရွေးကောက်ပွဲဟာလည်း
လွတ်လပ်ပြီး တရားမျှတတဲ့ ရွေးကောက်ပွဲတခု မဖြစ်နိုင်ပါဘူး။”
မစ္စတာကင်တားနားဟာ မြန်မာနိုင်ငံခရီးစဉ်အတွင်း NLD ခေါင်းဆောင်တွေ၊ နိုင်ငံရေး
အကျဉ်းသားတွေအပြင် မြန်မာစစ်အစိုးရက ဒေါ်အောင်ဆန်းစုကြည်နဲ့ဆက်သွယ်ဖို့
တာဝန်ပေးအပ်ခြင်းခံထားရတဲ့ အလုပ်သမားရေးဝန်ကြီး ဦးအောင်ကြည်၊ တရားသူကြီး
ချုပ် ဦးအောင်တိုး၊ ရှေ့နေချုပ်၊ နောက် ပြည်ထဲရေးဝန်ကြီးနဲ့ ရဲချုပ်တို့ကို တွေ့ဆုံခဲ့ပါ
တယ်။ စစ်အစိုးရကဖွဲ့စည်းထား တဲ့ လူ့အခွင့်အရေးကော်မတီနဲ့လည်း မစ္စတာ
ကင်တားနား တွေ့ဆုံခဲ့ပါတယ်။ မြန်မာနိုင်ငံရဲ့ ပြည်တွင်းဥပဒေတွေကို လူ့အခွင့်အရေး
ကို လေးစားလိုက်နာတဲ့ နိုင်ငံတကာစံနှုန်းတွေနဲ့အညီ ပြောင်းလဲပြင်ဆင်ဖို့ လိုအပ်တဲ့
အကြောင်း မစ္စတာကင်တားနားက အရင်ကတည်းက ပြောခဲ့ဖူးပါတယ်။
သူ့ရဲ့ခရီးစဉ်အတွင်း နေအိမ်အကျယ်ချုပ် ကျခံနေရတဲ့ မြန်မာ့ဒီမိုကရေစီခေါင်းဆောင်
ဒေါ်အောင်ဆန်းစုကြည်နဲ့ တွေ့ဆုံခွင့်မရခဲ့တဲ့အတွက် စိတ်ပျက်မိတဲ့အကြောင်းကိုလည်း
မစ္စတာကင်တားနားက ပြောဆိုခဲ့ပါတယ်။
ထိုင်းနိုင်ငံရောက် ရွှေ့ပြောင်း အလုပ်သမားများအရေး လူ့အခွင့်အရေးအဖွဲ့ စိုးရိမ်

23 February 2010
ထိုင်းနိုင်ငံရောက် ရွှေ့ပြောင်း အလုပ်သမားတွေအတွက် နိုင်ငံသား စိစစ်ရေး လုပ်ဆောင်ဖို့ ကန့်သတ်ရက် နီးလာနေတဲ့ အချိန်မှာပဲ အမေရိကန်ပြည်ထောင်စု နယူးယောက်မြို့ အခြေစိုက် Human Rights Watch ခေါ် လူ့အခွင့်အရေး စောင့်ကြည့်ရေးအဖွဲ့က သတ်မှတ်ရက် တိုးမြှင့်ပေးဖို့ ထိုင်းအစိုးရကို တောင်းဆိုလိုက်တဲ့အပြင် ဒီရွှေ့ပြောင်းအလုပ်သမားတွေ လူ့အခွင့်အရေး ချိုးဖောက်ခံနေရတဲ့ အပေါ်မှာလည်း မီးမောင်းထိုး ပြသခဲ့ပါတယ်။ ဒီအကြောင်းနဲ့ ပတ်သက်လို့ Human Rights Watch အဖွဲ့က တာဝန်ရှိသူနဲ့ ဆက်သွယ်မေးမြန်းထားတဲ့ ဒေါ်ခင်မျိုးသက်က တင်ပြပေးထားပါတယ်။
Human Rights Watch လူ့အခွင့်အရေး အဖွဲ့ကြီးက ထိုင်းနိုင်ငံရောက် ရွှေ့ပြောင်းအလုပ်သမားတွေရဲ့ အခြေအနေတွေနဲ့ ပတ်သက်ပြီး ကျားရဲတွင်းဆီက မိကျောင်းတွင်းဆီသို့ (From the Tiger to the Crocodile) လို့ နာမည်ပေးထားတဲ့ အစီရင်ခံစာ တစောင်ကို အင်္ဂါနေ့မှာ ထုတ်ပြန်ခဲ့တာ ဖြစ်ပါတယ်။
ထိုင်းနိုင်ငံရဲ့ စီးပွားရေးအတွက် ဒီအလုပ်သမားတွေက တွင်တွင်ကျယ်ကျယ် ပံ့ပိုးပေးနေပေမဲ့ ဒီအလုပ်သမားတွေကို ကန့်သတ်မှုတွေ ပါဝင်တဲ့ နိုင်ငံသား စိစစ်ရေး လုပ်ခိုင်းပြီး ဒီစိစစ်ရေးလုပ်ငန်းမှာ မပါဝင်သူတွေကို ဒီလကုန်မှာ နောက်ဆုံးထားပြီး ပြန်ပို့ဖို့အတွက် ထိုင်းအစိုးရက စီစဉ်နေတာမို့ ဒါဟာ ဆိုးသထက်ဆိုးအောင် လုပ်နေတဲ့ အနေအထားမျိုး ဖြစ်နေတယ်လို့ အစီရင်ခံစာ ရေးသားတင်သွင်းတဲ့ Human Rights Watch အဖွဲ့ရဲ့ အာရှဆိုင်ရာ လက်ထောက် ညွှန်ကြားရေးမှူး ဖိလစ် ရောဘတ်ဆန် (Philip Robertson) က ပြောပါတယ်။
“ထိုင်းစကားပုံတခု ရှိပါတယ်။ သေဘေးရင်ဆိုင်နေရသူ သေဘေးက လွတ်အောင် ပြေးကာမှ ပိုဆိုးတဲ့ အနေအထားကို ရောက်သွားတာပါ။ ကျားကြောက်လို့ ရှင်ကြီးကိုး၊ ရှင်ကြီး ကျားထက်ဆိုးတဲ့ အဖြစ်ပါ။ ထိုင်းနိုင်ငံက ရွှေ့ပြောင်း အလုပ်သမားတွေရဲ့ အခြေအနေက ဒီလိုအဖြစ်မျိုးလို့ ကျနော်တို့ ယုံကြည်ပါတယ်။”
ဒီရွှေ့ပြောင်းအလုပ်သမားတွေဟာ လူ့အခွင့်အရေး ချိုးဖောက်မှု မျိုးစုံကို ခံနေကြရပေမဲ့ ဒီပြစ်မှု ကျူးလွန်နေသူတွေကိုတော့ အရေးယူတာမျိုး သိပ်ကိုရှားပါးတယ်လို့လည်း ပြောပါတယ်။
“ထိုင်းနိုင်ငံရောက်နေတဲ့ ရွှေ့ပြောင်း အလုပ်သမားတွေအပေါ် ကျူးလွန်တဲ့ ပြစ်မှုတွေအတွက် ဘေးမဲ့ပေးထားတာတွေ၊ အရေးမယူတာတွေ တွေ့ရပါတယ်။ မြန်မာ၊ လောနဲ့ ကမ္ဘောဒီးယား နိုင်ငံတွေက လာပြီး အလုပ်လုပ်နေသူတွေရဲ့ အမှုတွေကို လေ့လာကြည့်တဲ့အခါမှာ အရပ်ထဲမှာ သူတို့ နေထိုင်နိုင်ရေးက သိပ်မလွယ်တာကို တွေ့ရပါတယ်။ သူတို့ကို ခြောက်လှန့်မှုတွေ၊ အကြမ်းဖက်မှုတွေနဲ့ ငွေညှစ်တာတွေ တော်တော်များများ ခံနေကြရပေမဲ့ ဒီလိုကျူးလွန်တဲ့ သူတွေကို အရေးယူတာမျိုးကလည်း သိပ်မရှိပါဘူး။”
ထိုင်းနိုင်ငံမှာ လာရောက် အလုပ်လုပ်ကိုင်နေသူတွေထဲက လောနဲ့ ကမ္ဘောဒီးယား နိုင်ငံသားတွေအတွက် သူတို့နိုင်ငံက တာဝန်ရှိသူတွေ လာရောက် စိစစ် ဆောင်ရွက်ပေးပေမဲ့ မြန်မာနိုင်ငံသားတွေ အတွက်တော့ နိုင်ငံသား စိစစ်ရေး လုပ်ဆောင်နိုင်ဖို့ မြန်မာနိုင်ငံကို ပြန်ရတာမို့ သူတို့အတွက် အန္တရာယ်ရှိတယ်လို့လည်း ဆိုပါတယ်။ ဒါ့အပြင် ဒီလို ပြန်ပြီးပို့ခဲ့ရင် လူ့အခွင့်အရေး ချိုးဖောက်မှု မျိုးစုံနဲ့ ကြုံရနိုင်တယ်လို့လည်း ဆိုပါတယ်။
“ဒီနိုင်ငံသား စိစစ်ရေးနဲ့ ပတ်သက်ပြီး သူတို့ကို နားလည်အောင် ရှင်းပြပေးတာမျိုး သိပ်မရှိပါဘူး။ သူတို့ဘက်ကကြည့်ရင် ထိုင်းအစိုးရရဲ့ အစီအစဉ်က သိပ်ရှုပ်ထွေးပြီး စရိတ်စက သိပ်ကြီးပါတယ်။ မြန်မာနိုင်ငံသားတွေအတွက် ဆိုရင် နိုင်ငံသား စိစစ်ရေးက မြန်မာနိုင်ငံကို ပြန်လုပ်ဖို့ စီစဉ်ထားတာပါ။ ဒါဟာ ကောင်းတဲ့အစီအစဉ် မဟုတ်ပါဘူး။ ထိုင်းအစိုးရ အနေနဲ့ ဒီ့ထက်ကောင်းအောင် လုပ်နိုင်ပါတယ်။ ဒီ နိုင်ငံသား စိစစ်ရေး လုပ်ငန်းစဉ်ကို ရက်ပိုတိုးပေးဖို့ ထိုင်းအစိုးရကို အကြံပေးပါတယ်။ ဒါ့အပြင် နေရပ်ရင်းကို ပြန်မပို့ဖို့လည်း လိုပါတယ်။”
အာဆီယံအနေနဲ့ ထိုင်းအစိုးရဘက်က ရွှေ့ပြောင်း အလုပ်သမားတွေရဲ့ အခွင့်အရေး ရပိုင်ခွင့်တွေကို အပြည့်အ၀ အကာအကွယ်ပေးဖို့ အဓိက တာဝန်ယူသင့်တယ်လို့လည်း မစ္စတာ ရောဘတ်ဆန်က ပြောပါတယ်။
“အာဆီယံဟာ ရွှေ့ပြောင်း အလုပ်သမားတွေရဲ့ ရပိုင်ခွင့်တွေကို ကာကွယ်ပေးဖို့နဲ့ အခြေအနေတွေကို မြှင့်တင်ပေးဖို့ ကတိပြုပေးထားတာမို့ ဒီကိစ္စမှာ အာဆီယံက ပါဝင်ပတ်သက်ဖို့ ကျနော်တို့က တောင်းဆိုပါတယ်။ ထိုင်းနိုင်ငံက အာဆီယံ ပဋိညာဉ်စာတမ်းကို လိုက်နာစေဖို့ ရွှေ့ပြောင်း အလုပ်သမားတွေရဲ့ ရပိုင်ခွင့်တွေကို ထိုင်းအစိုးရက အကာအကွယ် ပေးလာအောင် အာဆီယံ လူ့အခွင့်အရေး ကော်မရှင်က တာဝန်ယူ ဆောင်ရွက်ရမှာပါ။”
Human Rights Watch အဖွဲ့ရဲ့ အာရှဒေသဆိုင်ရာ လက်ထောက် ညွှန်ကြားရေးမှူး မစ္စတာ ဖိလစ် ရောဘတ်ဆန် ပြောပြသွားတာ ဖြစ်ပါတယ်။
ဟွန်ဒေးနဲ့ ဒေ၀ူး မြန်မာ့သဘာဝဓာတ်ငွေ့ ရှာဖွေရေး ဒေါ်လာ ကုဋေချီ စာချုပ် ချုပ်ဆို

23 February 2010
မြန်မာနိုင်ငံ ကမ်းလွန်ပင်လယ်ပြင်မှာ သဘာဝဓာတ်ငွေ့ ထုတ်လုပ်ရေး အကျိုးတူ ပူးပေါင်းဆောင်ရွက်ကြဖို့ အတွက် တောင်ကိုရီးယားနိုင်ငံ ဟွန်ဒေး ကော်ပိုရေးရှင်းနဲ့ ဒေ၀ူး ကုမ္ပဏီကြီးအကြား ဒေါ်လာသန်းပေါင်း ၁,၄၀၀ တန်ဖိုးရှိတဲ့ သဘောတူစာချုပ်ကို ဒီနေ့ လက်မှတ်ရေးထိုး လိုက်ကြပါတယ်။
ဟွန်ဒေး အကြီးစားစက်မှုလုပ်ငန်း ကော်ပိုရေးရှင်းနဲ့ ဒေ၀ူး နိုင်ငံတကာ ကုန်သွယ်ရေး ကော်ပိုရေးရှင်းကြီးတို့ ပူးတွဲပြီး မြန်မာနိုင်ငံ အနောက်မြောက်ဘက်မှာ ရွှေသဘာဝဓာတ်ငွေ့ စီမံကိန်းကို ၂၀၁၃ ခုနှစ် မတ်လမှာ စတင် အကောင်အထည်ဖော်ဖို့ ဖြစ်ပါတယ်။
မြန်မာ့ကမ်းလွန် ပင်လယ်ပြင်မှာရော ကုန်းတွင်းမှာပါ စီမံကိန်းတွေချပြီး သဘာဝဓာတ်ငွေ့ ထုတ်လုပ်ရေး ပူးတွဲ ဆောင်ရွက်ကြမှာ ဖြစ်ပါတယ်။ ၂၀၁၃ ခုနှစ် မေလမှာ မြန်မာ့ သဘာဝဓာတ်ငွေ့တွေကို ပိုက်လိုင်းတွေကတဆင့် တရုတ်နိုင်ငံကို တင်ပို့နိုင်ဖို့အတွက် ဒေ၀ူး နိုင်ငံတကာ ကုန်သွယ်ရေး ကော်ပိုရေးရှင်းကြီးက သဘောတူလိုက်တာ ဖြစ်ပါတယ်။
ဒီစီမံကိန်းကြီးကနေ လာမယ့် ၂၅ နှစ်ကနေ အနှစ် ၃၀ အကြား တနေ့ကို သဘာဝဓာတ်ငွေ့ ကုဗမီတာ ၁၅ သန်းနှုန်းနဲ့ ထုတ်လုပ်သွားမှာ ဖြစ်ပါတယ်။ မြန်မာ့အိမ်နီးချင်း ထိုင်း၊ တရုတ်နဲ့ အိန္ဒိယနိုင်ငံတို့က မြန်မာ့ ရေနံနဲ့ သဘာဝဓာတ်ငွေ့သိုက်တွေကနေ ရေနံတွေ၊ သဘာဝဓာတ်ငွေ့တွေ ရယူရေးအတွက် ဒေါ်လာသန်း ထောင်နဲ့ချီ သုံးစွဲနေကြတာ ဖြစ်ပါတယ်။
သဘာဝပတ်ဝန်းကျင် ထိန်းသိမ်းရေးနဲ့ လူ့အခွင့်အရေး အခြေအနေ စောင့်ကြည့်သူတွေကတော့ ဒီ ရေနံနဲ့ သဘာဝဓာတ်ငွေ့ စီမံကိန်းတွေကြောင့် ဒေသခံတွေ အများအပြား အဓမ္မ ပြောင်းရွှေ့ခံနေရတာတွေ အပါအ၀င် လူ့အခွင့်အရေး ချိုးဖောက်ခံနေကြရတယ် ဆိုတဲ့ နှစ်စဉ် အစီရင်ခံစာတွေ ထုတ်ပြန်ထားတာ ရှိပါတယ်။
ဒေါ်အောင်ဆန်းစုကြည် အယူခံပြင်ဆင်ချက် ပယ်ချမှု နိုင်ငံတကာ ပြစ်တင်ဝေဖန်

27 February 2010
မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်က သူ့အပေါ်ချမှတ်ထားတဲ့ ထောင်ဒဏ်နဲ့ပတ်သက်ပြီး ပြင်ဆင်ချက် လျှောက်ထားတင်သွင်းတာကို ဗဟိုတရားရုံးက ပယ်ချလိုက်တဲ့အတွက် နိုင်ငံတကာက စိတ်ပျက်လက်ပျက် ဝေဖန် ပြောဆိုလိုက်ကြပါတယ်။ ဒါပေမဲ့လည်း ဒီလို နိုင်ငံတကာက ထုံးစံအတိုင်း ကြေညာချက်တွေထုတ်ပြီး ဝေဖန် ပြောဆိုတာ လောက်ကိုတော့ မြန်မာစစ်ဗိုလ်ချုပ်တွေက ဂရုစိုက်မှာမဟုတ်ဘူးလို့ တုံ့ပြန်ဝေဖန်တာလည်း ထွက်လာပါတယ်။ အပြည့်အစုံကို ကိုကျော်ကျော်သိန်းက တင်ပြထားပါတယ်။
ဒေါ်အောင်ဆန်းစုကြည်ကို ပြစ်ဒဏ်ချမှတ်ထားတဲ့အပေါ် ပြင်ဆင်ချက်လျှောက်ထားတာကို ဗဟိုတရားရုံးက ပယ်ချ လိုက်တဲ့အတွက် ဝေဖန် ပြစ်တင်တဲ့နိုင်ငံတွေထဲမှာ ဗြိတိန်နဲ့ ကနေဒါတို့က အပြင်းထန်ဆုံးလို့ ဆိုရပါလိမ့်မယ်။ ဗြိတိန်ဝန်ကြီးချုပ် ဂေါ်ဒွန်ဘရောင်းက ဒီလိုပယ်ချလိုက်တဲ့အတွက် မိမိအနေနဲ့ ထိတ်လန့် တုန်လှုပ်ပြီး ၀မ်းနည်း စိတ်ပျက်ရတယ်လို့ ကြေညာချက် တစောင် ထုတ်ပြန်ပြောဆိုခဲ့ပါတယ်။
ဒေါ်အောင်ဆန်းစုကြည်ကို တရားရုံးတင်စစ်ဆေးခဲ့တာရော၊ အယူခံတင်သွင်းတာကို အဆင့်ဆင့် လုပ်ဆောင်ခဲ့တာတွေ ရောဟာ နိုင်ငံတကာ စံနှုန်းစံထားတွေနဲ့ မကိုက်ညီသလို တရားဥပဒေစိုးမိုးရေးကို လုံးဝ လျစ်လျူရှု ပစ်ပယ်လိုက်တာပဲလို့ ကနေဒါနိုင်ငံခြား ရေးဝန်ကြီး လောရန့်စ် ကန်နွန် (Lawrence Cannon) က ပြောပါတယ်။ အခုလို ပယ်ချလိုက်တာကို ကနေဒါနိုင်ငံအနေနဲ့ အလွန်အမင်း စိတ်ပျက်ရတယ်လို့လည်း ဆိုထားပါတယ်။
အကြီးအကျယ် စိတ်ပျက်ရတယ်လို့ပြောခဲ့တဲ့ နောက်နိုင်ငံတခုကတော့ မြန်မာနိုင်ငံနဲ့အတူတူ အာဆီယံ အရှေ့တောင်အာရှ နိုင်ငံများ အဖွဲ့ဝင်နိုင်ငံတခုဖြစ်တဲ့ စင်္ကာပူနိုင်ငံပါ။
ကုလသမဂ္ဂအတွင်းရေးမှူးချုပ် ဘန်ကီမွန်းကတော့ စိတ်ပျက်ရကြောင်းလောက်ကိုပဲ စာကြောင်းသုံးကြောင်းပါ ထုတ်ပြန်ချက်တခုနဲ့ သူ့ရဲ့ပြောရေးဆိုခွင့်ရှိသူက ထုတ်ပြန်ခဲ့ပါတယ်။
ကုလသမဂ္ဂအပါအ၀င် နိုင်ငံတကာဟာ အခုလောက်ပြောဆိုရုံနဲ့ လုံလောက်မှုမရှိဘဲ ပိုပြီး လက်တွေ့ကျကျ လုပ်ဆောင်ဖို့ လိုတယ်လို့ ပြန်ပြီး ဝေဖန်ပြောဆိုလိုက်တာကတော့ ဗြိတိန်နိုင်ငံအခြေစိုက်၊ မြန်မာ့အရေးလှုပ်ရှားမှုအဖွဲ့ Burma Campaign UK ရဲ့ ညွှန်ကြားရေးမှူး Mark Farmaner ပါ။
"ဒါပေမဲ့လည်း အခုလိုမျိုး ခပ်ပျော့ပျော့ အားနည်းတဲ့ထုတ်ပြန်ချက်တွေ ထုတ်ပြန်ခြင်းအားဖြင့် လက်ရှိအချိန်မှာတော့ သူတို့ကိုယ်တိုင်က ပြဿနာရဲ့ တစိတ်တပိုင်း ဖြစ်နေပါတယ်။ သူတို့က မြန်မာစစ်ဗိုလ်ချုပ်တွေကို ဆက်သာလုပ်၊ လူတွေကို ဖမ်းဆီးနှိပ်စက်၊ တိုင်းရင်းသားလူမျိုးစုတွေကို တိုက်ခိုက်၊ အာဏာရှင်စနစ် သက်ဆိုးရှည်စေမယ့် အခြေခံဥပဒေကိုကိုင်ပြီး အတုအယောင် ရွေးကောက်ပွဲကိုလုပ် ဆိုပြီး ပြောသလိုဖြစ်နေပါတယ်။ ဘန်ကီမွန်းကတော့ သူ စိတ်ပျက်တယ်လို့ ပြောတာပဲ။ ဒါပေမဲ့ စစ်ဗိုလ်ချုပ်တွေ ကြားမှာကတော့ လူ့အခွင့်အရေး ချိုးဖောက်မှုတွေကို ဆက်သာလုပ်၊ ငါတို့ ဘာမှမလုပ်ဘူးလို့ ဆိုတာပါပဲ။"
ဒေါ်အောင်ဆန်းစုကြည် အယူခံပြင်ဆင်ချက်ကို ပယ်ချတဲ့အပေါ် ဝေဖန်ပြောဆိုကြတာနဲ့ တဆက်ထဲမှာပဲ အကျဉ်းချထားတဲ့ နိုင်ငံရေးအကျဉ်းသားတွေ လွတ်မြောက်ရေးနဲ့ ဒီနှစ်အတွင်း ကျင်းပမယ်လို့ကြေညာထားတဲ့ ရွေးကောက်ပွဲတွေရဲ့ တရားဝင်မှုကို ဆက်စပ် ပြောဆိုတာတွေ တွေ့ရပါတယ်။
တိုင်းပြည်ရဲ့ နိုင်ငံရေးဖြစ်စဉ်ထဲမှာ ဒေါ်အောင်ဆန်းစုကြည် မပါနိုင်အောင် ဘေးဖယ်ထုတ်ထားပြီး နိုင်ငံရေးအကျဉ်းသား ၂,၁၀၀ ကျော်ကို ဆက်ပြီး ဖမ်းထားတာနဲ့အမျှ စစ်အစိုးရက ကျင်းပတဲ့ ရွေးကောက်ပွဲတွေဟာ နိုင်ငံတကာရဲ့ အသိအမှတ်ပြုမှုကို မရသလို တရားဝင်မှုလည်း ရှိမှာမဟုတ်ဘူးလို့ ဗြိတိန်ဝန်ကြီးချုပ် ဂေါ်ဒွန်ဘရောင်းက ပြောပါတယ်။
ပွင့်လင်းမြင်သာတဲ့ ရွေးကောက်ပွဲလုပ်ငန်းစဉ်ထဲမှာ အတိုက်အခံ နိုင်ငံရေးအင်အားစုတွေ အပါအ၀င် နိုင်ငံသားအားလုံးကို မြန်မာ စစ်အစိုးရက လွတ်လွတ်လပ်လပ် ပါဝင်ခွင့်ပေးမှသာ ရွေးကောက်ပွဲတွေဟာ ယုံကြည်ဖွယ်ရာဖြစ်လိမ့်မယ်လို့ ကနေဒါ နိုင်ငံခြားရေးဝန်ကြီးက ပြောပါတယ်။
ဒါ့အပြင် ရွေးကောက်ပွဲမတိုင်ခင်မှာ မြန်မာစစ်အစိုးရနဲ့ ဒီမိုကရေစီအင်အားစုတွေ၊ တိုင်းရင်းသားလူမျိုးစုတွေ တွေ့ဆုံ ဆွေးနွေးပွဲ ဖြစ်အောင်လုပ်ဖို့ကိုလည်း စင်္ကာပူနဲ့ ကနေဒါတို့က တောင်းဆိုထားပါသေးတယ်။
မြန်မာစစ်ဗိုလ်ချုပ်တွေက နိုင်ငံတကာကပြောတာကို နားထောင်ပြီး နည်းနည်းလိုက်လုပ်တဲ့အချိန်ကတော့ နိုင်ငံတကာကနေ ပြင်းထန်တဲ့ဖိအား ကျလာတော့မယ်လို့ စိုးရိမ်တဲ့အချိန်ပဲဖြစ်တယ်လို့ Burma Campaign UK က Mark Farmaner က ပြောပါတယ်။
"တကယ်ပဲ ဖိအားကျလာတော့မယ်ဆိုတဲ့ အချိန်မျိုးမှာ သူတို့လုပ်ပါတယ်။ ကျန်တဲ့အချိန်မှာတော့ လုပ်ကို မလုပ်ပါဘူး။ ASEAN အဖွဲ့က တိုးတိုးတိတ်တိတ် ၀န်ခံထားတာရှိပါတယ်၊ သူတို့လုပ်ခဲ့တာ မြန်မာ့အရေးမှာ လုံးဝ မအောင်မြင်ဘူး၊ သူတို့ရဲ့ ပျော့ပြောင်းညင်သာတဲ့ ချဉ်းကပ်မှုက အလုပ်မဖြစ်ဘူးလို့ ၀န်ခံထားပါတယ်။ ကုလသမဂ္ဂ အထူးကိုယ်စားလှယ် တွေ အများအပြား မြန်မာနိုင်ငံကို ၄၁ ကြိမ်သွားခဲ့ဖူးပါပြီ၊ အပြောင်းအလဲလေးတခုတောင် မဖြစ်ခဲ့ပါဘူး။ မြန်မာ စစ်ဗိုလ်ချုပ်တွေ တခုခုလုပ်တဲ့အချိန်ကတော့ နိုင်ငံတကာ ဖိအားအောက်မှာ ရောက်နေတဲ့အချိန်ပဲဖြစ်ပါတယ်။"
ဗြိတိန်နိုင်ငံအခြေစိုက် မြန်မာ့အရေးလှုပ်ရှားမှုအဖွဲ့က ညွှန်ကြားရေးမှူး Mark Farmaner ပြောခဲ့တာပါ။
ဒေါ်အောင်ဆန်းစုကြည်ရဲ့ အကျိုးဆောင်ရှေ့နေတွေကတော့ ဥပဒေလမ်းကြောင်း ဆုံးတဲ့တိုင်အောင် လုပ်စရာရှိတာတွေ ကို ဆက်လုပ်သွားမှာဖြစ်ပြီး နောက်တဆင့် အထူး အယူခံတင်မယ်လို့ ဗွီအိုအေကို ပြောခဲ့ပါတယ်။
မူးယစ်တိုက်ဖျက်ရေး နိုင်ငံတကာ ဥပဒေကို မြန်မာ လိုက်နာမှုမရှိ

02 March 2010
မြန်မာနိုင်ငံဟာ မူးယစ်ဆေးဝါး တိုက်ဖျက်ရေးမှာ နိုင်ငံတကာ သဘောတူညီချက်တွေ အတိုင်း ထိထိရောက်ရောက် ဆောင်ရွက်ဖို့ ပျက်ကွက်နေတဲ့ နိုင်ငံတခု ဖြစ်တယ်လို့ ၂၀၀၉ ခုနှစ် အမေရိကန် ပြည်ထောင်စု နိုင်ငံခြားရေး ၀န်ကြီးဌာနက ထုတ်ပြန်တဲ့ အစီရင်ခံစာမှာ ဖော်ပြပါရှိပါတယ်။ အပြည့်အစုံကို ကိုသိန်းထိုက်ဦးက တင်ပြပေးထားပါတယ်။
မူးယစ်ဆေးဝါး တိုက်ဖျက်ရေးမှာ နိုင်ငံတကာ သဘောတူညီချက်တွေနဲ့ အညီ လိုက်နာဆောင်ရွက်တယ် ဆိုတာကို ပြသဖို့ ပျက်ကွက်တဲ့ နိုင်ငံတွေ စာရင်းမှာ မြန်မာ၊ ဘိုလီးဗီးယားနဲ့ ဗင်နီဇွဲလား နိုင်ငံတွေကို အမေရိကန် ပြည်ထောင်စု နိုင်ငံခြားရေး ၀န်ကြီးဌာနရဲ့ အစီရင်ခံစာက ထည့်သွင်း ဖော်ပြပါတယ်။ မနေ့က မတ်လ ၁ ရက်နေ့ နေ့စွဲနဲ့ ဒီအစီရင်ခံစာကို ထုတ်ပြန်တာ ဖြစ်ပါတယ်။
ဒီလို မူးယစ်ဆေးဝါး တိုက်ဖျက်ရေးမှာ ထိထိရောက်ရောက် မလုပ်နိုင်တဲ့ နိုင်ငံတွေအနေနဲ့ အမေရိကန် ပြည်ထောင်စုရဲ့ အရေးယူပိတ်ဆို့ ဒဏ်ခတ်မှုတွေကို ခံရနိုင်ပါတယ်။ ဒီလိုခံရဖို့လည်း သတ်မှတ်ချက်တွေ ရှိပါတယ်။ ဒါပေမဲ့ ဘိုလီးဗီးယားနဲ့ ဗင်နီဇွဲလား နိုင်ငံတွေကိုတော့ အဲဒီနိုင်ငံတွေကို ပေးနေတဲ့ အကူအညီပေးရေး အစီအစဉ် တချို့ကြောင့် အမေရိကန် သမ္မတ ဘရက်ခ် အိုဘားမား (Barack Obama) ရဲ့ အမိန့်နဲ့ အရေးယူပိတ်ဆို့ ဒဏ်ခတ်ဖို့ သတ်မှတ်ချက်တွေကို ပယ်ဖျက်ပေးထားပါတယ်။
ဒါ့အပြင် အမေရိကန် နိုင်ငံခြားရေး ၀န်ကြီးဌာနရဲ့ အစီရင်ခံစာထဲမှာ မူးယစ်ဆေးဝါး အဓိက ထုတ်လုပ်တဲ့ ဒါမှမဟုတ် မူးယစ်ဆေးဝါး ရောင်းဝယ်မှုတွေ အဓိက ဖြတ်သန်းသွားတဲ့ နိုင်ငံ ၂၀ ကိုလည်း ထည့်သွင်း ဖော်ပြထားပါတယ်။ အဲဒီနိုင်ငံတွေထဲမှာ မက္ကဆီကို၊ ပနားမား၊ အာဖဂန်နစ္စတန်၊ နိုင်ဂျီးရီးယား၊ ပါကစ္စတန်၊ စတဲ့နိုင်ငံတွေ ပါဝင်ပါတယ်။
မြန်မာနိုင်ငံနဲ့ ပတ်သက်လို့ မြန်မာနိုင်ငံဟာ မူးယစ်ဆေးဝါး အဓိက ထုတ်လုပ်တဲ့ နိုင်ငံတခု ဖြစ်နေပြီး စီးပွားရေးလုပ်ငန်း တော်တော်များများကို အစိုးရနဲ့ ရင်းနှီး ကျွမ်းဝင်သူတွေက ချုပ်ကိုင်ထားတဲ့နိုင်ငံ ဖြစ်တဲ့အကြောင်း၊ မူးယစ်ဆေးဝါး ရောင်းဝယ်မှုတွေဟာ ငွေမည်းတွေကို ခ၀ါချဖို့အတွက် အဓိကလုပ်ကိုင်တဲ့ လုပ်ငန်းတွေ ဖြစ်လာပြီး ပြီးခဲ့တဲ့ နှစ်ပိုင်းတွေအတွင်း မြန်မာစစ်အစိုးရက စီးပွားရေးဘဏ်တွေက တဆင့် ငွေမည်း ခ၀ါချမှု တိုက်ဖျက်ရေးမှာ တိုးမြှင့်ပြီး ဆောင်ရွက်လာခဲ့တာတွေ ရှိပေမဲ့ တိုင်းပြည်အတွင်းမှာရှိတဲ့ စီးပွားရေးဘဏ်တွေနဲ့ ငွေကြေး အဖွဲ့အစည်းတွေရဲ့ ခေတ်မီမှု အားနည်းနေတာ၊ စည်းမျဉ်းစည်းကမ်းတွေထက် တရားမ၀င် ကုန်သွယ်ရေးက အဓိက လွှမ်းမိုးနေတာတွေကြောင့် ငွေမည်း ခ၀ါချမှုတွေကို ထိထိရောက်ရောက် မတိုက်ဖျက်နိုင်ဘူးဆိုပြီး အစီရင်ခံစာက ဖော်ပြပါတယ်။
ဒါကြောင့်လည်း အခြေခံ အဆောက်အဦးတွေ ရင်းနှီးမြှုပ်နှံမှုတွေနဲ့ တခြား ကူးသန်းရောင်းဝယ်ရေး ဆိုင်ရာ ငွေကြေးလုပ်ငန်းတွေမှာ ဒီလို တရားမ၀င် ငွေဖြူတွေ ခ၀ါချထားတဲ့ငွေတွေ စီးဝင်မှုကို ကာကွယ်နိုင်မှု အားနည်းတယ်ဆိုပြီး အစီရင်ခံစာက ဆိုပါတယ်။
မြန်မာနိုင်ငံနဲ့ နယ်စပ်ဒေသတွေမှာ စစ်အစိုးရဘက်က လုံခြုံရေးယူနိုင်မှု အားနည်းပြီး လက်နက်ကိုင် မူးယစ်ဆေးဝါး ရောင်းဝယ်မှုတွေကို ထိထိရောက်ရောက် အရေးယူနိုင်ဖို့ အားနည်းချက်တွေ ရှိနေတယ်လို့ ပြောပါတယ်။ ဒါ့အပြင် မြန်မာနိုင်ငံတွင်းမှာ လာဘ်ပေးလာဘ်ယူမှုတွေ ကြီးထွားနေတဲ့အတွက်လည်း မူးယစ်ဆေးဝါး ရောင်းဝယ်မှုတွေနဲ့ ငွေမည်းကို ငွေဖြူအဖြစ် ခ၀ါချမှုတွေကို ထိထိရောက်ရောက် မတိုက်ဖျက်နိုင်တာလို့ အစီရင်ခံစာက ထောက်ပြပါတယ်။
မြန်မာနိုင်ငံဟာ နိုင်ငံတကာ လာဘ်ပေးလာဘ်ယူမှုတွေကို စာရင်းပြုစုလေ့ရှိတဲ့ Transparency International အဖွဲ့ကြီးရဲ့ ၂၀၀၉ ခုနှစ် အစီရင်ခံစာထဲမှာ နိုင်ငံပေါင်း ၁၈၀ ထဲက ၁၇၈ အဆင့်ရှိတဲ့ အဆိုးဝါးဆုံး နိုင်ငံတခု ဖြစ်တဲ့အကြောင်းကိုလည်း အမေရိကန် နိုင်ငံခြားရေး ၀န်ကြီးဌာနရဲ့ အစီရင်ခံစာက ကိုးကားဖော်ပြထားပါတယ်
အမျိုးသမီးများအပေါ် အကြမ်းဖက်မှု ဥပဒေပညာရှင်တွေ ကြားနာ

03 March 2010
မနေ့က ကုလသမဂ္ဂ ဌာနချုပ်ရှိရာ နယူးယောက်မြို့မှာ မြန်မာနိုင်ငံတွင်း အမျိုးသမီးတွေအပေါ် အကြမ်းဖက်မှုနဲ့ ပတ်သက်လို့ ကြားနာပွဲ ပြုလုပ်ရာမှာ ဒီအဖြစ်အပျက်တွေဟာ နိုင်ငံတကာ ဥပဒေတွေကို ချိုးဖောက်မှု မြောက်တယ်လို့ နိုင်ငံတကာ ဥပဒေ ပညာရှင်တွေက သုံးသပ်ခဲ့ကြပါတယ်။ ဒီပွဲကို ကိုယ်တိုင် သတင်းသွားယူခဲ့တဲ့ မခင်ဖြူထွေးကို မခွာညိုက ဆက်သွယ်မေးမြန်းပြီး တင်ပြပေးထားပါတယ်။
မြန်မာနိုင်ငံက အမျိုးသမီး ၁၂ ဦးက လူ့အခွင့်အရေး ချိုးဖောက်တာတွေကို သူတို့ကိုယ်တိုင် ခံစားရတာတွေကို ပထမဦးဆုံးအကြိမ် အမေရိကန် ပြည်ထောင်စုမှာ လာပြီးတော့ သက်သေခံ ထွက်ဆိုတာ ဖြစ်ပါတယ်။ ဒီလို သက်သေထွက်ဆိုတဲ့ နေရာမှာ ခုံရုံးသဘောမျိုး ပြင်ဆင်ပြီးတော့မှ တရားသူကြီး ၄ ဦးက သူတို့ရဲ့ ထွက်ဆိုချက်တွေကို နားထောင်တယ်။
ဒီတရားသူကြီး ၄ ယောက်ထဲမှာ ၁၉၉၇ ခုနှစ် နိုဘယ်လ် ငြိမ်းချမ်းရေးဆုရှင် ဂျိုဒီ ၀ီလီယံ (Jody Williams)၊ ၂၀၀၆ ခုနှစ် နိုဘယ်လ် ငြိမ်းချမ်းရေးဆုရှင် အီရန်နိုင်ငံက အမျိုးသမီး လှုပ်ရှားသူ ရှီရင်း အီဘာတီ (Shirin Ebadi)၊ တောင်ကိုရီးယားနိုင်ငံ ဆိုးလ်မြို့ ကွာဟမ် နိုင်ငံရေး လေ့လာရေးကျောင်းက ပါမောက္ခ စိန်ဆူးရှင်း၊ သူကလည်း တရားသူကြီး ၄ ယောက်ထဲက တယောက်၊ ထိုင်းနိုင်ငံ ချူလာလောင်ကွန်း တက္ကသိုလ်က ဥပဒေပညာရှင် ပါမောက္ခ ဗီတစ် မွန်တာဘွန်၊ သူတို့တွေက တရားသူကြီးတွေ အနေနဲ့ သက်သေခံ ထွက်ဆိုတာတွေကို ကြားနာပြီး မြန်မာနိုင်ငံက အမျိုးသမီးတွေက သူတို့ကိုယ်တိုင် ကြုံတွေ့ရတဲ့ အမျိုးသမီး ၁၂ ယောက်ရဲ့ အကြောင်းအရာတွေကို နားထောင်ပြီး ဒီအပေါ်မှာ သုံးသပ်ချက်တွေ ပေးကြတာ ဖြစ်ပါတယ်။
အကြမ်းဖက်ခံရတဲ့ အမျိုးသမီးတွေကိုယ်တိုင် လာပြီး ထွက်ဆိုကြတယ်ဆိုတော့ ဘယ်လို အမျိုးသမီးတွေလဲ၊ ဘယ်အရပ်က လာကြသလဲ၊ အဲဒါလေး ပြောပြပေးပါ။
“ဒီလို သက်သေထွက်ဆိုတဲ့ နေရာမှာတော့ အမျိုးမျိုးပါပဲ၊ လူ့အခွင့်အရေး ချိုးဖောက်ခံရတဲ့ ပုံစံ အမျိုးမျိုးနဲ့ လူ့အခွင့်အရေး ချိုးဖောက်ခံရတဲ့ လူတွေက ဒီမှာလာပြီး ပြောကြတာဆိုတော့ အစိတ်အပိုင်းအားဖြင့် သုံးမျိုး ခွဲထားတယ်။ ဥပမာ မုဒိမ်းကျင့်ခံရတဲ့ ကိစ္စမျိုးတွေက အမျိုးသမီးတွေအပေါ်မှာ တိုက်ရိုက် အကြမ်းဖက်ခံရတဲ့ အခြေအနေတွေအကြောင်း၊ ကချင်ပြည်နယ်က ဆယ်ကျော်သက် အမျိုးသမီးလေး တယောက်ကလည်း မြန်မာစစ်သားတွေက ၀ိုင်းပြီး သူ့ကို မုဒိမ်းကျင့်ခံရတဲ့ အခြေအနေပေါ့၊ အဲဒီ သူ့ရဲ့ ကိုယ်ပိုင် အတွေ့အကြုံကို ပြောပြတယ်။ ဒါပေမဲ့ သူကတော့ ကိုယ်တိုင် မလာရောက်နိုင်တဲ့အတွက် သူ့ရဲ့ကိုယ်စား ဒီမှာရှိတဲ့ တယောက်က သူ့ရဲ့ သက်သေထွက်ဆိုချက်ကို ဖတ်ကြားပေးတာ ရှိတယ်။
“ဒါပေမဲ့ အဓိက သက်သေထွက်ဆိုတဲ့သူတွေ တင်ပြသွားတဲ့ အကြောင်းအရာတွေထဲမှာ မုဒိမ်းကျင့်ခံရတဲ့ ကိစ္စတွေ၊ အတင်းအဓမ္မ လုပ်အားပေး စေခိုင်းခံရတာတွေ၊ ရွာတွေမှာ နေအိမ်တွေကနေ အတင်းအဓမ္မ ရွှေ့ပြောင်းခိုင်းတာ၊ ကျေးရွာတွေကို မီးရှို့ဖျက်ဆီးတဲ့ အထဲမှာ ကိုယ်တိုင်ခံစားရတဲ့ သူတွေပေါ့၊ နောက် နိုင်ငံရေး အကျဉ်းသားတွေ ဆိုရင်လည်း အကျဉ်းထောင်တွင်းမှာ သူတို့တွေ ဘယ်လို ညှဉ်းပန်းနှိပ်စက်ခံရတယ် ဆိုတဲ့အကြောင်း၊ သူတို့တွေရဲ့ နိုင်ငံသား အခွင့်အရေးတွေ၊ နိုင်ငံရေး လှုပ်ရှားခွင့် အခွင့်အရေးတွေ ဘယ်လိုဆုံးရှုံးရတယ် ဆိုတဲ့အကြောင်းတွေကို သူတို့တွေက တရားသူကြီးတွေရှေ့မှာ သက်သေထွက်ဆိုခဲ့တာ ဖြစ်ပါတယ်။”
ကြားနာမှုကို နိုင်ငံတကာက တရားသူကြီးတွေရော၊ ဥပဒေ ပညာရှင်တွေပါ လာပြီး ကြားနာတယ်ဆိုတော့ နိုင်ငံတကာ ဥပဒေကို စံထားပြီး ဘယ်လိုသုံးသပ်သွားပါလဲ၊ ဗမာပြည်က အခြေအနေနဲ့ ပတ်သက်ပြီးတော့။
“သက်သေထွက်ဆိုသွားတဲ့ လူတွေကို နားထောင်ခြင်းအားဖြင့် မြန်မာစစ်အစိုးရဟာ ပြည်တွင်း ဥပဒေတွေကိုရော၊ နိုင်ငံတကာ ဥပဒေတွေကိုရော ကျူးလွန်နေတယ်ဆိုတာ ထင်ရှားတယ်၊ တကယ့်ကို လူသားမဆန်တဲ့ အစိုးရ၊ ပြည်သူတွေကို ကာကွယ်ပေးရမယ့် အစား ပြည်သူတွေရဲ့ အခွင့်အရေးတွေကို ချိုးဖောက်နေတဲ့ အစိုးရတရပ် ဖြစ်တယ်၊ မြန်မာနိုင်ငံဟာ အခြေခံ လူ့အခွင့်အရေးတွေကို လုံးဝ လျစ်လျူရှု ခံနေရတဲ့နိုင်ငံ ဖြစ်တယ်ဆိုတာကို သူတို့တွေက သက်သေခံ ထွက်ဆိုသွားတဲ့ အပေါ်မှာ မူတည်ပြီးတော့ သုံးသပ်ချက် ပေးတာတွေ ရှိပါတယ်။
“အဲဒီအထဲမှာ ထိုင်းနိုင်ငံက ဥပဒေ ပညာရှင် ဗီတစ် မွန်တာဘွန်က ဆိုရင် ယုံနိုင်စရာတောင် မကောင်းတဲ့ ရက်စက်ကြမ်းကြုတ်မှုကြီးကို သူတို့ ဒီနေ့မှာ ကြားရတယ်ပေါ့။ အခုလိုဖြစ်တာဟာ မြန်မာနိုင်ငံမှာ လူ့အခွင့်အရေး၊ နိုင်ငံသားတွေရဲ့ အခွင့်အရေးတွေ မရှိလို့ ဖြစ်နေတာ၊ ဒီအခွင့်အရေးတွေကို ပြည်သူတွေဟာ အလုခံထားရတယ် ဆိုပြီးတော့ သူက သုံးသပ်ပြောဆိုတာ ရှိပါတယ်။
“တောင်ကိုရီးယား တရားသူကြီး တယောက်က ဆိုရင်လည်း ဒီအဖြစ်အပျက်တွေကို သူ နားထောင်ရတာဟာ သူ့ကိုယ်တွေ့ အဖြစ်အပျက်တွေကို ပြန်ပြီး သတိရစေတယ်လို့ သူက ပြောတယ်။ ဥပမာ သူ ၁၉၇၀၊ ၈၀ ခုနှစ်တွေတုန်းကဆိုရင် တောင်ကိုရီးယားနိုင်ငံမှာ သူတို့လည်း ကြုံခဲ့ရတယ်လို့ သူက ပြောတယ်။ သူ့ရဲ့အမျိုးသားဆိုရင် ထောင် ၃ နှစ် ကျခဲ့တယ်။ သူတို့ကိုယ်တိုင်လည်း ဒါတွေကို ဖြတ်သန်းခဲ့ဖူးတယ်။
“ဒါတွေဟာ တကယ့်ကို မထင်ရက်စရာ အခြေအနေတွေ ဖြစ်တယ်။ အဲဒီလို အခြေအနေတွေ ရောက်တိုင်း၊ ရောက်တိုင်းမှာလည်း သူတို့တွေရဲ့ အဓိက မျှော်လင့်ချက်က ပြည်ပဖိအား ဖြစ်တယ်။ မြန်မာနိုင်ငံမှာလည်း အခုလိုဖြစ်နေတဲ့ အခြေအနေတွေမှာ မြန်မာနိုင်ငံမှာ ဒီနေ့ အဓိက လိုအပ်နေတာလည်း နိုင်ငံတကာ ဖိအားပါဆိုပြီး သူက ပြောဆိုသွားပါတယ်။”
နိုင်ငံတကာက တရားသူကြီးတွေနဲ့ ဥပဒေ ပညာရှင်တွေကလည်း သုံးသပ်ပြီးသွားပြီဆိုတော့ ဒီလိုဖြစ်ရပ်တွေနဲ့ ပတ်သက်ပြီး ရှေ့ဆက် ဘယ်လို ဆောင်ရွက်နိုင်မယ့် အလားအလာတွေ မြင်ရသလဲဆိုတာ မခင်ဖြူထွေး မြင်သလောက် ပြောပြပေးပါဦး။
“အခု ကျမပြောနေတဲ့ အချိန်မှာကို ဒီနေ့ အစီအစဉ်တွေက မပြီးသေးပါဘူး။ နောက်ထပ် သက်သေခံ ထွက်ဆိုမယ့် အမျိုးသမီးလည်း ၄ ဦးကျန်သေးတယ်။ သူတို့အားလုံး ၁၂ ယောက် သက်သေခံပြီးသွားပြီ ဆိုရင်တော့ တရားသူကြီးတွေချည်းပဲ ဆုံပြီးတော့ သူတို့ ကြားနာခဲ့ရတဲ့ အချက်အလက်တွေ၊ သူတို့ အရင်တုန်းက မြန်မာပြည်နဲ့ ပတ်သက်ပြီးတော့ ရှာဖွေရရှိထားတဲ့ အချက်အလက်တွေကို တရားသူကြီးတွေက ပြန်ပြီး သုံးသပ်မှာ ဖြစ်ပါတယ်။
“အဲဒီလို သုံးသပ်ပြီးသွားရင် တရားသူကြီးတွေက အစီရင်ခံစာ ထုတ်ပြန်ပြီးတော့ ကုလသမဂ္ဂ အပါအ၀င် နိုင်ငံတကာ အစိုးရတွေကို မြန်မာနိုင်ငံမှာ လူ့အခွင့်အရေး ချိုးဖောက်မှုတွေက စနစ်တကျနဲ့ကို ဖြစ်နေတယ်၊ နိုင်ငံတကာ ဥပဒေ ပုဒ်မ ဘယ်အပိုဒ် ဘယ်အပိုဒ်အရ မြန်မာစစ်အစိုးရဟာ ဒီဥပဒေတွေကို ချိုးဖောက်နေပါတယ် ဆိုပြီးတော့ သူတို့တွေက ဥပဒေ အချက်အလက်တွေနဲ့ ကိုးကားပြီး မြန်မာနိုင်ငံမှာ ဖြစ်နေတဲ့ အခြေအနေတွေ သူတို့ ကြားနာခဲ့ရတဲ့ အပေါ်မှာ မူတည်ပြီးတော့ သူတို့က အစီရင်ခံစာကို ထုတ်မှာပါ။ မြန်မာစစ်အစိုးရကိုလည်း ဒီအခြေအနေတွေက ရပ်တန်းက ရပ်ပါဆိုတဲ့ တိုက်တွန်းမှုမျိုးတွေကို သူတို့က လုပ်သွားဖို့ ရှိပါတယ်။”
အဲဒီလို နိုဘယ်လ် ငြိမ်းချမ်းရေး ဆုရှင်တွေက ကမကထပြုပြီးတော့ နိုင်ငံတကာက ဥပဒေ ပညာရှင်တွေနဲ့ တရားသူကြီးတွေ ပါဝင်တဲ့ ကြားနာပွဲကနေ အစီရင်ခံစာတစောင် ထုတ်ပြန်ပြီး မြန်မာစစ်အစိုးရဆီကိုလည်း ပေးပို့မှာ ဖြစ်ကြောင်းနဲ့ ဒီနေ့ဆိုရင် ကုလသမဂ္ဂ ရုံးချုပ်ရှေ့မှာ မြန်မာပြည်တွင်းက အကြမ်းဖက်ခံရတဲ့ အမျိုးသမီးတွေ အတွက် ဆုတောင်းပွဲလုပ်ဖို့ ရှိတယ်လို့လည်း သိရပါတယ်။
ဥရောပသမဂ္ဂ မြန်မာအတွက် လူသားချင်းစာနာမှု အထောက်အကူ ယူရို ၁၇ သန်းကျော် ပေး

03 March 2010
မြန်မာနိုင်ငံအတွင်းက ဖွံ့ဖြိုးမှုနည်းတဲ့ ဒေသတွေနဲ့ ထိုင်း၊ မြန်မာ နယ်စပ်ဒေသက ဒုက္ခသည်စခန်းတွေမှာ ရှိနေကြတဲ့ ဒုက္ခသည်တွေအတွက် EU ဥရောပသမဂ္ဂကနေ လူသားချင်း စာနာတဲ့ အကူအညီတွေ ပေးနေရာမှာ ၂၀၁၀ ခုနှစ် အတွက်တော့ အမေရိကန်ဒေါ်လာ ၂၃ သန်းခွဲလောက်နဲ့ ညီမျှတဲ့ ယူရို ၁၇.၂၃ သန်းကို ထောက်ပံ့ပေးသွားဖို့ ရှိနေပါတယ်။ ဘယ်လိုကဏ္ဍတွေကို အဓိက အကူအညီ ပေးသွားမလဲ ဆိုတာတွေကို ဆက်သွယ်စုံစမ်းထားတဲ့ ကိုဇော်ဝင်းလှိုင်က တင်ပြပေးထားပါတယ်။
အခု ဥရောပသမဂ္ဂက ချမှတ်ပေးတဲ့ ထောက်ပံ့ငွေ ယူရို ၁၇ သန်းကျော်ကျော်ထဲက ၉ သန်းကျော်ကို မြန်မာနိုင်ငံအတွင်း ဖွံ့ဖြိုးမှု နည်းနေသေးတဲ့ ဒေသတွေ၊ အထူးသဖြင့်တော့ ဝေးလံခေါင်ဖျားတဲ့ တိုင်းရင်းသား ဒေသတွေမှာ လူသားချင်း စာနာတဲ့ အကူအညီတွေ ပေးသွားမှာ ဖြစ်ပါတယ်။
ခရစ္စတိုဖာ ရယ်တီယန် (Christophe Reltien) ဟာ ECHO လို့ခေါ်တဲ့ ဥရောပနိုင်ငံများ လူသားချင်း စာနာမှုဆိုင်ရာ အကူအညီပေးရေးရုံးက မြန်မာနိုင်ငံဆိုင်ရာ ရုံးခွဲတာဝန်ခံ ဖြစ်ပါတယ်။ သူက အခုပေးတဲ့ အကူအညီငွေ အများစုကို ကျန်းမာရေးနဲ့ အာဟာရဖွံ့ဖြိုးမှု လုပ်ငန်းတွေအတွက် အသုံးပြုသွားမယ်လို့ ဆိုပါတယ်။
“ကျနော်တို့အနေနဲ့ ဒီထောက်ပံ့ငွေ အများစုကို ကျန်းမာရေးနဲ့ အာဟာရဖွံ့ဖြိုးမှု လုပ်ငန်းတွေမှာ အသုံးချသွားမှာ ဖြစ်ပါတယ်။ နောက် တိုင်းပြည်ထဲက တချို့ဒေသတွေမှာ ရေကောင်း ရေသန့် ရရှိရေးနဲ့ မိလ္လာကျင်းဆိုင်ရာ လုပ်ငန်းတွေ၊ ကာကွယ်စောင့်ရှောက်ရေး လုပ်ငန်းတွေမှာလည်း သုံးစွဲသွားမှာ ဖြစ်ပါတယ်။”
သူပြောသွားတဲ့ ကာကွယ်စောင့်ရှောက်ရေး ဆိုတဲ့အထဲမှာ လူ့အခွင့်အရေးနဲ့ တခြား နိုင်ငံရေး လုပ်ငန်းတွေတော့ မပါဘူးလို့ ခရစ္စတိုဖာ ရယ်တီယန်က ခွဲခြား ပြောသွားပါတယ်။ အဲဒီ လူ့အခွင့်အရေးနဲ့ နိုင်ငံရေး လုပ်ငန်းတွေကိုတော့ EU ရဲ့ တခြားရုံးခွဲတွေကနေ တဆင့် လုပ်ဆောင်နေတယ်လို့ ဆိုပါတယ်။ ဥရောပကော်မရှင်က မြန်မာနိုင်ငံကို ပေးနေတဲ့ အကူအညီတွေကိုတော့ ရန်ကုန်မှာရှိတဲ့ EU ECHO ရုံးက ကြီးကြပ် လုပ်ဆောင်သွားမှာ ဖြစ်ပါတယ်။
EU အနေနဲ့ ဒီလုပ်ငန်းတွေကို အကောင်အထည် ဖော်ရာမှာ မြန်မာနိုင်ငံအတွင်းမှာရှိတဲ့ ကုလသမဂ္ဂ အဖွဲ့အစည်းအောက်က NGO တွေနဲ့ တိုက်ရိုက် ဆက်သွယ် လုပ်ဆောင်သွားမှာ ဖြစ်ပါတယ်။ တခြား မြန်မာနိုင်ငံအတွင်းက ဒေသခံ NGO တွေနဲ့တော့ တိုက်ရိုက်မဟုတ်ဘဲ တဆင့်သဘောမျိုး လုပ်ငန်းတွေကို ပူးပေါင်း လုပ်ဆောင်သွားမယ်လို့ ဆိုပါတယ်။
“ကျနော်တို့မှာ ပူးပေါင်း လုပ်ဆောင်ကြမယ့် NGO နဲ့ ကုလသမဂ္ဂ အဖွဲ့အစည်းတွေ ရှိပါတယ်။ သူတို့ကပဲ ဒီလုပ်ငန်းတွေကို အကောင်အထည် ဖော်ပေးကြမှာပါ။ ECHO ရုံးအနေနဲ့ တိုက်ရိုက် ပူးပေါင်း မလုပ်ဆောင်ပေမဲ့လည်း ကျနော်တို့ရဲ့ လုပ်ဖော်ကိုင်ဖက်တွေက ဒေသခံ NGO အဖွဲ့အစည်းတွေနဲ့ ပူးပေါင်း လုပ်ဆောင်နေပါတယ်။ ဌာနေ ဒေသခံ NGO တွေကို တတ်နိုင်သလောက် အသုံးပြုကြဖို့လည်း ကျနော်တို့ရဲ့ လုပ်ဖော်ကိုင်ဖက်တွေကို ကျနော်တို့ အမြဲတမ်း တိုက်တွန်းနေပါတယ်။”
ဒေသခံ NGO တွေထဲက ဘယ်အဖွဲ့အစည်းတွေကို အသုံးပြုမယ် ဆိုတာကိုတော့ အခုချိန်မှာ စိစစ်နေတုန်းပဲ ဖြစ်တယ်လို့ ဆိုပါတယ်။
အကူအညီတွေ ဘယ်နေရာ လိုအပ်တယ်၊ ဘယ်နေရာတွေကို အထောက်အပံ့တွေ ပေးသင့်တယ် ဆိုတာကိုတော့ သူကိုယ်တိုင် အပါအ၀င် EU ကိုယ်စားလှယ်တွေ သွားရောက်လေ့လာပြီးမှ ဆုံးဖြတ်ချက်ချတာ ဖြစ်တယ်လို့ ခရစ္စတိုဖာ ရယ်တီယန်က ပြောပါတယ်။
“ဘယ်ဒေသကို ကူညီသင့်တယ် ဆိုတာက ကျနော်တို့ရဲ့ လေ့လာတွေ့ရှိချက်တွေနဲ့ ကျနော်တို့ လုပ်ဖော် ကိုင်ဖက်တွေရဲ့ လေ့လာတွေ့ရှိချက်တွေ အပေါ်မှာ မူတည်ပါတယ်။ မှန်ပါတယ်၊ တချို့ဒေသတွေဟာ တိုင်းရင်းသား လူမျိုးစုတွေ နေထိုင်တဲ့ ဒေသတွေ ဖြစ်ပါတယ်။ ဒါပေမဲ့ တခြား တိုင်းရင်းသားဒေသ မဟုတ်တဲ့ နေရာတွေမှာလည်း ကျနော်တို့ အကူအညီတွေ ပေးနေပါတယ်။”
အခုထောက်ပံ့ငွေတွေထဲက ကျန်နေသေးတဲ့ ယူရို ၈ သန်းလောက်ကိုတော့ ထိုင်း၊ မြန်မာ နယ်စပ်ဒေသက ဒုက္ခသည်စခန်းတွေမှာ ရှိနေကြတဲ့ မြန်မာနိုင်ငံက ဒုက္ခသည်တွေကို ကူညီမှာ ဖြစ်တယ်လို့ ဆိုပါတယ်။ ဒီလို ကူညီရာမှာလည်း မြန်မာနိုင်ငံအတွင်းမှာ ကူညီသလိုပဲ ကျန်းမာရေး စောင့်ရှောက်မှု၊ အစာ အာဟာရ ဖွံ့ဖြိုးမှု ရရှိရေး စတာတွေကို ကူညီပေးသွားမယ်လို့ ဆိုပါတယ်။
EU ဥရောပသမဂ္ဂ အနေနဲ့ မြန်မာနိုင်ငံကို လူသားချင်းစာနာတဲ့ အကူအညီတွေ ၁၉၉၉ ခုနှစ်လောက်ကစပြီး ပေးလာတာမှာ ပြီးခဲ့တဲ့ ၂၀၀၅ ခုနှစ်မှာတော့ EU ရဲ့ ECHO ရုံးခွဲကို မြန်မာနိုင်ငံ ရန်ကုန်မြို့မှာ စတင်ဖွင့်လှစ်နိုင်ခဲ့တယ်လို့ ဆိုပါတယ်။
အခုလို လူသားချင်း စာနာတဲ့ ထောက်ပံ့ငွေတွေ နှစ်စဉ်ပေးလာတာမှာ မနှစ်ကလည်း အလားတူ ငွေကြေးပမာဏနဲ့ ညီတဲ့ အကူအညီတွေကို မြန်မာနိုင်ငံကို ထောက်ပံ့ပေးနိုင်ခဲ့တယ်လို့ ECHO ဥရောပနိုင်ငံများ လူသားချင်း စာနာမှုဆိုင်ရာ အကူအညီပေးရေးရုံးက မြန်မာနိုင်ငံဆိုင်ရာ တာဝန်ခံ ခရစ္စတိုဖာ ရယ်တီယန်က ပြောပါတယ်။
စစ်အစိုးရကို ခုံရုံးတင်ရေး ကုလ ထောက်ခံမှုပေးရန် နိုဘယ်လ်ဆုရှင်တွေ တောင်းဆိုမည်

04 March 2010


နိုဘယ်လ်ငြိမ်းချမ်းရေး ဆုရှင်များ ဖြစ်သော ရှီရင်း အီဘာဒင်(၀ဲ) နှင့်
ဂျိုဒီ ၀ီလီယမ်စ်(ယာ)။
ဇွန် ၈၊ ၂၀၀၆။
လူ့အခွင့်အရေး ချိုးဖောက်မှုတွေ ကျူးလွန်နေတဲ့ မြန်မာစစ်ခေါင်းဆောင်တွေကို နိုင်ငံတကာ ရာဇ၀တ်ပြစ်မှုဆိုင်ရာ တရားရုံးက အရေးယူဖို့ တောင်းဆိုနေတာတွေကို အားပေး ထောက်ခံလာအောင် တိုက်တွန်းဖို့အတွက် နိုဘယ်လ် ငြိမ်းချမ်းရေးဆုရှင် ၂ ဦး ကုလသမဂ္ဂ အတွင်းရေးမှူးချုပ် ဘန်ကီမွန်းနဲ့ နယူးယောက်ခ်မြို့မှာ ဒီကနေ့ တွေ့ဆုံဖို့ ရှိပါတယ်။
အမျိုးသမီးတွေအပေါ် လူ့အခွင့်အရေး ချိုးဖောက်မှုတွေ ကျူးလွန်တယ်ဆိုတဲ့ စွပ်စွဲချက်တွေဟာ လူသားမျိုးနွယ်အပေါ် ရာဇ၀တ်မှု ကျူးလွန်ရာ ရောက်တာမို့ မြန်မာစစ်ခေါင်းဆောင်တွေကို အရေးယူသင့်တဲ့အကြောင်း နိုဘယ်လ် ငြိမ်းချမ်းရေးဆုရှင် ၂ ဦးဖြစ်တဲ့ ရှီရင်း အီဘာဒင် (Shirin Ebadin) နဲ့ ဂျိုဒီ ၀ီလီယမ်စ် (Jody Williams) တို့က ပြောခဲ့ကြတာပါ။
လူ့အခွင့်အရေး ချိုးဖောက်ခံခဲ့ရသူ မြန်မာအမျိုးသမီးတွေလည်း တက်ရောက် ထွက်ဆိုခဲ့ကြတဲ့ အမျိုးသမီးတွေအပေါ် ကျူးလွန်တဲ့ ရာဇ၀တ်မှုတွေနဲ့ ပတ်သက်တဲ့ နိုင်ငံတကာ ကြားနာပွဲတခုကို ဒီတပတ်ထဲ ကျင်းပခဲ့ရာက ထွက်ပေါ်လာတဲ့ အချက်အလက်တွေကို နိုဘယ်လ် ငြိမ်းချမ်းရေး ဆုရှင်တွေနဲ့ လူ့အခွင့်အရေး ကျွမ်းကျင်သူတွေက မနေ့တုန်းကပဲ ထုတ်ပြန်ခဲ့ကြတာ ဖြစ်ပါတယ်။
နယူးယောက်ခ်မြို့က ကြားနာပွဲအတွင်း မြန်မာစစ်တပ်က အမျိုးသမီးတွေအပေါ် အဓမ္မ ပြုကျင့်တာတွေ၊ နှိက်စက်ညှဉ်းပန်းတာတွေနဲ့ တခြား လူမဆန်တဲ့ အပြုအမူတွေနဲ့ ပတ်သက်ပြီး မြန်မာအမျိုးသမီး ၁၂ ဦးက သက်သေခံ ထွက်ဆိုခဲ့ကြတာပါ။
ဒီနောက်မှာတော့ မြန်မာအမျိုးသမီး လူ့အခွင့်အရေး လှုပ်ရှားသူတွေက ဒီပြဿနာတွေကို ကုလသမဂ္ဂ လုံခြုံရေးကောင်စီကနေ နိုင်ငံတကာ ရာဇ၀တ်ပြစ်မှုဆိုင်ရာ တရားရုံးကို လွှဲပြောင်းပေးဖို့လည်း တိုက်တွန်းခဲ့သလို ကုလသမဂ္ဂ အနေနဲ့ မြန်မာအာဏာပိုင်တွေဟာ နိုင်ငံတကာ လူ့အခွင့်အရေး စံချိန် စံညွှန်းတွေနဲ့အညီ ရှိစေအောင် ဖိအားပေး ဆောင်ရွက်သွားဖို့ကိုလည်း တောင်းဆိုခဲ့တာ ဖြစ်ပါတယ်။
မြန်မာနဲ့ မြောက်ကိုရီးယား ဆက်ဆံရေး အမေရိကန် စိုးရိမ်

04 March 2010
မြောက်ကိုရီးယားနဲ့ စစ်ဘက်ဆိုင်ရာ ဆက်နွယ်မှုတွေ ရှိနေတဲ့ မြန်မာနိုင်ငံနဲ့ ပတ်သက်လို့ စိုးရိမ်မကင်း ဖြစ်ရတဲ့အကြောင်း အမေရိကန် အစိုးရ တာဝန်ရှိသူတဦးက ပြောဆိုလိုက်ပါတယ်။
အမေရိကန် သမ္မတ ဘရက်ခ် အိုဘားမား (Barack Obama) အစိုးရက မြောက်ကိုရီးယားနဲ့ ဆက်ဆံမှုတွေ ရှိနေတဲ့ မြန်မာနိုင်ငံက စစ်ဘက်ဆိုင်ရာ နည်းပညာတွေ ၀ယ်ယူဖို့ လုပ်နေတာတွေကို ဟန့်တားဖို့ ကြိုးပမ်းနေတယ်ဆိုတဲ့ သတင်းတွေ ထွက်ပေါ်လာတဲ့နောက် အမေရိကန် နိုင်ငံခြားရေးဌာန ပြောခွင့်ရပုဂ္ဂိုလ် ပီဂျေ ခရော်လီ (P J Crowley) က မနေ့တုန်းက ပြုလုပ်တဲ့ ပုံမှန် သတင်းစာရှင်းလင်းပွဲမှာ ပြောဆိုလိုက်တာပါ။
“မြန်မာအစိုးရနဲ့ မြောက်ကိုရီးယားနိုင်ငံ နှစ်နိုင်ငံ အဆက်အဆံ ရှိတာတွေနဲ့ ပတ်သက်ပြီးတော့ အမေရိကန် ပြည်ထောင်စုအနေနဲ့ စိုးရိမ်ပူပန်တဲ့အကြောင်း အကြိမ်ကြိမ် ပြောခဲ့ပြီးပါပြီ။ ဒီနှစ်နိုင်ငံဟာ နျူကလီးယားကိစ္စမှာ ပူးပေါင်း ဆောင်ရွက်နေကြသလားဆိုတာ စိုးရိမ်မိတာပါ။ ဒါကြောင့်လည်း မြောက်ကိုရီးယားနိုင်ငံနဲ့ ပတ်သက်ပြီးတော့ ကုလသမဂ္ဂ လုံခြုံရေးကောင်စီရဲ့ ဆုံးဖြတ်ချက် ၁၈၇၄ အတိုင်း နိုင်ငံတကာ အသိုင်းအ၀န်းက လိုက်နာကြဖို့၊ မြန်မာနိုင်ငံ ကိုယ်တိုင်လည်း ဒီဆုံးဖြတ်ချက်ကို လိုက်နာဆောင်ရွက်ဖို့ ကျနော်တို့ ဆွေးနွေးခဲ့တာတွေ ရှိပါတယ်။ မြန်မာနိုင်ငံနဲ့ကတော့ အပြန်အလှန် ဆွေးနွေး ဆောင်ရွက်နိုင်ဖို့ ကျနော်တို့ ဆက်လုပ်သွားမှာပါ။”
အမေရိကန် နိုင်ငံခြားရေးဌာနက ပြောခွင့်ရပုဂ္ဂိုလ် ပီဂျေ ခရော်လီ ပြောသွားတာ ဖြစ်ပါတယ်။
ပြီးခဲ့တဲ့နှစ်ထဲက မြောက်ကိုရီးယားက လက်နက်ရောင်းချမှုတွေကို တားမြစ်တဲ့ ကုလသမဂ္ဂ လုံခြုံရေးကောင်စီ ဆုံးဖြတ်ချက်ကို မြန်မာစစ်အစိုးရက ထောက်ခံခဲ့တာဟာ တိုးတက်မှုတခု ဖြစ်ပေမဲ့ ဒီအတိုင်း ဆက်လက် ရပ်တည်သွားဖို့ နှစ်ဘက်အကြား ဆွေးနွေးပွဲတွေမှာ ဆက်ပြီး တိုက်တွန်းသွားမှာ ဖြစ်တယ်လို့လည်း အမေရိကန် နိုင်ငံခြားရေးဌာန ပြောခွင့်ရသူက ပြောဆိုခဲ့တာပါ။
မြန်မာစစ်အစိုးရအပေါ် ပိတ်ဆို့ဒဏ်ခတ် အရေးယူမှုတွေ ချမှတ်ထားတဲ့ အမေရိကန် ပြည်ထောင်စုက ထိတွေ့ ဆက်ဆံမှုတွေ လုပ်သွားမယ့် မူဝါဒတွေကိုပါ ကျင့်သုံးသွားဖို့ ကြေညာပြီးနောက်ပိုင်း မြန်မာနိုင်ငံကို သွားရောက်ခဲ့တာ အပါအ၀င် ၂ နိုင်ငံကြား ဆက်ဆံမှုတွေ ၄ ကြိမ် ရှိခဲ့သလို မကြာခင် နောက်ထပ် တွေ့ဆုံဖို့ ရှိနေတယ်ဆိုတဲ့ သတင်းတွေလည်း ထွက်ပေါ်နေတာပါ။
ဒါပေမဲ့လည်း အမေရိကန် နိုင်ငံခြားရေးဌာန ပြောခွင့်ရသူကတော့ နောက်တကြိမ် တွေ့ဆုံမှုတွေနဲ့ ပတ်သက်လို့ အတိအကျ မပြောနိုင်သေးဘူးလို့ မနေ့တုန်းက သတင်းစာရှင်းလင်းပွဲမှာ ပြောဆိုခဲ့တာ ဖြစ်ပါတယ်။

အမျိုးသမီးများအပေါ် အကြမ်းဖက်မှု ကြားနာစစ်ဆေး

05 March 2010
မြန်မာနိုင်ငံတွင်းက အမျိုးသမီးနဲ့ မိန်းကလေးတွေအပေါ် အစိုးရစစ်သားတွေ၊ အာဏာပိုင်တွေ ကျူးလွန်တဲ့ ပြစ်မှုတွေနဲ့ ပတ်သက်လို့ထွက်ဆို ကြားနာပွဲတခုကို ကုလသမဂ္ဂဌာနချုပ်ရှိရာ နယူးယောက်မြို့မှာ မတ်လ (၂) ရက်နေ့က ပြုလုပ်ခဲ့ပါတယ်။ ဒီ ကျူးလွန်မှုတွေဟာ လူသားမျိုးနွယ်စုတွေအပေါ် ကျုးလွန်တဲ့ရာဇ၀တ်မှု ဖြစ်တယ်လို့ သရုပ်ပြ တရားရုံးကြားနာပွဲအပြီးမှာ နိုင်ငံတကာ ဥပဒေပညာရှင်တွေက သုံးသပ်ခဲ့ကြပါတယ်။ ဒီကြားနာပွဲကို ကိုယ်တိုင်သတင်းသွားယူခဲ့တဲ့ မခင်ဖြူထွေးက အပြည့်အစုံကို ဆက်ပြီး ပြောပြပေးပါမယ်။
မြန်မာအမျိုးသမီးများ အရေး လုံခြုံရေးကောင်စီမှာ တင်မည်

05 March 2010


နိုဘယ်လ်ငြိမ်းချမ်းရေးဆုရှင် ဂျိုဒီဝီလျံ၊ ရှီရင်အယ်လ်ဘာနီနှင့် အမျိုးသမီးများ အဖွဲ့ချုပ်(မြန်မာနိုင်ငံ) မှ အမျိုးသမီး ကိုယ်စားလှယ် မသင်းသင်းအောင် တို့ အတွင်းရေးမှူးချုပ် ဘန်ကီမွန်းနှင့် တွေ့ဆုံခဲ့စဉ် (မတ်လ ၄၊ ၂၀၁၀) ဓါတ်ပုံ - အမျိူးသမီး နိုဘယ်လ်ငြိမ်းချမ်းရေး ဆုရှင်များအဖွဲ့ (NWI)
အမျိုးသမီးများ အဖွဲ့ချုပ် (မြန်မာနိုင်ငံ) က အမျိုးသမီး ကိုယ်စားလှယ်တွေနဲ့ နိုဘယ်လ်ငြိမ်းချမ်းရေးဆုရှင် အမျိုးသမီး ၂ ဦးတို့ဟာ ကုလသမဂ္ဂ အတွင်းရေးမှူးချုပ် ဘန်ကီမွန်း (Ban Ki-moon) နဲ့ မနေ့က တွေ့ဆုံခဲ့ပြီး မြန်မာနိုင်ငံတွင်း အမျိုးသမီးတွေအပေါ် အကြမ်းဖက်ခံရတာတွေနဲ့ စပ်လျဉ်းတဲ့ အခြေအနေတွေကို ဆွေးနွေးတင်ပြခဲ့ကြပါတယ်။ ဒီအခြေအနေတွေကို ကုလသမဂ္ဂ အတွင်းရေးမှူးချုပ်က သူ့အနေနဲ့ လုံခြုံရေးကောင်စီမှာ တင်ပြပြီး ဆွေးနွေးသွားမယ်လို့ ကတိပြုပါတယ်။ ဒီအကြောင်းကို နယူးယောက်ခ်မြို့ကနေ ဆက်သွယ်မေးမြန်းထားတဲ့ မခင်ဖြူထွေးက တင်ပြပေးထားပါတယ်။
မြန်မာစစ်အစိုးရရဲ့ အမျိုးသမီးတွေ အပေါ်မှာ အကြမ်းဖက်မှုတွေနဲ့ ပတ်သက်လို့ ကုလသမဂ္ဂ အနေနဲ့ မြန်မာစစ်အစိုးရကို အရေးယူဖို့၊ မြန်မာစစ်အစိုးရကို နိုင်ငံတကာ ပြစ်မှုဆိုင်ရာ ခုံရုံးမှာ စစ်ဆေး အရေးယူလာအောင် လုံခြုံရေးကောင်စီက ဆောင်ရွက်ပေးဖို့အတွက် မနေ့တုန်းက ကုလသမဂ္ဂ အတွင်းရေးမှူးချုပ် ဘန်ကီမွန်းကို နိုဘယ်လ်ငြိမ်းချမ်းရေးဆုရှင် ၂ ဦးနဲ့အတူ မြန်မာအမျိုးသမီး ကိုယ်စားလှယ်တဦးတို့ သွားပြီး တွေ့ဆုံ တိုက်တွန်းခွင့် ရခဲ့ပါတယ်။
ဒါဟာ အမျိုးသမီးတွေ အနေနဲ့ အမျိုးသမီးအရေးနဲ့ ပတ်သက်ပြီး ဆွေးနွေးဖို့အတွက် မစ္စတာ ဘန်ကီမွန်းနဲ့ တွေ့ဆုံခွင့်ရတာ ပထမဦးဆုံး အကြိမ်လည်း ဖြစ်ပါတယ်။ မိနစ် ၅၀ လောက် တွေ့ဆုံခွင့် ရခဲ့တဲ့ ဒီဆွေးနွေးပွဲ အတွင်းမှာ မြန်မာအမျိုးသမီးတွေ အပေါ်မှာ အကြမ်းဖက်မှုတွေနဲ့ ပတ်သက်ပြီးတော့ လုံခြုံရေးကောင်စီက ထိထိရောက်ရောက် အရေးယူ ဆောင်ရွက်ပေးဖို့အတွက် အတွင်းရေးမှူးချုပ် ဘန်ကီမွန်းကို တင်ပြခွင့် ရခဲ့တယ်လို့ အမျိုးသမီးများ အဖွဲ့ချုပ် (မြန်မာနိုင်ငံ) က သဘာပတိ အဖွဲ့ဝင် မသင်းသင်းအောင်က အခုလို ရှင်းပြပါတယ်။
“အဲဒီမှာ ကျမတို့ တင်ပြတာတွေနဲ့ ပတ်သက်ပြီးတော့ ဘန်ကီမွန်းက ပြန်ပြီး တုံ့ပြန်တာတွေ ရှိပါတယ်။ အခုလိုမျိုး ဖတ်ရတယ်၊ ဒီအကြောင်းတွေ ကြားရတဲ့အခါ သူကိုယ်တိုင်လည်း အရမ်းကို ဒေါသထွက်မိတယ်ပေါ့။ အခုလိုမျိုး စစ်တပ်က ပြုကျင့်တဲ့ တိုင်းရင်းသူ အမျိုးသမီးလေးတွေ ကိစ္စကို သူကြားတဲ့အခါ ဒါ တရားမျှတမှုကို ရဖို့အတွက် အရမ်း အရေးကြီးတယ်ဆိုတာ သူ လုံးဝ သံသယ မရှိဘူးတဲ့။
“တရားသူကြီးတွေက အဓိက တင်ပြခဲ့တဲ့ လုံခြုံရေးကောင်စီ အနေနဲ့ မြန်မာကိစ္စကို ICC လို့ခေါ်တဲ့ အပြည်ပြည်ဆိုင်ရာ ရာဇ၀တ်မှု ခုံရုံးကို လွှဲပြောင်းပေးဖို့ တိုက်တွန်းတဲ့ ကိစ္စကိုတော့ ကုလသမဂ္ဂ လုံခြုံရေးကောင်စီနဲ့ သူ အဲဒီကိစ္စကို ဆွေးနွေးပါ့မယ်တဲ့။ မစ္စတာ ဘန်ကီမွန်းက အဲဒီလို ပြောခဲ့ပါတယ်။”
မသင်းသင်းအောင်တို့ အနေနဲ့ အခုလိုမျိုး အမျိုးသမီးတွေ အပေါ်မှာ အကြမ်းဖက်မှုတွေနဲ့ ပတ်သက်ပြီးတော့ အတွင်းရေးမှူးချုပ် ဘန်ကီမွန်းကို ဆွေးနွေးခွင့် ရခဲ့တယ်ဆိုတော့ ဒီအပေါ်မှာ အမျိုးသမီးတွေကို အကြမ်းဖက်မှုတွေ ဖြစ်နေတာနဲ့ ပတ်သက်ပြီးတော့ အတွင်းရေးမှူးချုပ် ဘန်ကီမွန်းကရော ဘယ်လိုများ ပြန်ပြီး တုံ့ပြန်ခဲ့ပါသလဲ။
“အမျိုးသမီးတွေကို လိင်ပိုင်းဆိုင်ရာ အပါအ၀င် အကြမ်းဖက်မှုတွေ မျိုးစုံကို ပပျောက်ဖို့အတွက် သူကိုယ်တိုင် အစီရင်ခံစာတခု ရေးထားတာ ရှိပါတယ်။ ပြီးခဲ့တဲ့နှစ်တုန်းကဆိုရင် အထွေထွေ အတွင်းရေးမှူးချုပ်ရဲ့ လုံခြုံရေးကောင်စီ ဆုံးဖြတ်ချက်အမှတ် ၁၈၂၀ နဲ့ ပတ်သက်တဲ့ ကိစ္စတွေနဲ့ ပတ်သက်ပြီး နိုင်ငံတော်တော်များများမှာ အဲဒီကိစ္စတွေ ဖြစ်နေတယ်ဆိုတာ သူက အစီရင်ခံစာ ရေးတယ်။
“အဲဒီအစီရင်ခံစာကို သူက လုံခြုံရေးကောင်စီကို တင်တယ်။ အမျိုးသမီးတွေကို လိင်ပိုင်းဆိုင်ရာ စော်ကားတဲ့ ကိစ္စတွေက ဘယ်ဒေသတွေမှာ တကယ့်ကို ဆိုးဆိုးဝါးဝါး ဖြစ်နေသလဲ၊ အဲဒီကိစ္စတွေက တကယ်ပဲ ရပ်တန်းက ရပ်ဖို့အတွက် တာဝန်ယူဖို့လိုတယ်၊ အစိုးရတွေက လုပ်ရမယ် ဆိုတဲ့ဟာတွေ ပါတယ်။ အဲဒီထဲမှာ မြန်မာနိုင်ငံရဲ့ အခြေအနေကို သူ ထည့်ရေးထားတာ ရှိတယ်။ မြန်မာနိုင်ငံမှာလည်း တိုင်းရင်းသူတွေ အဲဒီလို ပြုကျင့်ခံရတယ်၊ တနိုင်ငံလုံး အတိုင်းအတာနဲ့ တကယ့်ကို ကျယ်ကျယ်ပြန့်ပြန့် ဖြစ်ပွားနေတယ်ဆိုတဲ့ ဟာတွေကို ရပ်တန်းက ရပ်ဖို့အတွက် ဆောင်ရွက်ဖို့လိုတယ် ဆိုတာကို အဲဒီထဲမှာ သူထည့်ရေးထားတယ်။ အဲဒါ လုံခြုံရေးကောင်စီကို သူ Report ပို့ခဲ့တုန်းက။
“အဲဒါကို ကျမတို့က ထောက်ပြတယ်။ အဲဒါကြောင့် လုံခြုံရေးကောင်စီ အနေနဲ့ သူတို့ကိုယ်တိုင် ချမှတ်ထားတဲ့ ဆုံးဖြတ်ချက် ၁၈၂၀ ကို ချိုးဖောက်နေတဲ့ အခြေအနေတွေက မြန်မာနိုင်ငံမှာ ဖြစ်နေတယ်။ ဒါကြောင့် လုံခြုံရေးကောင်စီ အနေနဲ့ အရေးယူဆောင်ရွက်မှုတွေ လုပ်ဖို့ အရေးတကြီး လိုနေတယ်ဆိုတာ ကျမတို့ ထောက်ပြခဲ့ပါတယ်။”
ဒီနှစ်အတွင်း မြန်မာနိုင်ငံမှာ ရွေးကောက်ပွဲလုပ်ဖို့ မြန်မာစစ်အစိုးရက ပြောဆိုထားပေမဲ့လည်း အခုချိန်ထိ မြန်မာနိုင်ငံမှာ နိုင်ငံရေးအရ တိုးတက်မှု တစုံတရာ မတွေ့ရသေးတဲ့အတွက် သူ့အနေနဲ့ စိုးရိမ်တဲ့အကြောင်းကိုလည်း အတွင်းရေးမှူးချုပ် ဘန်ကီမွန်းက ပြောခဲ့တယ်လို့ မသင်းသင်းအောင်က ပြောပြပါတယ်။
တချိန်တည်းမှာပဲ မကြာခင်ကမှ မြန်မာနိုင်ငံက ပြန်ရောက်လာတဲ့ လူ့အခွင့်အရေး အထူးကိုယ်စားလှယ် မစ္စတာ ကင်တားနား (Mr. Quintana) ရဲ့ မြန်မာနိုင်ငံဆိုင်ရာ ခရီးစဉ် အစီရင်ခံစာကိုလည်း သူ့အနေနဲ့ စောင့်မျှော်နေတယ် ဆိုတဲ့အကြောင်းနဲ့ ဒီအစီရင်ခံစာ ထွက်လာတဲ့အခါ Friends of Burma ဆိုတဲ့ မြန်မာ့မိတ်ဆွေများအဖွဲ့ရဲ့ အစည်းအဝေး ခေါ်ယူပြီး မြန်မာနိုင်ငံနဲ့ ပတ်သက်ပြီး ဆွေးနွေးသွားဖို့ ရှိတယ်လို့လည်း အတွင်းရေးမှူးချုပ် ဘန်ကီမွန်းက ပြောခဲ့ပါတယ်။
မြောက်ကိုရီးယား၊ မြန်မာ ဆက်ဆံရေး ဒေသလုံခြုံရေး ထိခိုက်နိုင်

05 March 2010
မြန်မာနဲ့ မြောက်ကိုရီးယား နိုင်ငံတို့အကြား စစ်ရေး ဆက်ဆံရေးတွေ ပိုတိုးလာနေတဲ့အပေါ် စိုးရိမ်တဲ့အကြောင်း အမေရိကန် ပြည်ထောင်စုဘက်က ပြောဆိုတဲ့အသံတွေ ဒီရက်ပိုင်းအတွင်း ပြန်ကြားလာရပါတယ်။ အထူးသဖြင့်တော့ မြန်မာစစ်အစိုးရဟာ မြောက်ကိုရီးယားဆီကနေ နျူကလီးယားလက်နက် ထုတ်လုပ်တဲ့ နည်းပညာရဖို့ ကြိုးစားနေတယ်ဆိုတဲ့ သံသယတွေ ပိုပိုပြီး ကြီးထွားလာနေတာကြောင့်ဖြစ်ပါတယ်။
၂၄ နှစ်လောက် သံတမန် အဆက်အသွယ် ဖြတ်တောက်ထားခဲ့ပြီးမှ မြောက်ကိုရီးယားနဲ့ သံတမန် အဆက်အသွယ် ပြန်ထူထောင်ခဲ့တာဟာ စစ်လက်နက်ပစ္စည်း ကိစ္စက အဓိကပဲလို့ လေ့လာသူတွေက သုံးသပ်ကြပါတယ်။ ဒါပေမဲ့လည်း နျူကလီးယားလက်နက် ပိုင်ဆိုင်ဖို့ထိ ရည်ရွယ်ချက်နဲ့ မြောက်ကိုရီးယားနဲ့ သံတမန် ပြန်ဆက်ဆံတယ် ဆိုရင်တော့ ရေရှည်မှာ မြန်မာနိုင်ငံအတွက် ကောင်းကျိုးဖြစ်စေမှာ မဟုတ်ဘူးလို့ ဆိုကြပါတယ်။ အပြည့်အစုံကို ကိုကျော်ကျော်သိန်းက တင်ပြပေးထားပါတယ်။
မြောက်ကိုရီးယားနိုင်ငံက သူလျှိုတွေဟာ ၁၉၈၃ ခုနှစ်တုန်းက မြန်မာနိုင်ငံထဲကို တိတ်တဆိတ်ဝင်ရောက်ပြီး အဲဒီအချိန်က မြန်မာနိုင်ငံမှာ အလည်အပတ် ရောက်နေတဲ့ တောင်ကိုရီးယား သမ္မတ ချန်ဒူးဝှမ် (Chun Doo Hwan) နဲ့ အဖွဲ့ကို အာဇာနည်ကုန်းမှာ ဗုံးခွဲ လုပ်ကြံခဲ့ကြပါတယ်။ အဲဒီဖြစ်ရပ်မှာ တောင်ကိုရီးယား သမ္မတဟောင်း ချန်ဒူးဝှမ် ဘာမှမဖြစ်ခဲ့ပေမဲ့ မြန်မာနဲ့ တောင်ကိုရီးယား နှစ်နိုင်ငံက တာဝန်ရှိသူ ၁၇ ယောက် သေဆုံးခဲ့ရပါတယ်။ အဲဒီဖြစ်ရပ် ဖြစ်ပြီးတဲ့နောက်မှာ မြန်မာက မြောက်ကိုရီးယားကို သံတမန် အဆက်အသွယ် ဖြတ်တောက်ပစ်လိုက်ပါတယ်။ ဗုံးခွဲတဲ့လုပ်ရပ်နဲ့ ပတ်သက်လို့ မြောက်ကိုရီးယားဘက်ကနေ မြန်မာနိုင်ငံကို လူသိရှင်ကြား တောင်းပန်တာမျိုး ခုချိန်ထိ မကြားရပါဘူး။
ဒါ့အပြင် မြောက်ကိုရီးယား အစိုးရဟာ သူ့ရဲ့ နျူကလီးယားလက်နက် ထုတ်လုပ်မယ့် အကြံအစည်ကြောင့် နိုင်ငံတကာ မျက်နှာစာမှာ ဖိအားအမျိုးမျိုးနဲ့ ရင်ဆိုင်နေရတာပါ။ အဲဒီအချိန်မှာပဲ နှစ်နိုင်ငံ သံတမန် ဆက်ဆံရေးတွေ ပြန်ထူထောင်ဖို့ မြန်မာနဲ့ မြောက်ကိုရီးယား နိုင်ငံခြားရေး အဆင့်မြင့် တာဝန်ရှိသူတွေ ၂၀၀၇ ခုနှစ်၊ ဧပြီလမှာ လက်မှတ်ရေးထိုး သဘောတူခဲ့ကြပါတယ်။ အဲဒီအချိန်ကနေစပြီး မြန်မာနဲ့ မြောက်ကိုရီးယား နိုင်ငံအကြား ဆက်ဆံရေးကို နိုင်ငံတကာက အထူး စောင့်ကြည့်နေခဲ့ကြပါတယ်။
ဒီလို စောင့်ကြည့်နေတဲ့ ကြားထဲကမှ မြန်မာ့တပ်မတော် စစ်ဦးစီးအရာရှိချုပ် (ကြည်း)၊ တပ်မတော် ညှိနှိုင်းကွပ်ကဲရေးမှူး (ကြည်း၊ ရေ၊ လေ) ဗိုလ်ချုပ်ကြီး သူရရွှေမန်း ဦးဆောင်တဲ့ တပ်မတော် အဆင့်မြင့် ကိုယ်စားလှယ်အဖွဲ့ဟာ ၂၀၀၈ ခုနှစ် နိုဝင်ဘာလ ၂၁ ရက်နေ့ကနေ ဒီဇင်ဘာလ ၂ ရက်နေ့ထိ မြောက်ကိုရီးယားနိုင်ငံကို လျှို့ဝှက်သွားရောက်ခဲ့တဲ့ သတင်းတွေ ပေါက်ကြားခဲ့ပါတယ်။ တခါ မြန်မာစစ်တပ်အတွက် စစ်လက်နက်ပစ္စည်း ထုတ်လုပ်ရေး၊ ၀ယ်ယူစုဆောင်းရေးမှာ အဓိက တာဝန်ရှိသူဖြစ်တဲ့ တပ်မတော် စစ်လက်နက်ပစ္စည်း ထုတ်လုပ်ရေးမှူးချုပ်၊ မြန်မာ့စီးပွားရေး ဦးပိုင်လီမိတက် ဥက္ကဋ္ဌ ဒုတိယဗိုလ်ချုပ်ကြီး တင်အေးဟာ ရန်ကုန်မြို့ မြောက်ကိုရီးယားသံရုံးမှာ ပြီးခဲ့တဲ့လက ကျင်းပခဲ့တဲ့ မြောက်ကိုရီးယား ခေါင်းဆောင် ကင်မ်ဂျုံအီလ် (Kim Jong-Il) ရဲ့ မွေးနေ့ပွဲကို သွားတက်ခဲ့ပါတယ်။
နိုင်ငံတကာမှာ ဖိအားအမျိုးမျိုးနဲ့ ရင်ဆိုင်နေရတဲ့ မြောက်ကိုရီးယားနဲ့ သံတမန် အဆက်အသွယ် ပြန်ထူထောင်ဖို့ မြန်မာအစိုးရက ဆုံးဖြတ်ခဲ့တာဟာ စစ်လက်နက်ပစ္စည်း ကိစ္စက အဓိကဖြစ်တယ်လို့ လက်ရှိ ဗြိတိန်နိုင်ငံမှာ နေထိုင်နေတဲ့ သံတမန် ၀န်ထမ်းဟောင်း တဦးဖြစ်သူ ဦးခင်မောင်ကြည်က ပြောပါတယ်။
“အဓိကက မြန်မာအစိုးရကလည်း အပယ်ခံဖြစ်နေတယ်။ သူတို့ကို လက်နက်ရောင်းတဲ့သူတွေက မရောင်းနိုင်တော့ဘူး၊ တရုတ်ကအစ။ သူတို့က လက်နက်ဝယ်တာလည်း အကြွေးတွေနဲ့ ၀ယ်တယ်။ ပိုက်ဆံတွေလည်း သိပ်မပေးနိုင်ဘူး။ အဲဒီမှာ မြောက်ကိုရီးယားဘက်က သွားပြီးတော့ လက်နက်တွေကို အချောင်ရတဲ့နည်းနဲ့ သွားဝယ်တယ်။ လက်နက်လိုချင်တဲ့ ကိစ္စနဲ့ပဲ ပြန်ဆက်သွယ်တယ်လို့ ကျနော်တို့က သုံးသပ်တယ်။ အဓိက မြောက်ကိုရီးယားနဲ့ ဆက်ဆံတာကတော့ ထိပ်ပိုင်းက အုပ်ချုပ်နေတဲ့လူတွေ လက်နက် ၀ယ်ချင်တဲ့ကိစ္စပေါ့ဗျာ။ နောက်ဆုံးမှာတော့ အဏုမြူလိုချင်တဲ့ ကိစ္စပေါ့။”
မြန်မာနိုင်ငံနဲ့ မြောက်ကိုရီးယားအကြား စစ်ရေးဆိုင်ရာ ဆက်နွယ်မှုတွေ ရှိနေတဲ့အပေါ် စိုးရိမ်မကင်း ဖြစ်ရတဲ့အကြောင်း ဗုဒ္ဓဟူးနေ့က ကျင်းပတဲ့ သတင်းစာ ရှင်းလင်းပွဲမှာ အမေရိကန် နိုင်ငံခြားရေးဌာန ပြောရေးဆိုခွင့်ရှိသူက ပြောသွားပါတယ်။
မြောက်ကိုရီးယားဟာ သူ့ရဲ့ နျူကလီးယား အစီအစဉ်ကြောင့် ဖိအားတွေနဲ့ ရင်ဆိုင်နေရပေမဲ့ နိုင်ငံတကာ မျက်နှာစာမှာ ခြိမ်းခြောက် အကျပ်ကိုင်တာတွေ၊ အပေးအယူ၊ အလျှော့အတင်းတွေကို အသုံးပြုပြီး ကစားပွဲတခုသဖွယ် တခြားနိုင်ငံတွေနဲ့ ကစားနေတဲ့ နိုင်ငံတခုပါ။ မြန်မာစစ်ကောင်စီ ခေါင်းဆောင် ဗိုလ်ချုပ်မှူးကြီး သန်းရွှေဟာလည်း အထူးသဖြင့် အမေရိကန်ကို အန်တုပြီး ဒေသတွင်းနဲ့ နိုင်ငံတကာမှာ ကစားချင်တဲ့ သဘောထား ရှိတယ်လို့ ပြောသူက အမေရိကန်နိုင်ငံဆိုင်ရာ မြန်မာသံရုံးရဲ့ ယာယီ တာဝန်ခံဟောင်းနဲ့ ထောက်လှမ်းရေး အရာရှိဟောင်း တဦးဖြစ်သူ ဗိုလ်မှူးဟောင်း အောင်လင်းထွဋ်ပါ။
“မြောက်ကိုရီးယားလို နေတော့ ဘာဖြစ်လဲကွာ၊ မြောက်ကိုရီးယားလို ဖြစ်လာရင် အမေရိကန်ကို ဘာဂရုစိုက်စရာ ရှိလဲဆိုတဲ့ ဒါ ဗိုလ်ချုပ်ကြီးသန်းရွှေ တက်ခါစ ၉၂ ခုနှစ် အလွန်မှာ ပြောထားတဲ့စကားပါ။ နောက်တခုက ကျူးဘား၊ ကျူးဘားတောင်မှ အမေရိကားနားမှာ နေနေသေးတာ။ အမေရိကန်ကို ဂရုစိုက်စရာ လိုလားဆိုတဲ့ ဒီအတွေးအခေါ်မျိုး သူ့မှာရှိပါတယ်။ မြောက်ကိုရီးယားလို ဖြစ်လာရင် Regional မှာ Threat လုပ်မှာပါ။ အဲဒီလိုလုပ်ရင် အဓိကနိုင်ငံကတော့ ယိုးဒယား ဖြစ်ပါလိမ့်မယ်။ ဗိုလ်ချုပ်ကြီးသန်းရွှေ အနေနဲ့ကလည်း တရုတ်ကို ရုရှားရယ်၊ နျူကလီးယားရယ်၊ မြောက်ကိုရီးယားရယ်နဲ့ ကစားနေတာပါပဲ။”
ကိုယ့်နိုင်ငံထဲဝင်ပြီး ဧည့်သည် ပြည်ပခေါင်းဆောင် တယောက်ကို ဗုံးခွဲလုပ်ကြံတဲ့ကိစ္စ ဘာမှ ဖြေရှင်းချက် မပေးခဲ့တဲ့ နိုင်ငံတခု၊ ကိုယ်တိုင်က နျူကလီးယားလက်နက် ထုတ်လုပ်ဖို့ ကြံစည်တာကြောင့် ကမ္ဘာ့အလယ်မှာ မျက်နှာပန်းမလှတဲ့ နိုင်ငံတခုနဲ့ ဆက်ဆံပြီး နျူကလီးယားလက်နက် ထုတ်တဲ့ နည်းပညာကို ရယူပိုင်ဆိုင်ဖို့ မြန်မာစစ်အစိုးရဟာ တကယ်ပဲ ကြိုးစားနေတယ် ဆိုရင်တော့ နိုင်ငံတကာကနေ ဒီ့ထက် ပိုပြင်းထန်တဲ့ တုံ့ပြန်မှုတွေနဲ့ ရင်ဆိုင်ရမှာ သေချာတယ်လို့ လေ့လာသူတွေက သုံးသပ်ပါတယ်။ ဒီအချက်ကို ဦးခင်မောင်ကြည်ကလည်း သဘောတူပါတယ်။
“မြောက်ကိုရီးယားနဲ့ ဆက်ဆံခြင်းအားဖြင့် ပတ်ဝန်းကျင် နိုင်ငံတွေကလည်း မလိုလားဘူးဗျ။ အာဆီယံ နိုင်ငံတွေကလည်း မလိုလားဘူး။ တရုတ်၊ အိန္ဒိယကစပြီး မြောက်ကိုရီးယားရဲ့ နျူကလီးယားစွမ်းအင်ကို တကမ္ဘာလုံးနဲ့ ဆန့်ကျင်ပြီး သူတို့ နျူကလီးယား လုပ်နေတဲ့ အကြံဉာဏ်နဲ့ ပတ်သက်ပြီးတော့ ဘယ်သူမှ မလိုလားတဲ့အချိန်မှာ မြန်မာက ဆက်ဆံတယ်ဆိုတော့၊ မြန်မာကလည်း မြောက်ကိုရီးယားနဲ့ ဆက်ဆံတယ်ဆိုတာ တကယ့် ငပွကြီး ဖြစ်ပြီးတော့ ဘေးပတ်ဝန်းကျင်က သူတို့ကို တနေ့ကျရင်တော့ ၀ိုင်းပယ်ခံလာရမယ့် အခြေအနေ ရှိလာမှာပါ။ တကယ်တော့ ကျနော်တို့မြင်တာ အင်မတန် ကံဆိုးတာပေါ့ဗျာ။ မဆက်ဆံသင့်တဲ့ လူနဲ့ သွားဆက်ဆံတာ။”
မြောက်ကိုရီးယားပေါ်မှာ ချမှတ်ထားတဲ့ ကုလသမဂ္ဂ လုံခြုံရေးကောင်စီရဲ့ ဆုံးဖြတ်ချက်အမှတ် ၁၈၇၄ ကို လေးစားလိုက်နာဖို့ အမေရိကန် အပါအ၀င် တခြား နိုင်ငံတကာ အစိုးရတွေက မြန်မာနိုင်ငံကို တိုက်တွန်းထားပါတယ်။ မြန်မာအစိုးရကလည်း လေးစား လိုက်နာပါမယ်လို့ ကတိပေးထားပါတယ်။
ဒါပေမဲ့လည်း ကမ္ဘာဖျက် နျူကလီးယားလက်နက်ကို ပိုင်ဆိုင်ဖို့ မြန်မာနိုင်ငံက ကြိုးစားနေသလားဆိုတဲ့ သံသယနဲ့ စိုးရိမ်စိတ်တွေကတော့ ပျောက်မသွားဘဲ တိုးလာနေဆဲ ဖြစ်ပါတယ်။
မြန်မာပြည် ဒီမိုကရေစီ ရရှိရေးကိစ္စ အရှေ့တီမောသမ္မတပြော

06 March 2010
မြန်မာပြည်ဒီမိုကရေစီရရှိရေး ကမ္ဘာလုံးဆိုင်ရာ တောင်းဆိုလှုပ်ရှားမှုတရပ်ကို အရှေ့တီမောသမ္မတ Jose Ramos-Horta က ဗြိတိန်နိုင်ငံ Bradford မြို့က Bradford တက္ကသိုလ်မှာပြုလုပ်တဲ့ PeaceJam ငြိမ်းချမ်းရေး ညီလာခံနဲ့ မနေ့က စတင်လိုက်ပါတယ်။ ဒီလှုပ်ရှားမှုနဲ့ ပတ်သက်ပြီးတော့ သမ္မတ Jose Ramos-Horta ကို ကျမတို့ ဗွီအိုအေက ကိုဇော်ဝင်းလှိုင် က ဆက်သွယ် မေးမြန်းထားပါတယ်။
သမ္မတကြီးခင်ဗျား၊ ဒီတောင်းဆိုလှုပ်ရှားမှုဟာ ဘယ်လို လှုပ်ရှားမှုမျိုးဖြစ်တယ်ဆိုတာ အရင် ပြောပြပေးပါခင်ဗျ။ -
"ဒီတောင်းဆိုလှုပ်ရှားမှုဟာ မြန်မာပြည် ဒီမိုကရေစီရရှိရေးတောင်းဆိုတဲ့ လှုပ်ရှားမှုဖြစ်ပါတယ်။ မြန်မာပြည် ဒီမိုကရေစီ ရရှိရေးအတွက် ကျနော့်အနေနဲ့ ပါဝင်ဆောင်ရွက်နေတာ ၁၀ စုနှစ် တစုကျော်ခဲ့ပါပြီ။ မြန်မာပြည် ဒီမိုကရေစီ ရရှိရေး အတွက် ကမ္ဘာတ၀ှမ်းမှာ တောင်းဆိုလှုပ်ရှားနေကြသူတွေ၊ ထောက်ခံအားပေးကြသူတွေကို ထောက်ခံအားပေးတဲ့အနေနဲ့ ဒီလှုပ်ရှားမှုကို ကျနော် စလိုက်တာပါ။ နောက်ပြီးတော့ မြန်မာပြည်ဒီမိုကရေစီရရှိရေး လှုပ်ရှားမှု ဒီ့ထက်ပိုပြီး ကျယ်ပြန့် လာအောင် တခြား ဘယ်လိုနည်းလမ်းတွေ ရှိနိုင်သေးသလဲ ဆိုတာကိုလည်း ရှာဖွေ လုပ်ဆောင်သွားကြဖို့ ဖြစ်ပါတယ်။"
ဒီလှုပ်ရှားမှုကြီး အောင်မြင်အောင် ဘယ်လို နည်းလမ်းတွေကို အသုံးချသွားမလဲ ဆိုတာ ပြောပြပါဦးခင်ဗျ။ -
"ကမ္ဘာတ၀ှမ်းမှာရှိတဲ့ အများပြည်သူတွေပါဝင်တဲ့ လှုပ်ရှားမှုတွေ၊ လူမှုအဖွဲ့အစည်းတွေကတဆင့် လုပ်ဆောင်သွားဖို့ ရှိပါတယ်။ အရင့် အရင်က ပြုလုပ်ခဲ့ကြတဲ့ လှုပ်ရှားမှုတွေလိုပါပဲ၊ ဒေါ်အောင်ဆန်းစုကြည်နဲ့တကွ နိုင်ငံရေးကျဉ်းသားတွေ အားလုံး လွတ်ပေးဖို့တွေအတွက် ကမ္ဘာတ၀ှမ်းက အစိုးရတွေအနေနဲ့ မြန်မာ့အရေးကို လက်ရှိ သူတို့ လုပ်ဆောင်နေကြတာ ထက် နှစ်ဆ ပိုလုပ်ကြဖို့အတွက် ထောင်ပေါင်းများစွာသော ပြည်သူတွေက လက်မှတ်ထိုး ထောက်ခံ တောင်းဆိုတဲ့ နည်း တွေနဲ့ လုပ်ဆောင်သွားမှာ ဖြစ်ပါတယ်။"
သမ္မတကြီးအနေနဲ့ တခြား နိုဘဲလ်ငြိမ်းချမ်းရေး ဆုရှင်တွေဖြစ်ကြတဲ့ အမေရိကန်သမ္မတ ဘာရတ်ခ် အိုဘားမားတို့၊ မြန်မာ့အရေးမှာ တက်တက်ကြွကြွ ပါဝင်လုပ်ဆောင်နေတဲ့ Jody Williams တို့လို ပုဂ္ဂိုလ်တွေနဲ့ရော ပူးပေါင်း လုပ်ဆောင်ဖို့ အစီအစဉ် ရှိပါသလားခင်ဗျ။ -
"လုပ်မှာပေါ့ဗျာ။ နိုဘဲလ်ငြိမ်းချမ်းရေးဆုရှင်တွေ အများအပြားပါဝင်တဲ့ PeaceJam ငြိမ်းချမ်းရေးအဖွဲ့က ဦးဆောင်ပြီး ဒီလှုပ်ရှားမှုကို လုပ်တာပါ၊ ကျနော်ကိုယ်တိုင်က ဦးဆောင်ပြုလုပ်တာမဟုတ်ပါဘူး၊ ကျနော်က ဒီအထဲမှာ ပါဝင်တဲ့သူ တယောက်သာ ဖြစ်ပါတယ်။ ဒီအထဲမှာ တခြား နိုဘဲလ်ငြိမ်းချမ်းရေးဆုရှင်တွေ အများကြီး ပါပါတယ်။"
ဒီလှုပ်ရှားမှုကို ဘယ်လောက်ကြာကြာ လုပ်ဆောင်သွားမှာပါလဲခင်ဗျ။ -
"မြန်မာပြည်မှာလည်း စစ်အစိုးရရဲ့ တင်းကျပ်တဲ့ စောင့်ကြည့်မှုအောက်မှာ ရွေးကောက်ပွဲ ကျင်းပဖို့ စီစဉ်နေတယ်ဆိုတော့ ဒီလှုပ်ရှားမှုဟာ အနည်းဆုံး ဒီနှစ်ကုန်ပိုင်းလောက်အထိတော့ ကြာနိုင်ပါတယ်။ ဒေါ်အောင်ဆန်းစုကြည်နဲ့ NLD ပါတီက ရွေးကောက်ပွဲမှာ ၀င်ပြိုင်ကြမလား၊ ၀င်ပြိုင်ခွင့် ရကြမလားဆိုတာလည်း ကျနော်တို့ ခုချိန်ထိ မသိသေးဘူးလေ။"
သမ္မတကြီးကိုယ်တိုင်ကလည်း အင်ဒိုနီးရှား အာဏာရှင်အစိုးရ လက်အောက်မှာ ဖိနှိပ်မှုမျိုးစုံ ခံခဲ့ရဖူးတယ်ဆိုတော့ သမ္မတကြီးအမြင်မှာ မြန်မာပြည်မှာရော တနေ့ အရှေ့တီမောနိုင်ငံလို အာဏာရှင်တွေလက်အောက်ကနေ လွတ်မြောက် လာမယ် လို့ ထင်ပါသလားခင်ဗျ။ -
"ဟုတ်ကဲ့ ကျနော်ထင်ပါတယ်။ စစ်အစိုးရအနေနဲ့ ဒေါ်အောင်ဆန်းစုကြည် အပါအ၀င် အတိုက်အခံ အင်အားစုတွေနဲ့ စကားဝိုင်းမှာ တွေ့ဆုံဆွေးနွေးတဲ့ နည်းလမ်းကလွဲပြီး တခြားထွက်ပေါက် မရှိပါဘူး။ ဒါမှလည်း မြန်မာပြည်ဟာ ဒီမိုကရေစီ လမ်းကြောင်းပေါ်ကို ရောက်နိုင်မှာပါ။ လက်ရှိအခြေအနေမှာတော့ ကမ္ဘာ့ အရက်စက် အကြမ်းကြုတ်ဆုံး အာဏာရှင် နိုင်ငံအဖြစ်နဲ့ မြန်မာပြည်ဟာ မြောက်ကိုရီးယားနဲ့ တန်းတူ ရှိနေပါတယ်။ မြန်မာပြည်ကို အချိန်အကန့်အသတ်မရှိ သူတို့အနေနဲ့ ဆက်လက် အုပ်ချုပ်မထားနိုင်ဘူးဆိုတာ စစ်တပ်ကလည်း သိနေပါတယ်။"
သမ္မတကြီးအနေနဲ့ မြန်မာပြည်အပေါ် နိုင်ငံတကာက ပိတ်ဆို့အရေးယူထားတာတွေနဲ့ ပတ်သက်လို့ ပြောဆိုဖူးတာတွေ ရှိပါတယ်။ ဒီအပေါ်မှာ ဘယ်လိုသဘောထား ရှိပါသလဲဆိုတာ ထပ်ပြီးကြားပါရစေခင်ဗျ။ -
"ပိတ်ဆို့အရေးယူမှုဟာ ဆင်းရဲသားပြည်သူတွေကို ထိခိုက်တဲ့အတွက် ကျနော့်အနေနဲ့ မလိုလားပေမဲ့ စစ်ရေးအရ ပူးပေါင်း ဆောင်ရွက်တာ၊ စစ်လက်နက်ပစ္စည်းတွေ ရောင်းချတာတွေ၊ ဘယ်နိုင်ငံကမှာ စစ်အစိုးရကို စစ်လက်နက် ပစ္စည်းတွေ မရောင်းချရဘူးဆိုတဲ့ အားလုံး တညီတညွတ်တည်း သဘောတူတဲ့ ပိတ်ဆို့မှုမျိုးကိုတော့ ကျနော် ထောက်ခံပါတယ်။"
နောက်ဆုံးအနေနဲ့ မကြာခင်ကပဲ စစ်အစိုးရ တရားရုံးကနေ ဒေါ်အောင်ဆန်းစုကြည်ရဲ့ အယူခံကို ပယ်ချလိုက်တဲ့အပေါ်မှာ သမ္မတကြီးအနေနဲ့ ဘယ်လို မြင်ပါသလဲ။ -
"ဒါဟာ လက်မခံနိုင်စရာကောင်းတဲ့ တရားလက်လွန် ဆုံးဖြတ်ချက်ပါ။ မြန်မာနိုင်ငံ တရားရုံးချုပ်အနေနဲ့ မှားယွင်းမှုကြီးတခု ကျူးလွန်လိုက်တာပါ။ ဒေါ်အောင်ဆန်းစုကြည်ရဲ့ အယူခံလွှာကို ပယ်ချလိုက်တာကို ကြည့်ခြင်းအားဖြင့် စစ်အစိုးရရဲ့ စစ်မှန်တဲ့ သဘောထားကို မြင်နိုင်သလို၊ မြန်မာနိုင်ငံ တရားစီရင်ရေးစံနစ်ဟာ လုံးဝ တရားမျှတမှု မရှိဘူးဆိုတာ ပေါ်လွင် နေပါတယ်။ တကယ်တော့ မြန်မာနိုင်ငံမှာ တရားစီရင်ရေးစနစ်ဆိုတာ မရှိပါဘူး။ အတုအယောင်သာ ဖြစ်ပါတယ်။ မြန်မာနိုင်ငံရဲ့ တရားစီရင်ရေး စံနစ်ဟာ စစ်တပ်ရဲ့ ကြိုးဆွဲခံထားရတဲ့ တရားရေးစနစ်သာ ဖြစ်ပါတယ်။"
ဗြိတိန်နိုင်ငံ Bradford တက္ကသိုလ်မှာ မနေ့ကကျင်းပခဲ့တဲ့ PeaceJam ငြိမ်းချမ်းရေးညီလာခံမှာ မြန်မာပြည် ဒီမိုကရေစီ ရရှိရေး တောင်းဆိုတဲ့ လှုပ်ရှားမှုတရပ် စတင်ခဲ့တာနဲ့ပတ်သက်လို့ ဒီလှုပ်ရှားမှုမှာ ဦးဆောင် ပါဝင်သူတဦးဖြစ်တဲ့ အရှေ့တီမော သမ္မတ Jose Ramos-Horta ကို ကိုဇော်ဝင်းလှိုင်က ဆက်သွယ် မေးမြန်းခဲ့တာဖြစ်ပါတယ်။
Peace Jam ဆိုတာကတော့ ကမ္ဘာတ၀ှမ်းမှာရှိတဲ့ လူငယ်တွေ ငြိမ်းချမ်းရေး လှုပ်ရှားမှုတွေမှာ ပါဝင်လာနိုင်အောင် နိုဘဲလ်ငြိမ်းချမ်းရေးဆုရှင်တွေနဲ့ ပေါင်းကူးပေးထားတဲ့ ငြိမ်းချမ်းရေးအဖွဲ့အစည်း တခုဖြစ်ပါတယ်။ ဒီအဖွဲ့ကို အမေရိကန် ပြည်ထောင်စု Colorado ပြည်နယ်မှာ ၁၉၉၆ ခုနှစ်က Dawn Engle နဲ့ Ivan Suvanjieff ဆိုသူတို့က စတင် တည်ထောင် ခဲ့တာပါ။ အင်္ဂလန်နိုင်ငံ Bradford တက္ကသိုလ်က PeaceJam ဌာနခွဲကတော့ ဥရောပတိုက်ရဲ့ တခုတည်းသော ဌာနခွဲ ဖြစ်ပါတယ်။
စစ်တပ်ထိုးစစ်ကြောင့် ဒုက္ခရောက်နေသူတွေကို ကနေဒါ ဆက်ကူညီသွားမည်

07 March 2010
မြန်မာနိုင်ငံတွင်း လူနည်းစုလူမျိုးစုဒေသတွေမှာ မြန်မာစစ်တပ်ရဲ့ထိုးစစ်ကြောင့် အိုးအိမ်စွန့်ခွာထွက်ပြေးပြီး ထိုင်းနယ်စပ် တလျှောက် ဒုက္ခသည်စခန်းတွေမှာ နေထိုင်နေကြရသူတွေ၊ မြန်မာနိုင်ငံတွင်းမှာပဲ တောတောင်တွေထဲမှာ လှည့်လည် ပုန်းအောင်းနေကြရသူတွေအတွက် အကူအညီတွေ တိုးမြှင့်ပြီး ဆက်ပေးသွားမယ်လို့ ကနေဒါအစိုးရက ကြေညာ လိုက်ပါ တယ်။ ဒီလို အကူအညီတွေ တိုးပြီး ဆက်ပေးသွားမယ့်အကြောင်းကို ကနေဒါနိုင်ငံမှာ မတ်လ ၆ ရက်၊ စနေနေ့က စတင် ကျင်းပတဲ့ မြန်မာ့အရေးဆွေးနွေးပွဲ ဖွင့်ပွဲနေ့မှာ ကနေဒါလွှတ်တော် ကိုယ်စားလှယ်တယောက်က ကနေဒါအစိုးရ ကိုယ်စား လာရောက် ကြေညာသွားတာပါ။ ကိုကျော်ကျော်သိန်းက ဆက်သွယ် မေးမြန်းပြီး အပြည့်အစုံကို တင်ပြထားပါတယ်။
မြန်မာနိုင်ငံနယ်စပ်ဒေသတလျှောက် လူမျိုးစုဒေသတွေမှာ အခြေအနေတွေ ဆက်ပြီး ဆိုးရွားနေတာရယ်၊ မြန်မာ စစ်တပ်က လူမျိုးစုလက်နက်ကိုင် အဖွဲ့တွေအပေါ် အရှိန်မြှင့်ပြီး ထိုးစစ်ဆင်တိုက်ခိုက်နေတဲ့ အခြေအနေတွေရယ်ကို ထောက်ပြပြီး ငါးနှစ်အတွင်း အကူအညီငွေ အမေရိကန်ဒေါ်လာ သန်းပေါင်း ၁၅ ဒဿမ ၉ သန်းအထိ ပေးသွားမယ့် အကြောင်း မတ်လ ၆ ရက် နေ့စွဲနဲ့ထုတ်ပြန်တဲ့ ကနေဒါ အပြည်ပြည်ဆိုင်ရာ ဖွံ့ဖြိုးတိုးတက်ရေးအေဂျင်စီ (CIDA) ရဲ့ ကြေညာချက်ထဲမှာ ဖော်ပြထားပါတယ်။
အခုလပိုင်းတွေအတွင်း မြန်မာနိုင်ငံ လူမျိုးစုဒေသတွေမှာ မြန်မာစစ်တပ်က ထိုးစစ်ဆင်တိုက်ခိုက်တာတွေ အရှိန်မြှင့်ပြီး လုပ်နေတယ်ဆိုတဲ့သတင်းတွေ ထွက်နေတဲ့အချိန်မှာပဲ ကနေဒါအစိုးရက အကူအညီတွေ တိုးပေးမယ်ဆိုတဲ့သတင်း ထွက်လာတာဖြစ်ပါတယ်။ အခုလို အကူအညီတွေကို တိုးပြီး ဆက်ပေးသွားဖို့ ကနေဒါအစိုးရက ဆုံးဖြတ်လိုက်တာဟာ လက်ရှိ တိုက်ပွဲသတင်းတွေနဲ့ ဒေသခံ ရွာသူရွာသားတွေ ထွက်ပြေးကြရတယ်ဆိုတဲ့ အခြေအနေတွေပေါ်မှာ မူတည် စဉ်းစားချက် အများကြီး ပါဝင်တယ်လို့ ဥရောပ-မြန်မာရုံးရဲ့ ညွှန်ကြားရေးမှူးဖြစ်ပြီး တိုင်းရင်းသားလူမျိုးများ ကောင်စီ ENC ရဲ့ အကြံပေးပုဂ္ဂိုလ်ဖြစ်သူ ဦးဟန်ရောင်ငွေက ပြောပါတယ်။
"ကနေဒါ အစိုးရက အခုလိုမျိုး နအဖ က တိုင်းရင်းသားတွေကို ၀င်တိုက်တော့ ဒုက္ခသည်တွေက ပိုများလာတယ်ဆိုတော့ သူတို့ကလည်း အဲဒါကို စိုးရိမ်တယ်။ ဒါဟာ လူထု ဒုက္ခရောက်ကုန်မယ်ဆိုပြီးတော့ သူတို့က တိုးတာ။ အဲဒီဟာလည်း ပါပါတယ်။"
CIDA အဖွဲ့ဟာ ကနေဒါနိုင်ငံ၊ နိုင်ငံတကာ ပူးပေါင်းဆောင်ရွက်ရေး ၀န်ကြီးဌာနရဲ့ ကြီးကြပ်မှုအောက်မှာရှိတဲ့ အဖွဲ့တခု ဖြစ်ပြီး အခု အကူအညီတွေကို လူသားချင်းစာနာမှုဆိုင်ရာ ကနေဒါအဖွဲ့အစည်း တခုဖြစ်တဲ့ Inter Pares Canada အဖွဲ့က တဆင့် ပေးအပ်သွားမှာ ဖြစ်ပါတယ်။
Inter Pares Canada အဖွဲ့ဟာ ထိုင်းနိုင်ငံ ဒုက္ခသည်စခန်းတွေက မြန်မာနိုင်ငံသားဒုက္ခသည်တွေကို အကူအညီပေးနေတဲ့ Thailand-Burma Border Consortium အဖွဲ့နဲ့ ဒေါက်တာစင်သီယာမောင်ရဲ့ မယ်တော်ဆေးခန်း အပါအ၀င် အဖွဲ့အစည်း အများအပြားကို ကူညီထောက်ပံ့နေတဲ့ အဖွဲ့အစည်းပါ။
ကနေဒါအစိုးရဟာ မြန်မာနိုင်ငံတွင်းအခြေအနေကို အထူးအာရုံစိုက်ပြီးတော့ အခုလို အကူအညီပေးဖို့ဆုံးဖြတ်တာ ဖြစ်တယ် လို့ ယူဆကြောင်း ကနေဒါနိုင်ငံအခြေစိုက် မြန်မာ့အရေးလှုပ်ရှားမှုအဖွဲ့ CFOB တာဝန်ရှိသူတဦးဖြစ်တဲ့ ကိုတင်မောင်ထူးက ပြောပါတယ်။
"အထူးတလည် အာရုံစိုက်ပြီးတော့ ကနေဒါအစိုးရက လုပ်ပေးတယ်လို့ ကျနော် ထင်ပါတယ်။ ဘာကြောင့်လဲဆိုတော့ လောလောဆယ် ကျနော်တို့ နိုင်ငံတိုင်းလိုလိုပေါ့။ ကနေဒါ အပါအ၀င် ငွေရေးကြေးရေး အနုတ်လက္ခဏာ ရင်ဆိုင်နေရတဲ့ အခြေအနေမှာ အစိုးရတွေက ငွေရေးကြေးရေးပိုင်းဆိုင်ရာတွေမှာ တင်းကျပ်ပြီးတော့ ကန့်သတ်မှုတွေ၊ လျှော့ချမှုတွေ လုပ်နေတဲ့အချိန်မှာ မြန်မာပြည်အတွက်ကို အထူးတလည် ထားပြီးတော့ အခုလို တိုးမြှင့်ပြီးတော့ ပေးတယ်ဆိုတာ တော်တော်လေးကို အားရစရာကောင်းတဲ့ အချက်တခုလို့ ကျနော် မြင်ပါတယ်။"
CIDA အဖွဲ့ကနေပေးအပ်မယ့် အခုအကူအညီတွေကို ဒုက္ခသည်တွေနဲ့ အိုးအိမ်ပစ် ထွက်ပြေးရသူတွေအတွက် စားရေရိက္ခာ ထောက်ပံ့မှုအစီအစဉ်၊ ကျန်းမာရေးစောင့်ရှောက်မှု အစီအစဉ်နဲ့ လူ့အခွင့်အရေးဆိုင်ရာ အစီအစဉ်တွေကနေတဆင့် ပေးအပ်သွားမှာဖြစ်ပါတယ်။ လွန်ခဲ့တဲ့ငါးနှစ်အတွင်း CIDA က အထောက်အပံ့ပြုတဲ့ ကျန်းမာရေးစောင့်ရှောက်မှုကနေ ငှက်ဖျားရောဂါ၊ အသက်ရှုလမ်းကြောင်းဆိုင်ရာရောဂါ၊ တီဘီ အဆုတ်နာရောဂါနဲ့ ဆိုးရွားတဲ့ အာဟာရမပြည့်ဝမှုတွေ ခံစားနေရတဲ့ လူနာပေါင်း တသန်းနီးပါးကို ကုသပေးခဲ့တယ်လို့ CIDA ရဲ့ ကြေညာချက်ထဲမှာ ဖော်ပြထားပါတယ်။
ကနေဒါအစိုးရက ဆက်လက်ပြီး အထောက်အပံ့ပြုသွားတာနဲ့အတူ မြန်မာနိုင်ငံက ပြဿနာတွေအတွက် နိုင်ငံရေး အဖြေ တရပ် ရရှိလာမယ်ဆိုတဲ့ မျှော်လင့်ချက်နဲ့ အခုဒုက္ခရောက်နေတဲ့ ဒေသတွေက လူတွေအတွက် လိုအပ်တဲ့ ကျွမ်းကျင်မှု အရည်အချင်းတွေ တည်ဆောက်ပေးရေးကို ဆက်လက်ပြီး အလေးအနက်ထား လုပ်ဆောင်သွားမှာ ဖြစ်တယ်လို့လည်း ဆိုထားပါတယ်။
မြန်မာစစ်အစိုးရအနေနဲ့ ကျင်းပမယ်လို့ ကြေညာထားတဲ့ ရွေးကောက်ပွဲတွေမတိုင်ခင်မှာ ထိုးစစ်ဆင်တိုက်ခိုက်တာတွေကို ရပ်ဆိုင်းထားရဖို့ ကနေဒါအစိုးရက လိုလားတဲ့အကြောင်း ဦးဟန်ရောင်ငွေ က ပြောပါတယ်။
"ကနေဒါအစိုးရအနေနဲ့ သူတို့ပြောလာတာက ဒီလိုလေ။ အခု နအဖကလည်း ရွေးကောက်ပွဲလုပ်မယ်မဟုတ်လား ဒီနှစ်မှာ။ ဆိုတော့ အဲဒီနေရာမှာ ပြောတာကလည်း ကနေဒါအနေနဲ့ လက်ခံနိုင်မယ်ဆိုရင်တော့ အရင်ဆုံး တိုက်ခိုက်နေတဲ့ကိစ္စကို ရပ်သင့်တယ်၊ အဲဒီလိုမဟုတ်ဘဲ ရွေးကောက်ပွဲလုပ်မယ်ဆိုရင် ဒါ အဓိပ္ပါယ်မရှိဘူး။ ဒါက ပထမအချက်၊ နောက်ထပ်ကတော့ ရွေးကောက်ပွဲကလည်း တိုင်းရင်းသား အပါအ၀င် တခြား နိုင်ငံရေးပါတီတွေ အပါအ၀င် လွတ်လွတ်လပ်လပ် ရွေးကောက် ခံရဖို့ သူတို့ကလည်း တိုက်တွန်းတာပေါ့။ မဟုတ်ရင်တော့ နအဖ လုပ်မယ့်ရွေးကောက်ပွဲကို ဘယ်သူမှ လက်ခံနိုင်မှာ မဟုတ်ဘူး။ ကနေဒါကလည်း လက်ခံမှာမဟုတ်ဘူးဆိုတာ သူတို့ကတော့ ပြောပါတယ်။"
မြန်မာနိုင်ငံ နယ်စပ်ဒေသတွေမှာ ကျန်းမာရေးစောင့်ရှောက်မှုလို သင့်လျော်တဲ့ အစိုးရ၀န်ဆောင်မှုတွေ ထူထောင်နိုင် ပြီးတော့ မြန်မာနိုင်ငံတွင်းမှာ အရပ်ဘက် လူမှုအဖွဲ့အစည်းတွေ လွတ်လွတ်လပ်လပ် လုပ်ဆောင်နိုင်ကြပြီဆိုရင် အခု အကူအညီပေး စီမံကိန်းကနေတဆင့် လေ့ကျင့်ပေးလိုက်တဲ့လူတွေဟာ အရပ်ဘက်နဲ့ နိုင်ငံတော်အဆင့် အဖွဲ့အစည်းတွေမှာ လုပ်ကိုင်နိုင်မယ့် လိုအပ်တဲ့ အရည်အချင်းနဲ့ ကျွမ်းကျင်မှုတွေ ရကြလိမ့်မယ်လို့ CIDA ရဲ့ ကြေညာချက်မှာဖော်ပြထားတာ တွေ့ရပါတယ်။
မြန်မာ့အရေး စိုးရိမ်မှု ဘန်ကီမွန်း စာရေးပေးပို့

09 March 2010
မြန်မာနိုင်ငံ နိုင်ငံရေး အခြေအနေနဲ့ ပတ်သက်လို့၊ အထူးသဖြင့် လာမယ့် ရွေးကောက်ပွဲနဲ့ ပတ်သက်လို့ စိုးရိမ်မှုတွေကို မြန်မာစစ်အစိုးရ အကြီးအကဲ ဗိုလ်ချုပ်မှူးကြီးသန်းရွှေထံကို ကုလသမဂ္ဂ အတွင်းရေးမှူးချုပ် ဘန်ကီမွန်း (Ban Ki-moon) က စာရေးသား ပေးပို့ခဲ့ပါတယ်။ မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည်နဲ့ နိုင်ငံရေး အကျဉ်းသားတွေ လာမယ့် ရွေးကောက်ပွဲမှာ ပါဝင်ခွင့် မရသရွေ့တော့ ရွေးကောက်ပွဲအပေါ် ယုံကြည်မှု ထိခိုက်နေမှာပဲလို့ သူက အလေးပေး ဖော်ပြခဲ့တယ်လို့ ဆိုပါတယ်။ အကြောင်းစုံကို ကိုသားညွန့်ဦးက တင်ပြပေးထားပါတယ်။
စစ်အစိုးရအနေနဲ့ မနေ့ ညနေပိုင်းကပဲ ရွေးကောက်ပွဲဥပဒေ ပြဋ္ဌာန်းလိုက်ပြီလို့ ဆိုပေမဲ့ ဒီ ရွေးကောက်ပွဲနဲ့ ပတ်သက်လို့ တရားမျှတမှု ရှိပ့ါမလား၊ ရွေးကောက်ပွဲဟာ တကယ်တမ်း လက်ခံနိုင်ချေ ရှိရဲ့လား ဆိုတာကတော့ ပြည်တွင်းရော ပြည်ပမှာပါ သံသယတွေ ရှိနေတုန်းပဲလို့ ဆိုရမှာပါ။ မြန်မာ့ဒီမိုကရေစီ အတိုက်အခံ လှုပ်ရှားသူတွေကတော့ ဒီရွေးကောက်ပွဲဟာ ၂၀၀၈ အခြေခံဥပဒေကို အခြေခံတာကြောင့် မူလ အခြေခံဥပဒေပါ ဒီမိုကရေစီနဲ့ မကိုက်ညီတာတွေကို ပြင်ဆင်ရမယ်လို့ တောင်းဆိုနေကြပါတယ်။
ကုလသမဂ္ဂ အပါအ၀င် နိုင်ငံတကာ သဘောထားမှာတော့ အတိုက်အခံတွေနဲ့ နည်းနည်းလေး ကွဲပါတယ်။ ၂၀၀၈ ဖွဲ့စည်းပုံကိစ္စကို အလေးပေး ပြောဆိုတာ မဟုတ်ဘဲ အခု ဒီရွေးကောက်ပွဲကို အများက လက်ခံယုံကြည်လာအောင် လုပ်ဖို့၊ အထူးသဖြင့်ဆိုရင် NLD အပါအ၀င် အတိုက်အခံ အင်အားစုတွေ ဒီရွေးကောက်ပွဲမှာ ပါဝင်လာနိုင်အောင် လုပ်ပေးဖို့ တောင်းဆိုနေပါတယ်။ ဒါကြောင့်လည်း စစ်အစိုးရ အနေနဲ့ ဒေါ်အောင်ဆန်းစုကြည်နဲ့ နိုင်ငံရေး အကျဉ်းသားတွေကို လွှတ်ပေးဖို့ဟာ အရေးကြီးဆုံး လုပ်ရမယ့်အချက် ဖြစ်တယ်လို့ ကုလသမဂ္ဂ အတွင်းရေးမှူးချုပ် မစ္စတာ ဘန်ကီမွန်းက မနေ့က သတင်းစာရှင်းလင်းပွဲမှာ ပြောသွားခဲ့ပါတယ်။


ကုလသမဂ္ဂ အတွင်းရေးမှူးချုပ်
မစ္စတာ ဘန်ကီမွန်း။
ဇန်န၀ါရီ ၃၁၊ ၂၀၁၀။
“အရေးကြီးဆုံးကတော့ ဒေါ်အောင်ဆန်းစုကြည် အပါအ၀င် နိုင်ငံရေး အကျဉ်းသားတွေ အားလုံး ဖြစ်နိုင်သမျှ မြန်မြန်ပြန်လွတ်လာပြီး သူတို့အားလုံး ဒီရွေးကောက်ပွဲမှာ ပါဝင်နိုင်ဖို့ လိုပါတယ်။ ဒီရွေးကောက်ပွဲဟာ အများပါဝင်နိုင်ပြီး အများက လက်ခံယုံကြည်နိုင်ဖို့ လိုပါတယ်။ ကျနော် ထပ်ပြီးတော့ အလေးအနက် ပြောချင်ပါတယ်၊ ဒေါ်အောင်ဆန်းစုကြည်နဲ့ အဓိကကျတဲ့ နိုင်ငံရေး အကျဉ်းသားတွေ ပါဝင်နိုင်ခွင့် မရှိဘဲနဲ့တော့ ဒီရွေးကောက်ပွဲဟာ အားလုံးပါဝင်နိုင်တယ်လို့ ယူဆစရာ မရှိပါဘူး။”
ဒါကြောင့် ရွေးကောက်ပွဲနဲ့ ပတ်သက်လို့ စိုးရိမ်ချက်တွေကို ကုလသမဂ္ဂ အတွင်းရေးမှူးချုပ် ဘန်ကီမွန်းက မြန်မာစစ်ခေါင်းဆောင် ဗိုလ်ချုပ်မှူးကြီးသန်းရွှေထံကို စာရေးသား ပေးပို့ခဲ့တယ်လို့ ဆိုပါတယ်။ မြန်မာနိုင်ငံ နိုင်ငံရေး တိုးတက်မှုတွေကိုလည်း အနီးကပ် စောင့်ကြည့်နေတယ်လို့ မစ္စတာ ဘန်ကီမွန်းက ပြောခဲ့ပါတယ်။
“မြန်မာနိုင်ငံ အခြေအနေကို အနီးကပ် အသေအချာ စောင့်ကြည့်နေပါတယ်။ လွန်ခဲ့တဲ့ ၁၀ ရက်တုန်းက ဗိုလ်ချုပ်မှူးကြီးသန်းရွှေထံကို ကျနော် စာတစောင် ပို့ခဲ့ပါတယ်။ ကျနော့် စိုးရိမ်မှုတွေထဲက ပထမဆုံး ပြောရရင်တော့ ဘာမှ တိုးတက်မှု မတွေ့ရတာပါ။ အခုနှစ်အတွင်း ကျင်းပဖို့ရှိတဲ့ ရွေးကောက်ပွဲကို အများက ယုံကြည်လက်ခံလာဖို့၊ အဓိကကျသူ အားလုံး ပါဝင်နိုင်ဖို့၊ ထင်သာမြင်သာ ပွင့်လင်းမှုတွေရှိဖို့၊ ဒါတွေဟာ အလွန်တရာ အရေးကြီးတယ်ဆိုတာ ဖော်ပြထားပါတယ်။
“ဒီအတွက် ဆောင်ရွက် လုပ်ကိုင်စရာတွေ ရှိပါတယ်။ မြန်မာအစိုးရက ရွေးကောက်ပွဲ ဥပဒေ ပြဋ္ဌာန်းလိုက်ပြီဆိုတဲ့ ကြေညာချက် သတင်းကိုလည်း ကြားရပါတယ်။ ဒီအချက်ကို ဖြစ်နိုင်သမျှ မြန်မြန်ဆောင်ရွက်ဖို့ မြန်မာအာဏာပိုင်တွေကို ကျနော် တိုက်တွန်းနေတာပါ။”
ဒေါ်အောင်ဆန်းစုကြည်အပေါ် အမိန့်ချထားတဲ့ အယူခံ ပြင်ဆင်ချက်ကိုတော့ တရားရုံးချုပ်ကနေ မကြာခင်က ပယ်ချခဲ့ပြီးပါပြီ။ ဒီအတိုင်း ဒေါ်အောင်ဆန်းစုကြည်ကို သူ့သက်တမ်းပြည့် ချုပ်ထားဦးမယ်ဆိုရင် လာမယ့် နိုဝင်ဘာ၊ ကြားရတဲ့ သတင်းတွေအရဆိုရင် ရွေးကောက်ပွဲပြီးမှ ဒေါ်အောင်ဆန်းစုကြည် လွတ်မယ်ဆိုတဲ့ သဘော ဖြစ်နေပါတယ်။ ကျင်းပနေတဲ့ ဂျနီဗာ လူ့အခွင့်အရေး ကောင်စီမှာလည်း ဒေါ်အောင်ဆန်းစုကြည်ဟာ တရားမဲ့ ဖမ်းဆီးခံထားရတဲ့ အခြေအနေမှာ ရှိတယ်လို့ ဆုံးဖြတ်ပြီး ဒေါ်အောင်ဆန်းစုကြည်ကို လွှတ်ပေးဖို့ ကုလသမဂ္ဂရဲ့ မတရား ဖမ်းဆီးထိန်းသိမ်းခံရမှု ဆိုင်ရာ အလုပ်အဖွဲ့ ဥက္ကဋ္ဌ မစ္စတာ အယ်လ် ဟတ်ဒ်ဂျီ မာလစ်ခ် ဆိုး (Mr. El Hadji Malick Sow) က ပြောသွားပါတယ်။
“ဒေါ်အောင်ဆန်းစုကြည် ဖမ်းဆီးခံထားရတဲ့ ကိစ္စနဲ့ ပတ်သက်လို့ ဒါဟာ မတရား ဖမ်းဆီးထိန်းသိမ်းခံရတာ ဖြစ်တယ်လို့ အမြင်သဘောထားတရပ် အလုပ်အဖွဲ့အနေနဲ့ ဆုံးဖြတ်ခဲ့ပါတယ်။ ဒါကြောင့်လည်း ဒေါ်အောင်ဆန်းစုကြည်ကို ခြွင်းချက်မရှိ အမြန်ဆုံး ပြန်လွှတ်ပေးဖို့ တောင်းဆိုပါတယ်။ အခုလို သူမရဲ့ လွတ်လပ်ခွင့်ကို တားဆီးချုပ်နှောင်ထားတာဟာ ကျနော်တို့ သတ်မှတ်ထားတဲ့ မတရား ချုပ်နှောင်မှုဆိုင်ရာ အချက် ၃ ချက်စလုံးနဲ့ ကိုက်ညီနေပါတယ်။”
မြန်မာနိုင်ငံနဲ့ ပတ်သက်လို့တော့ အရင် မစ္စတာ ဂမ်ဘာရီနေရာ ကုလသမဂ္ဂ အတွင်းရေးမှူးချုပ်ရဲ့ အထူးကိုယ်စားလှယ်သစ် အစားထိုးဖို့ကိုတော့ အတွင်းရေးမှူးချုပ် အနေနဲ့ အကောင်းဆုံးလူ ရှာနေတုန်းပဲလို့ ဆိုပါတယ်။ ဒါပေမဲ့ လက်ရှိ မြန်မာအရေးနဲ့ ပတ်သက်လို့ အဆက်အသွယ်လည်းရှိ၊ အတွေ့အကြုံ ဗဟုသုတလည်း ရှိတဲ့ ကုလ အတွင်းရေးမှူးချုပ်ရုံး အကြီးအကဲ မစ္စတာ နမ်ဘီယာ (Mr Nambiar) က ယာယီ တာဝန်ယူထားတယ်လို့ သိရပါတယ်။
မစ္စတာ ဘန်ကီမွန်း အနေနဲ့ကတော့ မြန်မာနိုင်ငံ အခြေအနေနဲ့ ပတ်သက်လို့ အခု မတ်လအကုန် မတိုင်ခင်မှာ အတွင်းရေးမှူးချုပ်ရဲ့ မြန်မာ့မိတ်ဆွေ နိုင်ငံများအဖွဲ့ အစည်းအဝေးကို ခေါ်ယူဖို့ ရှိတယ်လို့ သိရပါတယ်။
မန်မာရွေးကောက်ပွဲဥပဒေ အမေရိကန် သံသယရှိ

10 March 2010
မြန်မာစစ်အစိုးရ ထုတ်ပြန်လိုက်တဲ့ ရွေးကောက်ပွဲ ဥပဒေဟာ မြန်မာ့နိုင်ငံရေးမှာ အဓိကကျတဲ့ အင်အားစုတွေနဲ့ တိုင်ပင်ညှိနှိုင်းမှုမရှိဘဲ တဘက်သတ် ထုတ်ပြန်တာကြောင့် လာမယ့် ရွေးကောက်ပွဲအပေါ် ယုံကြည်လက်ခံနိုင်ဖို့ ခက်ခဲမယ်လို့ အမေရိကန်ပြည်ထောင်စုက ပြောပါတယ်။ မြန်မာအစိုးရဟာ တဘက်မှာတော့ နိုင်ငံတကာက လိုလား တောင်းဆိုနေတဲ့ မြန်မာ့ဒီမိုကရေစီရေး ခေါင်းဆောင် ဒေါ်အောင်ဆန်းစုကြည် အပါအ၀င် နိုင်ငံရေး အကျဉ်းသားတွေကို လွှတ်ဖို့ လျစ်လျူပြုနေဆဲ ဖြစ်ပါတယ်။
အမေရိကန် နိုင်ငံခြားရေး ၀န်ကြီးဌာန ပြောခွင့်ရသူ ပီ.ဂျေ ခရော်လီ (P.J Crowley) ကတော့ အခုလို နိုင်ငံရေး အင်အားစုတွေ၊ တိုင်းရင်းသား အင်အားစုတွေကို မဆွေးနွေးဘဲ ရွေးကောက်ပွဲ ဥပဒေ ပြဋ္ဌာန်းတဲ့အပေါ်မှာ စိုးရိမ်မိတယ်လို့ ပြောသွားပါတယ်။


အမေရိကန် နိုင်ငံခြားရေးဝန်ကြီးဌာန
ပြောခွင့်ရသူ ပီ.ဂျေ ခရော်လီ။
“ဒီမိုကရေစီ လိုလားတဲ့ အတိုက်အခံ အင်အားစုတွေ၊ တိုင်းရင်းသား ခေါင်းဆောင်တွေနဲ့ အခြေအမြစ်ရှိရှိ တွေ့ဆုံဆွေးနွေးတာမျိုး အရင်မလုပ်ဘဲနဲ့ မြန်မာအာဏာပိုင်တွေဘက်က တဘက်သတ် အခုလို ရွေးကောက်ပွဲဥပဒေ ထုတ်ပြန်လိုက်တဲ့ အပေါ်မှာ ကျနော်တို့ စိုးရိမ်ပူပန်မိပါတယ်။”
ဒါကြောင့်လည်းပဲ ရွေးကောက်ပွဲကို အများက လက်ခံယုံကြည်မှု ရှိဖို့ဆိုရင် နိုင်ငံရေးအရ တွေ့ဆုံဆွေးနွေးမှုတွေ လုပ်ဖို့ကိုလည်း အမေရိကန်ပြည်ထောင်စုက မြန်မာစစ်အစိုးရကို ထပ်မံတောင်းဆိုလိုက်ပါတယ်။
“အခုနှစ် ကျင်းပမယ့် ရွေးကောက်ပွဲဟာ အများက လက်ခံယုံကြည်နိုင်လောက်တဲ့ ရွေးကောက်ပွဲ ဖြစ်ပါ့မလားဆိုတာ အမေရိကန်ပြည်ထောင်စု အနေနဲ့ သံသယ ရှိနေတုန်းပါ။ ဒါကြောင့် အများက လက်ခံယုံကြည်လောက်တဲ့ ရွေးကောက်ပွဲ ဖြစ်လာဖို့ဆိုရင် နိုင်ငံရေးမှာ အဓိကကျသူ အားလုံးနဲ့ စစ်မှန်တဲ့ နိုင်ငံရေး တွေ့ဆုံဆွေးနွေးမှုတွေ လုပ်ဖို့ မြန်မာအာဏာပိုင်တွေကို တိုက်တွန်းပါတယ်။”
အမေရိကန် နိုင်ငံခြားရေးဌာန ပြောခွင့်ရသူ ပီ.ဂျေ ခရော်လီ ပြောသွားတာ ဖြစ်ပါတယ်။
အတိုက်အခံ ဒီမိုကရေစီ လိုလားသူတွေကတော့ အခု ရွေးကောက်ပွဲ ဥပဒေအရ ဆိုရင်တော့ ဖမ်းဆီးခံထားရသူတွေဟာ နိုင်ငံရေးပါတီကို ဦးဆောင်ဖွဲ့စည်းခွင့် မရှိပါဘူး။ ဒါဟာ လူတိုင်း လူတိုင်း နိုင်ငံရေး လုပ်ဆောင်ခွင့်ကို ကန့်သတ်ထားတဲ့ သဘောလည်း သက်ရောက်နေပါတယ်။
မြန်မာနိုင်ငံမှာ အခုလို အရေးပါသူအားလုံး၊ အထူးသဖြင့် ဒေါ်အောင်ဆန်းစုကြည် ပါဝင်ခွင့်မရဘူး ဆိုရင်တော့ ဒီရွေးကောက်ပွဲကို အများက ယုံကြည်လက်ခံနိုင်ဖွယ် မရှိဘူးလို့လည်း တနေ့က ကုလသမဂ္ဂ အတွင်းရေးမှူးချုပ် ဘန်ကီမွန်း (Ban Ki-moon) က သတိပေးခဲ့ပါတယ်။
ရွေးကောက်ပွဲ ဥပဒေ နိုင်ငံတကာ ဝေဖန်

11 March 2010
စစ်အစိုးရက ထုတ်ပြန်လိုက်တဲ့ နိုင်ငံရေးပါတီများ မှတ်ပုံတင်ခြင်း ဥပဒေအရဆိုရင် လာမယ့် ရွေးကောက်ပွဲမှာ ဒေါ်အောင်ဆန်းစုကြည် ပါဝင်ခွင့်ကို ပိတ်ပင်ထားတာမို့ မြန်မာစစ်အစိုးရ အပေါ်မှာ နိုင်ငံတကာက ပြစ်တင် ဝေဖန်လာကြပါတယ်။
ဒီဥပဒေအရ ဖမ်းဆီးခံထားရတဲ့ နိုင်ငံရေး အကျဉ်းသား ၂,၀၀၀ ကျော်ကို ရွေးကောက်ပွဲမှာ ပါဝင်ခွင့် ပိတ်ပင်ထားတဲ့အတွက် ဒီဥပဒေကို အမေရိကန် ပြည်ထောင်စုက ပြစ်တင် ဝေဖန်ပါတယ်။ ဒီဥပဒေဟာ ဒီမိုကရေစီရေး လုပ်ငန်းစဉ်နဲ့ လွဲချော်နေတယ်လို့ အမေရိကန် နိုင်ငံခြားရေးဌာန ပြောခွင့်ရသူ ပီ.ဂျေ ခရော်လီ (P.J Crowley) က ပြောဆိုလိုက်ပြီး လာမယ့် ရွေးကောက်ပွဲ အပေါ်မှာ အများက လက်ခံယုံကြည်နိုင်မှာ မဟုတ်ဘူးလို့လည်း ဆိုပါတယ်။
အခု ဒီဥပဒေဟာ နိုင်ငံရေး အင်အားစုတွေနဲ့ တိုင်ပင်ဆွေးနွေးခြင်း မရှိဘဲနဲ့ တဖက်သတ် ထုတ်ပြန်တာမို့ ၀မ်းနည်းစရာပါပဲလို့ ဗြိတိန်နိုင်ငံကလည်း ပြောပါတယ်။
ကုလသမဂ္ဂ အတွင်းရေးမှူးချုပ် ဘန်ကီမွန်း (Ban Ki-moon) ကတော့ ကုလသမဂ္ဂ အနေနဲ့ ဒီဥပဒေကို လေ့လာနေတုန်းပဲလို့ ဆိုပါတယ်။ ဒါပေမဲ့လည်း ရထားတဲ့ အချက်အလက်အရ ဆိုရင်တော့ အားလုံးပါဝင်နိုင်တဲ့ နိုင်ငံရေး လုပ်ငန်းစဉ်တရပ်လို့ မျှော်လင့်လို့ မရနိုင်ဘူးလို့ ကြေညာချက် ထုတ်ခဲ့ပါတယ်။
ဒါ့အပြင် ဒေါ်အောင်ဆန်းစုကြည် အပါအ၀င် မြန်မာနိုင်ငံသား အားလုံး ဒီရွေးကောက်ပွဲမှာ လွတ်လွတ်လပ်လပ်နဲ့ ပါဝင်ခွင့် ပေးခြင်းအားဖြင့် လွတ်လပ်မျှတပြီး အများက ယုံကြည်လက်ခံနိုင်တဲ့ ရွေးကောက်ပွဲတခု ဖြစ်လာအောင်လုပ်ဖို့ အတွင်းရေးမှူးချုပ်က မြန်မာအာဏာပိုင်တွေကို ထပ်မံ တိုက်တွန်းပါတယ်။
အမေရိကန် အထက်လွှတ်တော်အမတ် မစ်ခ်ျ မက်ကောနဲလ် (Mitch McConnell) ကတော့ အခုလို ဒေါ်အောင်ဆန်းစုကြည်နဲ့ နိုင်ငံရေး အကျဉ်းသားတွေ ရွေးကောက်ပွဲမှာ ပါဝင်ခွင့် မပေးဘူးဆိုတာ ဒီစစ်အစိုးရ အနေနဲ့ အာဏာဆက်ကိုင်ထားဦးမယ် ဆိုတာ ရှင်းရှင်းလင်းလင်း ပြသလိုက်တာဖြစ်တယ်လို့ ပြောဆိုခဲ့ပါတယ်။
မြန်မာစစ်ရာဇ၀တ်မှု စုံစမ်းရေး ကင်တားနား တောင်းဆို

12 March 2010
မြန်မာစစ်အစိုးရ ကျူးလွန်ခဲ့တဲ့ စစ်ရာဇဝတ်မှုတွေကို စုံစမ်းဖော်ထုတ်ပေးဖို့ ကုလသမဂ္ဂ ထိပ်တန်း တာဝန်ရှိသူ တယောက်က တောင်းဆိုလိုက်ပါတယ်။ မြန်မာနိုင်ငံမှာ အခြေခံ လွတ်လပ်မှုတွေကို စနစ်တကျ တိုးပြီး ချိုးဖောက်နေတဲ့ ပုံစံကို တွေ့မြင်နေရတယ်လို့ မြန်မာနိုင်ငံ လူ့အခွင့်အရေးဆိုင်ရာ ကုလသမဂ္ဂ အထူးကိုယ်စားလှယ် တောမတ်စ် အိုဟေး ကင်တားနား (Tomas Ojea Quintana) က ပြောလိုက်တာ ဖြစ်ပါတယ်။
စစ်အစိုးရ အာဏာပိုင်တွေ၊ စစ်တပ် အရာရှိတွေ၊ ဥပဒေရေးရာ တာဝန်ရှိသူတွေရဲ့ မူတွေက လူ့အခွင့်အရေး ချိုးဖောက်မှုတွေကို ဖြစ်စေတာလို့ ကုလသမဂ္ဂ လူ့အခွင့်အရေး ကောင်စီကို တင်ပြတဲ့ အစီရင်ခံစာထဲမှာ မစ္စတာ ကင်တားနားက ရေးသား ဖော်ပြထားပါတယ်။
သူ စဉ်ဆက်မပြတ် ရရှိတဲ့ မှတ်တမ်းတွေအရ တချို့ ကျူးလွန်ချိုးဖောက်မှုတွေဟာ လူသားမျိုးနွယ်တို့အပေါ် ကျူးလွန်တဲ့ ရာဇဝတ်မှု၊ စစ်ရာဇဝတ်မှု မြောက်တယ်လို့ အပြည်ပြည်ဆိုင်ရာ ရာဇဝတ်တရားရုံးက သတ်မှတ်ကောင်း သတ်မှတ်နိုင်တယ်လို့ မစ္စတာ ကင်တားနားက ပြောပါတယ်။
သူသိရတဲ့ မှတ်တမ်းတွေထဲမှာ ကလေးစစ်သားအဖြစ် စုဆောင်းတာအပြင် အခြေခံ အခွင့်အရေးတွေဖြစ်တဲ့ စားရေရိက္ခာ ရရှိမှု၊ နေမှုထိုင်မှု၊ ကျန်းမာရေး စောင့်ရှောက်မှုနဲ့ ပညာသင်ကြားနိုင်တဲ့ အခွင့်အလမ်းတွေကို အာဏာပိုင်တွေက ပိတ်ပင်ပြီး လူ့အခွင့်အရေး ချိုးဖောက်နေတာလို့ ဆိုပါတယ်။
ရခိုင်ပြည်နယ်ထဲက လူနည်းစု မွတ်ဆလင်တွေအပေါ် စစ်အစိုးရက ဖိနှိပ်ဆက်ဆံနေတဲ့ အပေါ်မှာလည်း စိုးရိမ်တယ်လို့ မြန်မာနိုင်ငံ လူ့အခွင့်အရေးဆိုင်ရာ ကုလသမဂ္ဂ အထူးကိုယ်စားလှယ် တောမတ်စ် အိုဟေး ကင်တားနားက ကုလသမဂ္ဂ လူ့အခွင့်အရေး ကောင်စီကို တင်ပြခဲ့ပါတယ်။
မြန်မာစစ်အစိုးရကို အရေးယူပိတ်ဆို့မှု ဆက်လုပ်ဖို့လို

12 March 2010
မြန်မာစစ်အစိုးရ ဒီနှစ်အတွင်းကျင်းပဖို့ စီစဉ်နေတဲ့ ရွေးကောက်ပွဲမှာ မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည်ကို ပါဝင်ခွင့်မပြုတဲ့အတွက် စစ်အစိုးရအပေါ်ထားတဲ့ အမေရိကန်ရဲ့ ထိတွေ့ဆက်ဆံရေး မူဝါဒဟာ အောင်မြင်မှု မရှိဘူးလို့ အမေရိကန် အဆင့်မြင့် အရာရှိတဦးက ပြောဆိုလိုက်ပါတယ်။ အပြည့်အစုံကို ကိုဇော်ဝင်းလှိုင်က တင်ပြထားပါတယ်။
အခုသီတင်းပတ်အတွင်း စစ်အစိုးရက ပါတီစုံ ဒီမိုကရေစီရွေးကောက်ပွဲဆိုင်ရာ ဥပဒေတွေ ထုတ်ပြန်ကြေညာ လိုက်တဲ့အထဲမှာ ဒေါ်အောင်ဆန်းစုကြည်ကို ၀င်ရောက် ယှဉ်ပြိုင်ခွင့်မပြုတဲ့အပြင် သူမရဲ့ အမျိုးသားဒီမိုကရေစီ အဖွဲ့ချုပ်ကိုလည်း အားနည်းသွားစေတယ်လို့ ဝေဖန် ပြောဆိုနေကြတာပါ။
စစ်အစိုးရက အခုကျင်းပမယ့် ရွေးကောက်ပွဲအတွက် ကန့်သတ်ချုပ်ချယ်တဲ့ ဥပဒေတွေ ထုတ်ပြန်လိုက်တာဟာ ဒီမိုကရေစီအရေး ဖော်ဆောင်မှုအတွက် အထောက်အကူ မပြုဘူးလို့ အရှေ့အာရှရေးရာ လက်ထောက် နိုင်ငံခြားရေးဝန်ကြီး ကာ့ ကမ်ဘဲလ် (Kurt Campbell) က ဘန်ကောက်မြို့မှာ သတင်းထောက်တွေကို ဒီကနေ့ ပြောကြားခဲ့ပါတယ်။
"ကျနော်တို့ အတော်ကို စိတ်ပျက်မိသလို စိုးရိမ်မှုလည်း ဖြစ်ရပါတယ်။ ဒါဟာ အင်မတန်မှ နောင်တရစေတဲ့ လုပ်ရပ်ပါ။ ဒီကိစ္စနဲ့ပတ်သက်ပြီး မနေ့က နိုင်ငံခြားရေးဝန်ကြီးဌာနက ထုတ်ပြန်တဲ့ ကြေညာချက်မှာလည်း ခင်ဗျားတို့ တွေ့ပြီးလောက်ပါပြီ။ ရှေ့ကို ဘာဆက်လုပ်သင့်တယ် ဆိုတာ ဒေသတွင်းမှာရှိနေတဲ့ ကျနော်တို့ရဲ့ မဟာမိတ်နိုင်ငံတွေနဲ့ တိုင်ပင်သွားမယ်ဆိုတာကတော့ သေချာပါတယ်၊ ဒါပေမဲ့ ဒါဟာ ကျနော် မျှော်လင့်ထားတဲ့အတိုင်း မဟုတ်သလို ဆုတ်ယုတ်မှုတခုသာ ဖြစ်ပါတယ်။"
မြန်မာနိုင်ငံအတွင်း တိုးတက်မှုတစုံတရာ မတွေ့ရတဲ့အပြင် အခုလို ဆုတ်ယုတ်မှုတွေ ဖြစ်ပေါ်နေတဲ့အတွက် လက်ရှိ ပိတ်ဆို့အရေးယူမှုတွေကို ဆက်ထားသင့်တယ်လို့ ကာ့ ကမ်ဘဲလ် က ပြောပါတယ်။
"အမေရိကန်အစိုးရအနေနဲ့ မြန်မာစစ်အစိုးရအပေါ်ထားတဲ့ မူဝါဒကို ပြန်လည် သုံးသပ်နေတယ် ဆိုတဲ့အချက်ကို ထပ်လောင်း ပြောကြားလိုပါတယ်။ လက်ရှိဖြစ်ပေါ်နေတဲ့ အခြေအနေတွေအရ စစ်အစိုးရအပေါ် ပိတ်ဆို့အရေးယူမှုတွေ ဆက်လက် ချဖို့ လိုပါလိမ့်မယ်။"
လက်ထောက်နိုင်ငံခြားရေးဝန်ကြီး ကာ့ ကမ်ဘဲလ် ဟာ လောလောဆယ် အာရှ ၁၀ နိုင်ငံကို ခရီးလှည့်နေတာဖြစ်ပါတယ်။
သမ္မတ ဘရက်ခ် အိုဘားမားအစိုးရ တက်လာပြီးနောက်ပိုင်း မြန်မာနိုင်ငံမှာ ပြောင်းလဲမှုတစုံတရာ ဖြစ်လိုဖြစ်ညားဆိုတဲ့ မျှော်လင့်ချက်နဲ့ စစ်အစိုးရကို လုံးဝ ပစ်ပယ်ထားတဲ့ပေါ်လစီကို ပြောင်းပြီး အကန့်အသတ်နဲ့ ထိတွေ့ဆက်ဆံရေး မူဝါဒကို ချမှတ်ကျင့်သုံးခဲ့ပါတယ်။ ဒါပေမဲ့ မြန်မာနိုင်ငံအတွင်းမှာ သိသာထင်ရှားတဲ့ ပြောင်းလဲမှု တစုံတရာ မတွေ့ရမချင်း ဒီပိတ်ဆို့ အရေးယူမှုတွေကို ရုတ်သိမ်းပေးမှာမဟုတ်ဘူးလို့ အိုဘားမား အစိုးရက ပြောပါတယ်။ အထူးသဖြင့်တော့ ဒေါ်အောင်ဆန်းစုကြည်ကို နေအိမ်အကျယ်ချုပ်က လွတ်ပေးပြီး ရွေးကောက်ပွဲမှာ ပါဝင်ခွင့်ပြုဖို့ အမေရိကန်နဲ့ နိုင်ငံတကာ အသိုင်းဝိုင်းက လိုလားနေကြတာပါ။
အခုထုတ်ပြန်လိုက်တဲ့ ရွေးကောက်ပွဲဆိုင်ရာ ဥပဒေတွေဟာ အဲန်အယ်လ်ဒီ ကိုရော၊ မြန်မာပြည်သူ အားလုံးအတွက်ပါ စိန်ခေါ်မှုတရပ် ဖြစ်ပြီးတော့ ဒီစိန်ခေါ်မှုကို ပြည်သူတွေအားလုံးက ညီညီညွတ်ညွတ်နဲ့ ရင်ဆိုင်ကြဖို့၊ စိတ်ဓါတ် ခွန်အားရှိကြဖို့ လိုအပ်တယ်လို့ မနေ့ကပဲ သူနဲ့ တွေ့ဆုံခွင့်ရခဲ့တဲ့ အကျိုးဆောင်ရှေ့နေကြီး ဦးဉာဏ်ဝင်းကတဆင့် ဒေါ်အောင်ဆန်းစုကြည်က ပြောလိုက်ပါတယ်။
ရွေးကောက်ပွဲဝင်လိုတဲ့ ပါတီတွေအနေနဲ့ လာမယ့် တနင်္လာနေ့ကစပြီး ရက် ၆၀ အတွင်း မှတ်ပုံတင်ကြရမှာ ဖြစ်ပါတယ်။ စစ်အစိုးရက အခုရက်ပိုင်းအတွင်း အဲန်အယ်လ်ဒီ ပါတီရုံးတချို့ကို ပြန်ဖွင့်ခွင့်ပေးခဲ့ပါတယ်။ ဒါပေမဲ့ ခေါင်းဆောင်ဖြစ်သူ ဒေါ်အောင်ဆန်းစုကြည်နဲ့ လွှတ်တော်အမတ် ၁၂ ယောက်အပါအ၀င် ပါတီဝင် ၄၀၀ ကျော်ကို ဖမ်းဆီး ထိန်းသိမ်းထားဆဲ ဖြစ်တယ်လို့ အမေရိကန် အခြေစိုက် လူ့အခွင့်အရေး လေ့လာစောင့်ကြည့်ရေးအဖွဲ့က ပြောပါတယ်။
အဲန်အယ်လ်ဒီ ပါတီကတော့ ခုချိန်ထိ ရွေးကောက်ပွဲကို ၀င်မယ်မ၀င်ဘူးဆိုတာ မဆုံးဖြတ်ရသေးပါဘူး။
ရွေးကောက်ပွဲ အတုအယောင်အဖြစ် အာဆီယံအဖွဲ့ဝင်တွေ ဝေဖန်

12 March 2010
မြန်မာစစ်အစိုးရ ဒီနှစ်ထဲကျင်းပဖို့ ပြင်ဆင်နေတဲ့ရွေးကောက်ပွဲအတွက် ထုတ်ပြန်လိုက်တဲ့ ဥပဒေဟာ မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည် အပါအ၀င် တခြားခေါင်းဆောင်တွေကိုပါ ပါဝင်ခွင့်မရအောင် ပြဌာန်းလိုက်တာမို့ ၀မ်းနည်းစရာကောင်းတယ်လို့ အာဆီယံအဖွဲ့ဝင် အင်ဒိုနီးရှား နိုင်ငံက ပြောဆိုလိုက်သလို ဒီဥပဒေကို ပြန်ပြီးပြင်ဆင်ပေးဖို့ ဖိလစ်ပိုင်နိုင်ငံကလည်း တောင်းဆိုလိုက်ပါတယ်။ အခုလို မြန်မာနိုင်ငံရဲ့ ရွေးကောက်ပွဲနဲ့ပတ်သက်ပြီး အာဆီယံနိုင်ငံတွေက ဘာပြောဆိုသလဲဆိုတာ အပြည့်အစုံကို ဆက်သွယ်မေးမြန်းထားတဲ့ ဒေါ်ခင်မျိုးသက် က တင်ပြထားပါတယ်။
မြန်မာစစ်အစိုးရ ထုတ်ပြန်လိုက်တဲ့ ရွေးကောက်ပွဲဥပဒေတွေကနေ ၁၉၉၀ ခုနှစ် ရွေးကောက်ပွဲမှာ အဲန်အယ်လ်ဒီ အမျိုးသားဒီမိုကရေစီအဖွဲ့ချုပ်ရဲ့ တခဲနက် အနိုင်ရမှုကို ပယ်ဖျက်လိုက်သလို မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည် ပါဝင်ခွင့်မရအောင် တားဆီးထားတာမို့ ဒီဥပဒေအတိုင်း ကျင်းပမယ့် ရွေးကောက်ပွဲဟာ အတုအယောင် ဖြစ်နေတယ်လို့ ဖိလစ်ပိုင် နိုင်ငံခြားရေးဝန်ကြီး အယ်လ်ဘာတို ရိုမူလို (Alberto Romulo) က ပြောပါတယ်။
နိုင်ငံတကာ လွှတ်တော်အမတ်များ သမဂ္ဂ (IPU) က ဖိလစ်ပိုင် အထက်လွှတ်တော်အမတ် အကွီလီနို နီနီပီမဲန်ဒဲလ် (Aquilino 'NENE' Pimentel) က ဖိလစ်ပိုင် နိုင်ငံခြားရေးဝန်ကြီးရဲ့ ပြောကြားချက်တွေကို အခုလို ပြောပါတယ်။
"မြန်မာနိုင်ငံက ရွေးကောက်ပွဲဟာ ဒေါ်အောင်ဆန်းစုကြည် ပါဝင်ခွင့်မရတာမို့ အလိမ်အညာသာ ဖြစ်တယ်လို့ ဖိလစ်ပိုင်နိုင်ငံခြားရေးဝန်ကြီး အယ်လ်ဘာတို ရိုမိူလို က ပြောလိုက်သလို ဒါဟာ ကျနော်တို့ အတိုက်အခံ အင်အားစုတွေရဲ့ ရပ်တည်ချက်လည်း ဖြစ်ပါတယ်။ မြန်မာနိုင်ငံမှာ စစ်အစိုးရက ဒီနှစ်ထဲကျင်းပပေးမယ်ဆိုတဲ့ ရွေးကောက်ပွဲဟာ အတုအယောင်ပါလို့ ပြောဆိုတဲ့နေရာမှာတော့ အစိုးရရော အတိုက်အခံပါ တသားတည်း ရှိကြပါတယ်။"
မြန်မာအာဏာပိုင်တွေရဲ့ ရွေးကောက်ပွဲဆိုင်ရာ ဥပဒေ ထုတ်ပြန်တာကို ဖိလစ်ပိုင်အစိုးရက အခုလို ရှုတ်ချလိုက်ပြီး ရွေးကောက်ပွဲမှာ အဖွဲ့အစည်းအားလုံး ပါဝင်ခွင့်ရအောင် ပြန်ပြီး ပြင်ဆင်ပေးဖို့ကိုလည်း တောင်းဆိုလိုက်ပါတယ်။
"မြန်မာအစိုးရအနေနဲ့ အားလုံးကို ပါဝင်ခွင့်ပေးသင့်ပါတယ်။ တိုင်းပြည်မှာ သက်ဆိုင်သူတွေအားလုံး ပါဝင်ရမယ်ဆိုတဲ့ အဓိပ္ပါယ်ပါ။ ဒါပေမဲ့ ပထမဆုံးအနေနဲ့ လုပ်သင့်တာကတော့ အခြေခံဥပဒေကို ပြန်လည် မူကြမ်းရေးဆွဲဖို့ လိုပါတယ်။ ဒါမှသာ သက်ဆိုင်သူအားလုံး ပါဝင်နိုင်တဲ့ အခြေအနေမျိုး ဖြစ်မှာပါ။ တရားဥပဒေစိုးမိုးရေး အခြေခံတွေနဲ့ ရေးဆွဲထားတဲ့ ဒီအခြေခံဥပဒေမူကြမ်းကိုမှ ဆန္ဒခံယူပွဲတွေကနေတဆင့် အတည်ပြုပေးရမှာပါ။ ဆန္ဒခံယူပွဲဆိုတာကလည်း အရင်တခေါက် လုပ်ခဲ့သလို နားဂစ် မုန်တိုင်း တိုက်ခတ်ပြီး ရက်ပိုင်းအကြာ လူတွေ ဒုက္ခသုက္ခတွေကြားမှာ လုပ်တာမျိုး မဟုတ်ဘဲနဲ့ ဆောင်ရွက်သွားရမှာဖြစ်ပါတယ်။"
မြန်မာနိုင်ငံရဲ့ ၂၀၀၈ ခုနှစ် ဖွဲ့စည်းပုံဥပဒေဟာ မြန်မာလူထုရဲ့ ဆန္ဒနဲ့ တထပ်တည်း မကျဘူးလို့ တခြား အာဆီယံ နိုင်ငံတွေကလည်း လက်ခံကြပါတယ်။ အင်ဒိုနီးရှားနိုင်ငံခြားရေး ၀န်ကြီးဌာန ပြောခွင့်ရ တိကုဖိုင်ဇာယား (Teuku Faizasyah) ကလည်း ဒေါ်အောင်ဆန်းစုကြည်အပါအ၀င် တခြား ခေါင်းဆောင်တွေကို ပါဝင်ခွင့်မပေးတဲ့ ဒီရွေးကောက်ပွဲဥပဒေ ထုတ်ပြန်တဲ့အတွက် ၀မ်းနည်းကြောင်း ပြောကြားလိုက်ပါတယ်။
မလေးရှားလွှတ်တော်အမတ် ထရီဆာ ကော့ ကတော့ မလေးရှားအစိုးရအနေနဲ့ တစုံတရာ တုံ့ပြန်တာမျိုး မတွေ့ရသေးပေမယ့် မလေးရှားနိုင်ငံကလည်း ဒီဥပဒေသစ်တွေနဲ့ ပတ်သက်ပြီး ပြောကြားဖို့ လိုအပ်တယ်လို့ ဆိုပါတယ်။
"မလေးရှားအစိုးရ အနေနဲ့ ဒီကိစ္စနဲ့ပတ်သက်လို့ ထုတ်ပြန်တာတော့ ကျမ မတွေ့သေးပါဘူး။ ဒါပေမဲ့ အင်ဒိုနီးရှား အစိုးရနဲ့ ဖိလစ်ပိုင်အစိုးရတို့က သူတို့ရဲ့ သဘောထားတွေကို တင်ပြကြတာ တွေ့ရလို့ ၀မ်းသာပါတယ်။ ဒါဟာ ကောင်းတဲ့အရိပ် လက္ခဏာလို့ ဆိုရမှာပါ။ မလေးရှားအစိုးရအနေနဲ့ မြန်မာစစ်အစိုးရက ကြေညာတဲ့ရွေးကောက်ပွဲ ဥပဒေသစ်အပေါ် သဘောထားကိုလည်း ကြေညာဖို့ ကျမတို့ တိုက်တွန်းမှာဖြစ်ပါတယ်။"
မြန်မာစစ်အစိုးရအနေနဲ့ ဒီနှစ်ထဲကျင်းပဖို့ ပြင်နေတဲ့ ရွေးကောက်ပွဲဟာ တရားမျှတမှုရှိမယ်လို့ ပြောကြားထားတဲ့အတိုင်း လိုက်နာဖို့တော့ လိုအပ်တယ်လို့ ဆိုပါတယ်။
"ဒီရွေးကောက်ပွဲဥပဒေဟာ အဓိပ္ပါယ်မရှိဘူးလို့ ကျမ ထင်ပါတယ်။ မြန်မာစစ်အစိုးရက တရားမျှတပြီး လွတ်လပ်တဲ့ ရွေးကောက်ပွဲ ကျင်းပပေးမယ်လို့ ကမ္ဘာကို ကြေညာခဲ့ပြီး ဖြစ်ပါတယ်။ နှစ် ၂၀ အကြာမှာ စေတနာအရင်းမှန်နဲ့ ပြုလုပ်ပေးတာ မတွေ့ရဘဲ ဒေါ်အောင်ဆန်းစုကြည် အပါအ၀င် အဲန်အယ်လ်ဒီ နိုင်ငံရေးအကျဉ်းသားတွေ မပါဝင်နိုင်အောင် အခုလို ပိတ်ပင်တာဟာ ရွေးကောက်ပွဲတရပ်လုံးကို စော်ကားရာ ရောက်တယ်လို့ ကျမ ထင်ပါတယ်။"
မလေးရှား လွှတ်တော်အမတ် မစ္စ ထရီဆာ ကော့ က ပြောကြားလိုက်ပါတယ်။
မြန်မာနိုင်ငံ လူ့အခွင့်အရေး အမေရိကန် ဝေဖန်

12 March 2010
အမေရိကန် ပြည်ထောင်စုက ပြုစုထုတ်ပြန်တဲ့ လူ့အခွင့်အရေး အစီရင်ခံစာဟာ အီရန်၊ တရုတ်၊ မြောက်ကိုရီးယားနိုင်ငံတွေရဲ့ အခြေအနေကိုသာ မက နိုင်ငံပေါင်း ၃၀ လောက်က လူ့အခွင့်အရေး အခြေအနေတွေကိုပါ နာမည်တွေနဲ့တကွ ဖော်ထုတ်ပြီး ရေးသား တင်ပြထားတာ ဖြစ်ပါတယ်။ ဒီနိုင်ငံတွေထဲမှာ မြန်မာနိုင်ငံလည်း တခု အပါအ၀င် ဖြစ်ပါတယ်။ အကြောင်းစုံကို ဦးကျော်ဇံသာက တင်ပြပေးထားပါတယ်။
မြန်မာနိုင်ငံ စစ်အစိုးရဟာ ထိတ်လန့် တုန်လှုပ်စရာကောင်းတဲ့ လူ့အခွင့်အရေး ချိုးဖောက်မှုတွေကို ဆက်လက် ကျူးလွန်ခဲ့တယ်၊ တိုင်းရင်းသား ဒေသတွေမှာ စစ်ရေး တိုက်ခိုက်မှုတွေကို အရှိန်အဟုန် တိုးမြှင့်တယ်၊ အထူးသဖြင့် ကရင်နဲ့ ရှမ်းပြည်နယ်တို့မှာ ဖြစ်တယ်၊ သြဂုတ်လတုန်းကဆိုရင် စစ်အစိုးရရဲ့ စစ်သားတွေဟာ ကိုးကန့် အပစ်ရပ်အဖွဲ့ကို တိုက်ခိုက်ခဲ့တယ်၊ အစိုးရက ဒါဟာ မူးယစ်ဆေး ထုတ်လုပ်မှုနဲ့ လက်နက်စက်ရုံတွေကို ပိတ်ပစ်နိုင်ဖို့အတွက် လုပ်ခဲ့ရတာလို့ အကြောင်းပြတယ်၊ အစိုးရ စစ်သားတွေဟာ ရွာပေါင်းများစွာကို ဖျက်ဆီးခဲ့တယ်၊ ဒီတိုက်ခိုက်မှုတွေကြောင့် ရွာသားတွေ သောင်းနဲ့ချီပြီး တရုတ်နိုင်ငံဘက်ကို ထွက်ပြေးခဲ့ကြရတယ်၊ အခုအခါ အဲဒီဒေသကို ဘယ်အခြေခံ ဥပဒေကိုမှ အခြေမခံဘဲ အမိန့်အာဏာ သက်သက်နဲ့ အုပ်ချုပ်ထားပြီး လူတွေကို ဘာအခွင့်အရေးမှ မပေးဘဲ ဖိနှိပ် ချုပ်ချယ်ထားတယ်လို့ ဆိုပြီး ဒီ ကိုးကန့်ဒေသကို အသေးစိတ်လိုလို ဖော်ပြထားတာ တွေ့ရပါတယ်။
ဒါ့အပြင် မြန်မာစစ်အစိုးရဟာ အခြား ဆိုးရွားတဲ့ လူ့အခွင့်အရေး ချိုးဖောက်မှုတွေကိုလည်း ကျူးလွန်ခဲ့တယ်။ တရားရုံးတင် စစ်ဆေးခြင်း မရှိဘဲ လူတွေကို သတ်ဖြတ်တာ၊ ထိန်းသိမ်းခံနေရတုန်း လူတွေ သေဆုံးခဲ့ရတာတွေ၊ လူတွေ ပျောက်ဆုံးသွားရတာတွေ၊ အမျိုးသမီးတွေကို စော်ကားတာတွေ၊ နှိပ်စက် ညှဉ်းပန်းတာတွေ၊ အတင်းအဓမ္မ နေရပ် ရွှေ့ပြောင်းခိုင်းတာ၊ အလုပ်ကြမ်း စေခိုင်းတာ၊ အရွယ်မရောက်သေးတဲ့ ကလေးတွေကို စစ်သားအဖြစ် စုဆောင်းတာ စတာတွေပဲ ဖြစ်တယ်လို့ ဖော်ပြထားပါတယ်။
ဆက်လက်ဖော်ပြတဲ့ အချက်တခုကတော့ နိုင်ငံရေး၊ လူမှုရေး၊ ကယ်ဆယ်ရေး ကိစ္စတွေမှာ ပါဝင်လှုပ်ရှား ဆောင်ရွက်နေကြတဲ့ အရပ်သားတွေကို တရားဥပဒေအရ စွဲချက်မတင်ဘဲ ဖမ်းဆီးချုပ်နှောင် ထားတာတွေလည်း ရှိတယ်လို့ ဖော်ပြထားပါတယ်။
တကယ်တော့ ၂၀၀၉ ခုနှစ်ဟာ အင်တာနက်တို့၊ လက်ကိုင်တယ်လီဖုန်းတို့၊ တခြား နည်းပညာတို့ တိုးတက်လာတဲ့နှစ် ဖြစ်တဲ့အတွက် ကမ္ဘာ့လူသားတွေဟာ လူ့အခွင့်အရေးအကြောင်း ပိုမိုသိရှိ နားလည်ခွင့် ရရှိလာနိုင်တဲ့နှစ် ဖြစ်တယ်လို့လည်း ဆိုထားပါတယ်။
သို့ပေမဲ့လည်း တချိန်တည်းမှာ အစိုးရတွေ ဘက်ကလည်း ဒီနည်းပညာ တိုးတက်မှုနဲ့အတူ ဖြစ်ထွန်းလာတဲ့ လွတ်လွတ်လပ်လပ် ဆက်သွယ် ပြောဆို ဖော်ပြကြတာတွေကို ပိတ်ပင်တားဆီးနိုင်ဖို့ အချိန်နဲ့ ငွေကြေး ပိုမို စိုက်ထုတ် ဆောင်ရွက်လာတယ်လို့လည်း ဖော်ပြထားပါတယ်။
ဒီနေ့ ကမ္ဘာ့အစိုးရတွေ များသောအားဖြင့် ကြုံတွေ့နေရတဲ့ ပြဿနာတခုကတော့ လူ့အခွင့်အရေး၊ နိုင်ငံသား အခြေခံ လွတ်လပ်ခွင့်နဲ့ နိုင်ငံသားတို့ရဲ့ လုံခြုံရေးကို ဘယ်လိုထိန်းချုပ်မလဲဆိုတာ ညှိနှိုင်းဆောင်ရွက်ရတဲ့ ပြဿနာပဲ ဖြစ်တယ်လို့ ဖော်ပြထားပါတယ်။ တချို့နိုင်ငံတွေဟာ အကြမ်းဖက်ဝါဒကို အကြောင်းပြပြီး နိုင်ငံသားတွေရဲ့ လွတ်လပ်ခွင့် ကန့်သတ်တာ၊ ထိန်းသိမ်းခံတွေရဲ့ အခွင့်အရေး ဖြတ်တောက်တာတွေကို လုပ်ဆောင်ခဲ့ကြတယ်လို့ ဖော်ပြထားတာ တွေ့ရပါတယ်။
တချိန်တည်းမှာပဲ အမေရိကန် အစိုးရရဲ့ ကမ္ဘာ့အမျိုးသမီးရေးရာ နယ်လှည့် သံတမန်ကြီး မလန်း ဗာဗီယာ (Melanne Verveer) ကလည်း မနေ့ နေ့လယ်ကလုပ်တဲ့ နိုင်ငံခြားရေး ၀န်ကြီးဌာနက သတင်းစာ ရှင်းလင်းပွဲမှာ မြန်မာစစ်အစိုးရရဲ့ လူ့အခွင့်အရေး ချိုးဖောက်မှုတချို့ကို ထောက်ပြ ဝေဖန်သွားပါတယ်။ ဒေါ်အောင်ဆန်းစုကြည်ကို ကာလတာရှည် ထိန်းသိမ်းထားတာဟာ ဆိုးရွားပြီး ဒီကိစ္စနဲ့ ပတ်သက်လို့ စစ်အစိုးရကို ထပ်ခါတလဲလဲ ပြောဆို မေးမြန်းခဲ့တယ်လို့ ဆိုပါတယ်။
ပြီးခဲ့တဲ့ သီတင်းပတ်က နယူးယောက်ခ်မြို့မှာ နိုဘယ်လ်ဆုရ အမျိုးသမီးတွေ တက်ရောက် ရုံးထိုင်တဲ့ သရုပ်ပြ တရားရုံးတခုကို သူ တက်ရောက်ခဲ့တဲ့အကြောင်း၊ အဲဒီမှာ တိုင်းရင်းသား ဒေသတွေက အထူးသဖြင့် အမျိုးသမီးတွေအပေါ် ကျူးလွန်ခဲ့တဲ့ ပြစ်မှုတွေဟာ အလွန်ပဲ ကြောက်မက်ဖွယ်ကောင်းပြီး များပြားလှတာကို ကြားသိခဲ့ရတယ်လို့ ဆိုပါတယ်။
ဒါတွေဟာ မှတ်တမ်း မှတ်ရာနဲ့တကွ ရှိနေတဲ့ အထောက်အထားတွေ ဖြစ်တယ်လို့လည်း အမေရိကန် အစိုးရရဲ့ ကမ္ဘာ့အမျိုးသမီးရေးရာ နယ်လှည့်သံတမန်ကြီး မလန်း ဗာဗီယာက ပြောကြားသွားပါတယ်။